2022-02-27 21:20:47
بين الجمعه و الجمعه .. حديث الثّار و الدمعه
او بِينه چم علِي ابْن اِسْويِد و ايْتاني
جمعه لموسى بِنْ جعفر .. او جمعه ابن الحسَن يظهَر
او يا مسجون أشَد سجنه من الثاني
نشوف الحالْ - السِّجِن أشكال
ــــــــــــــــــــــــــــــــ
(عليُّ بْنَ سُوَيْد) ايگول رحِت للشيعه بيتٍ بيت
أبشّرها الفرج گرَّب او گبل هاليوم ميِّت رِيت
شگول !؟ .. امصاب ايحيْر العُقُول
گلْت الجمعه الإمام .. ايعود إلنه مِن جديد
إجيت .. او لمّن جيت اشلگيت !؟
سكته و يوصلني صوت .. بس خَرْخَشْةِ الحديد
انفتح باب السّجن لَنَّه .. گلِت هسه يعود إِلنه
إمامي من عگب ما طوَّل افراگه
توقّعته لمَن يطلَع .. ابسلامه و منهو يتوقَّع
يطلع ميِّت امْرَضرَض عظم ساگه
ولا عالبالْ - السِّجِن أشكال
ــــــــــــــــــــــــــــــــ
گلت بالجمعه راح افرح لچَنها الفرحه ما تمَّت
گلت راح أسمع البشره سِمَعت اجنازته انْشِتمَت
كلام .. ما ينگال لْــ إمامْ
يالمهدي ايْعز عليك .. تسمَع سبِّ البتول
نِريد .. اتفك من رجله الحديد
لابد يومك يحين .. مهما الجمعه تطول
جدّك عالجسر بعده .. يريدك من تجي عنده
دُوَه ابإيدك تجيب لچَبده لتفطَّر
السلاسل تاكل ابجْيده .. و الأغلال التحز بيده
و إنته ابغيبتك مسجون تتنطّر
بلا أغلالْ - السِّجِن أشكالْ
ــــــــــــــــــــــــــــــــ
طبيب الفحص جثْته او گال وين أهله اليحضرونه
يعني يمته أبو صالح يگرِّ ابجيِّته اعيونه
رهين .. يترقّب من سِنين
نعشه الطاهر طريح .. و اعْيونه ابإنتظارْ
يجيْه .. او يطلب دمَّه ابإديه
او يجبر عظمه الكسير .. و ايْردِّ لجده ثار
موسى الكاظم ابگبره .. او عينه امْن اللطم حَمره
او لي هسَّه أثرها لطمة السِّندي
من وسط اللِحد شابح .. جفنه يريد أبو صالح
و اينادي العجَل يوْليدي يالمهدي
صِدَگ من گالْ : - السِّجِن أشكال
ــــــــــــــــــــــــــــــــ
مثل وگفة علي ابْنِ اسْويد او حنينه او شوگ الِبْـ گلبه
ابكل جمعه إلي وگفه ابْحنيني اْو أقره بالنُدبه
ابدموع .. أصرخ هل من جزوع ؟!
ايعاونّي اعْله البكاء .. حتى الغايب يعود
سجين .. وحده او ماله مُعين
محكوم ابـ [ ألْفِ عَامْ ] .. بس من غير القُيود
مو شرط السِّجن لازم .. مثل طامورة الكاظِم
أبو صالح سجين او غيبته سِجنه
و إذا موسى خلص حَبسه .. سجْن المهدي لي هسَّه
ولا نعلم متى يوم الفرج عنَّه
گِصَر لو طالْ - السِّجِن أشكال
ــــــــــــــــــــــــــــــــ
إذا هالدنيا محسوبه سِجْن المؤمن ابهمها
إذن عالغايب المهدي اشلون الدنيا نفهمها ؟
طِريد .. عن أوطانه اْو بعيد
سجنه ابكبر الوُجود .. حگِي امْن انحَب عليْه
يغيب .. او ما صَحْ مثله غريب
والله اعليَّه عزيز .. ما كحِّل عيني بيْه
مهما الجمعه تتأخر .. لابد ما يجي اْو يثأثر
او يكسر طوگه و ايْعود لْهله اْو ناسه
أظل كل العمر ناطِر .. باچر لا عگب باچر
يرد و اعْمامة الكاظم عله راسه
البعُد چتّال - السِّجِن أشكال
ـــــــــــــــــــــــــــــــــــــــ
بين الجمعة و الجمعة
الكويت – رجب 1443
ميرزا عادل أشكناني
5.0K views18:20
م
