2021-09-05 17:26:48
طفلك ما يرضى يأكل
و منو ما عنده هذا الطفل اللي يعاني من فقدان الشهية
#فقدان_الشهية
ابشركم عندي الوسطى فاقده للشهية
و الاولى كانت كلش فاقده للشهيه
و هسه دا اسويلها ريجيم
طبعا كل الامهات تكول ان طفلها ما ياكل والسبب مثل ما كلت ببوست سابق انت !!!!
جربي الاهمال دامك لازمه الماعون و الخاشوكه و تركضين وره طفلك ما راح ياكل
انت دا تاخريه على احلى شي بحياته اللي هو اللعب
يحب اللعب اكثر من الاكل و الشرب و اكثر منك كذلك
**كل واحد اله مساحه حريه و استقلاليه و جبرك لطفلك على الاكل بصراحه لا حضاري و لا مستقل و لا راح يعلمه على اتخاذ ابسط قرار بنفسه
كلما يلتفت يلكاك انت و خاشوتك و تعال هم هم و تركضين وراه
هووووب
توقفي
مثل روسي يكول
""حتى الجنة لا يساق لها الناس بالعصى"
.
اكو اطفال تاكل مثل البلبل كل شويه
عادي و شنو يعني
ماهو معدته مو بكد معدتك
خلي ماعون صغير او علميه يفتح باب الثلاجه كلما يجوع
و بلا جبر
* كافي تكولين لخالتك و عمتك و بيبتك ما ياكل ما ياكل ما ياكل ما ياكل ما ياكل
حتى هو نفسه لعبت هلكد تكوليها
و الله مل الطفل من الالحاح بالموضوع
اتركي الموضوع
* اساليه شنو تاكل ؟
يعني انت ما تحبين البيض
و ترديه الا ياكل بيض !!!
صباح الخير زين ليش الديكتاتوريه !
اني ما احب فلان اكله
ليش اجبره عليها !!!
بنتي الكبيره ما تحب لا البيض و لا الجبن و لا اللبن !
بس هل اجبرها ؟
طبعا لا
هي ذوقها و هي حرة
* كافي حليب و جبس و عصير
و الله لو انت تشربيهن انت راح تنسد نفسك
و العصير كله سيء
طبيعي او صناعي
علميه على الاكل
مثل يكول
Never drink your calories
اي ابدا لا تشرب طاقتك
* كثر الحليب راح يؤدي الى فقر الدم
و فقر الدم اكثر سبب لفقدان الشهيه
من تراجعين طبيبك خلي يفحصه او سوي له تحليل
بالمناسبه هاي
ماكو رقم ثابت لفقر الدم
بعمر سنه ممكن يكون الهيموكلوبين بنسبه ١٠ و نص طبيعي
و بعمر سنتين ممكن يكون ١١ طبيعي
لذلك كل عمر و اله نسبه دم معينه
و بس
سهليها
اهملي الموضوع
لا تحجين عنه كدامه
لا تتوترين
و توتري طفلك
د. سيف سمير البياتي
أخصائي طب الاطفال.
458 views14:26