2022-12-30 12:35:13
و انت داخل على مرحلة جامعية، أكيد سمعته نصائِح مِن مَن هم أكبر منك وقالوا ليك كلام كتير عشانك "الجامعه ما ذي الثانوي.. الجامعه دراستها كتيرة.. الجامعه الجامعه! "
ف عشان نمشي الطريق الصح، لازم نأخذ بالنصيحة صح؟
" و من سار على الدرب وصل" ؟
-ما تغتر بِنتيجة الشهادة السودانية وما تيأس بسببها ، لأن الجامعه أقل اهتمام منك واجتهاد بظهر في النتيجة والشهادة وأقل إهمال بظهر في النتيجة.
-حاول افهم قبل ما تحفظ، ايوا حاول افهم قبل ما تحفظ وتاني حاول افهم قبل ما تحفظ.
-ما تستهين بِمادة وتقول "دي بدونا ليها لي" ؟! مع السنين حتعرف لي .
_لو واجهتك مشكلة الترجمة ، استخدم تقنية:
1/المترجم.
2/الدراسة الجماعية .
"كل ما تتقدم في سنين الدراسه حتلقى نفسك ما محتاج تترجم"
_إذا مافهمته درِس :
1/افتح المرجع واقرأ الجزء الغير مفهوم .
2/افتح اليوتيوب واكتب اسم الجزء الغير مفهوم .
3/ما تدُك المحاضرات وتعال بدري .
4/اسأل الدكتور من الجزء الغير واضح لك.
5/اسأل زميلك يشرح لك .
6/ادرسوا في شَكل قروبات .
_تقنيات احتمال تحتاجها:
1/لخِص المادة البتحتوي كلام كتير .
2/اشرح المادة البتحتوي كلام بسيط .
3/استخدم أسلوب الخرائط الذهنيه .
_حاجات حتحِس أثرها في مستواك قبل التخرج وبعد التخرج:
1/اشرح لغيرك .
2/شارِك في السمنارات .
3/شارِك في المناشط غير الأكاديمية .
4/في الإجازة إلتحق بِكورسات إنجليزي أو أي حاجة ممكن تضيف ليك.
5/في الإجازة اِستغل الانترنت وادخل online courses .
6/أثناء الدراسة لو ما قدرت تقرا المادة أول بأول ما تخليها تتراكم عليك .
7/راجِع الدرس الفات قبل ما تدخل المحاضرة الجديدة، حتعمل فرق كبير في الاداء .
_حاجات مهمة حاول اهتم بيها :
1/الكمبيوتر مُهم ، كُل ما اتعلمته عليه تلقى نفسك مميز وقادر تنجز بسرعة قبل وبعد التخرج .
2/بداية السمستر افهم وتوسع في الشرح، لكن نهاية السمستر ركِز الدرسته وحل اسئلة وكويزات حتى تعرف كيف تحل في الامتحان.
3/خليك إيجابي، ومُبادر ،وخت لنفسك عهد إنك تتقن الشغال عليه سواء كان قراية أو عمل بعد التخرج.
_اخيرا : قد أكون نسيت شيء بس دا الاتذكرته.. واسأل الله أن ينفع به كل محتاج له ، وكل الاماني بالتوفيق ليكم .
"عشان تعم الفائدة اعمل شِير ليصل لأكبر عدد من الأصدقاء
صوت الجامعة صوت كل طالب
849 views09:35