2023-04-02 02:57:43
مساء الخير شديد بعد١٥ يوم مرت من الرحلة العلمية اللي كانت في #محمية_الدندر_الإتحادية
مع أزبط وأحلى ناس
أبدأ من وين ولا من وين؟
أحكي عن المناطق اللي زرناها؟
ياخ حرفيًا دي كانت من أجمل المناطق اللي شفتها في حياتي بعيدًا عن جوطة المدن.
إتحركنا صباح يوم الجمعة ١٠ مارس:
فتخيل يا إنسان وانت ماشي في الطريق مما طلعت من #الخرطوم الجوطة ماشة تخف لحدي ما تحصل الجزيرة ودي براها حكاية، بتديك إحساس المدينة والقرية في نفس الوقت، حتى الهواء اللي بتتنفسه فيها لطيييف، مافي زول ما شافنا فيها إلا لوَّح بيده وابتسم لينا، بتحس فيها بالإلفة والأمان وإنت ماشي.
على شاكلة ضواحي #الجزيرة وبيوتها البسيطة وناسها الطيبين دخلنا سنار حوالي الساعة ٣ ونص عصرًا وحرفيا جمالها أسرني، إحساس الإلفة في المكان بيعميك عن شكلها أو صعوبة الحياة هناك، ناس بتهاجر عشان تلاقي موية تشربها، وبتشيل الحطب مسافات طويلة عشان توقد بيه نار بالنسبة ليهم نور ودفا، وبالرغم من كدا ناس جمييييلة جميلة حد الاكتفاء، ببشاتها وفرحتها وقلبها الصافي.
وماشين في السكة لحدي ما حصلنا مدينة #سنجة، سنجة دي براها يخوانا بالجد، يعني السوق الفيها براه بيخليك تقتنع إنو لسة بلدنا بخيرها وبطيبة ناسها اللي معدنهم نقي، نقي نقي جدًا جدًا جدًا، السوق كان بمثابة نقطة التقاء لكل الضواحي اللي حول المدينة وكان كله حب وسلام.
مرينا بمنطقة #العزازة، وكان بعد المغرب، منظر النجوم وهي مترصعة في السماء النقية جدًا كان بيسحر العيون، جمال ما بعده جمال .. سبحان الخالق!
دخلنا #الدندر المساء، ورغم التعب وطول الطريق بس طبيعة المنطقة بتمحي ليك كل اللي عانيته في ثواني، نزلنا في منطقة #القويسي، وبرضو نفس الهدوء والجو النقي والحُب اللي فيها، بيَّتنا هناك وشفنا حيوانات متنوعة من أسد ونعام وطيور وقرود وضبع وتماسيح.
اتحركنا تاني يوم على #المحمية، ودي كانت من أصعب وأجمل الرحلات، بنتذكر وعورة الطريق وصعوبته بس كانت بتهون بالرفاق وبسواقينا اللطيفين جدًّا، تخيل يا إنسان إنه عمو السايقنا ممكن يغير الطريق بمسافة أبعد من الخيال بس عشان ما ينزل في حفرة أو البص يتقلب أو يصيبنا مكروه، بيجاهد عديل عشان احنا نكون كويسين، كلهم بيسوقو بأمانة وصدق، ودي كانت من ألطف الحاجات اللي لاقتنا منهم.
وصلنا المحمية يوم الأحد الساعة ٢ صباحًا، ولاقونا شرطة الحياة البرية واستقبلونا بصدر رحب رغم التأخر وقامو بواجبهم اللي انت بتخجل من العطاء والحب اللي فيه، قامو بواجبهم وزيادة ربنا يجازيهم بالخير ويحفظهم.
جاء الصباح واستقرينا وبدت رحلاتنا من عصر الأحد لمختلف الميعات، كل صباح أو عصر بنشوف ميعة وضهرة وفرش، وبنشوف الحيوانات اللي فيها والطيور والكائنات والأشجار والطبيعة الخلابة الآسرة، هناك انت ممكن تذهل من الجمال وما تقدر تقول غير سبحاااان الخالق!
مشينا مسافات ومنها اللي حصل ١٤ كيلو مشيًا، ومنها بالبص، وبالدفار وبالتاتشر، ورغم صعوبة الأماكن والطرق الا انها كانت أجمممممل أيام ممكن الواحد يعيشها.
كانت أحلى رحلة مع أزبط دفعة ممكن تلاقيك وأنا فخورة جدًا كوني بنتمي ليها #Zoo_017 دفعة زي البنيان الواحد يشد بعضه بعضًا، وزي الجسد الواحد إذا اشتكى منه عضو تداعى له سائر الجسد بالسهر والحمى، معاهم بيهون كل قاسي.
وكانو معانا أزبط وأغلى دكاترة: د/ رحوم اللي كان زي أبونا في الإرشاد واللطف والخوف علينا والعطاء بالمعلومات اللي بيقدمها لينا.
د/ عمر اللي ورانا الكتيييير الكتير عن تراث البلد وثقافاته المتنوعة وما بخل علينا أبدا، وكان الطرفة البترافقنا في كل خطوة.
د/ حسيبة، يلا دي براها في كفة والله، كانت أحن علينا من نفسنا، بتخاف علينا جدا، ورغم إنه ممكن تتعب بالأزمة في المشاوير والغبار بس بتضحي بإنه تمشي معانا وترشدنا وتورينا وممكن تقدم أي شي في سبيل راحتنا!
أستاذة ابتسام اللي كانت أختنا قبل ما تكون أستاذة ومشرفة علينا، بتورينا وتوجهنا وكل لحظاتنا اللي معاها كانت ضحك وونسة ونقاشات زابطة شديد.
وأستاذة أشراقة اللي كانت خير مثال للطيبة والحلاوة الفي الدنيا، هدوءها ورزانها وعطاءها لينا ما كان عنده حد.
أستاذ محمد صلاح وهو من أزبط الشخصيات اللي ممكن تلاقيك في الكلية، إنسان معطاء بكل ما تحويه الكلمة من معانٍ، لا يمكن أبدًا تقول ليه وريني دا شنو وما يوريك، لا يمكن يبخل عليك بمعلومة، بالجد الواحد بيخجل ويقيف محتار قدامه، ربنا يزيده علم ويبارك فيه.
حرفيا ما قادرة أقول ليكم غير ربنا يجازيكم عنا بالخير.
ما ننسى ضيفتنا من جامعة السودان العالمية كلية العمارة الخريجة هويدا اللي كانت أجمل شخصية لاقتنا، وما ننسى عم النور واللي برضو كان دليل بالنسبة لينا، وكان بيعمل كل شي عشان احنا بس نكون مبسوطين. وعمو آدم اللي ونسنا شديييد يخ، وعمو فيصل اللي رغم تعبه وكدا الا إنو بيبذل قصارى جهده إنو يكون معانا، والسواقين اللي سبق الذكر عنهم. وهبة الطباخة الجميلة.
230 views23:57