2019-03-30 15:45:34
قصائد اسشهاد الامام الكاظم عليه السلام
قصيدة (صوت السلاسل)
****
صوت السلاسل ذكّرك باليُسر أكيد
وظلّيت تتخيّل صور عيلة الشهيــد
بايديك شفت السلسله
يرجع أصلهه الكربله
چتّفوا بيهه العايله ويسّروهه
*****
گبل سجنك يبن جعفر وانته تنعه الكربله
وچنت ليل انهار تبچي عالحُسين ومقتله
ويعْله ونّك مُن يُمرّك طاري سبي العايله
وهسه صرت اتحسهه أكثر من حملت السلسله
لمّن صُفه يابو الرضا ابچفّك الحديــد
حسّيت كلّش بالصُفت تمشي كالعبيد
قيدك يذكرك بالحبل
البي گيّدوا حتى الطفـل
وباللي اضربوهه وعالهزِل ركّبوهه
********
صوره فتّت گلبي وإنته وَحْدك ابسجنك رهين
چنت من تشهگ وتبچي وتنعه لمصاب الحُسين
ايغيب وَعيك من بُكائك يا إمامي يالسجين
والمصيبه اعله المصيبه ما إلك أحّد يعين
ايطوّل سجودك سيّدي وينگضي نحيب
تواسي الذي ابهذا الوضع منذبح غريب
العالأرض صارت جبهته
الساجد تبيّن صورتـه
وهوّه الأعادي رُگبتــه گطّعوهه
*********
اكو صوره انته اذكرتهه رادت اتوگف النبض
صوره والذكّرك بيهه ساگك المتروس رَض
خيم محروگه يموسى وطفل من عدهه ركض
عِثَر وانرضّت اعضامه ابخيل اُميّه ومانِهَض
طامورتك باللي جره بيهه يالإمام
ينقصهه نار وتنگلب كربله وخيام
حتى الظلام البالسجـن
ذكّرك بالراحت تـوِن
بالليل للما مندفن تنعه أخوهه
**********
ناصيه الطاموره چانت بيهه ماتگدر تگوم
من جلوس اتصلّي يعني مثل سيّدة الهموم
اسنين اربطعش مَرّن بالحَبِس تجرع سموم
رغم كل هذا وتنادي ما مثل عاشور يوم
رغم اللي شفته بالسجن من أسى وعذاب
يم كربله ابحالك تحِس هيّن المُصاب
ابجسمك لأن مامنفتح
ألف وتسعمية جرح
وآه اعله إخت اعظم ذَبِح من سِبوهه
********
من سجن تُنقل الآخَر هاي كلش ألمتك
يبن جعفر هالمصيبه بالعقيله ذكرتك
من وطن تطلع وتدخل وطن چانت عمَتك
وهالسبيّه مُصيبتهه اتهون يمهه امصيبتك
ابسجنك مشاهد مؤلمه اتشابه الطفوف
وشابَهُت ابو اليمّه الحزن حتى بالحتوف
مثل البقه طايح غِدِر
اجنازتك ظلّت عالجسر
يالكاظم وهَم تنتظـر يدفنوهه
*********
كلمات خادم اهل البيت (عليهم السلام)
الشاعر مهند قاسم الكاظمي
1.0K viewsمهند قاسم الكاظمي, 12:45
ا
