2021-08-13 11:29:36
بويه صح باجر اضل اوحيده
وبعد ما الزم اخيي من ايده
ـــــــــــ
بداعت عيوني التهل حاجيني
صدك باجر وحدي اتخلّيني
خلاف عبد الله منو ايسليني
زغير محلاه من اشمه ابجيده
ــــــــــ
رد عليّه وخلّي اسمع جلمتك
بويه لتصدلي وتكفكف دمعتك
صعب تكسر بويه خاطر طفلتك
اتعيفني واعرف السفره بعيده
ــــــــــــ
كلكم اتروحون بس ابقه أنه
يوم فركاكم احسبنّه بسنه
بويه اودع وياكم ايام الهنه
الدهر للفاكَد مناحه ايزيده
ــــــــــ
بويه خلّي وياي عبدالله الولد
وياه اتسلّه وأهز ليه المهد
تسولف عيوني العيونه لو كعد
يمته يرجع والدي وعضيده
ــــــــــ
بويه عبدالله اخيي وتدري بيه
أمن انولد لليوم متعوده عليه
اه لو خليت ايدي ابين اديه
احس دم كلبي نبض بوريده
الشاعر محمد حسن ضيغم
بعيني اشوف حسين من راح الحميده
كَعد يمهه براسهه ضل يمسح ايده
ــــــــــــــــــــ
راح يمها ومن مشى ضل ظهري محني
شابج جفوفه واحسّن خاب ضني
دموع عينه التهمل بكَلبي جونّي
كوّه حابس عبرته اووّنه يزيده
ــــــــــ
شاف من ابعيد طفله تريد ابوها
وتستحي اتناشدني بس نشدة اخوها
آه يا بت مسلم الّي دللوها
خلاف ابوها الطفله تتصور وحيده
ــــــــــــــــــ
حسين يعرف حال مسلم والجراله
اسع يكَلها ابوج آنه ابداله
بحضنه خلاها ودمع عينه تلاله
وكَله بويه سفرة الوالد بعيده
ــــــــــــــــ
من مسح راس الحزينه بجف يمنته
تكَلّه حال الوالد بفعلك عرفته
بويه يحسين اليتم هالساعه شفته
راح ابوي الناطريت اهلال عيده
ــــــــــــ
صرت عمي آنه انحسب من اليتامه
خلاف ابوي الليل عمّي ما انامه
دمعة عيونك يبو اليمه علامه
الكوفه غدرت والدي وانحز وريده
ـــــــــــــــ
الشاعر محمد حسن ضيغم
بلهفة ضنوني ,, ودمعة عيوني .. نخيتج
فدوه مولاتي ...اكَضي حاجاتي ... نخيتج
ـــــــــــــ
انتي ام الاربعه الكلهم نشامه
الضحّوا انفسهم لجل دين الامامه
اعليج بحسين الذي بكَلبج غرامه
خلّي بشفافي تضل دوم ابتسامه
كَلبي مو ذايب .. بهاي المصايب .. نخيتج
بفضيض دمعاتي ...اكَضي حاجاتي ... نخيتج
ـــــــــــــ
انتي باب الحاج ربّج خصّج بهاي
فضل هذا الفضل جيف اتحبّي مولاي
ارد اخبرنج همومي بكَلبي اهواي
ومنهن آنه يالحنينه امتيّه الراي
فدوه ارحميني ...بفرحه خلّيني ... نخيتج
صعبه مأساتي ...اكَضي حاجاتي ... نخيتج
ـــــــــــــ
يلّي متردّين واحد مدلج الايد
حتى لو كَلبه دعاج وهوّه ابعيد
ها يمولاتي ونيني بمحنتي ايزيد
غير عطفج لا يحره والله ما ريد
فرّجي الشدّه ..الدنيه مسودّه .. نخيتج
بلهب جمراتي ...اكَضي حاجاتي ... نخيتج
ـــــــــــــ
العايش سنينه بهظيمه ودمعه همال
ينطرج مولاتي انتي اتغيّري الحال
ماهجع من البواجي عندي دلال
بجاه ابو فاضل اريد المحنه تنزال
ما سكن روعي ... نشّفي ادموعي ... نخيتج
شكبر آهاتي ...اكَضي حاجاتي ... نخيتج
ـــــــــــــ
رافع اجفوفي وأنادي يم الاطياب
يلّي متسدّين مره بجفّج الباب
باب للحاجه وتعرفي شنهي الاسباب
ليش كَلبي بهل مصيبه واقعاً ذاب
جبري الخاطر .. بكَلبي الصابر ... نخيتج
وحشه دنياتي ...اكَضي حاجاتي ... نخيتج
ـــــــــــــ
الشاعر محمد حسن ضيغم
عليله ...ابجمرة احزاني
عليله ... وفاكَده اخواني
ــــــــــــــ
يا طيف مر اعله الجفن ....اوكحّل جفوني
بلجن انظر سلوتي .... وبطيفي يجوني
واخبرهم حالي صعب ... اهلي الفاركوني
وبيديه عباس الوفي ... يمسحلي عيوني
عليله ...افراكَه اذّاني
عليله ... وفاكَده اخواني
ــــــــــــــ
للباب ملّيت امنصد .... أي والحيره حييره
وحدي وكاتلني الهظم .... جي طفله زغيره
مسجونه ابدنيه قهر .. مو جنّي اسيره
والوالي راح وشني ... ما اعرف مصيره
عليله ...امغيّره الواني
عليله ... وفاكَده اخواني
ــــــــــــــ
المن احجي بقصتي .... ويسمعلي شكوتي
وحسين هم يسأل بقى ... وينادي طفلتي
ياريح روح الكربله .... اوبس وصّل حسرتي
واجروح مليان الكَلب ... خبّر فدوه عمتي
عليله ...الوالي خلاني
عليله ... وفاكَده اخواني
ــــــــــــــ
يا ليل تدري بالسهر .... مايرحم دليلي
وزغيره شكَد تنتظر ... شكد صعبه يليلي
عالعاف طفله بالنزل ... جم جمره ابغليلي
ويّاه ياريت اصبحت ... مئساتي ورحيلي
عليله ...وليلي بجّاني
عليله ... وفاكَده اخواني
ــــــــــــــ
ياريت يلفيني الاجل ...ولا حاله آنه اسمعه
مذبوح بالطف والدي ... وطحنوا ويلي ضلعه
وراسه انشال اعله الرمح.... والشامت يرفعه
وخنصر من جف يمنته ... بسيف الذل يكَطعه
عليله ...مصابه اذّاني
عليله ... وفاكَده اخواني
ــــــــــــــ
الشاعر محمد حسن ضيغم
204 views08:29