2021-09-03 20:32:20
جدي جان شخص عصبي وقوي, شخص غامض وصامت كل الوقت ولحد الان، شخص يحجي بأفعاله فقط، حكيم لأبعد حدود، وبنيته الجسدية ومظهره ماشاءلله, بالبداية جان جندي بالجيش بالستينات او بداية السبعينات تقريبًا، هو اقارب بيبيتي, يصير ابن عم ابوها وجيرانهم بصف الحايط، بيبيتي جانت اجمل البنات بعائلتهم وبالمنطقة كلها، جان الكل يريدها ويريد وصلها، وهيّ من النوع الآنسات المدللات المهتمة جدًا بشكلها وبأناقتها، قبل جانن كله تنوره يلبسن ومفرعات، وهيّ اصلًا بيضه ونازگه وترفه وتخبل فالعيون كلها عليها، جان يحبها هوايَ وما يكللها لان يستحي، تحجيلي والدتي تكول اعترفلها عن طريق باكيت مال شخاط (باكيت اعواد النار) جان يدزلها كلام عن طريق الكتابة على الباكيت، وبدت بينهم قُصة الحب العظيمة الي اغلبها بنظرات العيون وبالإبتسامات الخجولة.
بيوم من الايام واحد من العائلة راد يخطبها، وراح دا يتقدم عليها وجان جدي يسمع بهل شي ومباشرةً رايح مكسره تكسر ومتعارك ويا اهله ومهددهم اذا ترحون لبيتها تتقدمولها ثاني اليوم احرككم، ومتراجعين عن الموضوع طبعًا لان ميكدروله ..
جان يجيبلها غراض وهدايا بالسّر كلما يسافر وجان يخاف عليها ويغار هوايَ.
ولكن سرعان ما أخو بيبيتي الجبير درَه بهل علاقة ووكف ضدهم ومنعهم بشده، وجدي جان عنده مشكلة بالقلب وسوه عمليه، فأخو بيبيتي راح گاللها انُ تتركه وهذا مريض وكذا ... وبيبيتي انقهرت كلش وبقت تبجي، فجدي سمع بهل كلام وما استلسلم بالعكس صار عصبي فدنوب
مباشرةً راح اخذ اخوها بسيارته ووداه لچوله!(منطقة مهجوره) ونازل جدي وخانگه لدرجة الموت وگاله اختك ماتصير بس الي، بحيث رادت روحه تطلع وبالاخير كله اتركني بس اتركني هسه من نرجع انطيها الك
وبالفعل ورجعه للبيت وخطبله بيبيتي .. وتزوجوا احلى زواج
خلَف من عدها ٤ بنات، اكبرهن والدتي.
وخلَف باقي ولّد تقريبًا ٤ بس للأسف كل الولّد يموتون مباشرةً ورك الولادة وبيهم اليطول شهر شهرين ويموت،، اخوانه گالوا لجدي وحتى هيه بيبي كالتله اتزوج وحده اخرى حتى تجيب ولَد يشيل اسمَك, گللها مستحيل وما افكر بهل شي ، عندي اربع بنات دُرَة مال الله ومكفياتني ومتأكد يرفعن اسمي احسن من الولَد وعندي انتِ(على بيبي) شنو احتاج بعد ...
تحجيلي والدتي تكلي جانت تصير مشاكل بينهم بس ولا يوم يخليها تنام هيّ وضايجة او مقهوره من عنده، لازم يروح يراضيها .. وياخذنا بنص الليل لبغداد حتى نغير جَو.
ب٢٠١١ بيبيتي انتكست وتدمرت من مرضها وصلت لمرحلة متكدر تمشي نهائيًا، دنتحضر حتى نوديها لبغداد .. كلنا چنا جاهزين ألا هو
كال ماكدر اروح وياكم، وحتى من شلناها دا ندخللها للسيارة كال ماكدر اشيلها.
جان الحزن عامي عينه، لأول مرة اشوفه هلكد مكسور ومابي حيّل، ذاك الجبل الينضرب بي مَثَل، إنهد بمجرد دره ان نهاية حبيبته الوحيدة .. قَربت.
راحوا بالسياره وهو بقى وحده بالحديقة منزّل راسه وكاعد ... يستحي يرفع راسه
لان ما بيده شي يسويه .. جان مقهور من نفسه لان عاجز.
وعبالكم كدر ينام بهل ليلة ؟
من الفجر ثاني يوم راح لبغداد وراها.
بقى بالمستشفى يومين .. وجان تتوفى بيبيتي بين رجلها وبين بناتها .. توفت قطعة روحه، توفت بيبيتي حمديه الجانت تحبني وتموت عليه كلش، والي ربتني ٣ سنين على ايدها، الي جانت تشيلني على راسها وتروح تشتريلي، وجانت تربط رجلي برجلها وتنومني فوك السطح من تنام يم جدي، اخاف بالليل اتحرك، الي جانت تبجي لان اروح لبيتنا واتركها، بيبيتي روحي من الدنيا.
تكول والدتي لحد الآن جدي من يدخل للمطبخ يگلي ها حمديه بدون ميدري، لحد الان لسانه متعود عليها، لحد الان هو يحبها ويفكر بيها.
البيت الي طلعت من عنده من توفت، جدي كال ممنوع ينباع، ولا يتأجر، ممنوع احد غريب يدخله، يكول لحد الان ريحتها بي.
بيبيتي .. الله يرحمج ويسكنج فسيح جناته .. هنيالج على هلحُب العظيم الحصلتيه .. شُكرًا لان زرعتي بداخلي هلحُب ولأن طلعتيني نسخة كاملة من زوجج، وشُكرًا على كلشي قدمتيه.
في امان الله وحفظه .
1.1K viewsاحمَد قاسِم., 17:32