بكت وهي تضع رأسها على صدره : ' اترجيتك بالله … م تطلع … يا زي | مكتبتي 💙
بكت وهي تضع رأسها على صدره : " اترجيتك بالله … م تطلع … يا زين … عشاني أنا … حتطلع تمشي وين هسه … اهدا و اطلع اوضتك ابوس يدك خليني اجي اتكلم معاك و حتى لو عايز تمشي من هنا انا حرتب ليك اي شي … الله يرضى عليك م تقطع قلبي عليك أمشي اوضتك يا زين "
" يبكي و يتشهق زي البنات … أرجل شوية على الأقل " قالها سليمان بغضب وهو يطالعه باحتقار .
صرخت سويداء : " سليمان أسكت "
نظرت إلى زين : " لف ارجع اوضتك … أمشي من دون اي كلمة أمشي … انا حيلي مات م تقهرني فيك "
لف بتردد و كان رأسه منحنياً و بسرعة عاد نحو السلم …. مسحت دموعها و اتجهت نحو سليمان و ظلت تنظر إليه : " انت شنو ؟ انت شنو ياخ ؟ سليمان دا ولدك … و لدك من صلبك … انت ابوه … بتعمل فيه كدا لي حرام عليك "
انتصار : " الولد دا م مترب… "
قاطعتها وهي تهز كفها : " لو سمحتي يا انتصار … لو سمحتي … الكلام بيني و بين سليمان … لو سمحتي م تدخلي "
فوجئت إنتصار من أُسلوب سويداء الذي لم تعتده و صمتت بصدمة … لتوجه سويداء انظارها نحو سليمان :
" انت عايز تخسر ولد تاني ؟ "
" قصدك شنو ؟ "
" انت فاهم قصدي "
" لو قصدك نبيل فهو ماف شي بيني و بينو و انا و هو علاقتنا عظيمة "
" بتكذب على نفسك يا سليمان .. انت خسرت نبيل من زمان … كفاية انو بيناديك بي اسمك مجرد … نبيل علاقتو معاك علاقة موظف بي مديرو … بيقضي ليك اشغالك وخلاص … لكن علاقة ولد بي ابوه دي ماف … و بالكلام السمعتو هسه دا ف انت خلاص خسرت زين …. زين مجروح و قلبو واجعو على امو … لي تقول ليه كدا يا سليمان لا حول ولا قوة الا بالله العلي العظييييييم "
" بالله كلام الفلسفة دا م عايز اسمعو خالص … الولد دا طلع من اليد من زمان و كلو بي سبب امو كانت مقوياه علي … انا م قصرت معاه بي شي … معيشو عيشة اي زول بيتمنى يعيش ربعها بس ، ساكن ف قصر ، طلباتو كلها مجابة ، سايق عربية آخر موديل بيقرا في أغلى كلية ف احسن جامعة ف البلد دي كلها … معيشو هو و اخوانو ف نعيم و م بقصر فيهم … يجي يتكلم معاي بي اسلوب زي دا ؟ انا ابوه و لا صحبو ؟ "
" سليمان اعترف و لو لمرة انو انت اسلوبك مرات كتيرة بيكون غلط … هسه الولد بقا راجل و بي دقنتو تمسكو تضربو و تخبتو زي الطفل الصغير ؟ أهنتو ، و بتقول ليه امك ماتت بي سببك … قبل م تشوف رد فعلو انتبه للفعل الكان سبب ف رد الفعل … الولد فضلت ليهو انت بس … ارحمو شوية "
" شوفي يا سويداء … انتي من كلامك واقفة ضدي انا و بتهاجمي فيني ليهو …. ف اسمحي لي اوضح ليك شي … زي م قبل شوية قلتي لي انتصار م تتدخل … ف انتي هسه لو سمحتي م تدخلي ف طريقة تعاملي مع اولادي … انا ابوهم و حر فيهم و اعمل العايزو ان شاء الله لو اقتلهم … انتي م احن مني عليهم …. زي م عاملة فيها صحبتو و واقفة معاه ابقي وعيه و خليه يحترم نفسو … عشان انا لو قبلت عليه م حيحصل خير إطلاقاً … انا طالع … عن اذنكم "
غادر من المكان تاركاً أختيهِ خلفه …. نظرت سويداء لإنتصار التي هدرت بغضب : " و انا برضو لو قبلت عليه م حيحصل خير ، الولد التافه دا خليه يعمل حسابو و م يتعد حدودو … عايز كسر الرقبة "
" لو كان ولدك كنت حتقولي عليه كدا ؟ "
" الحمدلله انو م ولدي "
" زين دا نعمة من الله … سليمان م حاسي بي قيمتها … غيرو بيتمنى يشوف جناه "
" سويداء … راجعي نفسك … انتي حكايتك مؤثرة فيك شديد لي درجة مخلياك تغضي البصر عن البيعمل فيه زين دا … انا طالعة اوضتي سديتو نفسي "
مسحت سويداء دموعها وهي تهز رأسها : " لا حول و لا قوة الا بالله العلي العظيم "
_______
هبطت نور من سيارة والدها الذي و لحسن حظه وجد سليمان قبل أن يُغادر المكان … حياهما سليمان ببشاشة و كأنهُ لم يخض حرب مع ابنه قبل قليل … نظر إليها قائلاً : " لكن ماشاء الله والله البت بقت عروسة "
ضحك عبدالله و هو ينظر إليها بحب : " مش عليك الله ؟ "
وضع سليمان كفه على كتفه : " لي واقفين برا اتفضلو اتفضلو "
دلفوا إلى الداخل … و اثناء دخولهم لاحظت نور للشاب الذي يجلس في أحد المقاعد الخشبية بينما وضع سماعات على أُذنيه . نظرت إلى والدها مستأذنة : " بابا عن إذنكم ثواني "
توجهت نحو الحديقة في حين دخل والدها مع سليمان إلى مجلس الرجال … تفاجأ زياد بالفتاة الجميلة التي وجدها أمامهُ من دون مقدمات … فخلع سماعته بسرعة ليستمع إليها . مدت كفها لهُ بتردد ثم قالت : " هاي "
أجابها باستغراب وهو يتلفت حولهُ : " هاي ! "
" انا حابا اقول ليك شكراً على موقف امس "
ارتفع حاجبه بينما انخفض رأسه قليلاً : " ها ؟ "
" و آسفة لاني إتكلمت بقلة ذوق "
" ثواني انتي منو اصلا ً ؟ "
" اهااا ، دا عشان انا قلت امبارح م متذكراكم لمن كنا اطفال صح ؟ لا انا متذكرة والله بس اضطريت انفي اني متذكراكم عشان كمان الريحة حقت الدخان حتفوح لو فتحت خشمي "
