2022-09-02 23:12:08
وعلى ضوء متصل بالموضوع السابق
اغلب البنات معذورات بخوفهن من يتأخر زواجهن، لأن عادات مجتمعنا يجبرهن على ارتباط ممدروس تحت ضغوط قاسية محد يكدر يتحملها، ضغط اسرتها عليها من تشوف صديقتها انخطبت لو وحدة من الكرايب اتزوجت، غير ضغطها هي على نفسها بسبب ارتباط اصدقائها، الموضوع صاير للبنية المتأخرة بزواجها مثل الطالبة الكاعدة بيوم توزيع النتائج ومجاوبة بشكل ممتاز، تنتظر الاستاذ يصيح اسمها من العشرة الأوائل
يصيح اسم الاولى مو هي، يصيح اسم الثانية مو هي، يصيح عالثالثة ، شوية شوية ويه كل صيحة اسم وهي اسمها مموجود
حالتها النفسية تتعب، توترها يزيد، ويمكن هي اسمها يكون رقم 10 بس من كثر التوتر والضغط تتصرف تصرف يأذيها وتصرخ :
اسمي وينة ؟
الي هو بالحياة الواقعية (توافق على اَي واحد يتقدملها)
العالم النفسي "الفريد أدلر" بكتابة معنى الحياة، ( اصعب شيء يواجه الانسان هو اجبارة على تكملة حياته مع شخص ليس من اختيارة 100% ، حينها سيعيش بنصف حياة ونصف روح )
الممثلة الامريكية ومقدمة برامج مهمة ( اوبرا وينفري ) من أغنى السيدات بالعالم، اتزوجت قبل سنتين لو اقل، انشغلت 26 سنة تبني اسمها وتاريخها، نجحت نجاح منقطع النظير ، عدم زواجها ماجان عائق كدامها.
زها حديد معمارية عراقية اختيرت كرابعة اقوى امرأة بالعالم، ابداعها وتاريخها يسبقها، جانت ممتزوجة وهذا الشي ما خلاها عائق كدام طموحها
الزواج مثل اَي شغلة بالحياة ممكن تشوفة زين بأمور وترفضة بأمور ثانية، ماكو مشكلة اذا ما جاتي قسمتج او عمرك اربعين وما تزوجت بعدك، ماكو شي اسمة راح تعنسين او متلكه عروسة ترضى بيك، ولا الك ذنب اذا اجه نصيب اصدقائك من وكت.
صح الزواج بي متعة تشوف بي أطفالك يمك وتفرح بيهم، بس المشكلة اذا جان إختيار الأم خطأ او اختيار الاب مو صحيح
"الي تفكر صح وفاتها القطار احسن من التزوجت خطأ ودهسها القطار"
وكلكم عيوني.
5.7K viewsأحمَد قاسم., 20:12
ف
