2021-09-28 06:42:13
" تنظيم الوقت "
خلينا متفقين بدايةً... انه مينفعش أعمل جدول لإسبوع أو أكتر واحدد ساعات للمذاكره وأقول كله ينتظم عليه.... لأن ربنا ميز كل إنسان بحاجه معينه ف مش كلنا عندنا نفس قدره الاستيعاب او تخزين المعلومات وكمان مواعيد دروسكم مختلفه ،.... ف انا هقولكم على شويه خطوات أساسيه. تقدر تبني عليها جدول وتتعلم إزاى تدير وقتك.....
1_مواعيد دروسك: لو انت بتدرس أونلاين أو بتاخد خاص وتقدر تتحكم ف المواعيد حاول قدر الإمكان تاخد المواد كلها ف تلات أيام بكتيره...علشان يكون عندك فرصه للمذاكره من غير ضغط وتقدر تحل.
2_مواعيد نومك وصحيانك(استيقاظك؛ علشان اللغه العربيه بس متزعلش ): ظبط نومك بالليل بحيث تنام ما لا يقل عن 6 ساعات... لأنه النوم ف مواعيد مظبوطه هيساعدك ع التركيز والنشاط خلال يومك.
3_الوقت الضائع: انت أكيد عارف ان فى وقت بيضيع منك (وطبعا مفيش مشكله من وقت ترفيه لأن مينفعش تضغط نفسك اوى وتتعب أعصابك)... يعني مثلا ذاكرت خمس ساعات بتركيز وأنجزت كم كويس... مفيش مانع من ساعه تضيعها ف حاجه بتحبها أيا كانت.... أو كان عندك دروس كتير ف استريحت شويه وضيعتلك نص ساعه بردوا مفيش مشكله
4_ وقت الفراغ: انت بتظبط الجدول ع أساس مثلا عندك يوم السبت تلات ساعات من بعد المغرب فاضي ف الوقت ده هتذاكر فيه ماده كذا وكذ(وتحددهم)..
الوقت اللى فاضي فيه يبقى عباره عن tasks (مهام)...انت وحدك اللى تعرف تحدد الدرس ممكن ياخد منك وقت اد ايه..ف حدد معاد مناسب بحيث متضيعيش وقتك وبس.
5_المتابعه ع النت"سوشيال": ركز معايا هنا شويه... لازم لو انت شخص بتذاكر أصلا اونلاين يبقى مواعيد ثابته زي الدروس بالظبط وتبقى ف ايام قليله زي م قولت ف الأول....وبحكم ان الأغلب بيفتح يسمع يوتيوب حتى لو بياخد درس..ف بلاش تحتك بالسوشيال بأريحيه،،،(خد بالك من وقتك اللى بيضيع، لأنك ممكن تكون متابع أكتر من حد وتلاقى امتحانات الكترونيه بتنزل وانت تدخل تحل ولو صعب تتعقد وطبعا هدور ع اجابه الاسئله..وقت ومجهود بيضيع وممكن أصلا الأسئله دي معقده ومن خارج اطار منهجك أصلا. ف يُفضل تتابع مع اللى بتاخد معاه بس وتشوف معلومات عن اللى عليك ف المنهج مثلا (وليكن الهرمونات ف الأحياء...ممكن تلاقي هرمون ليه أكتر من وظيفه وعندك ف الكتاب منوه عن البعض ومش شارحهم.....ف الحاله دي دور عليهم علشان يبقى عندك المعلومه كامله...لكن متدورش ع هرمونات مش مذكوره ف منهجك أصلا ).
أتمنى أكون فدتكم ولو بشئ بسيط، وآسفه ع الإطاله بس الكلام مهم جدا
#تنظيم_الوقت.
#بالتوفيق
┏━━━ ━━┓
彡 @You_Can21
┗━━━ ━━
906 viewsRofida bakr, edited 03:42