2021-08-16 13:52:56
للقاسم
على لحن مسلم الوائلي
كَلبي ضامي
يا زماني .. فكَد ابني عماني .. هذا اليوم
بلايه زفّه ... يرجع دامي جفّه ... وكلّه ادموم
يويلي يويلي ... بدّل فرحاتي ابدمعه
يويلي يويلي ... ريح الهم طفّى الشمعه ... يجاسم
ــــــــــــــ
ليش الزمن مني باكَ ... وردة حياتي اوروحي
وآنه النطرت افرح يوم ... شو كَلبي ذاب ابنوحي
يبني كَلّي ياذنب سوّيته
وثوب عرسك بالدمه صبغيته
شموعك اكَبالي طفت يبن الحسن
تبدّه ماي البلعمر لمّيته
حريمه حريمه ... دلالي اكَبالي مكَطّع
هظيمه هظيمه ... متخضّب لمّك ترجع ... يجاسم
ـــــــــــــــــــ
يوليدي كل ام ترتاح ... ضنواهه كون اتزفّه
وتنظرله بين الشبان ... والحلقه تضوي بجفه
وانه يبني خلّصيت اسنيني
متانيه الهل ساعه ومتانيني
تالي بالخيمه تضل هاي الثياب
وصورة المذبوح تترس عيني
عجيبه عجيبه ... دارت دنياي بموتك
مصيبه مصيبه .... يمّي وما اسمع صوتك ... يجاسم
ـــــــــــــــــــ
يا ما حسبت آنه حساب ... وخيّطت بيدي اهدومك
ويوميه اعيشن بالبال ... جسام زفّت يومك
جنت اسولف بالعرس لخوانك
وبيدي يبني حضّرت نيشانك
وجنت اكلهم راح نفرح بالزفاف
ليش يبني ينكَطع شريانك
ضنوني ضنوني ... خابت يوليدي اشبيهه
عيوني عيوني ... لجلك صدّك لعميهه .. يجاسم
ــــــــــــــــــــــــــ
بالخيمه حضرت اشموع .... ومعزومه كل عمّاتك
وحضّرت يوليدي الياس ... وجنت انتظر هوساتك
وكل عمامك يبني يم اخيامك
رايده اتهوّس فرح جدّامك
رحت للحومه واتاني اترد الي
جابك حسين وتخط اجدامك
دمعته دمعته ... ترست لمصابك عينه
حسرته حسرته ... مابي حيل ايحاجينه ... يجاسم
ـــــــــــــــــــــــــــــــ
يمّك اجيت اوّنيت ... يبني واشم اجفوفك
نايم يبو عيون اوساع ... والدم صبغهه ازلوفك
جسمك مطبّر يضي عينايه
والجروح البيك حيل اهوايه
يبني ماعندي جفن حيل اعتذر
راح اجفننك ابهاي الرايه
خضيبه خضيبه .... جثّة جسام اكَبالي
سليبه سليبه ... امك تمشي ابلا والي .. يجاسم
ــــــــــــــــــــــ
الشاعر محمد حسن ضيغم
https://t.me/kasaedalatharDaygham
190 views10:52