2023-05-16 23:15:52
بعد الحرب دي تنتهي كل زول حيكون عندو قصص كتيييرة يحكيها ..
اي زول حيكون شاف الموت ألف مرة ومرة وباألف طريقة كمان..
حيجي اليوم النحكي قصصنا دي لأحفادنا واحنا بنضحك وما مصدقين كيف رغم كل الموت الشفناه دا احنا نجونا وبأعجوبة!
صدقوني كل ما تضيق وكل ما تشوفو انو النهاية قربت و ماف أي أمل للخلاص وماف أي حل خلاص..كل ما كان الفرج قرب ..
أصلاً هي بتضيق شديييد كدة عشان تفرج ..
شفتو شعور لما الكهرباء تكون قاطعة بالأيام و الموية ناشفة من المواسير و من الوضايات
و لما ننسى طعم الموية الباردة ونشرب الموية السليقة في الجو الحار والعرق النازل ..
ونكون خلاص اتأقلمنا على الوضع دا
وبعد شوية تضرب دانة تهز البيت وتهز قلوبنا وتخلينا نتدس تحت السرير كأنو السرير حيحمينا وهو اضعف من انو ينقذنا أساساً..
شفتو شعور اننا نكون اتعودنا على السخانة والتلاجات الأكل الفيها كله خرب وبقينا نعمل اكل قدر حوجتنا بس؟
وحتى تعبنا من اننا نسأل الكهرباء حتجي متين؟
طبب اخوانا ضهورهم وجعتهم من نقل الموية..ياربي الموية ما حتجي؟؟
وخلاص بقينا ما بنسأل الأسئلة دي لأننا فاقدين الأمل من الكهرباء والموية .. وفجأة بدون أي مقدمات هووووووووب الكهرباء تجي!!!
بعد ما قطعنا العشم في الكهرباء رغم حوجتنا ليها .. نسمع صوت المراوح اشتغلت والأنوار النسينا شكلها فجأة بتضوي الحتة كلها وبتضوي قلوبنا معاها
شفتو الصرخة بتاعت الفرح البتسمعوها من اي بيت في الحلة بداية من بيتكم لحدي اخر مربوع؟ ..
الصرخة بتاعت عدم التصديق .. والفرح .. والمفاجئة ووووووو
والسجود بتاع الشكر الفوراً بنسجدو فرحا وامتنانا
ديل حيجي يوم
في لحظة أبدا احنا م متوقعنها
وينتهي كل الدمار دا !
و تتحرر الخرطوم الجميلة وكل ارجاء الوطن الحبيب من الاستعمار الحصل ليها فجأة دا
حنطلع الشارع نحتفل
نبتهج
ونقرع الطبول
ونغني ونصفق ونحضن بعض ونبارك تحريرنا للأبد
حنعيش الحياة الطيبة والعيشة الرغدة البنستاهلها
وحيرجع السودان قوي وعزيز وامن ومطمئن ومتماسك..حيرجع السودان سلة غذاء العالم ما عارفة متين بالظبط بس متأكدة انو نصر الله قريب بإذن الله
#زُبيدة_الزومة
#زُبيديات
382 viewszubida Alzoma, 20:15
ك
