2022-07-04 01:58:10
شکراً ابا عبد الله يل خدمتك رفعه وجاه
فضلك علي جبير خادم الك اصير
شکراً ابا عبد الله
ــــــــــــــــــــــــــــــ
يانور من ساگ العرش نازل بهيئة انسان
یا معجزة بسورة فجر يلگاك مو ياهو الجان
كل خادم بذله يحس لو خدم غيرك ينهان
وانته بحسابك يختلف حتى اليخدمك سلطان
الف انعم الله يحسين مطلوب الك هذا الدين
كبلك جنت فقير خادم الك اصير
شکراً ابا عبد الله
ــــــــــــــــــــــــــــــ
جبريل مأمون الوحي وابخدمتك راد ايكون
واشچم رسول وچم نبي لهذا الشرف يتمنون
كل الملوك ابحضرتك لمن يجوك ايدنگون
لو ترضه اصيرن لك عبد مولاي جدا ممنون
يا اغلى شي عد جدك لو ترضه اصيرن عبدك
بحبك صرت اسير خادم الك اصير
شکراً ابا عبد الله
ــــــــــــــــــــــــــــــ
يل دللتني بخدمتك فضلك علي صار هواي
من مستحاي اتلعثمت خجلان يمك مولاي
انته ابدماك اتغسلت زحمه انه ابچي لك ماي
يل طحنو ضلوعك طحن اعميها الك هاي وهاي
ما ضل عظم سالم بيك عود انه الطم واوفيك
وانته الچنت أمير خادم الك اصير
شکراً ابا عبد الله
ــــــــــــــــــــــــــــــ
يا رحمة الله الواسعة وباب النجاة المفتوح
لو هاجت امواج الفتن وياك مايغرگ نوح
ارواح يمك نلتقي كل روح مشتاگه لروح
عطر الجنان بحضرتك ضلت مجالسنه تفوح
بارواحنه من انزورك تسحرنه طلعة نورك
وابحضرتك نطير خادم الك اصير
شکراً ابا عبد الله
ــــــــــــــــــــــــــــــ
ياباب فاطم حضرتك تكشف كربته المكروب
عندك مفاتيح الحجب شيسوي گلبه المحجوب
انته التدلي بالدرب كل مذنب الجاي ايتوب
ندمان اجيت المجلسك يا سيدي وكلي ذنوب
مولاي احلفك باختك داخل اجيت ابختك
تخليني ما احير خادم الك اصير
شکراً ابا عبد الله
ــــــــــــــــــــــــــــــ
نعيم ابو باقر الساعدي
1.0K viewsالشاعر نعيم الساعدي, 22:58
ق
