2022-08-01 19:39:35
ام البنين و العليلة عليهما السلام
يلله ننعه ونلطم اثنيناتنه
النحبه وراح من بيناتنه
والچانو ويانه يگعدون
راحو بعد لا ما يرجعون
هاي هيه
.......
شو گاعده ومالچ خلگ .. راح النذرتيله العشگ
المن بعد ما تبچين .. وياي اريد تلطمين .. لا موحلم رايح صدگ
سافر ابوچ وما يرد .. وياه مشو اربع ولد
وراحن خواتچ تدرين .. المن دمع تجري العين .. فارگنه حتى الـ بالمهد
خلينه نتگابل سوه خلينه .. احبابنه وعافونه وشظل بينه
ايا مصيبه .. ايا مصيبه
جيّه ما الهم بعد ونشوفهم
واحنه ما نگدر مسيه انعوفهم
نار الهجر بينه ميدرون
راحو بعد لا ما يرجعون ... هاي هيه
..................
معلوله ادري ابعلّتچ ... بس المصيبه خلّتچ
لازم تصبين ادموع .. ما ينحمل هالموضوع .. ما ظل بعد واحد الچ
كلهم مشو يمدللـه .. ظل بيتچ ابلا عايله
هم بيتي ظل بلا ناس .. راح اويه اخوته العباس .. كلهم خذتهم كربله
وصارت ظلام بيوتنه ابلياهم .. ياريت انه وياچ رحنه وياهم
للغاضريه .. للغاضريه
مالهم رجعه بعد لبيوتهم .. گلبي يعلم يحدي بيهم موتهم
بغيابهم نتصبر اشلون
راحو بعد لا ما يرجعون
هاي هيه
.................
كل غالي من عدهم رحل .. ما ظل بعد عدنه أمل
حتى الصبر لا ميفيد .. بالطيف لو مره انريد .. بينه يمرون الاهل
باچر يجي منهم خبر .. عباس طايح عالنهر
وضامي انگطع نحره احسين .. بخيامه نار اموجرين .. وزينب تلم جسمه وذر
وامذبّحين اعله الثره أنصاره .. وعياله يحديهه الشمر واشراره
صعبه الرزيه .. صعبه الرزيه
يا رزية كربله والامهه .. بيهه زينب تنسبي وايتامهه
وخوانهه صرعه يظلون
راحو بعد لا ما يرجعون .. هاي هيه
............
لا ما يرجعولچ تره .. باچر ذبايح عالثره
وحسين بآخر أنفاس .. صدره بحوافر ينداس .. زينب على التل تنْظره
ويصعد على صدره شمر .. ماكو ظلع مابي كسر
وبكل ظلع يسحگ حيل .. ما يكتفي بسحگ الخيل .. ويطلّع اعظام الصدر
وحسين عينه اعله الخيم مشبوحه ... حد ما يحز راسه ويطلع روحه .. الله أكبر.. الله أكبر
وزينب اعله حسين تبقه اعيونهه .. اي لحد ما للسبي يحدونهه
واخوتهه لو يمهه يشوفون
راحو بعد لا ما يرجعون..هاي هيه
..................
اي هاي هيه وانتهت .. عشرتنه وياهم گضت
ظلينه بس احنه اثنين .. ونجيبهم هسه امنين .. شيرجع ايام المضت
خلينه نبقه بهالبچي .. تدرين ميفيد الحچي
غالي بعد غالي ايروح .. مذبوح ودّع مذبوح .. چانو عليهم ننتچي
وگلوبنه انشلعت عگب فرگاهم .. نتحلم يرجعون نتلگاهم .. خلص صبرنه . خلص صبرنه
هاي هيه وانتهت ايامنه .. واحنه تحدينه بقت الامنه
غالي بعد غالي يموتون
راحو بعد لا ما يرجعون .. هاي هيه
...............
#الشاعر علي عبدالله المفرجي
52 views16:39
ن
