2021-09-04 21:09:03
#ركضو_عكس
دخل مسلم بيده راية وشاد بعيونه النگاب
دخن وضهضب وعَيَّت فوگهم حل العذاب
گام يردم زلمة زلمة وشالها وما خله باب
من صفت بس هوَّ واگف والجثث فوگ التراب
ماكو بيهم روس ثاري لكربلا موصل الرگاب
يا دخيل عيونه .. حيدر يسمونه
لخيام حسين، گام يشمّر بالخيل
وامسلما.. وامسلما..ـــــــــــــــــــــــــــــــــــــــــــــــــــــــــ
منين ماشردو يجيهم وي مسلم حيرة هاي
صاح اخر جندي يركض هذا مسلم من وراي
شردو وصيّح الاول هذا من گدام جاي
صارت اليسرة يمين ومابقى اعله الجيش راي
هذا عود الصار كله وطوعة ما مطيته ماي
بيهم اشجع واحد .. گبل مسلم شارد
چا طب للشام، مسلم لو شارب ماي
وامسلما.. وامسلما..ـــــــــــــــــــــــــــــــــــــــــــــــــــــــــ
صعد خيّال الهواشم والمهر شگ الرياح
صوته يشبه صوت حيدر چنه آذان الصباح
صاح والخيالة گامت تعثر بذاك الصياح
الجيش من گد خوفه يركض مامخلي مستراح
هيبة مسلم ظال واگف والقصر بالكوفة طاح
الخيل تعّب حيلها .. الگاع راد يشيلها
مسلم ماطاح، راية بچف العباس
وامسلما.. وامسلما..ـــــــــــــــــــــــــــــــــــــــــــــــــــــــــ
غيّم اعله الكوفة مسلم گام فوگاها يحوم
ظلمة صارت من دخلها وعجَّت تراب وسموم
هذا مات وهوَ واگف ذاك مايگدر يگوم
شكو طلابة وبيها مسلم سيفه يگضيها ولزوم
شمرة العباس عنده وسيفه يوصل للنجوم
مثل حيدر نازل .. يا شبيه الكافل
شرَّدها الگاع، مسلم مثل العباس
وامسلما.. وامسلما..ـــــــــــــــــــــــــــــــــــــــــــــــــــــــــ
ساكت ويرهب سكوته وچان اعلى من الصهيل
صاحوا دخيلك وگلهم ماكو عد مسلم دخيل
انه ابن هاشم وهاشم خلفت وين الثگيل
منين ما مالت مهرته السبعة ويا هم تميل
ركض والسبعين ركضوا عكس مسلم بن عقيل
من يطگ بچفوفه .. تصير حمرة الكوفة
قائدهم صاح، ذب راسك واركض حيل
وامسلما.. وامسلما..ـــــــــــــــــــــــــــــــــــــــــــــــــــــــــ
صلى بالميدان مسلم وبعزم طال القنوت
وزار الحسين وتبسم گاله ابشر راح افوت
سيفه بگرابه وگضاهم ماطلع من سيفه صوت
كلها موتة وگام هوّس مايحب هذا السكوت
طبها راعي الغيرة .. حيراهم حيرة
مابيهم روس، شردوا حتى الميتين
وامسلما.. وامسلما..ـــــــــــــــــــــــــــــــــــــــــــــــــــــــــ
✿ اداء: سيد فاقد الموسوي
✿ الشاعر:السيد محمد والسيد محمود الموسوي
✿تليگرام: قصائد سيد فاقد الموسوي المكتوبة
@facdy
2.2K viewsedited 18:09