2022-04-07 15:33:51
اني اشوف الناس حساسين، وراح اضربلك مثال
تخيل فد يوم امك مالحكت تسويلكم غده، فبالرجعة تكلك تعال ابني روح جيبلنا فلافل سفري، دخلت للمطعم كتله الصاحبه بدون زحمة عليك اريد فلافل بخمستالاف دينار، وراك بدقيقتين دخل واحد كله اريد عشرين لفة سفري، فصاحب المطعم كام يمشيه قبلك، راح تعصب وتكله ليش مشيته قبلي مو سرايه هو ؟ يتفاجئ صاحب المطعم يضرب ايده على كصته ويكلك والله اني اسف اخوية ولا أنتبهت
يجي عليك يريد ياخذ من خاطرك وتمنعه بإيتسامة ويكلك حقك عليه دقايق وامشيك
ساعتها شراح تحس ؟ راح تحس أمتلكك بأسلوبه، وتكله على راحتك ماعندي شي، ومو بعيد تصير زبون دائم للمحل وتظل دائماً تجي.
الأسلوب هذه يخلي الواحد يصحى .
-تعرف اكو وحدة تبقى سهرانة للصبح من وره وحده كلتلها سمنانه لو طالعلج كرش !
زين تخيل واحد نفسه تنسد ولكمه مياكل ويبقى يباوع على اهله وعلى نفسه بالمراية لان كتله غير ملابسك مو مال هيج طلعة وهو على كد حاله.
مرات نشوف الموضوع ميستحق زعل الكدامنا وهو مكبر الموضوع، بس احنه مو هو
عمرك شفت واحد عنده مغص حسيت بالمغص مالته ؟
الهالسبب قاري حديث للنبي يكول خاطبوا الناس على قدر عقولهم، واليقصده مادام عقله تقبل فهم المقابيل ومشاعره تنجرح من كلمة معينه منحجيها حتى لو شفناها طبيعية بالنسبة النا.
ماكو شي اسمه ماكو داعي تشيل بخاطرك، لان هو صاحب ردة الفعل مو انت !
كل فعل نسوي نجربه على روحنا، حط نفسك بدال الشخص المقصود، راح تنجرح لو لا ؟ زين التصرف الفلاني راح يضايقني اذا صار ضدي ؟ ونبقى نقيس على كل شي.
الأسلوب هو اليحكم على جمال الشخص، لأن اَي انسان اول أمنية يتمناها بأنسان هي شخصيته، والأذن تحب قبل العين
اذا تصرفك وكلامك حلو
راح تظل حلو حتى لو شكلك عادي.
واليمتلك احساس وأسلوب احسن من مليون واحد يمتلك بيوت وقصور .
وكلكم عيوني
6.6K viewsأحمَد قاسم., edited 12:33