نعي ابو ذيات هوسات

2023-08-13 13:41:08 نعي للامام السجاد ع

عندما رجع الامام زين العابدين عليه السلام الى المدينه بعد مقتل الحسين عليه السلام  كان يبكي كثيرا على والده وكأني به يبكي ويقول
صعبه الليالي  بعد الابو صــــعبه الليالي
والابو غالي   كلش عزيـــــز الابو غالي  
والدمع هالي   ابجي اشكثر والدمع هالي
مشدوه بالي   من فركتــــــه مشدوه بالي
والبيت خالي   وسفه مشه والبيت خالي
والنوح فالي   صار البجي والنوح فالي
***
وكان يجلس على باب الدار وينظر باتجاه المقبره وكأني به يخاطب والده يقول
مشـبعت منك    بساعك شلت مشبعت منك 
فركنــي عنك    وسفه الكبر فركنـــي عنك
ماترد جـــنك   بويه ارحــــــلت ماترد جنك
ماتسمع ابنك    يبجي ويون ماتســمع ابنك
***
وكان الامام زين العابدين كثير البكاء على والده ويجلس في وقت الغروب على باب داره
اعليكم يالأحباب   مسيت العافيه اعليكم يالأحباب
يالحدر التراب     يالصرتو بــعد يالحدر التراب
ذابحنه الغياب    والله اشـــــــكثر ذابحــنه الغياب
كفينه العـتاب    منكم بعد كفيـــــــــــــنه العتاب

وكأنما زينب تأتيه وتصبره فيقول لها الامام عليه السلام

معـــذور  لوناح    الفاكدله ابو معــــذور لوناح
واشلــــون يرتاح   هيهات ابد واشــــلون يرتاح
بسيوف وارماح   كلبه انترس بسيوف وارماح
والدمــــع لوساح    مثل الجمر والدمــع لوساح
***
كعدات اهلـنه    لاماترد كــعدات اهلنه
نكطع الضـنه    منهم بعد نكطع الضنه
اهل المحـــنه    شالو بعــد اهل المحنه
جن موش منه   راحو بعد جن موش منه
***

وكأنما زينب عليها السلام تقول له
ضيف اليجي ياهو اليحيه   
وياهو اليكــرمه واليسليه
وباليا هله ياهــو اليلاكيه
ديوانكم راحـــــت اهاليه
***
شــــيرده اليروح   صعبه بعد شـــيرده اليروح
معــــذور الينوح   اعزازه مشت معذور الينوح
والكلب مجروح   يبجي اشكثر والكلب مجروح
ماتهجــع الروح   تسكت بعد ماتهــــجع الروح
***
وكأنما الامام عليه السلام يقول لعمته زينب ع لما دفنت والدي
مارد علــيه  ندهـــته اشكثر مارد عليه
جاهاي هيه  ها يالابــــو  جا هاي هيه
ردت المنيه   ذاك الوكــت ردت المنيه
والنار بـــيه   هلت التـــرب والنار بيه
***
غمض اعيونه   مات الابو وغمض اعيونه
سدهن اجفونه   راح النفس ســدهن اجفونه
****
من هلت التراب   نحت اشكثر من هلت التراب
والدمع ســجاب   انعه الابـــــــو والدمع سجاب
ياكبر الاحـباب    عينك علــــيه  ياكبر الاحباب
ياذينـــه الغياب    بعده اشـــــــكثر ياذينه الغياب

وكأنما الامام يقول لعمه محمد ابن الحنفيه عليهما السلام
***
ابجي اعله الاحنان   عمي انتحب وابجي اعله الاحنان
واعزاز  الاخوان    مامش مثلـــــــهه اعزاز الاخوان
بالكــــــلب نيران      ظلت تشــــــــــب بالكلب نيران
وحشـــه الديوان      راحت هله او حشـــــــه الديوان
***
لمــــــت الخوان   لاماترد لمــــــــــــــــــت الخوان
كعــدت الديوان    راحت بعد كعــــــــــدت الديوان
ماهيه الحـــنان     يوم العيد لاما ماهـــــــيه الحنان
شو خالي المجان   وحشه البيت ظل وخالي المجان
***



وكأني بالامام عندما يعود الى داره وتسأله الايتام  الاوالد والبنات
جاوين ابونه     شومارجع  جاوين ابونه
فدوه العيونه     ردناه يجي فدوه العيونه
ماخرب لونه     بعده حلو وماخرب لونه
وحشه بدونه    ظلمه الوكت وحشه بدونه
***
واريده يرجع    محتاجين ابونه انريده يرجع
والبجي يسمع    ندريـــــــه والله البجي يسمع
واشلون نقنع    مات الحنــــــــين اشلون نقنع
واليتم يوجع     هاكد نكلــــــــــه  اليتم يوجع
***



أبو علي الركابي


https://t.me/joinchat/AAAAAEN4vuuUfDbAramBIQ
قناة خاصه نعي / ابوذيه / هوسات باز کردن / نظر دهید

2023-08-01 01:01:47 نعي الدفن



يحيدر بالدفن هاي المسيه
تنادي زينب من الغاضريه
١

زينب حايره بدفن الغوالي
تنادي الزهره وبهاي الليالي
تعالي يم حسن ليه تعالي
ويبويه ياعلي لحك عليه


زينب بالدمع وبنار الاحزان
تنظر للذبيح المات عطشان
طاح امكطع بحومة الميدان
وضل ابلا دفن أبن الزجيه


طاح اعله الشريعه اليرفع الراس
مصيوب بعمك ومهشم الراس
مامدفون ضل الهيبه عباس
وجفوفه مكطعه فوك الوطيه


بالحومه عليه مرت أيام
انظر للغوالي وكلبي محتام
بعيوني شفت مذبوح جسام
مامدفون ضل جثه رميه


ماهميت من حركو اخيامي
بعبدالله افكر مات ضامي
مذبوح بسهم والنحر دامي
عليه تبجي وتون ضلت رقيه


علي الاكبر وكع بين الأعادي
مامدفون شبه النبي الهادي
وينك ياعلي ضليت انادي
تحضرني وتشوف اشصار بيه


ناديت اشكثر وكليبي محتار
وينك ياعلي وينك يكرار
ماتحضر يبويه الدفن الأنصار
وتحطهم بالكبر كلهم سويه



زينب حايره والكلب مفجوع
ياليل الدفن ياليل الدموع
تمشي وعثرت ابخنصره المكطوع
ونت بالهضم ونه شجيه


زينب حايره ودمعتها بالعين
لا عباس يحميها ولا حسين
وبليل الدفن بس النساوين
وكلبها اتحمل الهم الأذيه


وينك ياعلي تحضرني ياريت
من طاحو اخوتي بويه ناديت
عمود البيت طاح وطايح البيت
اكثر ناديت ياحامي الحميه


اخوتي ابلا دفن ضلو ليالي
ماتحضر يبويه تشوف حالي
عكب عباس وحسين ودلالي
اخبرك بويه راح امشي سبيه



ساعات الدفن صعبه وثكيله
وغيرك بويه ماعندي اشتكيله
محد مابقه ايحامي العقيله
بالطف حايره واصفك بديه


لاتنسون والدي وابني عباس من الرحمه والمغفره
خادمكم رياض الرسل الجابري


https://t.me/joinchat/AAAAAEN4vuuUfDbAramBIQ
قناة خاصه نعي / ابوذيه / هوسات باز کردن / نظر دهید

2023-07-31 10:05:08 نعي ليلة الدفنة


دمعنه بالجروح اليوم دفناه
على الصار اويا جنح الليل دفناه
دفن حسرات فوگ هموم دفن آه
وفجعنه من أهد يوم الغاضريه


دفنهم والحزن يشبچ علي وين
بدليله ودمعته من دم علي وين
العقيله نشدته وگالت علي وين
چنت گلهه دفنت إعزاز إليه




الگمر يصعب بوسط اللحد لمّاه
ويلوم الگلب وانه ٱستمع لمّاه
منو يودي خبر دفنته لماه
ويگلها إبنچ وفه بكل الوصيه


مشاهد ما تسر العين لامت
شكو أحزان وچثير أرواح لامت
الأمس فرسان حومه صفوف لامات
صفوا ياللأسف بخت المنيه


الحزن لگلوبنا إمن حسين تركاه
سيوف بكل گلب مهموم تركاه
الدفن إكرام ميت وصعب تركاه
الصعب جوه الثره تحط الثريه


عمار هليل الواسطي
ليلة الدفنة المؤلمة
١٣ محرم الحرام


https://t.me/joinchat/AAAAAEN4vuuUfDbAramBIQ
قناة خاصه نعي / ابوذيه / هوسات باز کردن / نظر دهید

2023-07-30 20:26:24 نعي للدفن


على الكاع على الكاع
    ثلثتيام اخيي ضل على الكاع
يلحكله ابساع يلحكله ابساع
        وين الولي اليلحكله ابساع
لاع القلب لاع القلب لاع
          لابن والدي لاع القلب لاع
ياحلو الاطباع ياحلو الاطباع
          مكطع وذر ياحلو الاطباع

ماجيتك انا ماجيتك انا
  يخويه اميسره وماجيتك انا
يوجع ندانا يوجع ندانا
لو صحنا الك يحسين يوجع ندانا
بسوطه ولانا بسوطه ولانا
    لو صحنا اه واه بسوطه ولانا
ظالم زمانه ظالم زمانه
ياحيف ويه حسين ظالم زمانه


امكطعه اوصاله امكطعه اوصاله
عالارص ضل حسين امكطعه اوصاله
ذكرن دلاله ذكرن دلاله
بنياته صجن حيل ذكرن دلاله
محد اجاله  محد اجاله
بطف كربلا مذبوح محد اجاله
ويتعناله ويتعناله
هلبت  يجي الكرار ويتعناله



يحيدر وين عن حسين هالساع
يبويه ماحضرته بكربلا بساع
ذبحوه وبناتك راحن ضياع
جا وين الغيارى التمحي الهموم

حسين بكربلا وربعه مطاعين
هاه يولاد هاشم راح الحسين
زينب ضلت بلايا محامين
وبيد أهل الرجس والقلب مالوم

زينب باليسر والحرم وأطفال
حرمه وثكلى ضلت بين العيال
اجيت من المدينه وعندي كفال
هسه بلا كفيل اتشوف الهموم



محمد دعبل النوري


             https://t.me/joinchat/AAAAAEN4vuuUfDbAramBIQ
قناة خاصه نعي / ابوذيه / هوسات باز کردن / نظر دهید

2023-07-29 00:41:53 *
صحت بالخيل ارجعي لا تسحكي
اظن حسين ضل ولجن نفس بي
عفته اعله التراب وماد رجلي
اشويه امن السحك يرتاح خلي


جاثي الشمر شفته فوك صدره
وكل ساعه عله الهامه يطبره
رفس صدر الحسين وكطع نحره
ولوع بالذبح فاطمه الزهره


من بعيد اشوفنهم يهوسون
ومات حسين يازينب يكولون
بعد بيمن يبت حيدر تلوذون
جتلنه حسين والعباس تدرون


عفت حسين فوك الترب عريان
ويلي اعله الغريب المات عطشان
ضلت بالخيم تصرخ النسوان
وكلها بكربله امذبحه الوليان


نحل جسمي واحس الكلب بيداه
امصابك كسر ضهري وحيل بيداه
الشمر شفته يحز الراس بيده
وذبحت حسين اخوج يصيح بيه


عكبك صاحي بالدلال يابت
وهليله تنوح اعليك يابت
الخيل وياها منك لحم يابت
انطحن جسمك طحن بالاعوجيه


عجب شح الفرات عليك. مايه
وبحر حزن يخويه تشوف مايه
سكينه تصيح ابوي حسين مايه
اريده يشوف ضيم المر عليه


****
الشاعر
تحسين الخفاجي


https://t.me/joinchat/AAAAAEN4vuuUfDbAramBIQ
قناة خاصه نعي / ابوذيه / هوسات باز کردن / نظر دهید

2023-07-28 20:49:39 نعي وداع الامام الحسين.. ع
***
ليلة عشره ظلمه وموحشه الگاع
أويلي شلون ليله وباچر وداع
ويم حسين نلتم نبچي كل ساع
يريت الصبح لا بيّن عليّه
***
بألف ليله يريتچ كون هالليله
وأگعد يم أبو السجاد وآحچيله
يشكي هموم گلبه وآنه أشكيله
ونظل طول العمر نگعد سويّه
***
گلّي شلون أودعك خويه يحسين
وهاي الگوم حاطت بالصواوين
وعلى چتلك يبو السجّاد ناوين
أموت ولا أشوفنّك رميّه
***
گعد بين العيال حسين حيران
وعبد الله الرضيع يلوع عطشان
وعلي السجّاد گلبه إلتهب نيران
وبچت رمله ورباب بهل مسيّه
***
رقيّه وخلني أشبع شوف منّك
أخاف من الوكت يبعدني عنّك
مكاني من صرت لليوم حضنك
وعلى صدرك ألذ نومه الرقيّه
***
على صدرك يبويه شكثر ارتاح
وأتعطّر بريحة عطرك الفواّح
هم يرجع هذاك الوكت لو راح
برحيلك بويه تاخذني المنيّه
***
ترى وداع الأبو يا ناس حيره
والله إيعين البنيّه الزغيره
چانت عايشه بجاله أميره
الله يساعد سكينه ورقيّه
***
يبويه أرجوك خل أگعد إگبالك
وخل عيوني تشبع من جمالك
وعليّه أعطف ورويّني بدلالك
هذا آخر وداع وياك اليّه
***
دخليّني أگعد إبّابچ يخيمه
أعلى أبوي الليله هل مأتم أجيمه
أحس سكنه الصّبح باچر يتيمه
وأنا وعمتي العصر أمسي سبيّه
***
أجت سكنه وتقبّل إيد أبوها
وتودّع نوبه عمها ونوبه أخوها
ومثل ما ودّعتهم ودّعوها
وبچو حد الفجر بالغاضريّه
***
بچن دمعاتهم دمعه أعلى دمعه
ونعي الدمعات ما واحد يسمعه
دمع زينب عبالك دمع شمعه
بگلبها النار والدمعه جريّه
***
أعلى هونك ياصبح لا لا تجينه
ظلام الليل خل ساتر علينه
اذا تطلع شمس نفگد ولينه
وتظل بس الحرم بالغاضريّه
خادمكم
ابو يحيى السويطي


https://t.me/joinchat/AAAAAEN4vuuUfDbAramBIQ
قناة خاصه نعي / ابوذيه / هوسات باز کردن / نظر دهید

2023-07-28 11:21:09 هوسات للعاشر من محرم

الحره أتناشد أبحسرات وتهل مدمع من العين
وين الوالي ما اجانه تأخر ما رجع الحسين
وحيد أبين عـدوانــــه واندارت عليه صوبين

أرد أنشــــدچ كـــــربلــــــه وينــــــه ولينـــــه
هلله هلله حسين وينه بالسيوف مگطعينه
وين أخوي حسين طايح كربلــه ردي علينــه
هلله هلله حسين وينه بالسيوف مگطعينه
هاي سكنه تريد ابوها تصرخ اتنادي الحزينه
هلله هلله حسين وينه بالسيوف مگطعينه


*

وين أبيا كاتـــر طايــــح ابواليمه علـى الغبره
صدگ فوگچ على التربان حزو يا وسف نحره
صدگ يا كـــربله الوالي داسـت خيلهم صـدره

جـــاوبينــي كـــربله بدمعــــه حـــــزينـه
هلله هلله حسين وينه بالسيوف مگطعينه
حسين فـــــوگ الغبــره مــا نسمع ونينه
هلله هلله حسين وينه بالسيوف مگطعينه
صدگ خيـل ا ل أميه بالحوافر ساحگينه
هلله هلله حسين وينه بالسيوف مگطعينه


*


وين حسين ابـو اليمه الي ويـــاچ الـــف عتبـــه
صــدگ يــــا كــربله الــوالي نـار أحشاه ملتهبه
وگلبه البيِه محّنه شلون صاب السهم نص گلبه

وين جــــده المصطفــــى يگصد يجينـــه
هلله هلله حسين وينه بالسيوف مگطعينه
ينظر بيا حاله طايح عالترب والد سكينه
هلله هلله حسين وينه بالسيوف مگطعينه
لا أهــــل يمّـــــه ولا أخــــــوه التعينــــه
هلله هلله حسين وينه بالسيوف مگطعينه

**
الشاعر
موسى البديري


https://t.me/joinchat/AAAAAEN4vuuUfDbAramBIQ
قناة خاصه نعي / ابوذيه / هوسات باز کردن / نظر دهید

2023-07-28 07:18:23 نعي مفجع
السيده زينب تخاطب العباس ع


بـاچــر يـخـويـه خـايـفــه اهـواي
جـيـش الــعـده يـوصـل ثـنـايـاي
احـزام الـظـهــر يالـبـيـك رجـواي
انــتــه الـسـتــر عـبـاس وفّـيــاي


مــنــك اريــدن عــهــد يالـحـيـد
بـاچــر عَـلـي مـاتـبـعــد ابــعـيـد
تدري بـخـصـمـنـه موش اجاويـد
نـار الـزچـيـه ابـخيـمـتـي اتـعـيـد


مـحــد يـصـلـنـي كـون مـوجـود
ومـحـد يـدوس الـهـاي لـحــدود
بـيـك الـخـدر والأمــل مـعـگــود
مـثــل الـعـلــگ ونـشــد بلـزنــود

                    *---------------*---------------*

خادم السيده زينب (ع)
الشاعر رعد الجريخي


https://t.me/joinchat/AAAAAEN4vuuUfDbAramBIQ
قناة خاصه نعي / ابوذيه / هوسات باز کردن / نظر دهید

2023-07-28 01:46:01 نعي عن الطفل الرضيع

الطفل منحور لمن شافه الحسين
يريت الصدگ لاموصدگ بالعين
رمه للسمه ابدمه ابن الميامين
                   مارد للارض دمه ولاطاح

الصبر رايد يربي وعينك اتشوف
يمد ايده على نحره الطفل ملهوف
يظن ماي الدمه واللون مخطوف
                    خالف ماخطاه السهم ذَبّاح

يعبد الله يشوغه بوسط صدري
گبل عمرك يبويه ريت  عمري
مثل عباس موتك كسر ظهري
                    يازهرة گليبي وعطر فواح

الشاعر حسن لعيبي الحريشاوي


https://t.me/joinchat/AAAAAEN4vuuUfDbAramBIQ
قناة خاصه نعي / ابوذيه / هوسات باز کردن / نظر دهید

2023-07-27 08:32:52 نعي  ام الاكبر تخاطب الإمام الحسين عليه السلام

علي الاكبر يبوالسجاد وينه
طول غيبته ومارد علينه
اتاني الراح ياساعه يجينه
بالحومه فرد محد يعينه
يگلها بشوغته وسچابه عينه
زيدي النوح يم روح الحنينه
طاح ابنچ تره وبطل ونينه
وبشفار السيوف امگطعينه
شبيه المصطفى معفر جبينه
العلى العشرين ماكملن سنينه

الشاعر حسن لعيبي الحريشاوي


https://t.me/joinchat/AAAAAEN4vuuUfDbAramBIQ
قناة خاصه نعي / ابوذيه / هوسات باز کردن / نظر دهید