2022-08-23 09:31:02
#قسمتدن_پای_اولماز
سنه چاتاسی‌دیر اولان- اولمازیم،
آتادان نه قالسا، سون بئشیگین‌دیر.
بختینه آغ گونو نه تهر یازیم؟
اؤزوم ده بیلمیرم نئیله‌ییم ایندی.
قسمت میراث قالمیر آتادان، اوغلوم!
قسمتدن پای اولماز، قوربانین اولوم!
هر شئیی پای وئرمک ممکن‌مو بَیَم؟
حئییف ان قیمتلی وار- دؤلتیمی-
گؤی‌لری دیندیرن محبّتیمی
سنه باغیشلایا بیلمه‌یه‌جه‌یم.
سئوگی میراث قالمیر آتادان، اوغلوم!
اُلفَتدن پای اولماز، قوربانین اولوم!
حیرت‌سیز یاشاماق، یاشاماق دئییل.
حیرت ائت، یوردونو تَن بؤلن چایا!
قوینوندا گزدیگین تورپاغی بوت بیل!
«حیرت، اِی بوت!» دئییب بابان دونیایا.
سنه قالمایاجاق حیرتیم، اوغلوم!
حیرتدن پای اولماز، قوربانین اولوم!
داشین، کَسسه‌یین ده باشینا هَرْلَن!
کَسسَک ده وطن‌دیر، داش دا وطن‌دیر.
دونیادان عؤمورلوک آیریلاندا من،
گؤزومدن سوزولن یاش دا وطن‌دیر.
بونو حسرتلی‌لر آنلایار، اوغلوم!
حسرتدن پای اولماز، قوربانین اولوم!
یوردونون شرفی، شانی آتش‌دیر.
بو یورد امانتی، اود امانتی،
باشینین اوستونده یانان گونش‌دیر،
«نسیمی» دؤزومو، «بابک» جرأتی.
جرأت دامارلاردا یارانار، اوغلوم!
جرأتدن پای اولماز، قوربانین اولوم!
سنه قالاسی‌دیر آنامیز وطن،
وطن ناموسونا اولو چلنگ‌دیر.
اونون شرفینی قورویا بیلن،
پاپاق گزدیرن یوخ، غیرت گرک‌دیر.
غئیرت باغیشلانمیر وار کیمی، اوغلوم!
غیرتدن پای اولماز، قوربانین اولوم!
#شاهمار_اکبرزاده
@AdabiyatEvi
391 viewsedited 06:31
ا
