فَكِّرْ

2021-09-10 22:44:21 غفران

وحيدة أمها وأبوها، سمرة وشعرها خشن، وزنها زايد عن اللزوم، داومت كلية مرحلة أولى، غفران بنت اجتماعية ويه البنات، مقتنعة بداخلها مستحيل تصير فتاة احلام أي شاب الهالسبب جانت شكد متكدر تتجنب تحتك بالشباب حتى متحرج نفسها، اكبر شغلة شاغلة بالها هي دراستها، أبوها عمرة ٤٤ سنة وامها عمرها 36 ، علاقتهم مثل الأصدقاء أكثر من ماهي علاقة اب وبنتة او أم وبنتها، يوم من الايام عيونها صارت على شاب حلو وياها بالكلية، غصب عنها مشاعرها اتحركت تجاهه، شخص وسیم انيق وأبو بنات فرصة هي تخطف گلبة جانت فرصة مستحيلة، حاولت تلفت نظرة بكل الطرق، توكف يم بنات هو يعرفهن، تصير كبالة بسنتر الكلية، لكت طريقة تحاول تجذبة بيها، تروح قبلة القاعة المحاضرة تحطلة وردة وكارت بيهن كلمتين مابيهن أي اسم، اعتمدت هو راح ياخذ باله يتعجب ويدور على صاحبة الكارت ويباوع يمنه ويسره بس الصار عكس التوقع، هو مامهتم، ولا دار بال، لكنها بقت تكرر الموضوع بدون فايدة
راحت على امها وأبوها حجتلهم الموضوع، استقبلوا الموضوع بهدوء وكعدوا وياها يفكرون بحل، لحد ماوصلوا النتيجة نصحوها لازم تعوفة الأن هذا هو الصح وهو اللازم يصير، رفضت غفران وبقت متمسكة بأعجابها والكارت والوردة يومية يتكررن، ابوها وامها شدوا عليها من شافوها هملت دراستها وعاشت بملكوت الإعجاب من طرف واحد، كالت اني لازم احب وانحب مثل باقي البنات وأني واثقة راح يحس عن قريب، يومين والأمور اختلفت بصورة غريبة، ندكت باب بيتهم ساعة ٩ بالليل ،ابوها جان طالع ،طلعت هي وامها للباب ،لكوا على عتبة البيت ظرف ووردة بيهن كلمتين حلوات امها خابرت ابوها صارت نظرتهم عليها نظرة شك وريبة بس هي جانت طايرة من الفرح، كالت و أخيرا حس، وره 3 ايام لكت بملزمتها بالكلية نفس الظرف والوردة والكلام الحلو
عاشت غفران بعالم ثاني، عالم وردي، وره فترة صاحتها صديقتها كلتلها لكيت هذا الكارت علي اسمج بقاعة المحاضرات بقت تنتظر شوكت يجي يصارحها ..

ولكن
قبل الامتحانات كل الكلية عرفت هذا الولد خطب ثانية وياه بنفس القسم، البنت انصدمت وانكسرت ونقهرت فدنوب، بس الغريب الكارت والوردة بعدها مستمر يجيها!!
كالت منو هذه اليدزلي كارتات، انشغلت بيهن وبالحبيب المجهول ونست تدريجيا هذه الجانت معجبة بي، الفضول اخذ كل عقلها، اهتمت بنفسها وبشكلها حبت هذه الانسان الي هي مشايفتة، الأولاني راح من بالها نهائيا، يوم من الايام امها وابوها صارت عدهم شغلة مهمة وسافروا، بقت وحدها بالبيت، دك الباب عليها ابو المولدة اجه راس الشهر، راحت الغرفة ابوها تجيب فلوس، فتحت باب کنتورة لكت كارتات !!!
نفس الكارتات التجيها وقلم احمر نفس خط الينكتب بيها كلمتين حلوات
ابتسمت وافتهمت، عرفت امها وابوها سووا هيج حتى ليحسسوها هي اقل من أي بنت، حبها الهم تضاعف، قررت متكلهم وطول عمرها ماراح تجيب سيرة بهالموضوع، انطوها ثقة بنفسها صارت عدها اهم من جبال من الذهب، وصارت تشوف نفسها احلى من أي بنيه بنظرها.

الحاصل ... الثقة تكدر تخليها تریاق لكل انسان، تكلب حياتة 180 درجة
امشي ووزع للناس ثقة بنفسهم وبنفس الوقت لتضيع ثقتهم بيك
الكلمة والتصرف البسيط ميكلفك شي بس يعتبر شي جبير لناس يتمنون امور بحياتهم صعبة عليهم
لكلمة الطيبة والابتسامة بوجوه العالم هي الصدقة الراح تدخل بيها الجنة.

وكلكم عيوني. باز کردن / نظر دهید

2021-09-09 15:15:12 الهفوات والشطحات الغبية التكررها بشكل شبه يومي تخلي حتى عائلتك تضوج من عندك مو بس الشخص اليحبك.
وهذهِ الهفوات مع أنها صغيرة لكن مؤلمة، بالضبط نفس الرصاصة، شكد صغيره؟ بس كافية حتى تقتل روح كاملة.
والهفوات كذلك، كافية بأن تغيّر وتقلل شعور الشخص اليحبك، لا تجفص ببطنهم لأن مجرد انتَ متأكد من حبهم الك، ومتأكد اذا رجعتلهم راح يرحبون بيك مهما سويت بيهم ومهما أذيتهم، لا تستغل هذا الحب حتى تطلِع سذاجتك وطفولتك عليهم, صدكني يكرهوك. باز کردن / نظر دهید

2021-09-08 23:32:01 تربطني علاقة بعائلة عدهم ولد اثنين اخوان، واحد اسمة يوسف الجبير والصغير اسمه حسن، يوسف يحب وحدة عندة علاقة بيها قديمة راد يتزوجها، اجوي اهل یوسف شافوا البنية ماقبلوا بيها، كالوا هاي شخصيتها قوية وانت گلبك طيب واحتمال تفرض سيطرتها عليك، والشغلة الثانية هي تشتغل ماراح تحتاجك فد يوم وتقدر تعبك عليها، وهيج وحدة اذا ضربتها كبل تهددك وتطلب الطلاق، باوع عليهم يوسف وضحكء، كلهم شكو بيها اذا شخصيتها قوية هذا الشي ايجابي ينعكس على تربيتها للاطفال وتعلمهم الحياة بواقعية بصغرهم حتى من يكبرون ماینصدمون بشي، وعالشغل خل تشتغل ماطول تعرف حقوقها وواجباتها بالبيت ماراح امنعها ابد، ثالث شي الغلط وارد بأي علاقة تصير مادام احنه متفاهمين بيناتنا شراح يدخل الضرب والاسلوب الهمجي بالموضوع ؟ المهم يوسف أصر يتزوج البنية رغم عناد اهله بس بقى على كلمتة واتزوجها وراها بفترة اخوه الصغير حسن اتزوج وحدة كلش فقيرة، سلوكها جان مناسب لاهله قبل لاتناسبه هو، وره فترة ظلوا يعيرون يوسف على زواجة، يكلولة شوف اخوك الصغير اخذ وحده مثلنا ونفس ثوبنا لاتحجي ولاتطلع كاعدة بالبيت وساكتة مهتمه بس بزوجها
الشغلة كبرت صار يوسف مايحجي ويه حسن والعكس من وره هالموضوع.

شاء القدر خلص عقد يوسف بالشغل وانسدت الشركة، بقه شهرين كاعد بدون عمل، اضطر يبيع سيارتة حتى يصرف عالبيت، تالي الواقع اتغلب على الظروف العايشها صاحبنه، كعد ويه مرتة كلها اسمعي بنت الحلال، الحياة الوعدتج عليها مااكدر انفذها، اذا تريدين تتطلكين ماعندي مانع وكل المصاريف وحقوقج تاخذيهن اول ماارجع اشتغل
ولكن رفضت زوجتة وحجت عليه وبقت تكثف ساعات عملها وبدون مايدري باعت سيارتها وحطتله رصيد ضخم بالبنك، وقدمتله على تعيين وانقبل
بظرف سنة رجعت حياة يوسف وزوجتة مثل قبل، اخذلها سيارة احلى من مالتها القديمة، وحط بحسابها ضعف المبلغ الساعدته قبل بي
وره ايام معدودة خابروا اهل یوسف کلوله تعال احجي ويه زوجة حسن تريد تتطلك بلكت تقتنع ، راح يوسف حجه وياها كلها ليش تريدين تعوفي ؟ كلتله راتبه ميكفي!

الحاصل
مو دائما وجهة نظر اهلك تطلع صحيحة ولازم تقتنع بيها، ومو كل الشغلات التربينا عليها تطلع صح، بهالزمن لازم انت تختار وتقيم الشخصية، شوفها تناسبك، شوف نفسك انت مناسبلها ! هل انسان تحبه وتريده فعلًا وهو يبادلك نفس الشعور؟
لتخلي أي شخص يفرض رأيه عليك حتى لو جان عزيز، ولتقيم مصلحة غيرك لان عقلك متخذ قرار ولازم تنفذه، شكد عالم بالواقع تتوقعهم ميحبوك بس بالشدات اول الناس يوكفولك!

وكلكم عيوني. باز کردن / نظر دهید

2021-09-07 00:39:43 نبذة عن الرسائل التوصلني على بوت القناة يوميًا . باز کردن / نظر دهید

2021-09-04 17:53:34 مشكلة العراق الحقيقية.


مثل ما الكل يعرف، دول الخليج قبل حوالي القرن جانت معظم اراضيها مجرد صحاري، وحياة الناس بيها بدائية واقل تطور مقارنة ببقية دول العالم لحد ما تم اكتشاف النفط سنة 1932 لاول مرة، وبدت تتغير حياة اغلب سكانها من حياة الجِمال وحفر الابار وتجارة اللؤلؤ ببعض الدول الى حياة الترف وتجارة الاموال بالنسبة لاغلب المواطنين.
وعلى ما يبدو بدت حكومات هالدول تتجه للاعتماد على مصادر اكثر للدخل غير النفط لتقوية وتدعيم اقتصادها، على عكس العراق بالوقت الحالي، وهذا اساس موضوعنا الدنحجي بيه.

من الوارد او شبه المؤكد ان الحاجة للنفط رح تقل مستقبلا بشكل واضح نتيجة عدة عوامل اهمها زيادة انتاج السيارات الكهربائية وايضا زيادة استخدام مصادر الطاقة البديلة مثل الطاقة الشمسية وغيرها، فاستهلاك وسائل النقل وحدها للوقود حاليا حوالي 60% من استهلاك النفط بالعالم.
وازدياد الاعتماد على السيارات الكهربائية والطاقة الشمسية بالمستقبل، باعتبارها اقل تلوث وتكلفتها دتبدي تقل بمرور الوقت، امور ممكن تكون بداية النهاية لهيمنة النفط بعد عشرة او عشرين سنة (تقريبا خلال او بعد سنة 2040).

الاقتصاد العراقي بالوقت الحالي يعتمد على النفط بشكل اساسي، فواردات العراق من النفط حوالي 95% من اجمالي دخل العراق من العملة الاجنبية.
فبالرغم ان العراق حاليا ينتج حوالي 2.9 مليون برميل باليوم الا ان المشاكل الاقتصادية ومعدلات البطالة وسوء الخدمات العامة دتتزايد بشكل مستمر فما بالك باللي حيصير بعدين والدولة ما عدها لحد الان اي تخطيط حقيقي لوضع الاقتصاد بالمستقبل او اي محاولة واقعية للحصول على مصادر للدخل بديلة عن النفط.


الى الله المشتكى.
زعم سويلي تاك لذاك الذيل.
وكلكم عيوني. باز کردن / نظر دهید

2021-09-04 17:41:55 كل دول العالم تحتاج قوانين حتى تنظّم مجتمعها وسيّر حياتها, وكل القوانين تحتاج الى مصدر قوي عالي حتى تفرض هلقوانين بالإجبار (بما يراعي المصلحة العامة) وهذا المصدر هو الشرطة والجيش وكل المفاصل التابعة الهم.

اما بالعراق عزيزي القارئ، فالمسألة مختلفة حالها حال بقية المسائل الأخرى، بعيدًا عن القوانين الضعيفة الهزيلة الما تراعي احتياجاتنا والمو يم متطلباتنا، بعيدًا عن هلشي، ماكو شرطة وجيش اقوياء حتى يفرضون هذي القوانين اذا تطبقت بالمستقبل.
ماكو قوة تثق بيها بالعراق ومُمكن توكف وياك وتاخذلك حَقك، والدليل اليوم من تصير عركة او مشكلة ما يلجئ المواطن للشرطة، يروح مباشرةً لعشيرته و لحزبه لان بكل بساطة الحزب والعشيرة هم اقوى من القانون واقوى من الجيش والشرطة،
اليوم للأسف الشرطي اصبَح شخص عادي ملبسينه بدله وحاطيله خرخاشه، اقصد رشاشة وموكفينه بالشمس. هذهِ وظيفته الوحيدة فقط.
ممنوع يضرب طلقة، ممنوع يلقي قبض، ممنوع يحل مشكلة، ممنوع يتدخل بعركه، ممنوع كلشي يسوي.. فقط يبقى ساكت ويباوع.

هذا الأسلوب نشَط ورا ٢٠٠٨, بسبب هيمنة الأحزاب على السلطة، الأحزاب منو اليرفعهم ؟ شيوخ العشاير يرفعوهم للحكم فكل واحد مستفاد من الاخر
وصار الشرطي او الجندي بآخر هرّم مصدر الأمن العراقي .. لا يحل ولا يربط، ولا حول ولا قوة.
وهذا الدنشوفه بالأيام الاخيرة وبكل وقت من مقاطع تظهر بيها الشرطة عاجزين عجز تام عن التدخُل او فض النزاع.

وكلهم عيوني. باز کردن / نظر دهید

2021-09-03 20:32:20 جدي جان شخص عصبي وقوي, شخص غامض وصامت كل الوقت ولحد الان، شخص يحجي بأفعاله فقط، حكيم لأبعد حدود، وبنيته الجسدية ومظهره ماشاءلله, بالبداية جان جندي بالجيش بالستينات او بداية السبعينات تقريبًا، هو اقارب بيبيتي, يصير ابن عم ابوها وجيرانهم بصف الحايط، بيبيتي جانت اجمل البنات بعائلتهم وبالمنطقة كلها، جان الكل يريدها ويريد وصلها، وهيّ من النوع الآنسات المدللات المهتمة جدًا بشكلها وبأناقتها، قبل جانن كله تنوره يلبسن ومفرعات، وهيّ اصلًا بيضه ونازگه وترفه وتخبل فالعيون كلها عليها، جان يحبها هوايَ وما يكللها لان يستحي، تحجيلي والدتي تكول اعترفلها عن طريق باكيت مال شخاط (باكيت اعواد النار) جان يدزلها كلام عن طريق الكتابة على الباكيت، وبدت بينهم قُصة الحب العظيمة الي اغلبها بنظرات العيون وبالإبتسامات الخجولة.

بيوم من الايام واحد من العائلة راد يخطبها، وراح دا يتقدم عليها وجان جدي يسمع بهل شي ومباشرةً رايح مكسره تكسر ومتعارك ويا اهله ومهددهم اذا ترحون لبيتها تتقدمولها ثاني اليوم احرككم، ومتراجعين عن الموضوع طبعًا لان ميكدروله ..
جان يجيبلها غراض وهدايا بالسّر كلما يسافر وجان يخاف عليها ويغار هوايَ.

ولكن سرعان ما أخو بيبيتي الجبير درَه بهل علاقة ووكف ضدهم ومنعهم بشده، وجدي جان عنده مشكلة بالقلب وسوه عمليه، فأخو بيبيتي راح گاللها انُ تتركه وهذا مريض وكذا ... وبيبيتي انقهرت كلش وبقت تبجي، فجدي سمع بهل كلام وما استلسلم بالعكس صار عصبي فدنوب
مباشرةً راح اخذ اخوها بسيارته ووداه لچوله!(منطقة مهجوره) ونازل جدي وخانگه لدرجة الموت وگاله اختك ماتصير بس الي، بحيث رادت روحه تطلع وبالاخير كله اتركني بس اتركني هسه من نرجع انطيها الك
وبالفعل ورجعه للبيت وخطبله بيبيتي .. وتزوجوا احلى زواج
خلَف من عدها ٤ بنات، اكبرهن والدتي.
وخلَف باقي ولّد تقريبًا ٤ بس للأسف كل الولّد يموتون مباشرةً ورك الولادة وبيهم اليطول شهر شهرين ويموت،، اخوانه گالوا لجدي وحتى هيه بيبي كالتله اتزوج وحده اخرى حتى تجيب ولَد يشيل اسمَك, گللها مستحيل وما افكر بهل شي ، عندي اربع بنات دُرَة مال الله ومكفياتني ومتأكد يرفعن اسمي احسن من الولَد وعندي انتِ(على بيبي) شنو احتاج بعد ...

تحجيلي والدتي تكلي جانت تصير مشاكل بينهم بس ولا يوم يخليها تنام هيّ وضايجة او مقهوره من عنده، لازم يروح يراضيها .. وياخذنا بنص الليل لبغداد حتى نغير جَو.

ب٢٠١١ بيبيتي انتكست وتدمرت من مرضها وصلت لمرحلة متكدر تمشي نهائيًا، دنتحضر حتى نوديها لبغداد .. كلنا چنا جاهزين ألا هو
كال ماكدر اروح وياكم، وحتى من شلناها دا ندخللها للسيارة كال ماكدر اشيلها.
جان الحزن عامي عينه، لأول مرة اشوفه هلكد مكسور ومابي حيّل، ذاك الجبل الينضرب بي مَثَل، إنهد بمجرد دره ان نهاية حبيبته الوحيدة .. قَربت.
راحوا بالسياره وهو بقى وحده بالحديقة منزّل راسه وكاعد ... يستحي يرفع راسه
لان ما بيده شي يسويه .. جان مقهور من نفسه لان عاجز.
وعبالكم كدر ينام بهل ليلة ؟
من الفجر ثاني يوم راح لبغداد وراها.
بقى بالمستشفى يومين .. وجان تتوفى بيبيتي بين رجلها وبين بناتها .. توفت قطعة روحه، توفت بيبيتي حمديه الجانت تحبني وتموت عليه كلش، والي ربتني ٣ سنين على ايدها، الي جانت تشيلني على راسها وتروح تشتريلي، وجانت تربط رجلي برجلها وتنومني فوك السطح من تنام يم جدي، اخاف بالليل اتحرك، الي جانت تبجي لان اروح لبيتنا واتركها، بيبيتي روحي من الدنيا.

تكول والدتي لحد الآن جدي من يدخل للمطبخ يگلي ها حمديه بدون ميدري، لحد الان لسانه متعود عليها، لحد الان هو يحبها ويفكر بيها.
البيت الي طلعت من عنده من توفت، جدي كال ممنوع ينباع، ولا يتأجر، ممنوع احد غريب يدخله، يكول لحد الان ريحتها بي.

بيبيتي .. الله يرحمج ويسكنج فسيح جناته .. هنيالج على هلحُب العظيم الحصلتيه .. شُكرًا لان زرعتي بداخلي هلحُب ولأن طلعتيني نسخة كاملة من زوجج، وشُكرًا على كلشي قدمتيه.
في امان الله وحفظه . باز کردن / نظر دهید

2021-08-29 22:19:28 منى عمرها 27 سنة
تكول ولا مرة شفت ابوية يبوس امي او هي تبوسة، 27 سنة ولا مرة شفتة جابلها هدية او كلها احبج او راحوا بمطعم يكعدون، دائما تكول لأمها اذا اتزوجت ما اريد اصير مثلج انتي وابوية، وره سنة منى اتزوجت بيوم زواجهم والحضور طلبت منة يبوسها، هو استحة كدام العالم لأن جانت عيونهم كلها عليّ فما باسها
بمرور الوكت والسنين اتبينلها زوجها طلع نسخة من ابوها وهي بمرور الوكت صارت مثل امها، ولاتتذكر فد يوم كعد بصفها وكلها احبج ولعب بشعرها و جابلها باقة ورد، بس هو بداخلة يعشق كل حرف من اسمها وكل ذرة بيها، يحترمها ويحبها فدنوب، جانت اذا تختتك وتريد تبجي يجي يحتويها بلمسة ايدة على رجليها وابتسامة تخلیها مرتاحة طول الوكت.
اول حمل الها بأخر ایام ولادة طفلها بالمستشفى جان يبقى وياها 24 ساعة يكعد بالكاع كبالها هو وحجمة الضخم وكرشة يسويلها حركات حتى يضحكها، من وره صوتة العالي مرة طردوا من الغرفة . بالاخير انرزقت منى بولد سمته ابراهيم، هو وبحضنها وعين زوجها بعينها، عرفت واتأكدت هو بگلبها مهما صار

كلمة احبك بمجتمعنا صارت اسهل شي حتى من شخص يريد يسلم عليك او عليج اول مرة تشوفه راح يحشر كلمة حبيبي بالنص، فيصل الموضوع هو الفعل مو الحجاية، من يصير الفعل طاغي الكدامك بعد ميحتاج اي كلمة.
ذاك اليوم دا أقرة بكتاب اسمة الملك وصل لجزء يكول : لم اسمعه مرة يكلمها عن الحب ، ولاسمعتها هي تتكلم عنه ، ولكنها حين كانت تسانده على أن يلبس معطفة، حين تسند ظهره لتسقيه، حين تدلك له ذراعه وقدميه بأصابعها، كانت هذه الأصابع تنطق شيئًا يتجاوز الحب ذاته!

وكلكم عيوني باز کردن / نظر دهید

2021-08-29 20:40:01 بطبيعتي تجي فترة من احس نفسي مختنك ابقى ساكت واطلع امشي، امشي بشوارع زيونة او الأعظمية، واذا ليل اروح يم المسرح الوطني اتعشي وأفتر
کله وحدي، قبل كم سنه من جنت ببغداد اجاني هذا الملل كلت خل اغير كافي مشي، صعدت بكيا نفرات كعدت اخر شي، يمكن بوقتها ثاني مرة اجرّب الكية بحياتي، فتحت الجامة وبقيت اباوع، کدامي كاعدين واحد هو وزوجتة أعمارهم جبيرة كلش، يحجون بصوت ناصي، ماردت اصير فضولي واسمع بس ركزت وياهم ماعرف ليش، مرتة جانت ضايجة وزعلانة وهو يرضي بيها يلزم ایدها وهي توخرها. بقى يتشاقة وياها ويضحكها، لحد ماكللها شوفي شجايبلج، سمعت صوت جيس وخرخشة اتفاجئت وبقت ساكتة جان يكلها دشوفي شجايبلج بعد هاي قبل اسبوع ردت افاجئج بيها، ضحكت وخجلت وضربن جتفه وكلتلة والله ذني هواية ابو یاسر، كلها حتى بس ترضين لان زعلج غالي عليه
وباوع عالجامة نظرة بيها حسرة مال واحد يريد يعيش بعد حتى يضحيلها ويقدملها بعد اکثر.
اتمنيت اعرف شطلعلها من الجيس، شكلهم ناس بسطاء شنطاها يعني ؟ عباية
، لو سوار، لو محبس، مااعرف بس اتأكدت الشي الأخذتة جان بداخلها كلش عزيز وغالي، ردت اكوم حتى اشوف ملامحهم ماكدرت، عيني صارت بعين السايق وضحكنا سوة هو هم راد يعرف شنطاها.

شكد حلو الانسان اليحبك مهما تكون حالتة المادية يسوي كل شي حتى بس يرضيك، الحب بالحلال تجارة، تشتري شخص وتبيع كل الدنيا لأجلة!

وكلكم عيوني باز کردن / نظر دهید

2021-08-28 22:25:31 تريد وحده عدها شهادة أتقدم على وحده عدها شهادة
تريد وحدة حلوة اتزوج وحده حلوة
تريد وحدة محجبة اتزوج محجبة
تريد وحدة تشتغل، دور وأتزوج وحدة تشتغل
تريد وحدة انطوائية، ارتبط بوحدة انطوائية
تريد وحدة بمواصفات معينة دور راح تلكاها
بس لتتعلق بوحدة مو محجبة وتريد تحجبها، او اجتماعية وتريدها تنعزل
كل شي ميجي بأقتناع داخلي ماراح يصير مثل متريد،
راح تكون نفس اليسعى وره الشي يريد يصلحه وبالاخير يكسره
اذا ماعندك مرونة وسلاسة بالكلام وسعة صدر لا تتزوجها وخلیها الغيرك يقبل بوضعها وهو الممنون.
اتعلم لتفرض شي على انسان، لو تقبلة وتعيش وياه لو تعوفه بحال سبيلة.

كلامي بعيد عن الصفات السيئة الموجودة بالشخص التريد ترتبط وياه، هنا لازم تدخّل وتخلصَه من هلصفات.
بس بأسلوب حلو وكلام ليّن ومنطقي..

وكلكم عيوني. باز کردن / نظر دهید