2023-01-23 11:40:28
يالهادي جفنك ذبل من كثر الونين
ولاخر حياتك جنت تبجي اعله الحسين
كل ما تحن وتذكره // بضلوعك اتشب جمره
******
انته اول بشر متعوب بالون خلص اسنينه
مات وضلت امن الشوك صورة كربله بعينه
يالهادي اشكثر جدك دار براسه لسكينه
ومن فوك المهر للكاع طاح ومحد ايعينه
بنص كلبه نابت سهم وينادي محتار
ويالهدي وجها اندفن من كثر الحجار
وبيده الشمر حز نحره // بضلوعك اتشب جمره
****تنام الليل خلك الله وانته الليل ما نمته
تذكر جدك المذبوح اشلون الخيل ساحكته
ما شايف جسد مسلوب وكلبه ايرف عله ابنيته
ورقيه اتصيح يابويه وراس حسين شابكته
تمسح لحيته وتون وتندها بهداي
وتكله عوف الشمس وكعد بالفياي
اطلع السهم من صدره // بضلوعك اتشب جمره
*****
لحد اخر نفس وحسين دار الزينب عيونه
وكل ما ضربو اخته بصوط كلبه اشكد يحركونه
كل ما راد ليها ايكوم بالحافر يسحكونه
الله ايساعد العباس من كامو يسلبونه
جم مره صدره احترك بالغيره عباس
وبراسه صله الوفه وكاماله بس راس
راعي العلم شيصبره // بضلوعك اتشب جمره
*******
تذكر عمتك وتكول الله ايساعد اجدامج
بين اخيامج اتركضين وانتي امحركه اخيامج
عمه ادخيلج امن الخيل كامت تصرخ ايتامج
وجم مره اعله وجه الكاع طاحت رمله جدامج
ام جاسم اتغيرت من كد حزنها
ودمع النواضر ترس صينيت ابنها
واعله العرس متحسره // بضلوعك اتشب جمره
****تصفن والجروح اتكود بيك الكربله وتعثر
وتذكر ليلى من لطمت وجها يم علي الاكبر
اتحاول تنسه والالام بكلبك كل وكت تكثر
وتسمع صوت عبد الله يصيح بكطعت المنحر
بجفها الرباب المهد تبجي وتهز بي
مذبوح ابنها وجت كامت كامت تناغي
وعبد الله ينزف ثغره // بضلوعك اتشب جمره
******
يالهادي مصابك صار يشبه ليلة العاشر
يشمس الله وهوه المخنوك اعليك اشجم كلب شاجر
غدر بيك الزمن مولاي وانته اعله الحزن صابر
متت وجنازتك ضلت غريبه وتكسر الخاطر
تنعه السماوات الك وتنوح النجوم
ونقرالك الفاتحه ضلينه كل يوم
امصابك هدل سامره // بضلوعك اتشب جمره
*****
تمت
تحسين الخفاجي
3.8K views08:40
ا
