' انا حاولت … حاولت كتير شديد إني ارضيه و اكون بنفس الشي الهو | مكتبتي 💙
" انا حاولت … حاولت كتير شديد إني ارضيه و اكون بنفس الشي الهو متوقعو مني … حتى لو كانت الضريبة إني اخسر نفسي و احس بالوحشة مع ذاتي البعدت عنها و ادعيت إني شخصية تانية عكس حقيقتي … بس المقابل كانو شنو ؟ إني برضو م كنت كفاية بالنسبة ليه … و لا حسيت إنو بيقدرني … خليها مشاعر الحب الأبوية ديك لاني أصلاً فقدت الأمل في إني أجربها يوم … انا عايز بس أحس إنو بيقدرني و بيحترمني … هل طلبت شي كتير ؟ "
صمت قليلاً و ارتجفت نبرة صوته وهو يردف : " الوصلت ليه ف النهاية … إنو مهما أعمل … مهما أحاول أوقف على رجولي و اشافي نفسي و احل مشاكلي و أقوي شخصيتي …. حتفضل علاقة ابوي السيئة معاي نقطة ضعفي البتكومني و بترميني ف الأرض كل مرة … الجروح الخلاها جواي فقدت الأمل في إنها تتعالج … و مهما الناس شافتني ناجح و مميز و شاطر و أثنوا علي … ف أنا واثق إنو هو حيشوفني صفر على الشمال …. و أي لحظة أنا اظهرت فيها انو دا كلو م فارق معاي و لا هاميني كنت كذاب … و كل مرة بتسأل فيها عن علاقتي معاه بقول إنها جميلة و قوية … انا حتى م عندي الشجاعة الكافية الأقدر أعترف بيها و أقول إنو دي أكتر علاقة مؤذية ممكن أكون عشتها … كيف حقدر أقول إنو أبوي بيأذيني ؟ "
أخفضت سويداء رأسها بحزن و هي تستمع إليه …
" انا م عايز اقعد ف البيت دا … حتى لو اقعد ف الشارع م مهم … المهم ابعد من هنا … م حكذب على نفسي و اقول أي شي حيتصلح "
" زين … انا عارفة اني مهما اقول ماف شي حيخفف عليك … بس انا عايزة منك حاجة واحدة … م تتسرع ف قرار زي دا … حتمشي وين و تسيب اخوك و بيتك "
" انا بفتش حالياً على منحة …. اول م القاها حسافر … م حقعد …. و حشتغل عشان اصرف على نفسي … انا م صغير …. الأصغر مني شغالين و معتمدين على نفسهم … مشاكلي م حتتحل الا بي اني ابعد من البيئة السامة دي كلها … و الا حيجي يوم حتلقيني فيه ميت هنا "
" بعد الشر عليك يا قلبي … بعد الشر عليك يا زين "
" الشر دا العايش فيه … اما الموت دا رحمة …. والله العظيم رحمة …. إنتي عارفة ابوي عايز يعرس ؟ امي م كملت ٣ شهور ماشي يعرس … لازم يكون عندو مرتين يعني … لو م عندو مرتين يذلهم و يحتقرهم م حيحس بي قيمتو "
نظرت إليه باستغراب : " ش …. شنو ؟ … جبت الكلام دا من وين ؟ "
" سمعتو هو و عمتو انتصار بيتكلمو …. و كمان محتار يعقد طوالي و لا ينتظر شوية عشان الناس م ياكلو وشو … انا و زياد م مهمين عندو … و مشاعرنا م مهمة … و امي م مهمة كل دا م مهم لو شال هم حاجة …. فهو شايل بس هم نظرة الناس …. دا الشي الوحيد المهم "
" لا لا يا زين … الكلام دا مستحيل … كيف يعني عايز يعرس ؟ احتمال ف سوء تفاهم "
" انتي لي مصدومة ؟ دي الحقيقة و دا الحصل … و كل الكلام البينا كان بالسبب دا "
نهضت من الفراش و اقتربت منه ثم مسحت آثار الدموع من على وجهه : " كدي انت اهدا … و امشي اغسل وشك … و اطمن … لو الدنيا كلها وقفت ضدك انا حقيف معاك و م حتخلى عنك في يوم … انت الشي الوحيد المهم بالنسبة لي هسه ، انت و وضعك النفسي … لو حابي نمشي نشوف عيادة نفسية حنمشي … ولو حابي تشوف المنحة و تسافر انا حساعدك … بس م تحس و لا تفكر انو انت مكروه او فاشل او ماف زول بيقدرك … انا م بقول الكلام دا عشان اراضيك … انا بقول ليك ف الحقيقة … حتى ابوك يا زين … م قادر يستوعب إنو ف واحد من اولادو م قدر يمشيه زي م هو عايز … انت مميز … و عندك شخصية و الوحيد بتوضح موقفك و م بتمشي بالعايزنو ليك … و انا بحبك زي م انت كدا … و امك كانت بتحبك زي م انت كدا … بالرغم من انها كانت بتخاف عليك بي سبب الحاجة دي … بس افهم شي واحد … ابوك م بيكرهك … أبوك م بيعرف يعبر عن مشاعرو يا زين …. هو شايف انو بيقدم ليك افضل شي عندو … اي هو غلط و لسا بيغلط ف حاجات كتيرة … بس برضو هو أبوك … و الضفر م بيطلع من اللحم … ابوك م حيتغير … دا خلاص بقا طبعو … لكن انت ممكن تتغير … عشانك انت … م عشان اي زول … لازم ابسط شي تتقبل ابوك بالصورة دي "
نظر إليها بانكسار و هو يسألها : " بالجد ؟ بالجد م حتتخلي عني ؟ م حتشوفيني زي عمتو انتصار قليل ادب و عايز كسر رقبة ؟ "
مررت كفها على وجهه بابتسامة حنينة : " لا … إطلاقاً … انا شايفاك على حقيقتك … شايفة قدر شنو انت شاب هادئ ، جميل و حساس … بتحب و بتفرح بي المشاعر العالية و الطيبة … مميز و بتحاول دايماً تصلح نفسك و تلقى حلول لي مشاكلك ، م بتخجل من عواطفك …. انت الوحيد البتبكي لمن تزعل شديد بين أخوانك … بتفرغ مشاعر القهر الجواك بطريقة صح … فارس و ماهر و ذكي … و دا بيوضح لي عندك علاقة كويسة مع الخيول و بتقدر تدربها و تكون سياس ليها …
