2022-08-12 10:40:28
پەیاموو پاڵپەشتی ڕێکوزیایە مەدەنیەکاو مەریوانی پەی دیدگاو ئەنجۆمەنوو سەوزوو چیای
پەی هاگاداری گردٚی
هەر پاسەکە هاگادارێنمێ ئەنجۆمەنوو سەوزوو چیای به وەڵاو کەردٚەو ئاگاداریێوی پەی گردوو خەڵکی، دماو ئاشکرا کەردەٚو ناڕەزایەتی وەرانوەروو وەرپەرسا و دەسەڵاتدارا و دام و دەزگا پەیوەنیدارەکاو مەریوانی و کاربەدەساو ژیوگا و سروشتی، پەیلوایو وێش پەی بەشداری نەکەردٚەی جە ئەوەکوشنای ئایروو دارسان و تاڵانکاری ژیوگای ئاشکرا کەرد. به بڕواو چیای، پارێزنای دارستان و ئەوەکۆشنای ئایرەکا، پلەو یەکۆمیەنه ئەرکوو دەسەڵاتیا و پەنەوازا ئادٚێ وەرپەرسیاری وێشا چی بوارەنە بەرا ڕاوە.
ئێمە پێسەو ڕێکوزیایە مەدەنییەکاو مەریوانی، پاڵپەشتی وێما پەی پەیلوایو هامڕایاو چیای درکنمێ و ئێژایی و پنەزانای پەی ئەرک و مانیایی و چالاکیشا پێشکەش کەرمێ.
پاسشە مزانمێ کە ئەنجۆمەنوو سەوزوو چیای زیاتر جە دوێ دەیان، بەهیچ جۆرێو جه خەبات و هەوڵ و چالاکی پارێزنایو ژیوگایەنە کۆتاییشا نەکەردٚەن.
چی بوارەنە ئازیزا و چالاکاو ویری سەوزی، هەر چن تووشیاروو هێرش و هەڕەشە و گیریای و زیندانی بیێنێوە، بەڵام سەربەرزانە پەی یاوای بە ئامانجە پیرۆزەکاشا پاشەکشەشا نەکەردٚەن و ئی کۆسپێ نەتاوانشا کارێگەری نێگەتیڤشا بۆ سەروو ورە وئێرادەیشارە. هەر سەروو درێژەدای بە هەرمانەکێشا، ئەنجۆمەنوو سەوزوو چیای خاستەرین ڕۆڵەکێش شەهیدێ بیێ و هەزینەی فرەش دان.
ئێمە پێسەو کۆمەڵگای مەدەنی مەریوانی، ئێژایی منیەیمێرە پەی هەر بڕیارێوی هەکە دەسەو ڕاوەبەرا و ئەنداماو چیای گێراش.
هەر چی سووچەوە بە تننی ڕەخنە گێرمێ جە دام و دەزگا حۆکمیەکا و دەسەڵاتی لۆکاڵی ئی شاریە و ئینایمێ چا باوەڕەنە کە وەرپەرسێ ئی شاریە هیچ وەخت ئەرکوو وێشا نەبەردٚەن ڕاوە، به نێسبەتوو هەستوو وەڵات وەشەسیایی و ژیوگا پارێزی، گەندەڵی و ڕانت، کەمتەر خەمێ بیێنێ و بە شێوەیوی جدی پەی پارێزنایو ژیوگاو وەڵاتەکەیما خەمەوەر و ساحێب ورێ نەبیێنێ و هەنگامێ پتەوێشا هۆرنەگێرتێنێ.
کۆمەڵگاو مەدەنی مەریوانی پەی چارەسەر کەردٚەو کێشەو کاول کەردٚەی و سۆچنای و بڕیەی دارسانەکا داواو وێ ئەرمانایوی جدی جە گردٚوو هاموەڵاتیا و ژیوگادۆسا و لایەنە پەیوەنیدارەکا کەرۆ، پاسشە مزانۆ کە پارێزناو سروشت و ژیوگای تەنیا ئەرکوو ڕێکوزیا ژیوگاپارێزیەکا نیا بەڵکووم ئەرکوو تاک بە تاکوو کۆمەڵگایا، بە تایبەت وەڵاتێوەنە کە کاربەدەسێ و وەرپەرسێ ئەرکی یاسایی و ئێداری وێشا نمەبەرا ڕاوە. چی بابەتەوە هەر جۆر پەیلوای و ڕاکارێو بە مافوو سروشتی و یاسایی و حقۆقی وێما پەی هۆشیار کەردەیوەو کۆمەڵگای سوودش چنە گێرمێ. ئێمە هیوادارێنمێ ئی هەڵوێستە و ئی ئاگاداریەو ئەنجۆمەوو سەوزوو چیایه، کاربەدەسا و وەرپەرساو ئی شاریە هۆشیار کەرۆوە تا ڕاکارێوی گونجیا پەی پارێزنایو ژیوگاو وەڵاتەکەیما بیۆزاوە و هەوڵی کارا بدٚا پەی ڕووبەڕوو بیەی چنی ئا کەس و لایەنا هەکە ئەنقەس ئایر وەر مدٚانە دارسانەکا و ویروو تاڵانکاری ژیوگای کەراوە.
18و گەلاوێژوو1401ی ک. ڕ.
شۆراو ڕێکوزیایەکا مەدەنیەکاو شاروو مەریوانی
1. ئەنجومەنی فەرهەنگی-ئەدەبیو مەریوانی
2. ئەنجومەنی فەرهەنگی -ئەدەبیو ڕۆجیاری
3. ناوەندی فەرهەنگی- هونەریو ڤەژینی
4. ناوەندی زانستی کولتووریو ڕۆنانی
5. ئەنجومەنوو نمایشوو مەریوانی
6. ئەنجومەنوو ژیانەوە (بەرنگاریی مادە هۆشبەرەکان)
7. کانوونوو سەڵامەتوو ژینی
8. ئەنجومەنی پیشەیی مامۆستایانوو مەریوان و سەڵواوای
9. یەکیەتی مامۆستایانی ئایینیو مەریوان و هەورامانی (یەمامە)
https://ku.chya.ir/?p=3280
@chya_ngo
954 views07:40
ا
