فَكِّرْ

2021-08-28 21:34:05 ماكو شي بالحياة اجمل من السمعة الحلوة
ودائما بحياتك تلگه ناس تريد تشوه صورتك، ويمرغلون نفسهم بالتراب في سبيل هلشي، بس يفشلون بكل مرة، لان الذهب الأصلي لونه ابد ما يتغير.
شكد ما تنجح وتشتغل وتداري روحك وتضمن مستقبلك ما راح تلگه كنز احلى من نظرة الله الحلوة والناس عليك
الله من خلق الشجرة وخلاها تثمر الفضل مو للفلاح من يحصد، الفضل من ينطيها میي ويداريها وحتى لو عافها ومحد وصلها راح يوصلها المطر وتكمل حياتها، الانسان هم هيج ويه كل فعل وحجاية يحصد تقدير الناس واذا الناس ما قدرته الله يقدره ويرفع شأنه.
وهنيال النيته صافية ويحبه الله.

لتحجي على ناس متعرفهم، واذا تعرفهم دافع عليهم مو تسقط بيهم، لتحجي على صديقك او صديقتك، لتصير الشخص المنافق الموجود بالشّلة، لتنقل حجي وتخرّب سمعة وعلاقات، أستر شكد ماتكدر، أستر على الناس حتى الله يستر عليك ويغطي فضيحتك اذا نفضحت لاسامح الله.

وكلكم عيوني. باز کردن / نظر دهید

2021-08-28 19:57:03 اول بنية انعجبت بيها بحياتي

جانت مقابيل بيتنا جنت من اريد اثير انتباهها اركع الطوبة بباب بيتهم حتى تطلع معصبة واكللها بعيونها السود التشبه ایام الحصار .. العفو
دائما جنت انتظر محرم حتى امي تسوي هريسه او تمن وقيمه واوديلهم ماعون حتى تطلع تاخذه من ايدي واجمل شي بهاليوم من تنتظر بالباب حتى ترجعلي الماعون، احس هالسالفة صارت الي حتى اكدر اباوع بعينها مرة ثانية
جان عبالي محرم بس لأجلها
مااعرف جنت الحسین ومااعرف ليش ثار على يزيد مااعرف جنت كاظم الساهر والقزويني
جنت مؤمن بگلبي ..مذهبي جان بس خجلها من تباوع عليه وتضحك .
وجانت تحب الطباشير الملونه هوايَ، بحيث الفلوس التطينياهن امي للمدرسة بالابتدائية جنت اضمهن بالحَله اشتريلها طباشير واوديهن الها حتى اشوف ضحكتها هي وفرحانه.
بالمتوسطة قررت اصارحها واكتبلها رسالة تعبر عن كل شي احس بي
كل شي كتبتلها واجنت اصدق رسالة الي وقبل لا اودي الرسالة اشتريت نعال اسفنج حتى تشوفني كاشخ جانت الكشخه قبل من تشتري نعال وتبقى بنفس بجامتك وتفتر بشوارع منطقتك حتى يشوفوه.
وديتلها الرسالة وكتلها هاي الورقه لكيتها بالكاع وانهزمت بساع.
جان قبل الخجل عدنا شي اصيل، بكل شي نخجل، خصوصًا اذا دزوك تجيب الحصه وام الحصه تكلك ليش ماجايب كواني وياك، او تطب لدكان وناسي فلوسك بالبيت
املهم قرتها وبقت ماطالعه من البيت 3 ايام جان ماكو لا فایبر و واتساب حتى انتظر رد آخر شي شفتها وصاحتني..
كلتلي مو امي وابويه ميقبلون ودمعت وراحت ... اني نقهرت بوقتها كلش.
وره شهرين ابوية قرر نشيل من بيتنا شلنا وصعدت فوك السياره اخاف شي يوكع من الغراض، آخر نظرة عفتها جانت بعينها من بردة شباگهم،
مرت السنين وامي وابويه ماتوا واصدقائي منهم السافر ومنهم الراح ضحية القاعدة والميليشات، اشتغلت ويه جماعة من يخلص دوامنا يومية نشرب بشقة واحد اي بنية صرت اشوفها وتباوع عليه اتخيلها ساقطه.
مرة جماعتي كلولي احمد راح نطّلع بنات ليش متجي ويانه اني صفنت وكتلهم اجي بس شوية ابقى يمكم واروح، رحت من خلصت شغلي، كعدت شفت بنات 2 وحده جريئة تضحك وتسولف والثانية فقيرة كلش، باوعت بوجها مدري شحسيت
حسيت بصوت يشبه صدى الطوبه من جانت تنركع ببابهم، حسيّت بشوارع الاعظمية القديمة بعصرية الشته، حسيّت بالچاي المهيّل مال ايام قبل
كتلها ممكن احجي وياج ؟ اني وگلبي يرجف
اخذتها وصرنا وحدنا باوعت عليها زين بتركيز
طلعت هي نفسها !
نفسها بغداد القديمة بدون مفخخات نفسها بغداد القديمة المتروسه فراشات نفسها بغداد الضحينا علمودها والراح نضحي علمودها بعد
كلتلي اني هنا لان امي وابويه ماتوا وماعندي احد .. كلهم تركوني
كلتلي اكتبلي رسالة من جديد حتى احسك من جديد وحتى احبك من جديد، اكتبلي لأن احتاجك.
طلعت ورقه وكتبتلها جملة وحدة فقط .. شافتها وحضنتي هي وتشهك وتبچي
كتبتلها
اني واحد يحبج حيل
واحد ثار علمودج.

بغداد .. يا اول حُب بحياتي .

وكلكم عيوني. باز کردن / نظر دهید

2021-08-25 14:08:15 "كلشي بالحقيقة يختلف"

شايف ذولة الاشخاص التكرهّم والتسبهم والتتعارك وياهم بالنت، ذيج النسويّة القافلة وذاك الملحد وهذا العلماني وذاك الحجي وهذا المراهق وذاك الفطير.

ذوله كلهم بالحقيقة أجمل واحلى، المتعصّب تشوفه هادئ، والطايح حظ بأفكاره تشوفه معتدّل ويبتسم بوجهك.
تفاصيل الناس بالحقيقة تختلف جذريًا عن الانترنيت، بيهم السيء بالنت وزين بالحقيقة وبيهم العكس كذلك.

ولكن اذا تريد تعرف ناس العراق الحقيقيين, لتقرالي خبر عن شيوخ عشاير انطوا بتهم لفصل عشائري وتجي تسبلي العراق، لتشوف خبر بي سياسي يلطم على الحسين او مشهور يركصلي بالتيك توك وتجي تكلي خرب شرفي اذا ابقى بالعراق ... ذوله ميمثلون الا نفسهم والا جزء صغير من عراقنا.
اني مدا انطيك مثاليات اني دانطيك واقع حال انتَ متعرفه بحكم جلوسك على النت ٢٤ ساعة وتقره كل هلأخبار والأفكار عن المجتمع، طبيعي راح تترسخ بعقلك فكرة قذرة عنه.
تريد تعرف مجتمعك، انزل شوف الناس الفقره البسيطة، انزّل شوف ابو الكية لو التكسي من يكلك بقيها اذا ماعندك، ومن تشتري لفة فلافل وتكله داريها يكلك تدلل، ومن ينطيكياها يكلك الف عافيه حبيبي، ولو طلبت شي من احد مباشرةً راح يكلك خادم عيوني.
واذا صارت عندك شغلة ومريت للغربية وللرمادي راح تسمع جملتهم الشهيرة - بالطلاك ألا تقده - وانتَ عبالك من خلال الانترنيت كل الغربية سنّة ودواعش.
لو عبالك من خلال الانترنيت اهل الناصرية خبيثين وجهلة، روح نص ساعه لساحة الحبوبي وشوف الناس شلون تشيلك بعينها عبالك جاي مشايه لكربلة.
ها على طاري كربلة والنجف .. لتاخذ بس هدومك وفرجة الاسنان، كل الاكل والكعدة والمبيت عليهم وهمه الممنونين.
ولو جينه على چعب الجنوب وبالتحديد بصرة وميسان، اتحداك تطلع بوقت الغده وانتَ ما ماكل مسكوف يمهم، صدكني يتعاركون وياك.
وكل هذا اتركه بجهة وسولفلي على طيبّة الأكراد، وعلى كباب الأكرّاد وعلى اللبن المدخّن وعلى كبة الموصّل وغاباتها ولهجة اهل نينوى الجميلين، وتشربلك چاي مهيّل على جبل سنجار.

العراق بي ناس تسوه الواحد يفتخر بيها وبي اماكن وبي تفاصيل تسوه تكضي عمرك علمود تتمتع بيها.
فقط صير خوش آدمي راح تشوف الناس كلها خوش أوادم.

وكلكم عيوني باز کردن / نظر دهید

2021-08-23 16:26:31 أكو ناس صمتها مخيف، ذوله اليصمتون بالوقت الي غلطات چبيره نكالت بحقهم، ويتغاضون عن أشياء صعب أي أحد يتحملها، اللي يسوون نفسهم مصدگین کلام الأخرين ويعرفون بأنه كذب ويكتفون فقط بأبتسامه خفيفه، اللي يستحملون ويضغطون على نفسهم هوايه ويكولون ميخالف تعدي وتهون، اللي يكونون قريبين الك بوكت الحاجة وبوكت النصيحة وينسحبون بصمت وبدون هوسه، اللي يتناسون حتی يسامحون بس مینسون، اللي وياك بوجه واحد صريحين وخلوقين وماعدهم وجهين.

الناس هاي زعلها صعب ولحظة أنفجارهم تكون أصعب، وصادمة كذلك لأي واحد جان قريب منهم، تكون لحظه همه مقرررين بيها أنك أنلغيت من حياتهم وشگد متحاول تصلح بعدين متكدر.
وبالرغم من طيبتهم بس لازم تخاف خاف منهم ، خاف تفقدهم لأن نادرین ، لأن حبوك وأستحملوك هوايه حتى يبقون موجودين يمَك، رغم أنه همه ماخذين بالهم من كل شيء وأنت متصور نفسك ذكي ، خاف وأتقي شر الحليم اذا غضب لأن قليل اللي يستحمل غضبهم بعد صبرهم الطويل.

وكلكم عيوني. باز کردن / نظر دهید

2021-08-22 16:15:43 الانسان يخضع لقيمه الاجتماعية وموقعه ومكانته بالمجتمع اكثر من خضوعه لتعاليم دينه، فاذا جان اكو فعل او ظاهرة معينة مقبولة بالمجتمع، رح يضطر الفرد يتقبلها استجابة للضغوط الاجتماعية حتى وان كانت لا توافق دينه، مثل الشرب او ارتداء الحجاب من عدمه او العلاقات قبل الزواج وغيرها.
لهالسبب دنشوف المسلم المولود بامريكا او اوربا مثلا طبيعة حياته وتعامله او التزامه بتعاليم دينه مختلفة عن اقرانه بايران او السعودية او العراق، بالرغم ان الدين نفسه وهلشي نتيجة استجابة الافراد لطبيعة وقيم المجتمع اكثر من الدين.

زين، هل العراقيون اشخاص يقدمون الدين على قيم المجتمع؟
الجواب: اكيد لا
نكدر نصنف العراق كمجتمع معظم افراده جاهلين بالامور الدينية، والاغلبية معلوماتهم من كتاب الاسلامية بالثالث متوسط وافعالهم معظمها تندرج تحت العيب والميصير وشيگولون العالم،

المواطن العراقي الآن يقدس العادات والتقاليد ويلتزم بيها اكثر من التزامه بالدين.

وكلكم عيوني. باز کردن / نظر دهید

2021-08-21 18:00:33 احنه صرنا مثل الملابس العارضيها بالمحلات، هواي ناس ينعجبون بيك بالظاهر، بيهم اليكدرك ويعوفك، وبيهم اليشوفون سعرك غالي يروحون الحاجة أرخص، واكو ناس يتمسكون بيك لأن راهم عليهم، وناس من يشتروك وراها ينسوك وتبقی مرکون، (واكو ناس يبقى يلبسك حتى لو شاف لبس ثاني احلى)
ناس من تتضرر يسويك وصلة مسح، وناس شميصير بيك يبقى مستعز بيك.

اليعرف قيمتك میهمه شكد السعر
وماينتظر ترخص وتصير تنزيلات.

وكلكم عيوني. باز کردن / نظر دهید

2021-08-20 11:38:52 رأيت الله بعين قلبي
فقلتُ لهُ
من أنت ؟
قال : أنت.


معرفة الله لاتقترن بقراءة كتاب او اثبات نظرية او صلاة الجمعة او تأدية احد العقائد الدينية،
سلوكك هو الذي يحدد من هو الله، ان كنت خيرًا نافعة لأهلك ولغيرك محبًا للفقير واليتيم أمرًا بالمعروف تمتلك أخلاق عالية ومُساعدًا للجميع وحريصًا لعملك ستجد أن الله الرحيم الغفور في كل مكان
وأن كنت مبغضًا حسودًا منافقًا متعالي واناني لن تجد شيئًا سوى الشك في البشرية ثم تقول من اين جاء الله
الله في كل انسان موجود لايحتاج لأن يكون واحد في نظرك انت تحتاج لأن تكون واحد وتثبت نفسك في الصراع الأخلاقي بين الخير والشر.

جمعة مُبارَكَة.
وكلكم عيوني باز کردن / نظر دهید

2021-08-19 13:00:42 ولابُد التنويه الشَديد :
الحُسين لا يُريد منكَ أن تُدمي رأسك ولا يريد منك أن تذل نفسك وتتصرف بحماقة تعبيرًا عن ما تُسميه حزن وشعائر، الحُسين يريد منك أن تكون قويًا شامخًا، لا يريدك أن تضرب على ظهرِك بالسلاسل وإنما أرادك أن تصفع وجه الظالم بها.

(سقط الحُسين مُمزقًا كي تفهموا إِن السكوت على الطغاة مُحرمُ) باز کردن / نظر دهید

2021-08-19 12:46:57 إنتهى العاشر من محرم ... انتهت المعركة .. إنتهت واقعة الطَف .. إنتهى الألم ... وأنتهى سيّل الدموع.

ولكن لم تنتهي فكرة الحُسين, عقيدة الحُسين، صلابة الحُسين، شجاعة الحُسين، تضحية الحُسين،
جميعها ما زالت قائمة داخلنا الى أبد الابدين,
الحُسين هو منهاجنا الحقيقي ومنهاج هذا الدين

السلامُ على روحك الطاهرة، السلامُ على دمك المقدس، وأشهدُ أشهدُ أن لولاك لَما أصبحنا ثائرين.

عظم الله لكم الأجر والثواب .


احمد قاسم. باز کردن / نظر دهید

2021-08-18 22:44:26 الى خطيب المنبر والى الرادود الحسيني، لقد عرفنا كيف أستشهد الأمام الحسين
رجاءً حدثونا من اجلِ ماذا إستشهَد ؟ باز کردن / نظر دهید