2022-08-28 01:45:30
هوَ حفار اذاً هوَ خسيس !..
......
السلامُ عليكم و رحمة الله و بركاته
.....
حفار !
كلمة كان لابد نقف عندها مراراً مراراً ...
الحفار هو الشخص اللي بكون ماكل المقررات اكل ... الزول " القراي " ... جنو قراية و دايماً شايل مراجعه ، دا حسب التعريف العالمي طبعاً !!
بس كمان عندنا أصحابنا كدا بكونوا اليوم كله حايمين و صايعين و صور و ما فايقين للقراية حتى ! و نجي نلقاهم مستلمين البورد و البرايزات !!...
دقيقه دقيقه !؟ دا حصل كيف ؟؟ ياااااه دا صحبي زاتو ال كان معاي اليوم كلو خماسيات و بليستيشن !! كيف بس كيف ؟؟
عملها كيف الخسيس دا ؟؟؟..
معقولة كان غاشيني !!؟
كنت بتقرا من وراي يا خسيس ؟؟؟..
و خلاااص يا حليله زولنا بقا اسمه " فلان الحفار المندس "
......
من جانب تاني !
الحفر يا شباب و الدراسة عموماً بتختلف من زول للتاني ! و كمان ما ننسى ارادة ربنا و توزيع الدرجات دي على الناس
عندي صحبتي دايماً دايماً حايمة بمراجعها و اليوم كلو بتقرا بس درجاتها ما على قدر قعدتها مع المراجع !
و سبحان الله صحبتي التانية م بتقرا خالص !! و مستلمة البورد كمان !!
بس هل معناه هي خسيسة ؟ داسة قرايتها من الناس ؟؟ هل القراية عيب لمن يدسوه ؟ ...
لالا .. الموضوع م كدا ...
الأمر و ما فيه ان ربنا سبحانه و تعالى موزع لينا نسبة الفهم و سرعة الحفظ دي بطرق مختلفه ...
في مننا ال محتاج يقرا مرة و مرتين و تلاتة ...
في مننا البشوف المرجع مره واحدة و خلاص يثبت في دماغة ..
و في ال ما بشوف المرجع اصلاً ! بس يا سبحان الله مخه بكون مسجل المحاضرة تسجيل !...
....
صحبك لمن يقول ليك انا ما قاري و انت تنوم على قفاك و هو يجيب معدل و انت م تجيب دا م معناها صاحبك طعنك في ظهرك لأ أبداً والله !! دا انت ال طعنت نفسك ...
لأنو قدراتك و قدرات الإنسان دا م واحده !...
فما تباري كلام الناس و القاري و الما قاري ...
أعمل العليك ..
و اجتهد عشان بكرة م تجي تلقا نفسك في ال " black list " براك !
و من ناحية تانية ...
صحبتك اللي بتبكي اليوم كله و شايفه نفسها م قارية و انتِ شايفاها قارية دي أبداً ما " خسيسة " زي ما انتِ قلتي !!! ...
بس دي بتشوف العملتوا كله ما كفاية و دايرة اكتر من كدا
فوقفوا تصفوا بعض بالألفاظ ال ما حلوة دي !
اللي بتقول عليه جحاد دا م جحاد بس عاوز الزيادة في العلم
لكن الجحاد انتَ ... اللي ربنا أكرمك بعقلك و انت مستغله اليوم كله في " فلان و علان !" ...
استغل قدراتك دي في المحل الصح و م ح تندم
و اتذكروا دايماً ...
قبل اي حاجة ...
القصة دي توفيق من ربنا
فيبقى انت تعمل بالاسباب ، تجتهد ، تتعب ، تدعي .. و ح تُجانب بإذن الله
.....
و لكل زول عنده امتحانات في الفترة الجاية عسى ربنا يوفقك و يثبتك و يعلي معدلك
اتذكر ...
القراية ما صعبة ..
صعبة القعدة للقراية
عشان كدا انت أبدا ... و كلو ح يعدي و ح تبقا حكاوي
...
و ربنا يدينا قدر تعبنا في المواصلات و أكتر
و الى حين آخر ...
السلام
صوت الجامعة صوت كل طالب
1.6K views22:45