2022-09-25 02:47:27
#ما_فينا_زولاً_ني "قسوة الطريق و لذة الوصول"
قالو زمان و العهدة على الراوي جماعة من اهلنا ديل .. سافرو السعودية زمن الاغتراب باااايخ داك و الكفيل بيعاملم بي سخف
و مسافرين هدفم واحد بس يشترو بوكس ٨٦ افتكر كان اسمه اب زيق ..! لأنه فيه زيق بالأحمر كدة
( زيق يعني خط لغير الناطقين بها )
و هم اولاد عم .. كل ما واحد فيهم يزهج .. و حماسه يقل و يدور يخلي الشغل ود عمه يصرخ ليه من بعيد
هوووي يا فلان .. أطرا اب زيق .. ( يعني اتذكر البوكسي الجايين عشان نشتري)
لما كنا في الجامعة في السنة الأخيرة ممتحنين جراحة .. بنمتحن كورس ورا كورس
السمستر داك كان جراحة ..
مستشفى و ضغط نفسي و جراحين النوع البيمسح بيك العنابر داك .. لكن ربونا ..!
جزاهم الله عننا كل خير يا رب ..
المهم .. الكهربا بتقطع الصباح بتجي تسعة بالليل لو جات ..
انا بقرا في الداخلية لأنه ما حر ممكن تلبس فيه اي شي غير هزاز
و بفتح كل الشبابيك تجيب ليك سموم النوع البعمل ليك شووووو في وشك داك
و لما اتأزم في القراية ما بقدر اقرا طربيزة
بقرا في الواطة بجدع مساند و بفرش الورق كله و بثبت الورق بي حاجات عشان ما يطير
بكون بقرا و غرقانة في العرق و الجلابية لو شفتها بتقول اتكشحت فيني موية .. ما بتقول دة زول سايح في روحه ..
عندنا برميل موية بتعبيه نجاة الله يذكرها بالخير .. تساهر معاها للصباح
اها نخش نكشح جردل نغير الجلابية نرجع لي نفس الواطة و الورق و الشيتات و السجم ..
الحركة دي زي تلاتة اربعة مرات كدة .. لما تغيب .. نقوم بي اي عولاق نمرق نمشي الجامعة نقرا في اي قاعة فيها كهربا ..
و هكذا دواليك ..!
دحين يا جماعة نحمد الله .. انا في #دبي و سارة في #الدوحة و لينا في #لندن .. و همام في #امريكا زينة الاخصائيين .. و مازن في #نيويورك و اييييييييك ..
ما فينا زولا ني !!
رسالتي دي لي كل من هو طالب جامعي و بيقرا في الظروف القاسية دي
اليدو في المويه ما زي اليدو في النار ولكن نحن يدنا كانت في النار قبل اليوم ..
صحيح الظروف أسوأ و الحالة أصعب .. لكن كلي ثقة .. بتعدي ..
كل ما تزهجو .. اتذكرو الحكايات دي ..و اطرو اب زيق ..!
محبتي التي تعلمون ..
سلمى المصباح
صوت الجامعة صوت كل طالب
تابعنا على التلجرام
قناة صوت الجامعة
https://t.me/unisvoice
444 views23:47