2022-01-01 21:11:36
كل ذكرياتي امحصنه بالدمعه والحسره
والذكرى اذا ما بيها الك ما تنحسب ذكره
بكل صفحه مكتوب العجل يا شوغتي الكبره
يا مهدي يا مهدي
قريت هواي عن ملگاك يمذبل لي الواني
من(عصر الضهور)الطال لحد(غيبة النعماني)
اتأمل واگول الگاك بطيت وشيبت اني
الضاهر اني ما الگاك امروتك سيدي الگاني
كل جمعة أخذلك ورد واگصد اله السهله
شلعان گلبي والدمع طايح الك كله
متعوب وينك سيدي تكفيني لو نظره
يا مهدي يا مهدي
.
.
.
.
يتيم ويمتى يا مولاي تمسح راسي بجفوفك
رايد مره وحده الگاك اوعد يالمهدي ما عوفك
عيني الما لفاها العيد يمتى تعيد بشوفك
ما ضل نهر ما خليت بي شمعات وحروفك
لا طيف ياخذني الك لا شوغه لا مغرب
ماضل بعد بيه خلگ وفراگك ايتعب
گالولي انسه اللي تحب منطي الك ضهره
يا مهدي يا مهدي
.
.
.
.
شكثر اسمع صباح الخير صباح المهدي يمتى اسمع
افزعلي الگلب بي نار غيور وعادتك تفزع
ناذر لو شفت وجهك اوگع يمك واركع
واهبط الراس يم رجليك واغسلها بحجي المدمع
نكعد سوه واعله السبط تقرالي واقرالك
وتخبرني بالصار وجره بطف كربله وآ لك
منك اريد اسمع حجي اعله الزهره والسطره
يا مهدي يا مهدي
.
.
.
.
يأول جرح بالدلال اويأول شيبه بالحاجب
بدفتر ذكريات اصباي بكل صفحه العجل كاتب
يمطيح ادموع العين بجْفاك السهر صاحب
يمهدي بكثر ما باجيك وجهي بغيبتك شاحب
رمضان حزني ما يفض الا يجي اهلالك
يّدّنه للموت العمر لو جاي يدنالك؟
امنيتي اشوفك لو حلم ياسيد الفطره
يا مهدي يا مهدي
.
.
.
.
السألوني الگمر يَخفه؟ كتلهم نعم يخفه
گلبي خلص وانه صغير من فرگاك يمتى اشفه
ترا اليتمرض بطرواك ماترهم عليه وصفه
اتلفت ابحر جفاك وعيني ما لگت ضفه
بين التجاعيد الدمع خاتل مثل حزني
ثگيل الهجر لو عالمتن جا ما نهض متني
كلساع اگللهم يجي بعمامته الخضره
يا مهدي يا مهدي
الشاعر عبدالله الشويلي
201 viewsعبدالله الشويلي, 18:11
ا
