نعي ابو ذيات هوسات

2023-07-01 13:24:07 (ابوذيات)

المشي من ثگل خطوتنا مشي تاه
تعبنا والجدم صارت مشيته آه
درب بي تعثر الناگة مشيته
وي ناس التشتم والديه

الگلب لمصاب خوّاني بريته
اخوي الجابني محالل بريته
مشه دخان خيمتنا بريته
وذكر گعدتنا بالخيمة سويه

الخيمة الجمّعتنا واللمتنا
احرگوها ونار كبرة ولّمتنا
يوادم من حچيهم والله متنا
اليمشّي النوگ ماعاف الزچية

الصخر يعرف گدرنا مايهلنا
ولون صرنا بعيونه مايهلنا
شعجب منّه انحرمنا ماي اهلنا
ونشرب ماي من ايد آل اميه


چثيرة گلوب وكتي ماردنّه
شعجب فَي الكفلنا ماردنّه
الماي من ايد شامت ماردنّه
اخاف اشرب ويتشمتون بيه

امس عباس بالطف راح منه
عگب ماراح فيّه راح امنّه
الحدانا مااجتنا راحة منّه
يعت بالنوگ حته اتميل بيه

اخذنا من فضلها منزلة امنا
شكثر گعداته حلوة منزل امنا
افترگنا ولاظل احد من زلمنا
وصبح خالي بعد بيت الزچية


يـربـي لا اتـودّي مـاي للـشـام
على امتون الحراير مايله الشام
يريت السار بينه مايه للشام
خذت هيبتنا من عدنا ورقيّة

@@@@@@@@@@@@

محمد جبر الدراجي

https://t.me/joinchat/AAAAAEN4vuuUfDbAramBIQ
قناة خاصه نعي / ابوذيه / هوسات باز کردن / نظر دهید

2023-06-30 13:22:01 نعي

ام البنين والعباس ع

اوصيك اعله زينب يبني عباس
ولو ما حاجه اذكرنك ينبراس
الدرب يبني طويل ورايد انفاس
اذا تعبت اخيتك حطها عالراس
*
ابوك اشگد عليها يبني وصاك
زينب والخدر يوليدي بحماك
احذرك يمه من الوادم اهناك
تدور عالرذيله فكها عيناك
*
اريدك بالطفوف اتفك العيون
وتذبحه اللي يحط عينه اعله الضعون
تسد الريح يمه ان چان بي لون
تضلل عالقيله برايتك كون
****
العباس يجاوب ام البنين ع

عد عينچ ييمه لا تنشدين
انه فدوه اروحن لختي وحسين
بعد چم يوم بخباري تسمعين
شهم عباس فرحي يم البنين
*
تناطرني بطفوفي شگد بطولات
ييمه اشحده ينظر للعقيلات
عدل عباس يم عباس ما مات
يگربون الخيم يايمه هيهات
*
اوصل الماي يم اخيامي مچتوف
وحگ ادموعچ اگلب كل الطفوف
وخلي صفوف تترادم بالصفوف
ما جوزن لحد ما توگع چفوف
****

الشاعر اياد الديراوي


https://t.me/joinchat/AAAAAEN4vuuUfDbAramBIQ
قناة خاصه نعي / ابوذيه / هوسات باز کردن / نظر دهید

2023-06-30 11:08:07 نعي الليله السادسه ليله الانصار
****
انصار انصار كل احنه لبو السجاد انصار
وخذنه الداور. تقاسمنه المنيه وخذنه الدوار
ما تعرف اعذار ما تعرف اعذار  تره انصارك ابد ما تعرف اعذار
ايبين الحار.  امن عيونه يالغالي ايبين الحار


اجينه اجينه عفنه بيوتنه ولحسين اجينه
وعلينه علينه.  ودم اركابنه شاهد علينه
وفينه وفينه.  اشما ضحينه الك ماضن وفينه
بينه بينه.  جمره امن الخيم يحسين بينه

طلع شيخ الأنصار وصاح حيهم
والانصار طلعو ركض كلهم
بجه وعن كربله ضل يحجي الهم
وزينب خايفه من عدنه كلهم

صاح بصوت زينب لا تخافين
انضحي ارواحنه ومنعوف الحسين
باجر ندخل السوح الميادين
وانتي رايح تشوفين بالعين


رفع جفه حبيب وصاح اطلعو
وبذيج الصوارم كومو هوسو
بخيمة بت علي استعراض سوو
ولحسين بدماكم رحو ضحو
***
الشاعر
تحسين الخفاجي


https://t.me/joinchat/AAAAAEN4vuuUfDbAramBIQ
قناة خاصه نعي / ابوذيه / هوسات باز کردن / نظر دهید

2023-06-28 09:08:12 #نعي لمولاي مسلم صلوات الله عليه

حميده :
ها بويه خلصت وانتهينه
وللكوفه  ناوي  يا  ولينه
بس گول راح ترد علينه ؟
تدري الگلب زايد ونينه

شو چنه   هذا   وداع   للموت
لاچمني گلبي ودمعي بسكوت
ما ظل   يبويه   بهاي  البيوت
الما بيهه انته النوح اجاهه

غير انته ابوي وحگي اعليك
اتمنى اشوفك وابتشر   بيك
من   المنيه     وين   اوديك
لو  تنفدي   بالروح   لافديك

مسلم :

يا بويه شدي حزام  للجاي
يبنيتي دارت  بعد   دنياي 
يلچنتي  روح  بروح وياي
خلصت يبويه وهاي هيه

يا بويه   رايح   وانه  اوصيچ
لو اموت ابوچ حسين يحميج
لو   بيدي   والله   ما   اخليج
بس   هذا  امر  الله  يبويه

راح امشي وانتي الله اليعينچ
ما  اريد   بويه   اسمع  ونينچ

خلي الدموع  بظهري بهداي
گدامي   لا   تبچين   دنياي
يبنيتي  باچر  يخنگ الجاي
انه   الغريب   ومحد  وياي

حميده :

چا بويه اخذني وياك اخذني
وياك    نسمه   بريه   شدني
الزمني    بيدك    لا    تهدني
ولمن    ترد      وياك    ردني


چلمة   يتيمه  اتعذب  الروح
وياك   اروحن  وين   متروح
ما   بيه  حيل  لكثر  الجروح
تابوت حالي بصحره مطروح

بعيونك   أمبين   وداعك
يتمت بنتك عفت  گاعك

تمسح   على  راسي  بيمينك
يا   بويه   بعيونك     ونينك
بويه ارد  اوافي  رباك  وينك


مسلم :

اوداعت الله بنيتي  رايح
ظلت الچ  دمعه   ونوايح
يا گلبچ المن هسه طايح
گبل اللطم گبل  الصوايح

انتي ورقية  وسكنه   باچر
نفس المصير الموت حاضر

بويه   وراكم    كربله  وخاف
جسم   الحسين  هناك ينعاف
والشاف ريته يصيح ما شاف
فوگ الرماح امعلكه الروس


باچر   حميده   نار   وسياط
ميظل عدل حتى   البلگماط

حميده :

تدريني  مالي  حيل  الفراگ
ما  اريد  غفله  العمر  ينباگ
وياك  اريد  اتشابگ  اشباگ
لحد ما اموت  ويدفنوني

خليلي   هدمك خلي اشمه
بالليل   احظن واغفه  يمه
يا داري صيري الليله ظلمه
من راح ابوي ويتماني

شنساك    بويه    شلون      شنساك
طرواك عاش بدليلي  الوالي طرواك
بويه الله وياك خلصت بعد بويه الله وياك


كلمات خادم الحسين
رعد الفريجي


https://t.me/joinchat/AAAAAEN4vuuUfDbAramBIQ
قناة خاصه نعي / ابوذيه / هوسات باز کردن / نظر دهید

2023-06-25 19:23:58 نعي بحق مسلم ابن عقيل عليه السلام جديد



الميت بالدفن اهلة يحضرون
واخير وداع للغالي يودعون
ومسلم ضل غريب ايدير العيون
اهلة بعاد عنة وموش يدرون
=================
كل ميت هلة تطلع تشييعة
وفوكَ متون اخوتة يصير رفعة
وكل واحد يصب اعليه دمعة
ومسلم وحدة ومحد يتبعة
===================
عد اهلة اليموت يوادعونة
واولادة واخوتة اليحضرونة
ومن رجليه مسلم يجرونة
بالسوكَ وشماتة ايشاهدونة
==================
الميت للگبر تتعنة اهلة
ودوم الفاتحة يقرون لجلة
مسلم بالگبر محد وصلة
بطوا عنة وبقت بالروح علة
================
يتاني اهلة يجون من المدينة
شابح بالنضر صوب الضعينة
يجون احبابة ضنة وگاصدينة
وعيونة تصب دم وحزينة
===================
ما يدري تطشر ضعن الاحباب
وعزيزة حسين نايم فوكَ التراب
واهلة وكل اخوتة الصفوة الاطياب
وبنيتة حميدة بين الاجناب
====================
(ابو ذية)

يدي وما هدالة   ير حميدة    (جرحة مدة)
يريت بهاي مسلم  ير حميدة   (يرة حميدة)
شلون الشمر بيدة   ير حميدة   (جر حميدة)
وتناديلك يبوة الحكَ علية
==================
اسألكم الدعاء رائد الاسدي


https://t.me/joinchat/AAAAAEN4vuuUfDbAramBIQ
قناة خاصه نعي / ابوذيه / هوسات باز کردن / نظر دهید

2023-06-24 23:19:28 ابوذيات الى مسلم (ع)



النفس تبقه النفس بالشر اماره
ومسلم راح مارايد اماره
شعجب يرموه من گصر الاماره
وينكثون العهد لبن الزچيه
------------

دليلك بس على الطيبات طوعه
ومسلم چان كل الحرب طوعه
تعب هده التعب يم بيت طوعه
وتلگه بصدره طعنات المنيه
-----------

صفات الرجل كون اتضل حميده
و دومه الباري عالباطل حميده
بعد مسلم يتيمه اتضل حميده
وتصب دمع الحزن صبح ومسيه





لاتنسون والدي وأبني عباس من الرحمه والغفران
خادمكم رياض الرسل الجابري


https://t.me/joinchat/AAAAAEN4vuuUfDbAramBIQ
قناة خاصه نعي / ابوذيه / هوسات باز کردن / نظر دهید

2023-06-23 22:33:46 ابو ذيات ١ محرم
•••
الفرح من هل ال محرّم   يَفاني ( جفاني)
وهلاله بكل حدث مؤلم  يفاني ( يوافيني)
تنادي الروح شد عزمك  يفاني
اجتهد في خدمتك لابن الزجية
•••
الشعائر ترفع الوادم    لوا الهه
وايد اخلاصها محد     لوا الهه
يبو اليمة محبينك       لو الهه
الف روح افتدت لجلك سويه
•••
تطوعنه خدم وانته     جه النه ( جاه النه)
لرضى الله نتّجه حبّك     جهة النه
العفو يحسين عن كثرة   جهلنه
بحقك والعفو عندك سجية
•••
ناظم الفضلي الكربلائي ٢٠٢٣


https://t.me/joinchat/AAAAAEN4vuuUfDbAramBIQ
قناة خاصه نعي / ابوذيه / هوسات باز کردن / نظر دهید

2023-06-23 16:41:30 نعي



لمسلم بن عقيل وخبر استشهاده






بالمرســـال ابو الســـــــجاد وداه
للكوفه وبـــدمع العيـــن وصــــاه
لو گالــــو حســين نمــوت ويـــاه
الكم اتجـه بس توصل اطـــروش


كـــد المــــهر للكوفه مـــــهـــتم 
واخطب عليهم غــــــاد مسلـــم
لحسين كــــثره البصـــمو بـــدم
بس الگلوب گلوب مو خـــــوش


صله الصلاة وهــــــواي بگـــفاه
ومـــأمــــــــن ومتّـــــجــه للـــه
من التفـــــت بس هــــاني وياه
والباقي ضده انگلبت اجيــوش


قرر الطاغي لمـــسلم المــــــوت
ومت عيني ضل ما بين البيوت
راح اعله باب ودگه بسكـــــوت
ومن العطش ذبلانه الهـــــروش



طلعت مـــــره وگللها عـــطشان
جابــــت الماي وگــــلبه لهـــفان
گلتله انـــته مـــنيــن يـــــــفلان
وبين المنازل حـــــــاير تــروش


ساكت وگام تصــب دمــــوعه
وبصــــدره لوعة تگود لـــوعه
گلها انه مسلم بچت طــــوعه
ومولاي طب گلتله للـــحوش


اندلوه واجو للقصر اخــــذوه
وطوعه تون وتصيح يــــابوه
من فوگ واعله الراس ذبـــوه
بلا رحمه كلهم چنهم وحـوش


جـــــروه بالاحــــبال المتيــنه
وتـــتفرج اعليـــــــه المـــدينه
وينه العله امــــــصابه يـــعينه
صار الجسم بالگاع مــــفروش


الما يمه واحد غــــربه توليــه
ومسلم تره محد فـــزع ليـــه
الشمس غيرت كــــل معانيــه
ومات ودليله هواي معـطوش




وصل الخبر الى سيدي ومولاي

ابا عبدالله الحسين ع


بچه حسين ولزم بچفوفه الاصفاح
وراح الحيل مو بس مسلم الــــراح
وگللــــــها يـــــزينب بيـــرغي طاح
يا حيف العده كسرولي الجــــــناح



لحميده شلون راح اشرح الحاله
الـــــــــوالد مــحد يصــير ابدالـه
مـــــشه الـــها والدمــوع اتّـــلاله
وحيره شيحچي ويگول لـــدلاله



ع الراس يمسح گام الحسين
وعرفت حميده الحال موزين
گلتله عمي وتهـــــــمل العــين
اتيتــــــمت چا والـــــدي وين



گلها الحسين وتمسح ايده
جية ابــــوچ شـــگد بعيده
ادري بدليلچ حن يـــــريده
لكن راح مسلم يا حمـــيده


دگت الراس وصاحت احا
راح الولي وما رحت وياه
ويلاه مسلم بويه ويـــلاه
والليل كله ابنيته تنــــعاه


صار مجلس عزاء بين الحسين

بين زينب بين حميده شلون بالله


صاحت حميده

يامن عفتي بغربتي
    
               وغورگت عيني بدمعتي

يا مسلم الحال انفجع
  
                وتهضم هضم يا حالتي

بليلي اسامر حسرتي

               ونهاري يكضي بونــتي 

وبين بالبراري انه انصبت

               مجلس عزه يا خيمتي

نوبه يشابگني الحسين

               وتشبگني نوبه عــمتي



لا تنشد تره اعـله العــمر -- يا راح
يالفگــدك سهم بالچـــبد -- يـــارح
تسلملي اعله مسلم كون -- يا ريح
وتگله ابنيتك بآه ورزيه


         عبد العليلـه
حيدر ابو كيان الفاطمي


https://t.me/joinchat/AAAAAEN4vuuUfDbAramBIQ
قناة خاصه نعي / ابوذيه / هوسات باز کردن / نظر دهید

2023-06-21 15:14:20 نعي للعليله ع

عليله الوحدي عافوني الحباب
جمر خله ابدليلي والله الغياب
اصب ادموع وعيوني عله الباب
لحد هل يوم مارد منهم اجواب

****
مشو كل الاهل وابعد دربهم
انه طفله ادور وين عنهم
اناشد كل مسه واصرخ بسمهم
نسو ظلت عليله اهنانه چنهم

****

وحشه الليل الله لا يجيبه
انه ابداري وحس روحي غريبه
اختنگ صدري ودليلي شب لهيبه
اشّفت بغيابهم غير المصيبه

****


الشاعر اياد الديراوي


https://t.me/joinchat/AAAAAEN4vuuUfDbAramBIQ
قناة خاصه نعي / ابوذيه / هوسات باز کردن / نظر دهید

2023-06-14 22:19:49 نعي لذكرى شهادة الامام الباقر عليه السلام (٧) ذو الحجة ( مجاريد)

•••
طر المدينة ليل الأحزان
وتوشحت أسود هالأكوان
الباقر تغدره آل مروان
مسموم جبده شعظمِ المصاب
•••
بطيّات روحه شچم رزية
وبگلبه چم طعنة قوية
والشافه يوم الغاضرية
غيّب فرحته و من زغر شاب
•••
يمحمد تره الشيعة و مواليك
تاذّت من سموم اللي تأذيك
بجزع وبحرگة المدمع تناديك
يشمس الخير يابدر الهدى الغاب
•••
بضميرك لسا صرخات اليتامه
خلت جم أثر يدّي وعلامة
كأنْ مو طف جرى قامت قيامه
بعينك لسه صورة حرگ الأطناب
•••
ناظم الفضلي


https://t.me/joinchat/AAAAAEN4vuuUfDbAramBIQ
قناة خاصه نعي / ابوذيه / هوسات باز کردن / نظر دهید