2021-08-15 23:38:24
#سلبوه_بده_يطيح
ميت وصحتك وينك
يالحسن فتش عينك
بس حرم ظلت وياي
گوم الحگ اعله حسينك
حسينك اذا مات .. اذا مات .. اذا مات
يـمـشـن سبـيات .. سبـيـات .. سبـيـات
گوم الحگ اعله حسينك ..
ـــــــــــــــــــــــــــــــــــــــــــــــــــــــــــــــــ
بعد اخوك..
حسين واگف وحده .. ودايرة عليه العده
كون تسمع صوتي
بعد اخوك..
عطش وتراب وهوا .. وحمرة صارت نينوى
وگمت اشوفن موتي
خوية.. واگف.
وهدومي.. بس ارمش تنسلب
خوية.. نازف.
وارسومي.. يحرگ بيها اليهب
گوه واگف منتچي بهيبة علمنا
بس اطيحن خوية تتفرهد خيمنا
خوية وينك خايف يتيهن حرمنا ..
متانيك وانه بنوحي
والخيم هاي جروحي
من كثرما بيه سهام
واگف وطلعت روحي
اسمع بالخيام بده صياح .. بده صياح
وافزع والرماح تذبني اعله الرمـاح
گوم الحگ اعله حسينك ..ـــــــــــــــــــــــــــــــــــــــــــــــــــــــــــــــــ
فدوة گوم..
صدر اخيك مختنگ .. بعد ساعة وينسحگ
والعده يطشرونه
فدوة گوم..
لاحرمكم تنسبي .. وتركض متيهة العبي
وانه حالي شلونه
مايل.. ضهري.
وعيوني.. دايرها اعله الخيم
لازم.. گلبي.
بچفوفي.. وبضهري شچم سهم
خوية من گد السهام البيه تدري
تيهت ياهوه ضهري وياهو صدري
ياسهم منهم يجيني نطيته عمري ..
بسهامهم غطوني
والدم خذاها عيوني
يردون الحسين يطيح
حتى العده يسلبوني
وسبعين الف صوت سوه تصيح .. سوه تصيح
سلبوه بده يطيح .. بده يطيح .. بده يطيح
گوم الحگ اعله حسينك ..ـــــــــــــــــــــــــــــــــــــــــــــــــــــــــــــــــ
حيله راح..
حسينكم من العطش .. لاتنفس لارمش
والسيوف تريده
عالرماح..
من وجع گلبه انتچه .. وروحه تطلع لو حچه
والخيام بعيدة
حاير.. اشهگ.
والضامي.. من يشهگ ينلچم
داير.. وجهي.
اعله خيامي.. خاف من امشي انثلم
يلهب الحر بالهوا اعثر هذا حالي
انه واگف والضوه يمر من خلالي
وشجرة سهام الهم يبين خيالي ..
مكسور ضهري وحيلي
بالموت گمت ادعيلي
من ارد زينب تحتار
تشكيلي لو تبچيلي
خاف اگطع الصوت عده تفوت .. عده تفوت
للخيمة وام عون ترا تموت .. ترا تموت
گوم الحگ اعله حسينك ..ـــــــــــــــــــــــــــــــــــــــــــــــــــــــــــــــــ
من السموم..
ظلمة صارت نينوى .. واشهگ ترب وهوا
ومني رايح شوفي
شلون اگوم..
سهام متروس وطحت .. وانه طايح اشرت
عالخيم بچفوفي
شافوا.. چفي.
وركضوله.. وتسلب خنصري
رايح.. صوتي.
وي راسي.. وصحتك من منحري
ضامي ومسلب غريب وكلها هيمة
الله كون يعين الحسين اعله ضيمه
شدة صارت والعلاوي بلاية خيمة ..
التمن بنات اعليه
مچوية يم مچوية
ياخوية والعلويات
تيهن كلهن بيه
صاحن خذوه وين .. خذوه وين .. خذوه وين
مو هذا الحسين .. الحسين .. الحسين
گوم الحگ اعله حسينك ..ـــــــــــــــــــــــــــــــــــــــــــــــــــــــــــــــــ
من گفاي..
طعنوا بضهري وطحت .. مدري چم مرة متت
وركضوا يسلبوني
حيرة هاي..
هذا عينه لملبسي .. وذاك ماخذ محبسي
وعالوجه گلبوني
نايم.. مچفي.
وگلبوني.. ولموا خيل العده
صاحوا.. ركضوا.
اعله ضلوعه.. مادامه الوحده
ركضوا بخيل اعله صدري وطشروني
من كثر مابيه سحگوا تيهوني
للمخيم يم حرمكم وصلوني ..
تراكضن نسواني
وتلاگن بعدواني
ردت افزعلهن بس راس
بس الرمح كضاني
زينبنا شتصير للحسين للزغار
وحدها والخيل والخيام دوت نار
گوم الحگ اعله حسينك ..ـــــــــــــــــــــــــــــــــــــــــــــــــــــــــــــــــ
✿ اداء : سيد فاقد الموسوي
✿ الشاعر : سيد محمد الموسوي
✿تليگرام : قصائد سيد فاقد المكتوبة
@facdy
1.5K viewsedited 20:38