2021-08-08 16:12:06
قصيده جديده
كتبت بتاريخ 8/8/2021
الساعه الثالثه والنصف عصرا
هذا دمك لو دمه امن عيوني
بجفّي اشوفه من مسحت اجفوني
يا اعز من الهوه ... دمك ودمي سوه
بجفّي اشوفه من مسحت اجفوني
ـــــــــــــــــــ
حيرتني ... من بعيد وتزحف ابعيني اشوفك
حيرتني ... تريد تنهض كَوّه تتوجّه ابجفوفك
حيرتني...تريد امشي وانه مااكدر اعوفك
حيرتني ..تعثّرت بلساني من ضيمي حروفك
تريد ترفع راسك تصد لينه
يهوه من يسمع ونين سكينه
السوط من شفته التوه .... دمك ودمي سوه
بجفّي اشوفه من مسحت اجفوني
ـــــــــــــــــــ
بلايه خيمه ...ادري صعبه تشوف زينب هل ظهيره
بلايه خيمه ...ابين هذا وذاك تنشاف الاميره
بلايه خيمه ...عكَب كافل خدري اتحوّل اسيره
بلايه خيمه ...هل ضعن مجهول من بعدك مصيره
ارد اجيلك خويه لاجن خوفي
تشوف جمرات الخيم بجفوفي
مثل جف امي انجوه .... دمك ودمي سوه
بجفّي اشوفه من مسحت اجفوني
ـــــــــــــــــــ
خويه اجيتك ...خطوه خطوه واركض ابين الاعادي
خويه اجيتك ... انه اخيتك ياحبيب الزهره انادي
خويه اجيتك ...حضّرت لحبالهم هاي الايادي
خويه اجيتك ... فدوه الك روحي وحياتي وكل اولادي
عمامتك يبن الوصي جا وينهه
ضلوعك ابحافرهم امطشّرينهه
يا مصيبة نيتوى ..... دمك ودمي سوه
بجفّي اشوفه من مسحت اجفوني
ـــــــــــــــــــ
رد على اختك ...من كعدت وناشدت شنهي الجرالك
رد على اختك ...ليش لازم خنصر اليمنه بشمالك
رد على اختك ...عن سبينه وغربتي الوالي اشحجالك
رد على اختك ... من اروحن منهو اليباري العيالك
منهو مثلك رمل وسط عيونه
ومنهو رفسات الشمر بمتونه
من وكَع راعي اللوه ... دمك ودمي سوه
بجفّي اشوفه من مسحت اجفوني
ـــــــــــــــــــ
الزمت نحرك ... قبّليته ودمعي يتجاري على خدّي
الزمت نحرك ...راح اخوي وصحت غيره هنا شعندي
الزمت نحرك ...ونملت دم ودمع يحسين ايدي
الزمت نحرك ...اه منك يا زمن ضليت وحدي
الدم ترس ايدي وترسلي اهدومي
وصت اسمع يالله زينب كَومي
خفت بعيوني الضوه ... دمك ودمي سوه
بجفّي اشوفه من مسحت اجفوني
ـــــــــــــــــــ
الشاعرر محمد حسن ضيغم
https://t.me/joinchat/AAAAAD3arLByb3pZDNRJzw
92 views13:12