التخدير النصفي في الحوامل.. اليوم نحجيلكم عن التخدير النصفي | hey

التخدير النصفي في الحوامل..

اليوم نحجيلكم عن التخدير النصفي للحوامل العدهن عملية ولادة قيصرية..شلون تصير وشنو فوائدها وشنو مضارها ،وشنو الاحسن النصفي لو التخدير (البنج) العام..

التخدير النصفي من اسمة هو عبارة تخدير جسم الانسان من مستوى السرة فما دونها ..عن طريق ابرة خاصة تحقن في ظهر الانسان فوق الحوض (بعيدا عن الحبل الشوكي) ..ويتم فيه اجراء العمليات الجراحية اسفل السرة مثل عمليات الفتق وعمليات الولادة القيصرية وعمليات الكسور في الاطراف السفلى..

بالنسبة للحوامل العدهم عملية قيصرية فخيارهم الافضل (علميا) هو التخدير النصفي الشوكي ،ليش؟
لان المريضة تتخلص من التخدير العام ،وانبوبة التخدير، الي هي قد تكون صعبة بالحوامل،وايضاً تتخلص من كل ادوية التخدير الي قد تأثر على طفلها بشكل مؤقت،بالاضافة لكون المريضة تكدر تمشي من وكت بعد العملية وهلشي ايقلل من حدوث الخثرة وخصوصا في المريضات اليعانن من السمنة، وايضا تكدر ترجع تمارس فعالياتها من وكت بالاضافة لكون التخدير النصفي ينطي فترة لابأس بيها من تسكين الالم بعد العملية..

شلون يصير التخدير النصفي؟
بعد مايشوفج طبيب التخدير، ويفحصج سريريا ، ويقرة تحاليلج، ويتطمن على وضعج ،
تفوتين لصالة العمليات..
ويقيسون ضغطج ودقات قلبج..
يحطولج كانيولات اثنين ..
ويمشولج مغذي بيها حتى يبقى ضغطج طبيعي ..

بعدها طبيب التخدير يطلب منج تكعدين لغرض اخذ حقنة النصفي..
يعقم ظهرج حتى لايتلوث المكان..
ويحقنج الابرة فوك الحوض ..
وتنامين على ظهرج مباشرة،..
ويرجع يتطمن على ضغطج ويتأكد انو مكان عمليتج اتخدر، من خلال سؤالج ترفعين رجلج ف انتي مراح تكدرين ترفعيها لان خدرت..

بعدها ايحطون حاجز بينج وبين مكان العملية..

يطلعون الطفل بعد اجراء الشق الجراحي ..وتسمعين ابنج/بنتج يبجي وتنتهي العملية..

مضاعفاتها قد يحصل هبوط لضغط الدم اثناء العملية ويتم معالجتة باعطاء المغذيات والادوية الي ترجع ضغطتج طبيعي

وممكن يصير عندج صداع بعد العملية..لذلك طبيب التخدير حيطلب منج متنامين على مخدة ، ولاتحركين راسج هواية بعد العملية ولمدة ٦ ساعات ،ويطلب منج تشربين سوائل ومي وگهوة فيما بعد..

علمياً وعالمياً التخدير النصفي هو الافضل للعمليات القيصرية..