2021-07-10 19:43:35
الحسين يخاطب عبدالله الرضيع ع
يبويه شلون بيه..... رد عليه..... يبني بيك اتحيرت
حرت ادفنك........ لو اردك للخيم
شرد اسوي..... ونابت ابنحرك سهم
السهم خرب ضحكتك ليش بعدهي رگبتك خضره
شاغت روحي من لاحك لحد ما شاغت الزهره
سحبت أنفاس من نحرك وصارت كربله حمره
ومو ريچي بلعته عليك بلعت الطف بالف حسره
دمك غير لون لحيتي
سهمك ذابح كل عافيتي
اگماطك محلول من الضربه
من دونك ما ارد البيتي
شِسوي الطاح بيته........ اولحيِّته...... انصبغت بدم النحر
گوه واگف........ حيلي يوليدي انهدم
شرد اسوي........ ونابت ابنحرك سهم
___________________ السهم من الگفه طالع طلع روحي من جاسك
اذا عفته بوسط نحرك يبني يعذب بناسك
واذا جر السهم بيدي خافن ينگطع راسك
والعباس احتاريت من انگطعت انفاسك
دمعة عينك هدلت متني
ضحكت شماتك ذبحتني
والدنيا ما ادري شبيها
بالهيمه اتلفت خلتني
أكابر عالولوني...... وحوطوني......... من الجهاتِ الاربعه
واليباوع........ ايشوف بعيوني الألم
شرد اسوي........ ونابت ابنحرك سهم
_____________________شحلاتك چنت بالكاروك اناغيك وتناغيني
حلوه بحضني من اتنام بس هالنومة تاذيني
لزمت بيسرتي ضلوعي من رفرفت بيميني
وعلي اتمنيته سهم اجفاك يبني طايح ابعيني
أتمنى مو انت التنزف
ومثل الطير بحضني اترفرف
خليني الگه الحل يوليدي
أمروتك بطل لا ترجف
شهيقك صار عالي..... ويبني بالي...... مشتت بكثر الالم
خاف اموتن........ وتبقى وحدها الحرم
شرد اسوي........ ونابت ابنحرك سهم
_____________________جاوبني يعبدالله يبني اتموت السكته
اروحًا بيك گلي الوين حتى الدرب ضيعته
ضجيج ابگلبي ما يهدأ چن ابنار حاوطته
اليشوف ابنه انذبح بيده خل تنصب فاتحته
طگ كلبي من كثر اللوعه
وايدي بخصارتي مطبوعه
خلص حيلي وخلص عمري
وهذا انه المخلص ادموعه
وربابك لو تشوفك....... ماتعوفك..... تدخل وياك الگبر
لو تشوفك....... تفجع اوياها الحرم
شرد اسوي........ ونابت ابنحرك سهم
_____________________منتظرك رسول الله من تروح اله گله
بدال الماي ياجدي فكوا ريچي بالنبله
وحُسينك وحده ضل محتار گله تذبحوا اهله
وگله محني عالعباس واني غيرت شكله
وگله اعله الكافل والضربه
إلمن عدها ضيع دربه
وسولفله حتى عله الساني
الصاير حتى اقوى من الخشبه
وتِبلغه عن ضعوني...وعن عيوني.... الغوشت من العطش
وصيح جدي....... ابكربله محد سِلم
شرد اسوي......... ونابت ابنحرك سهم
الشاعر عبدالله الشويلي
282 viewsعبدالله الشويلي, 16:43