قصائد حسينية مكتوبه

2021-09-23 21:14:53 . قصيدة ترحيب الامام الحسين ع بالزوار


ياهله ومية.هله. بالگصدني الكربله
هَلي بيهم. يلاكبر هَلي بيهم


وسـع المــيــدان ألـــهم يبني واتلگله الزلم
وصيح حيهم بلأجونه وافرش ابساط الكرم
الشيعه گـصدتنه يلاكبر شدت احزام العزم
ويله نتلگاهه يبني أنــــــده الراعي العلم

.
وسع الهم كربله. وصلوا اهل المرجله
هَلي بيهم. يلاكبر هَلي بيهم

ذوله تــربات المضـــايف عـــــالكرم متعلمه
طشـــــر الخـــيرات الهم خلها توصل للسمه
والله مـاقصروا يبني اسنين نصروا فاطمه
وكل حروب ويانه همه اجسامهم تگطر دمه

تلگه يبني القافله. كل امرهم جلله
هَلي بيهم. يلاكبر هَلي بيهم

الف عابس يبني اجانه ينطي روحه ومايهم
ونار مشتعله بجروحه وعله زينب منهظم
مثل حرگت گلبي يبني الشيعه متروسه ألم
وشفت شايب بالمواكب يصرخ الثار الخيم

ناسي غيره محمله. بيهم الهم انجله
هَلي بيهم. يلاكبر هَلي بيهم

أسئل الـعباس عنـهم يبني ذوله مجربين
مـايهابون المنايه ونــصروا الدين ابيقين
حـاربوهم عالقضيه وگطعوا منهم ادين
ورغم كل الصار بيهم مانسوا أسم الحسين

ألهم اعظم مَنزله. والنصرنه اندللــــــه
هَلي بيهم. يلاكبر هَلي بيهم

يبني كل هايه المواكب ريت بالطف حاضره
جان ماضاع الرضيع وماجره اعلييه الجره
ومابقت زينب وحيده اوخــــــيمهه اموجره
وچان هسه اركاب أميه عالتراب امبعثره

وين يشرد حرمله. لو لفت هالقافله
هَلي بيهم. يلاكبر هَلي بيهم

خادم الزهراء ع ابو احمد الطائي


https://telegram.me/aabas78
قصائد لكل ايام محرم اشترك بالقناة باز کردن / نظر دهید

2021-09-22 13:09:54 يزاير ....هاي كل خطوه سلام
يزاير ....سعيك يشكره الامام

تعتني مشايه
هلا  بالوفايه
************************
بعيني اشيلك يالمحب كاصد اليه
حجه  تدري ازيارتي  اعظم هويه
بيدي اوزع  الماي  ونطيك الهديه
وياكم امي بالمشي تمشي الزجيه

يزاير.......خلي دمعك من دمه
يزاير ......عيش لوعة فاطمه

لو رفعت الرايه
هلا   بالوفايه
************************
بالمشي  ماكو  تعب  لا والله ياناس
اني واكفلك اجيت وعندي لك ياس
لو مريض اتعنه يشفه ينادي عباس
هلا بالزاير گصدني بدمع الاحساس

يزاير........اتفضل اهنانه استراح
يزاير....... موكب الحب والنياح

رايتك عنايه
هلا  بالوفايه
************************
هلا  بالجانه  مشي اتفضل  الچاي
اذكر حسين ومصابه بشربة الماي
صيح ياعباس صوتك وانت مشاي
موقف  العباس خالد  والله وفاي

يزاير..........شوف يوم الاربعين
يزاير........سلم  عليك الحسين

صورتك چن ايه
************************
هلا   بالزاير   وصلنه  حجه  مبرور
دمعتك بالعين تجبر ظهري مكسور
ادري بالشيعي غيور وسعيه مشكور
حلوه من تنعالي والله بطور عاشور

يزاير...........هاك بشران النجاة
يزاير..........اشفع الكم بالممات

سوه يمي اقرايه
************************
تدري   فضل  ازيارتي  جدا عظيمه
رحمة الله تشوف بيها هوايه خيمه
خاطر  اجبر  كل كسر عنده يتيمه
اتذكرت دمعة  رقيه  شكد هضيمه

يزاير........شوفهه بدرب السبي
يزاير........شلهه سوط الاجنبي

والدموع هوايه
************************
اشكر اصحاب المواكب كلها خدام
كل سنه  ويانه تتعب طول  الايام
عيني نامت بالمواكب شفته مانام
اسمائهم يم  الزجيه والله كل عام

يزاير........حسين يقرالك دعاء
يزاير.......هاك اخذ مني الجزاء

هيه هاي الغايه
************************
يوسف الفتلاوي


https://telegram.me/aabas78
قصائد لكل ايام محرم اشترك بالقناة باز کردن / نظر دهید

2021-09-21 10:37:51 محرم ٢٠٢١

فزعت الوفايه - اورايه تسبك رايه - واربعينك جنة المشايه
--------------
1) دربك درب جنه ---- اتحمل أجر منه ----- هاي البشر
ويتباهه بنصارك --- اويتلكه زوارك ----- الليله الكمر
ترخصلك الدمعه -- اوفزعتنه الك فزعه --- أه او قهر
اوداعت اخو زينب -- ابدربك فلا نتعب - رغم الدهر

والله ما ناسينك - وانته شوف ابعينك - واربعينك جنة المشايه
--------------
2) زين انته تدرينه --- من عابس البينه --- هذا الوفه
جم زاير اتعنه --- وزيارتك جنه ---- اوبيها الشفه
المنك طلب طلبه - تنطيها حك تعبه - الشايل صفه
زاير يسمونه --- اويبجيلك اعيونه ---- اوبيك اكتفه

انته تدري ابهايه - احنه كد احجايه - وأربعينك جنة المشايه
-----------------
3) ياجنة انصارك -- هالليله خطارك --- اتردد قسم
لاوالله منعوفك - وبالمرقد انطوفك - بسم الخدم
يل عالترب خدك -- وبعين اليضدك -- نصبح سهم
خادم اجه اويانه -- اوخادم تلكانه -- ابذيج الخيم

ابكربله اتلكونه -- اوبالدرب خدمونه -- واربعينك جنة المشايه
---------------
4) الكبرك نظل نهوه -- اويم الكمر نروه --- راعي اللوه
يم عتبة الحضره - كلب اليحب جمره - اونلطم سوه
الزاير يرض ضلعه - من تنزل الدمعه - اوعشكك ضوه
كل هذا من نورك - اوعشاكك اتزورك ---- وتشم هوه

المهدي يمشي اويانه - اوعابس اتلكانه - واربعينك جنة المشايه

--------------
5) من السبي الحره --- ردت مثل جمره ---- لزيارتك
والشيعه وياها ---- ابدمعه اتلكاها --- يم حضرتك
وبجفنه يالغالي -- وبسمانه للتالي --- اترف رايتك
وانصارك ابعبره -- كلمن يرض صدره -- اوماعفتك

شعيتك عنايه - وانته عدها الغايه - واربعينك جنة المشايه
-----------
لخادم اهل البيت ع أبو أحمد المجراوي ٠


https://telegram.me/aabas78
قصائد لكل ايام محرم اشترك بالقناة باز کردن / نظر دهید

2021-09-20 19:46:07 #ذكرى_الأربعين

(موشح)

اشـعدها زينب عودت لحـــســـيـــــنها
بالـــيــــسر وفّـــت البـــيـــنـه وبـــينها

اشْعِـــدْها زيــنب ويّـه الحسين اشْتِريد
مــا كِفــــاها امْصــــابها وشوفـة يِـزيـد
نســــت هـــضم اليِـسر لو وحشة البيد
لو بـرض كـــربله اشْــنِـظْـرَت عـيـنـهـا

اشعـــدهـــا زيـــنب رَدّت الكربله ردود
مــــا دِرَت بِخْــــوتـها مِتْوسده اللحود
الـــراح مـــنـــها راح لَتْـــظِــنّه يِـعـود
وعالمصايب بـــس صــبرها ايْعـــينها

اشعــدها زينب عَـوِّدَتْ لرض الطفوف
ما درت لـــو وصْــلَت الطف اشْتـِشوف
انچـــان مــا تِگْـــطَعْ أملها اوْما تعوف
خـــل تگــضــي عله گــبور اسْـنينها

اشعـــدها زيــنب عَتَب لو رايده تنوح
واليِـــــسُر مـــا خَـــلّه الهـــا بعد روح
خـــل تِـــلِــمِّ الحَـــرَم والطــيـبه تِروح
ويـــم گــبــــر امــــها اتْــكَــثِّر اوْنـينها

اشعـــدها زينـب تعدي ما بين الگبور
وابْـــمَـــچان خــــيامها ظـــلَّـت تِـدور
بـــالشكايـــه وبـــالمْعاتَـــب لا تِــجور
حسيـــــن شـــاهد حـرگة اصْـواوينْها

اشعــــدها زيـــنب أمـل بعد اشْتِنْتِظر
شــــاهِدَتْ مصـــرع اخــوَتْـها واليِسُر
وِ لْتِـــحَـــشِّم بــــيه مـــنـــها يِعْــتِـذِر
تــــدري لا رايــــتــه ولا چَـــفّـيــــنْها

اشعــدها زينب حايِمه اعْله المشرعـه
وغــــدت تِتْـــمَّـثل اخــوها اوْ مصرعه
ما درت بچــــفوف اخــــوها امگـطعه
وجـــثّـــته ابْـفـيض الـدمه امْغَـسْلينْها

اشعــــدها زيــنــب تــــذكر أيّام الدلال
مــــا دِرَت بِخْــــوتها متــوسده الرِّمال
خــــل تِــــوَزِّم روحـــها ابْجَـمْعِ العيال
حيــــث تــــمُر العــــايله امْـــوَصّـينها

اشــعــدها زينب واليريده حسين صار
وضـــع امـــيـه مـــنـها صابه الانهـيـار
خـــل تــرد عــــيال اخــوها للـــديـــار
الـــعـــتب ويــن اوْ روح زيـــنـب وينها

الأديب #جابر_الكاظمي


https://telegram.me/aabas78
قصائد لكل ايام محرم اشترك بالقناة باز کردن / نظر دهید

2021-09-20 19:46:05 صوغة سفر. (الاربعينيه)

من السبي جينالكم
صوغة سفر جبنالكم
شتگول اخوتي وآني ام عون
ارجع واديه خاليه شلون
صوغة سفر جبنالكم
++++++++++
ردينه ما نشبه قبل بس المهم درينه
غير الحنان ودمعتي اي عرف ماضل بينه
يخواني ميتين اقتنع بس اشيقنع سكينه
تسألني ما صاحوا هله بس لا صدك ناسينه

لا والله ما ينسونها
احبيبتهم ايتانونها
ودهم ولكن ما يگدرون
ارجع واديه خاليه شلون
صوغة سفر جبنالكم
++++++++++
ليموت گلبه امن القهر مامات عنده حساسه
يتناسه الام التعب من يلتقي وي ناسه
بگبور اخوته امن الترب تشتم حنان انفاسه
الكم هدايه اعله العدد جبناله كلمن راسه

من الدمه اغسلناهن
بس ماتغيير حالهن
صحنه باساميكم تسمعون
ارجع واديه خاليه شلون
صوغة سفر جبنالكم
+++++++++++
سألتني بالشام شكثر حلم الرباب شكده
يم عون بله شكولتچ اخذ مهد لو ارده
لو هسه عبد الله كْبر مايغفه بعد بمهده
تسالني هسه بكربله ماگعد نايم بعده

اگعد تصيح اوليدها
وگماطه بعده ابأيدها
گلتلها موته وما يفزون
ارجع واديه خاليه شلون
صوغة سفر جبنالكم
+++++++++
يحسيني يا اكبر جرح انه القميصك جبته
لو بي گصر خويه اعتذر عالرمح ماگدرته
قبل الحوافر والسحك طولك جنت حافظته
گالو حصيره وچم شبر بس جسمك اتخيلته

بس مالگينه احابسك
وبخنصرك لتلابـسك
ماندري اذا خنصرها مدفون
ارجع واديه خاليه شلون
صوغة سفر جبنالكم
+++++++++
ايتامي ركضت للنهر كلمن وطاسه وياها
صاحب جميل الكل طفل وكفات ماينساها
ياعمي صاحو جربه الك من السفر جبناها
ماتتعب بدخلت نهر بدموعنه اترسناها

محتاجه بس اترافجك
تتعطر امن شفايفك
تروينه بيدك يالگمر كون
ارجع واديه خاليه شلون

الشاعر ثائر الربيعي


https://telegram.me/aabas78
قصائد لكل ايام محرم اشترك بالقناة باز کردن / نظر دهید

2021-09-20 10:50:41 بيها نزلت آيه .. ثورة المشايه
ــــــــــــــــــــــ
نحچيها ابمختصر .. هالنعمه بكل فخر
مِتنزْله اعله النحر .. تقراها الضماير
من يمشي لك جدم .. من ايرف لك علم
كــل آيــات القِيَم .. في هاي الشعاير

احنه نزلت بينه .. آيات العجايب
( إنَّمَـا نُطْعِمُكُـمْ ) .. نزلت بالمواكب

صارت إمصلايه.. ثورة المشايه
ــــــــــــــــــــــ
بهالآيه شگد عشگ .. يتجلّه كل صدگ
معشوگنه منسحِگ .. ونگطِّع له إدينه
ياعطره من يهب .. نمشيله وننتحب
نوصل لِلْـ منسلب .. ويا لَذّت مشينه

آيـه رتّلنــاها .. المشايه إبگلبنه
مو فقط ايدينه .. تستاهل رُگبنه

ما تريد أوصايه .. ثورة المشايه
ــــــــــــــــــــــ
آيات الـ مائده .. تلگاها ابسفرته
ما بردت دلّته .. من جمرت خيامه
خطاره ايدللـه .. وخِدّامه امعدِّله
من بيوتنه لكربله .. موجوده الخِدامه

شگد سفرته إچبيره .. ويْلِمّ الـ عوالِم
واللي ينوي يزوره .. إيسخّر لجله خادم

بكلشي حكمه وغايه .. ثورة المشايه
ــــــــــــــــــــــ
اعشگناها من الزغر .. ننطرها عالجمر
كل آيات الصبر .. صارت بـ أربعينه
ما نترك خدمِتَه .. نعشگها ازيارته
من نوصل گبّته .. يروينه ابحنينه

يا حلاة ايامهـا .. ونضل عد عهدنه
ثـوره وبأهدافها .. تتربّى ولِدنَه

كل أملنه بهايه .. ثورة المشايه
ــــــــــــــــــــــ

الشاعر مهدي التقي


https://telegram.me/aabas78
قصائد لكل ايام محرم اشترك بالقناة باز کردن / نظر دهید

2021-09-19 15:36:12 هذا يوم الأربعين
@@@
الاربعين ابموعده
جرح عاشر جدده
بالحسين او مشهده
عالمآسي والونين
@@@
چنه يوم الواقعه
والضحايه اموزعه
وبالسيوف امگطعه
وجسد مهشوم ابوتين
@@@
عالظعن رجعت عبي
من بعد ذلة وسبي
هذا ركب الزينبي
اگبل اينوح الحسين
@@@
الروس رجعت بالأهل
والظعن لمن سئل
وين عباس الكفل
بلا يسار ولا يمين
@@@
گلب ام عون انچوى
وبس يداويه اللوه
ومتن بالسوط انلوى
والاشد جرح الحنين
@@@
النوح لمن يعتلي

امدلله چي تنولي
الهظم شيّب بت علي
مدنگه ابهمها الجبين
@@@
محيره فيما ابتلت
لو نياحتها اعتلت
چم دواوين ادخلت
بين طاغي ومجرمين
@@@
بيها شالسوه الزمن
اتمنت ايلفها الچفن
نزلوها امن الظعن
رجعت وكبرت سنين
@@@
علي احمد الحمود
١٨-٩-٢٠٢١
الأربعين المقدس


https://telegram.me/aabas78
قصائد لكل ايام محرم اشترك بالقناة باز کردن / نظر دهید

2021-09-18 19:43:26 #محرم_١٤٤٣
#قصائد_منبريه
#الزيارة_الاربعينية

درب الحسين غايتي درب الحسين
امشي وترف رايتي كل اربعين
...............................
عشكي وابكَلبي انبنت كَبه ومناره
روحي ملهوفه وتجي اتأدي الزياره
صبري من مرت سنه ابعمري انتظاره
وادري كل خطوه ابعشك أجمل عباره
أنعه بأنين دمعتي أنعه بأنين
امشي وترف رايتي كل اربعين
...............................
كعبه قبله وكل محب يوصل يطوفه
كَلبه ابيض طيب وميرد ظيوفه
صعبه سهله اتصير من الفظ حروفه
حربه بيهه استشهد وضامي ابطفوفه
لجل الوتين صيحتي لجل الوتين
امشي وترف رايتي كل اربعين
...............................
عارف كلمن حقه ضامنهه العقيده
عاكف يعبد ربه من كَطعو وريده
ناشف جان السانه بالحاله الشديده
واكَف هل من ناصر ايردد نشيده
يطلب معين قبلتي يطلب معين
امشي وترف رايتي كل اربعين
...............................
حره زينب تعتني اتأدي اربعينه
جمره بيه الدمعت الحره الامينه
نحره من تحت الترب تسمع أنينه
عطره باقي ابتربه بيهه امكَطعينه
دمع الحنين سلوتي دمع الحنين
امشي وترف رايتي كل اربعين
...............................
دمعه واوكَع بالصحن لو اطب ضريحه
ضلعه ذاك المنكسر قصه ونصيحه
شمعه نوره ابدربي احس جلمه صريحه
وضعه جان اعظم رساله الكل شريحه
ياعالمين كلمتي ياعالمين
امشي وترف رايتي كل اربعين

الشاعر
ياسر العارضي


https://telegram.me/aabas78
قصائد لكل ايام محرم اشترك بالقناة باز کردن / نظر دهید

2021-09-18 13:03:46 قصيده للاربعين
عــمّـــه يــا عــمّـــه عـلــــي
ويـــن كَــبـــره كــافــلــــــــي
عــالكَــبـــر خــلّــيــنــــي أجـــري دمّــعــــة عـيـنـــــــي
ويــن كَــبـــــره كــــافـــلـــــــــــــــي
ـــــــــــــــــــــــــــــــــــــــــــــــــــــــــــــــ

عـمّــه يـا عــمّــــه عـلــي فـاضـــن ســواجــــــي أعــيـــــونـــــــــي
عــمّـــه دلــيـنـــــي كَـــبـــــر عـبــاســـي يــمّـــــه أخـــذونــــــــــــي
يـمّــــه أشـكـــي غــربـتـــي وأشـكـيـلــــــه هــــم أضــعـــونــــــــــي
عــمّـــه بــعـيـــونـــه ردت يــنــظــــر ســــــــواد أمــتــــــونــــــــــي

عــمّـــه يــنــظـــــر حــالــتــــــي
والــجـــرالــــــي بــغــــربــتـــــي
وأحّــجــــــي ويـــحـــاجــيــنــــــي أجـــري دمّــعــــة عـيـنـــــــي
ويــن كَــبـــــره كــــافـــلـــــــــــــــي ـــــــــــــــــــــــــــــــــــــــــــــــــــــــــــــ

عــمّـــه عــفــتـــه عــالـثــــرى مـكَــطـــوعـــه مــنّـــه أزنــــــــــوده
عــمّــــه وبـعــيـنــــه الـسـهـــم وبـصــفّـــه طـــايـــــــح جــــــــــوده
خــذنــــي يــمّـــه أشــتـــكـــي هــظـــم ألّلـيـــالــــــي الــســـــــــــوده
يـرضـــه زيـنـب تـنـسـبـــــي وجـفّـهـــه بـحــبــــــل مـــشـــــــــدوده

أشــــكـــــي آلام الــيــــســــــــــــــر
خـــذنــــي عـــمّـــــه لـلـكَـــبـــــــــر
لـلـنــهـــــــــــر ودّيــــنــــــــــــــــي أجـــري دمّــعــــة عـيـنـــــــي
ويــن كَــبـــــره كــــافـــلـــــــــــــــي

عــمّــــه خــذنـــــــي لـلـكَــبـــر أجـــري الــدمــــــع وأشـكــيـــلــــــه
خــلّــي يـعــلـــم بــالـجـــره والـصـــايــــــر آنــــه أحّــجــيـــــلــــــــه
مــــا دره لــمّـــن وكَــــع هـــد جــيــــش أمــيّــــه بــخـــيـــــلـــــــــه
حــركَــــو بــنـــــار الــخـيــــم مـــا يـــــدري فـــــوكَ الــعَــيــلــــــــه

يـــم أبــن حــامــــــي الــحــمــــــه
خــل أصـــب دمـعــــي بـــدمـــــــه
جــن جــمــــر يــجــــويـــنـــــــــي أجـــري دمّــعــــة عـيـنـــــــي
ويــن كَــبـــــره كــــافـــلـــــــــــــــي
ــــــــــــــــــــــــــــــــــــــــــــــــــــــــــــــــــ

عــمّـــه عــبـــاس الـكــفـــــل خــــدري وأمــــــان أنّـــطـــــانــــــــــي
كَـــال طــلـعــــي بـــرايــتــــــي ولــكـــــربــــــلـــــــه جـــابــــانـــــــي
عــمّـــه خــــذنـــي لـهــيـبــتــــي خـــذنـــي لـعـمـــد صـيــــوانــــــــي
خــلّــــي أســولـــف وأشــتـــكـــي ســـــوط الــشــمـــــر أذّانــــــــــي

شـفــنـــه كــلّــشــــي بــالــغــــــــرب
ظــــيـــــــــــــم وآلام ورعـــــــــــــب
والــســفـــــــــــر مـــاذيـــنـــــــــــــي أجـــري دمّــعــــة عـيـنـــــــي
ويــن كَــبـــــره كــــافـــلـــــــــــــــي
ــــــــــــــــــــــــــــــــــــــــــــــــــــــــــــــــ

خـــذنـــــي يــا عــمّــه عـلـــي لــراعــــي الـفــظــــل والـــرايـــــــــه
عــالـنــهـــــر ضــامـــي وكَـــــع يـــــم الــفــــــرات ومـــــايــــــــــــه
خــــل أكَــلّـــــه يـــا فــحــــل زيــنـــب أجـــــت شــــجّـــــايــــــــــــــه
مــن الـغـــــرب رد الــظــعـــــن وأنــت شــتـــكَــــــول بــهـــــايــــــه

عــمّـــه يـــكَـــعــــــد مــا أظــــن
لـلـمـــديــــنـــــــــه لـلـــــوطـــــن
مــنــهــــو الــيــــــوديــــنــــــــــــي أجـــري دمّــعــــة عـيـنـــــــي
ويــن كَــبـــــره كــــافـــلـــــــــــــــي


الشاعر السيد علاء الحيدري


https://telegram.me/aabas78
قصائد لكل ايام محرم اشترك بالقناة باز کردن / نظر دهید