2022-06-01 20:45:00
مفاتيح الحوائج كلها ويّاها..
كريمة اوما ترد سائل تعنّاها
كريمةْ آل موسى كلها حنيّة
عطوفة اوماكو مرّة ردّت ايديّة..
تنطي اهواي دوم امن اطلب اشويّة
مُحال افضالها ابفد يوم أنساها
مُحال انساها وانا العندي من عدها
دخيل اخت الرضا وادخيل والدها
طرواها امن اجيبن وادخل ابسدها
ترتاح النَفِس حيل اعله طرواها
مفاتيح الحوائج كلها بيديها
عليك الفاتِحة والباقيِ اعليها..
اشكثر عندك حوائج كلفة تگضيها
ما خاب الذي من گلبه ينخاها
ما خاب الذي ابمعصومة يتوسّل
اشما يسأل تگلّه هاك... تدّلّل
الصعب الماله حل بچفوفها ينحل
مثل المرتضى ابكل شدّة تلگاها
تلگاها الذخيرة ابكل أمر معضل
اوخيمة اتفَيِّ روح اللي يِدَوِّر ظل
كشّافة كرب يا چنها ابو فاضل..
عد عمها الگمر معصومة مغلاها
هم عدها اشغلاته صاحب الراية!
من قم كل سنة تگصدله مشّاية..
اعله حُبّه تگضي حاجات البشر هاية
لأن عينه ابقضاء الحاجة طفّاها..
ابقضاء الحاجة غمّض عالنهر عينه
اوظلّت حسره عنده حاجة اسكينة
ابقضاء الحاجة چي لن گطعوا ايمينه
ابثوابه فاضت اعله الأمّه يمناها...
اودليل اعله اللي گلته إسمع الآتي
بيها اتوسّلت وانا انظم ابياتي
اوتمّت هالقصيدة ابعون مولاتي..
اوما چانت تتم واللهِ لولاها
*حيدر الدر العاملي*
167 views17:45
ت
