2022-01-05 21:38:48
قبل كم يوم صار نقاش بالبيت أنه ليش مايصير ننطي التليفون للأطفال ؟
ليش ممنوع ؟ شنو المضار ؟
صار عندي فضول أتعمق وأبحث عن هالموضوع ..
وشفت أغلب الناس يگولون بالعكس طفلي كل شي دا يتعلم من التليفون ليش أمنعه ؟
وحتى أني جان عندي نفس التفكير لأن عدنا أطفال بالعائلة وفعلاً دا أشوفهم يتعلمون كم معلومة
بس تعرفون أنه كل معلومة يتعلموها أطفالكم من التليفون بالمقابل دا يخسر وقت محتاجه حتى يتعلم مهارات حياتية محتاجها حتى يطور بشكل طبيعي وسليم!
يعني مهما نشوفوهم دا يتعلمون فكل هذا وهم لأن بالأصل دا يتأخرون ..
وتعرفون هورمون الدوبامين صح ؟
هورمون السعادة بالجسم
خلي اسولفلكم شيسوي هذا الهورمون ..
نعرف العقل يدمن المتعة بسرعة ..
ومرات من الصعب نفرق بين المتعة المُدمرة والمُفيدة .
مثلاً من تاكل أكل طيب رح تشعر بسعادة، لكن اذا كنت مدمن رح تحتاج كمية كبيرة حتى تصل لمعدل الدوبامين وبالتالي توصل مرحلة بعد متفيد أي كمية للأسف وتكون وصلت مرحلة الأدمان القوي ..
لأن العقل يريد يتغذى على المتعة بأستمرار ..
لذلك اذا ما كانت عدنا قدرة نتحكم بنفسنا حتى نوازن المتعة والسعادة بجسمنا رح ندمن ونذعن ويستمر عقلنا يطلب حتى يشبع ..
فكل برامج التليفون سواء برامج التواصل الاجتماعي أو الألعاب وغيرها هي بالأصل تحفز الدماغ حتى يطلق الدوبامين فتحس برضا من تصفح
وبعد 3 او 5 ساعات اذا قررت تترك التليفون شنو حيصير ؟
أنت أرهقت مستويات الدوبامين عندك ومشاعر كآبة، توتر وقلق رح يحفزها دماغك حتى ترجع للتليفون وبالفعل رح ترجع للتليفون ..
وهذا نفسه دا يصير وية الأطفال المساكين .. فاصلين عن الواقع وعيونهم بالشاشة والأهل مدا يدرون شنو من حرب دا تصير بجسمهم الصغير
ومن تحاول تسحب التليفون منهم تصير معارك طاحنة وبجي وعياط لأن تحفزت عدهم مشاعر التوتر والقلق تاليها ممكن للأسف تمد ايدك وتضرب الطفل
بنتي سنة ونص (طول اليوم فقط 15 دقيقة او 25 دقيقة) تشوف التليفون لأن أكو حساب مال بط تحب تشوفهم شلون يركضون ويصيحون واك واك وراها اخذه منها، صح رح تبجي بس عادي أشتت أنتباها اخذها للزحليگة او تشوف البزونة او نصعد بالسطح مجرد دقيقة وخلص تنسى ..
مدا أكولكم أني أم مثالية لو أحسن وحدة بالعكس كل يوم اخطأ بس أتعلم وأطور أفكاري للأحسن وأبحث وأقرة وأطلع على كذا مقال وكتاب حتى أعرف شلون أتعامل بالمواقف مستقبلاً ولأن هو هذا الصح ..
التربية مو سهلة أبداً فلازم نثقف نفسنا ونزيد معلوماتنا لخاطر أطفالنا الحلوين
المنشور منقول من كروب عظماء المستقبل
لكاتبته ايمان حميد
طبيب العائلة الإلكتروني للإستشارات الطبية والتوعية الصحية
#إِنَّ_اَللَّهَ_لَيَغْضَبُ_لِغَضَبِ_فَاطِمَةَ_وَ_يَرْضَى_لرِضَاهَا.
قناة التيليكرام
t.me/Electronicfamilydoctor
للتواصل معنا
t.me/OnlineFamilyDr
او عبر الفيس بوك
https://www.facebook.com/طبيب-العائلة-الإلكتروني-2091513481061328/
1.3K views18:38