2023-05-06 14:52:56
الحرب علمتنا كتيير..
علمتنا التدبير..
علمتنا نقتصد في كل شي ابتداءً من الموية الكنا بندفقها عادي هسا اتعلمنا كيف نوفرها..
علمتنا كيف نحتفظ بالأكل اطول فترة ممكنة..
ورتنا اننا كنا في خير ونعم كتييرة ما كنا حاسين بيها..
خلتنا نستدرك نعمة الكهرباء ، الموية ، الانترنت ، الغذاء المتوفر بسهولة ، وأهم نعمة على الإطلاق هي نعمة الأمن والأمان الما كنا حاسين بيها مطلقاً!
الحرب خلتنا نتلم على أهلنا .. نحبهم نتونس ، نلعب ، نضحك ونفرق جو معاهم .. خلتنا نستدرك نعمة الأسرة وجوها الجميل الما كنا مستشعرين نعمتهم مع زحمة الحياة!
فجأة اكتشفنا انهم ظريفين و القعدة معاهم بالدنيا!
الحرب خلتنا كلنا نتمنى نرجع حياتنا الطبيعية الكنا دايماً زهجانين منها وبنشكي ونبكي!
الحرب غيرت جوانا كتيير..الما كان بحسن لشغله هسا نفسو الحياة ترجع عشان يحسن ليه
الما كان بلاقي اصحابو هسا مناه يلاقيهم
الما كان مجتهد في دراستو .. هسا نفسو الحياة ترجع ويجتهد ويدرس ويتمنى الزمن يجري سريع عشان يتكتب من الناجيين ، قصدي من الخريجين!
في بلد ما مفهومة و ظروف بتتقلب كتير..
الحرب علمتنا الصصصبر
علمتنا نرضى بالقليل
ونرضى بالمافي أصلاً
علمتنا نلوك القرض!
لأنو مهما اتجرسنا ماف شي حيتغير!
الحرب لما تنتهي
حنكون ناس قويين شدديييد
تاني البهزنا ما حيرمينا
حنقدر نعيش في اسوء الظروف و نطلع منها الجنة !
الحرب ملتنا يقين بالله
ورتنا انو الموت قرييييب شديييد
اقرب من نفَسنا الطالع والنازل
احنا مهددين في أي لحظة للموت
عشان كدة لازم نعمل لآخرتنا ونبطل نعيش الدنيا كأننا ضامننها
لأنها الشي الوحيد الما مضمون
لازم نبطل الأنانية وحب الذات
نبطل نخلي كل شي لنفسنا لأنو ممكن في اي لحظة نمشي ونسيب كل شي ورانا
الحرب ورتنا انو عشان الحياة انت ممكن تسيب بيتك و حتتك وذكرياتك وكل شي بتحبو وراك وتهرب!
بس المصيبة حتهرب للمجهول!
ماف زول ضامن الطريق والوصول
ماف زول ضامن الحتة الحيمشيها هي فعلاً الأمان ولحدي متين؟
عشان كدة أهم درس أهم درس المفروض نكون اتعلمناه
هو التوكل على الله
والآية حقت
""الذين قال لهم الناس ان الناس قد جمعو لكم فااخشوهم فزادهم ايمانا وقالو حسبنا الله ونعم الوكيل !!"
المفروض الآية دي تكون اسلوب حياتنا وطريقة تفكيرنا تاني
انو لن يصيبنا إلا ما كتب الله لنا
والبجي من ربنا كلو سسسسمح
#زُبيدة_الزومة
#زُبيديات
944 viewszubida Alzoma, 11:52