2021-08-18 19:48:24
قصيده ثكيله ليلة العاشر
الوداع الوداع طولي ياهليله
نودع الوالي الليله هذا اخر يوم اله
باجر يصير الصبح ينكتل بارض البله
يروح مني حسين وابقى محيره بطف كربله
اصرخ ودمعتي عالخد من مصابك هامله
الوداع الوداع طولي ياهليله
ـــــــــــــــــــــــــــــــــ
طول ياليل الموادع خلي اودع الوالي
باجر بطف كربله ينذبح وكبالي
روحي مجروحه هليله وحزني بدلالي
ريت باجر لا يجيني وتنذبح يالغالي
الوداع الوداع طولي ياهليله
ــــــــــــــــــــــــــــــــــــــــــ
ودعيته ابو اليمه بدمعتي واهاتي
وهو يمسح دمع عيني واجهر بوناتي
يكلي لو شفتي يخويه كثرت جراحاتي
لمي الاطفال وحريمي وعينج اعلى اخواتي
الوداع الوداع طولي ياهليله
ـــــــــــــــــــــــــــــــــــــــــ
صعبه ياخويه الوصيه كلفتني بيها
توصي باطفال وحرم وانا عيني اعليها
العايله يحسين عكبك هل عده توليها
تصرخ من العطش والذل وسفه ياواليها
الوداع الوداع طولي ياهليله
ـــــــــــــــــــــــــــــــــــ
ااه يالوعة گلبها الودعت ولياهه
خلي نواسي العقيله ونكعد احنه وياهه
باجر تون وتصيح منهو العازاهه
حرمه مسبيه وكتها اويه الغرب خلاها
الوداع الوداع طولي ياهليله
ــــــــــــــــــــــــــــــــــــــــــ
تمت بعون الله تعالئ
بقلمي
شاعرة اهل البيت
ام احمد ( البصراويه)
صاحبة كتاب
(ديوان الحزينه)
اسالكم الدعا۽ لي
ولوالديه بالمغفره
t.me/raehinah
لا اجيز حذف اسمي
وغير مبرئ الذمه الئ يوم الدين من يحذفه
ــــــــــــــــــــــــــــــــــــــــ
18/8/2021
610 viewsالشاعره ام احمد البصراويه , edited 16:48