فَكِّرْ

2021-07-02 18:32:15 إذا شفت بنية حلوة بالشارع گول الله يحفظها ويستر عليها ويبعد عَنها ولد الحرام، وإذا شفت بيت رُكن چبير بالمنصور كول الله يرزقهم، واذا شِفت شخص أكثر منَك مكانة بالمجتمع ومتوفرله كل الأمور الأنتّ تتمناها كول الله ينور طريقه اكثَر ويوفقه بحياته، واذا جانت صديقتج او بنت خالتج احلى منج وبشرتها صافية، لا تغارين منها وتعاديها، واذا شفتي شَخص طلّب من عِندج مُساعدة بالخاص أو بالشارع، ساعديه ولا تحسّين انتِ الوحيدة المخلوقة بهذا الكوكب وكُل الناس تتمنى قُربِج، ومهما يكون المقابيل فَقير وملابسَه متواضعة مجبور تحترمة وما تستهزء بي ابدًا، واذا شفت شخص لابس احلى من ملابسَك لا تحسّ بنقص داخلَك وتتمنى تكون كامل ومِثالي ، عُمر الملابس والفلوس ماتسوي الواحد مِثالي،

هذهِ التَفاصيل الصغيرة لو تُطَبق بمجتمعنا راح نحصّل مُجتمع رائع ومثقف وعقلاني
احترم الناس وحبهم وأتمنالهم كُل الخَير واشكُر الله دائمًا على حالَك مهما يَكُن حتى يوفقَك ويرزقك اكثَر.
واتذكّر مقولة الإمام علي "عليهِ السَلام"
(من لم يرحم الناس منعَهُ الله رحمتَهُ)


وكلكم عيوني. باز کردن / نظر دهید

2021-07-02 18:23:56 ‏المرأة في الشرق الأوسط تم اختزالها من إنسان وعقل وشريك وقائد وأنثى، إلى مجرد جسد، بل إلى مجرد جزء سفلي من الجسد يكون ملكًا للعائلة والمجتمع، ويدخل ضمن العادات والتقاليد والدين والوصايا. باز کردن / نظر دهید

2021-07-01 22:13:51 اليوم بنهاية مشاويري صديقي خابرني كلي تعال كاعدين بفلان مقهى من مقاهي بغدادنا، شفت الكاعدين ماعرفهم فقط اعرف صديقي، فالجماعة يحجون، هذاك العمره دخل الأربعين وهذا حافظ كل اغاني القيصَر وهذا مايرسم بس جسد الأنثى وهذاك الخبير بالهدايا والعطور وهذا اليكتب قصائد غزلية وحبجيات ومن هلنوعيات، طبعًا كلهم مزوجين فيحجون على معاناتهم ويا زوجاتهم والمشاكل الصغيرة التافهة التصير بينهم إلي تتحول سريعًا إلى مشاكل كبيرة تؤدي الى النفور والزَعل، ويبدأون بموجة تنمّر واستخفاف وإهانه لزوجاتهم، وسرعان ما كل شخص منهم يبدأ بالحديث حول البنيه الحاطها بالإحتياط، للأسف كُل شخص بيهم عنده بنية سواء مراهقة او موظفة او مُطلقة، حاطها جوه ايده شوكت مايريد يستخدمها، وهنه بكل غباء ورعونية قابلات.

اني دورّت حجة واترخصت من صديقي وطلعت من المَكان لأن كمية اشمئزاز وجهَل مو طبيعي وما يليق بشخصي.
فطرأ على بالي سؤال من دا اغادر المكان، ليش مُمكن الزوج يفكر بأنثى غير مرته؟
ورجعت سألت نفسي، طيّب هو شنو تحتاج الأنثى بالعراق !
جاوبت على سؤالي مُباشرةً، مو لسهولة السؤال لا، بَل لبساطة البنية ومتطلباتها.

كل بنية تحتاج للإهتمام، تحتاج لرَجُل يحبها من صدگ، يحبها مو لأن هيّ موظفة وشهادتها شهادة، وم لأن بت فلان، ومو لأن حلوه وجسمها مُناسِب، ومو لأن فقيرة وتشتغل خدامه يمه، البنيه تحتاج تحس بأنها مُقدَسة بعالم رَجلها، مُميزة وألها تأثيرها على رأيَه، تحتاج أحد يقدرها ويحميها ويصونها، وما يدور وراها فلوس ومصالح، تحتاج حنيّه وكلمة طيبة، وطلعة بمطعم سوية حتى اذا مرة بالشهر، تنبها دائمًا شكد هيّ حلوه وثمينة، والأكل مو طيب بس من ايدها، تكللها شكد صوتها دافي، تنبها دائمًا على تفاصيلها الصغيرونه الماتدري بيهن هيه وتدليها على جوهَر روحها الحلوه، تحب براءتها وطفولتها وتسامحها على هفواتها وتحتويها بحضنك إذا خطأت.

لو كُلّ زوج يسوي نص الكلتهن، ثق بالله كل قضايا الطلاق والمشاكل الزوجية تنتهي وتخلَص، البنيه بسيطة وما تحتاج منك بس كلمة احبج بنهاية الليل من ترجع تعبان.
وشوفها شلون راح تصونَك وتقدرك وتخليك على راسها، يكفي أنها شايله البيت والأكل وأطفالَك وهوستهم، بينما انتَ تسرح وتمرح بمنتهى حريتك.

فكر بيها يوّل .. فكر بيها شويه تره خطيه هم إنسانه مثلك وعدها مشاعر.

وكلكم عيوني باز کردن / نظر دهید

2021-07-01 21:28:06 صراحةً أني شخص آخر شي مُمكن يفكر بي او يسوي ويا الأنثى هو الجنس، مو استصغارًا بالموضوع لَكن ما يهمني ابد، يمكن لأن اكدر اتحكّم بمشاعري واضبط نَفسي دائمًا، ويمكن لأن اباوعله كأنهُ موضوع ثانوي بعلاقتي، مو رئيسي حتى يكون مُهم. فإذا شفت بنيه لابسة لبس غير لائق وبارزه جسمها ومرخصَة نفسها بالشارع او بالمول او بالكوفي، راح تثير اشمئزازي فقط لاغَير، وانظرلها بنَفس نظرتي للشباب الطايحين حظ اليتحارشون بيها، ويسموها بمُسميات مُثيرة،
اليوم للأسَف الشديد نُقطة ضعف الشاب العراقي خاصةً والعربي عامةً هو الجنس، يضعف كدام البنيه ومستعد يسوي كلشي وحتى اذا طلبت يترك أمه ويشمرها في سبيل 5 دقايق مُتعة مؤقتة، هاي الشهوة المحبوسة بين الطَرفين وقلة الوعي والثقافة والإيمان هيّ السَبب بمعظم المشاكل الدتصير للشباب،

الحَل بسيط أبني، إتعلم شلون تسيطّر على نَفسك وتروضها على التفكير بعقلانية دائمًا، ودبرلك چم فلس وأتزوج بما يرضي الله
ولا تصير أرعن.

وكلكم عيوني. باز کردن / نظر دهید

2021-06-30 20:52:00 . باز کردن / نظر دهید

2021-06-30 20:48:29 بطبيعتي من اضوّج اطلع أتمشى وحدي، قبل كم يوم طلعت بالبنوك بشارع الكنيسة تمشيت وبقيت فوك الساعتين بس امشي، صادف وتعبت شويونه رحت على ابو أسواق اشتريت بطّل مَي وما جان عندي صرف فنطيته 25 الف وصرفلي، رجعلي الباقي وطلعت من المَحل، دا اخلي الباقي بجيبي جان فجأة أنتبه على رُبع دينار مكتوب بي كتابات، اني طلعتَه مباشرةً وعقجت حاجبي عبالي سوالف مكسرة مال مشعوذين وكذا، بس ورا ماقريت شويونه من الكتابات أبتسمت جدًا.
من خلال ما استنتجته أنُ هيه طفلة بالابتدائية وكاتبة على الفلوس كلام حُب وأمنيات لصديقتها ودازتلهيا...بهذا الشكل

- الى صفا الجميلة، أتمنى لكِ سعادة.
- نحن الآن في الصف الرابع.
- أتمنى أن تصبحين مُدَرِسة.
- لا تنسين لأن انا احبك.
- ذكرى جديدة، صفا.

دا تقرون البراءة واللطافة والثقافة بالكَلام؟ بنية يادوب عمرها 9 سنين تكدر بطريقة مُميزة تعبّر عن مشاعرها بهذا الأسلوب، اني متأكد هيّ من عائلة مهتمين بيها جدًا، محتويها وموفريلها أبسط سُبل النجاح، من ناحية الرُقي الأخلاقي التربوي ومن ناحية الإهتمام والحُب، لأن لو ما مهتمين بيها وما يعّبرون الها عن مشاعرهم ماتعرف هيَّ شلون تعبر عن مشاعرها، بس صديقتنا ما جانت فاقدة من اهلها هذا الحُب والإهتمام بالعكس، لذلك شفناها بكامل رُقي تكتب لصديقتها هذهِ الجُمل الإنسانية البَسيطة والمؤثرة.

دائمًا اني بكتاباتي أركّز على شريحة الأطفال والمراهقين لأن همه النواة لكل مجتمعات العالَم، أحتووهم وامنحوهم الحُب والشجاعة والطاقة التخليهم يكونون مُميزين بحياتهم، وتخيلوا وياي لو كل الأطفال نفس هاي الطفلة، جان شلون صار مُجتمعنَا !

شُكرًا الها ولصديقتها صَفا، وللصدفة الجمعتنا بيهم، غيرتلي مزاجي بوقتها، جنت محتاج هلشي.

وكلكم عيوني. باز کردن / نظر دهید

2021-06-23 16:46:22 اعيدها واكررها دائمًا وخليها بالك وبالج.

جُملة "شخصيتك حلوه" أحلى بهواي من واحد يكلك انت حلو شكلًا" او مظهرًا. واحد يكلك اني معجب بعقلك او يكلك شكد تعجبني طريقة تفكيرك، احب رزانتك، اختلافك، اخلاقك، كلها تعتبر مميزات بيك
لو واحد يكلك تعجبني طريقة عملك، مثابرتك بشغلك، لو روحك حلوه والمكان صار احلى بوجودك لو واحد يحب طريقتك من تتعامل ویه مشكلة بهدوء من غير ماتنفعل والاحلى من واحد يكلك انت مثله الأعلى بالحياة كل ذني الأمور هوايه احلى من كلمة انت حلو لأن جمال الوجه والجسم ميغير طبعك بس جمال الجوهر راح ينطبع بملامحك ويخليك كلك حلو

إشتغل على نفسك وثقافتك وجوهرك الدخلي اكثر من جسمك ووجهك. مع مراعاة المظهر الخارجي طبعًا.
وتأكدي الي يحبج لأن حلوه راح يتركج بأقرب فرصة من تصيرين مو حلوه، والي تحبك لأن عندك عضلات وفلوس راح تتركك بس تفلّس وياكل الزمن جسمك.

وكلكم عيوني. باز کردن / نظر دهید

2021-06-23 15:46:28 احترموا أطفالكم واحضنوهم حتى وهمَ نايمين، راح توصللهم طاقة حب ومودة وتخليهم اکثر انسانية، كافي صنع نماذج مشوهة، كافي تهيئون للحياة بشر مقهورين ومتحرشين وتايهين وغير مؤدبين، اغلب اليعانون بكبرهم يسولفولي ويتذكرون طفولتهم بأسى وغضب، ذاكرتهم محفورة بمئات الأمثلة من تَخَلي اهاليهم عنهم وقهرهم والتحكم بيهم بأعتبارهم ملكية خاصة لو شخص مسلوب الإرادة . شبعوا اطفالكم حب واملوهم رحمة، صاحبوهم وانطوهم من ذوات نفسكم، لا تنطوهم مبایل وپلي ستيشن، انطوهم قصص مؤثرة وحكايات اخلاقية، علموهم شلون يحترمون الأكبر منهم وشلون يحترمون الأنثى اذا كانوا اطفال ذكور ولا تخلون الانثى تحس بأنها شيء صعب ومعقد خلوها تحس أنها مقدسة نعم لكن مو بالشكل اليجعلها مغرورة ومثل العصفور بقفص من يتحرر راح ينفلت.. ويوم من الايام راح تجنون ثمرة تعبكم، كُل يوم الصبح کرر هالجملة كبال المراية : ابنك مو جماد، بنتك مو كرسي، أطفالك مو عقار ولافئران تجارب

كافي تخلف للحياة شخص تخلي نسخة بائسة منك.

وكلكم عيوني. باز کردن / نظر دهید

2021-06-23 15:19:41 . باز کردن / نظر دهید

2021-06-23 15:19:07 اليوم ماكملت مشاويري لأن گلولي والدتي إجتي لبغداد رحت يمها حتى اشوفها، تغدينا وداشرب چاي، جان ألاحظها دا تسّبح بسبحة بيضة، منظر إعتيادي جدًا بس رَكزت شوية على السبحة ورحتلها إترخصت منها وأخذت السبحة يمي، بقيت صافن بيها شوية،
كلت هاي وين شايفها قَبل، شنو الذكرى التربطني بيها! بقيّت احاول استرجع ذاكرتي إلى أن إنتهت محاولاتي بإبتسامة چبيرة
تذكرت أول ذَنب إرتكبته بحياتي قبل 15 سنة تقريبًا، من سرقت 10 الاف من جنطتها بدون ماتدري، مبلغ صغير ما انتبهت مسروق منها، اخذت ال10 الاف ورحت اشتريت بيها حذاء رياضي لواحد ويانه بالفريق، يتيم .. مثلي
وماعنده يشتري حذاء، واتذكر بيومها طَلَع حِجه ع اساس مريض ومايكدر يجي، بس كلنا ندري هو فقير وماعنده حذاء.
رحت الظهر جبتلهيا قبل اللعبة، ومن كملنا وفزنا باللعبة وانتهت الأمور بخير
رجعت المغرب للبيت غسلت وتعشيت وكعدت وحدي، إتذكرت الذنب السويته اليوم
أول مرة أسرق شي وأول مرة اسوي مثل هلفعل، گلت بيني وبين نفسي هسه الله زعلان مني وبس انام يمكن ما يكعدني بعد،، واستحي اگول لأمي ،، شسوي احمد شسوي

رحت للمصلاية مالتها جان الكي نَفس السبحة البيضة هاي، أخذتها وبقيت اسبح بيها (استغفرلله استغفرلله) ساعتين الى ان غفيت بدون مادري.

تذكرت شكَد چنه أشخاص عدنا مخافه الله والفعل المو صحيح يبقى خلل وإن كان صغير وغير مُضر بس يبقى خطأ ارتكبناه ولازم نتطهر من عنده، من احنا اطفال أهالينا نمَّو بداخلنا روح محاسبة النَفس وتحمّل الأخطاء وصارت من مبادئنا وشيّمنا الأخلاقية.

واليوم اني اباوع على هذا الجيّل، جيل تعبان ومنتهي فدنوب، لا المراهق براسه خير ولا الطفل سليّم ويبشر بخير.

ديصنعون من هذا الجيل قنبلة موقوتة راح تنفجر أخلاقيًا وسلوكيًا من يكبرون بعد شوي،، انقهر اني على هذا الوضع الحالي واتمنى لو تتم إعادة برمجة التأهيل التربوي للأطفال.
وأول خطوة لازم تسووها حاليًا"سارعوا بإحتواء أطفالكم".


وكلكم عيوني باز کردن / نظر دهید