2023-05-18 22:13:41
من شي اسبوعين رفيقتي عزمتني على حفلة لحتى اتعرف على رفقاتها وكذا، يعني ما بعرف بهالحفلة إلا رفيقتي.
وأنا بالعادة بحب هيك مناسبات، الواحد بيروح وبيتعرف وبيحكي وبيتعلم وهكذا.
من النقاشات اللي استمتعت فيها كتير كانت مع شب اسمه مارتن، بيشتغل بمجال الذكاء الاصطناعي والبرمجة، وأنا كتير بحب أخد واعطي مع عالم من هالمجال.
حكينا لمدة ساعة ونص بتذكر، موضوع ورا موضوع، وبالأخير قبل ما أمشي قلي عنجد انبسطت كتير بالحكي معك خلينا نلتقي مرة تانية، قلتله والله وأنا كمان.
تبادلنا الأرقام وعلى أساس قريباً رح نعمل قعدة.
امبارح بسمع إنه مارتن ما حدا شافه من هداك اليوم، وكانوا عم يدوروا عليه لمدة أسبوع.
بالأخير لاقوه ميت غرقان بأحد البحيرات هون ببرلين.
النظريات بتقول كان ماشي لحاله وزحط وهو ما بيعرف يسبح، وكانت الدنيا ليل وما في حدا.
وأنا اجتني الصدمة هون، إنه أنا بصراحة ما عندي مشكلة مع الموت ولا بخاف منه.
ولكن دائما دائما مننسى نعيش هلأ ومنضل نفكر ببعدين بطريقة غير صحية بالمطلق ونحن بأي لحظة ممكن نموت وكل شي كنا عم نخطط إله يروح!
دائما دائما مننسى كيف نكون مناح مع الناس اللي حوالينا، أو على الأقل "نكون" مع الناس اللي حوالينا، لأنه بأي لحظة ممكن حدا منهن يروح أو نحن نروح، وبعدها الندم بيشتغل ويا ريتني قضيت معه/ا وقت أكتر!
انتبهوا على حالكن وعيشوا اللحظات مع العالم اللي بتحبوها
-يوسف جندية
1.2K viewsAnaam , edited 19:13
ب
