2022-08-29 14:43:03
كتلها اتشرف بيكم اني هذا بيتي واشرت الهم
والظاهر انتو جديد جاين..
الاثنين انصدمو..
وكالو انتو بيت الي انذبحت مراه بي
كعدت واخذت حسرة وباوعت
اي نعم زوجتي
سكتوا..
هدى كالت ياعيني البقيه بحياتك
وانتبهت لينه السوريه تجر بيها وتهمس الها
كتلها اشكرج محتاجين شي اروح اني
لينه بسرعه كالت لا لا يعطيك العافيه ولا شي بدنا
هدى كالت بس سؤال صدك منو كتلها
والله احنا اسبوع منايمين نخاف
كتلها علمي علمج لليوم البحث جاري
السورية متخوفه مني شي واضح عليها
هدى كالت والله شو الناس كالو زوجها..
كلت الهم اني زوجها ومستحيل امس شعره منها
لكن هذا كلام الناس الي ميترك احد بحاله اترخص منكم
ومشيت صدك اتهامها الي نرفزني
العالم تشوفني اني القاتل واحتمال يخافون مني عبرت الشارع ودخلت ع البيت وكلامه بعدة براسي
مغثوث منه اني ليش محجيت وكلت ليش اكتفيت بهل كلمتين منا يوسف ومنا هاي رجعت معصب دخلت شفت
يوسف بعدة نايم
رحت مددت ع الكنبه و اتصفح نت ماكو شي اسوي..
اكثر من مرة اريد اروح اشرب واتراجع
ماعرف شنو الي اسوي
معقوله ابني هيج ويايه
معقوله هيج يجاوبني اني كبرت وازوجت ولا يوم رديت اهلي او غثيتهم بشي
بقيت اتكلب مقهور ومختنك
منا يوسف ومنا البنات والناس الي تاهميني بقتل زوجتي
صدك كلام الكل ويايه خلاني اعيد حساباتي..
محسيت ع روحي واله واني نايم
بعد ساعه او اقل كعدت من النوم
جسمي متكسر حياتي عبارة عن اكل ونوم وذكريات وشرب
كمت من الكنبه توجهت للمطبح شفت يوسف كاعد ياكل
والفون مقابيلة ومشغل شي بي ويتفرج
رحت صبيت الي اكل وكعدت بصفه
يوسف ينطي من خاله اكثر مني جان ابيض وعيونه صغار مسحوبه عبالك ياباني او صيني
اني اختلف اسمر وملامحي كلها بارزة ..
حاولت افتح ويا حديث كتله بابا يوسف..
جاوب نعم..
كتله اني من احجي اريد مصلحتك اولا مو هامني نفسي ولا راح احصل شي اذا تدرس او تتفوق بحياتك
وقدمت اله كلاص وخليت بي عصير..
مجاوبني ورجع يباوع ع الفون..
بديت اكل لكن تصرفاته تستفزني بصراحه..
بس مجبور اتعامل ويا بهدوء..
رديت كتله يوسف
رفع عينه عليه..
شلونها درجاتك
يوسف /جيد..
مروان / اكيد وفاه امك اثرت ونزلت للجديد انت جنت كله ممتاز
ضحك وفر ايدة..
اخذت نفس كتله اظن كافي تعاملك ويايه ابد مو لائق اني ابوك لازم تحترمني..
كال/ بابا شبيك ويايه اليوم يعني انت الليل كله سكران ومن صحيت ع نفسك اجيت عليه
ضربت الميز بعصبيه يوووسف..
بقى كاعد وياكل..
كال.. اولا اني علاماتي من زمان جيد او ممتاز
وامي مايوم درستني خلي يكون بعلمك ولا تخاف انجح
كتله انت ابد مو مؤدب وميهمني الة اربيك من جديد
جان يستمر ياكل وكأنما اني مموجود وميسمعني
كال اي وبعدين تزيني صفر لو تربطني لو تنزع الحزام وتضربني.. شوف الف عائله اوربيه تتمن تتبناني وبصراحه اني مليت منكم..
هنا اني بين نارين
نار افقد ابني
ونار احسه ضايع مني.
كتله اني وين جنت عنكم وامك وين جانت هاي اختك هم هيج احلاقها..
ضحك كال لا لا ترة سنا معروفة
كتله شنو؟؟
كال اي انت مسامع بالمشاهير
كتله اي سامع..
كال اي واختي هي من المشاهير اتخيل عدها 47k
جاوبته وهاي شنو وشنو مشهورة فهمني شديصر
جر الفون وطلع صفحتها
وفتحها الي..
جنت اكلب بيها
فيديوات عادية لو العاب لو تغني لو تسولف او تنزل مشترياتها
لكت الي فاجئني واحد من الفيديوهات
كالت هلو فانزاتي اليوم بابا طبخ النا
وهي جانت كاعدة نفس مكاني واني واكف ع الطباخ
اني وين عنهم الغائب الحاضر
مستحيل ..اني وين جنت ذولي منو ...
عبالك كابوس دامر بي..
كتله طفله عمرها ١٠ سنوات منو سمح الها
كال ماما قبلت وجانت تدعمها
اتفاجئت اكثر..
امك مستحيل تقبل واني متاكد انتو مستغلين غيابها
وهل تصرفات اله اعدلها
صدمتوني بعدني مصاحي من حادث امكم
مستحيل رهف تقبل ولك كاسرة ظهرها عليكم..
حارمة نفسها من كل شي لا تطله ولا اطب بس ملتزمه بيكم كاافي حرام عليكم
وبداخل نفسي بصراحه عاجز عن التصرف
كام كااال او كف اوكف
عوف امي انت اخر انسان تححي بيها ..عوفها ..
مرتاحة منك ...
بس أسألك انت وين جنت عنه
لا تجي تعيش دور الاب رجاءا ..
لا احنا نعرفك ولا انت تعرفنا ...
خلينا كل واحد يعيش حر ..
ميعجبك نعوفك ..
وبلا هل الدراما الي خبلتنه بيها ...من الصبح ..
اريد ابلع ريكي احسة يبس للاخر ..
ودخت ..
اني الوحيد الغريب بهذا البيت ..
رهف ..اولادي الكل غريب ..
قاطع كل كلامنه اتصال ..
يمكن جنت مرتبك اريد اهرب ..
رديت بسرعه ..
الو ؟
/ سيد مروان ممكن تجي للمركز
رجعت للوعي ..
انداريت ع ابني كتله راح اروح للمركز وارجع وكلامنا مخلص ..
بسرعه بدلت وطلعت ..
جنت اسوق واني الف فكرة ابالي لكو القاتل ..
او يوسف
لو سنا ..
لو رهف ..
هاي الدوامه وصلتني بسرعه للمركز ..
نزلت ..ودخلت سالت ع الي اتصل بيه ..
كالو انتظر ...
مدة ودخلت ..
379 views11:43