2022-08-26 17:51:34
قال :
الحمدلله اتربيت في أسرة محترمة ، اتعلمت الصلاة و الصيام و بخاف من حق الله و حق الناس ، لكن ما متفقّه في الدين شديد .
اتزوجت قبل سبعة شهور ، زوجتي زميلتي في الجامعة ، لاحظت فيها الأدب و الإحترام من أيام الدراسة ، و استخرت كتير حتى اتقدمت ليها و بقت من نصيبي الحمدلله .
في الخطوبة كانت مؤدبة و حيِيّة ، و بعد زواجنا اكتشفت فيها حاجات كتيرة جميلة خلّتني أحترمها أكتر من زمان .
بعد زواجنا و رجعنا للشغل ،
كلما أجي داخل البيت ألقاها مافي في الهول ولا في المطبخ ، أمشي ألقاها في غرفتنا بتصلّي ، نادر جداً ألقاها بعيدة من مصلايتها ، ربنا يحفظها و يتقبل منها .
مرة صحيت بالليل لقيتها بتصلي ،
سألتها :
انتي نسيتي تصلّي العشاء ؟
قالت لي : أنا بصلّي قيام الليل .
قلت ليها : قيام الليل ؟ أنا ما حصل صليتو غير في رمضان !!
قعدت تضحك و قالت لي :
خلاص تاني نصلّي كل يوم سوا ، و فعلاً من الوقت داك بقينا نصلّي قيام الليل الحمدلله
مرات أطلع مشوار أو ألاقي أصحابي ،
لمن أرجع ألقاها بتسمّع في القرآن ، و مرة مرة تقول لي هاك سمّع لي .
ما حصل في حياتي فكّرت أحفظ القرآن ،
لكن بي سبب زوجتي اتعلّمت التجويد و بديت أحفظ القرآن وعندي ورد يومي كمان ماشاءالله
علّمتني أعيش في الدنيا بي هدوء ،
و أتعامل مع الأمور بي حكمة ، حياتنا ما كاملة و فيها المشاكل زي كل الناس ، لكن بي طبعها الجميل خلّتني ما أشيل في قلبي منها ولا أخلّي الزعل بيننا يطول .
ما اتخيّلت في يوم ربنا يكرمني كده ،
الزوجة الصالحة نعمة تخلي الواحد يحمد ربنا ليل و نهار ، تملأ البيت قرآن و تذكر الله و تسبّح كتير ماشاءالله .
أجي من برة شايل هموم الدنيا ، تلاقيني بي طيبة قلبها و تشيل مني كل الهموم و تخليني مرتاح
..
شريك الحياة اللي بخاف ربنا رزق ، أسألو ربنا يرزقكم ليهو ، ولو لقيتوهو أبقو عليهو عشرة .
الناس بتختلف في المواصفات اللي بتفتشها في شريك حياتها ،
و كل زول عندو صفات ممكن يتنازل عنها ، اتنازلو عن أي شي إلا عن الخوف من رب العباد
و الحياة ما كلها حلوة ،
بتجي الأيام الصعبة اللي بتهون مع الشريك الطيّب الهيّن الليّن الساعي لي حياة هادية و مليانة سعادة و راحة بال .
فاللهمّ لُطفك تهب به للقلوب رُفقائها ، حِكمتك تجمّل لنا الطريق ، و أن نحمدك فرحاً في النهايات
#بيوت_متطمنة
ممكن نصلّ على الحبيب!
#تيسير_الصادق
صوت الجامعة صوت كل طالب
2.1K views14:51