2022-05-25 19:14:48
انس وبيتر
انا اسمي انس ، مواطن سوري
عمري يوم واحد.. انولدت مبارح .. أبوي بشتغل مدرّس لغة عربية .. راتبه 3500 ليرة .. طلعولي شهادة ميلاد.. وكرت تطعيم.
اتصنّفت مواطن من دول العالم الثالث..
أنا اسمي بيتر .. مواطن الماني
عمري يوم واحد .. انولدت مبارح بمستشفى فرانكفورت .. بابا بشتغل مدرّس لغة ألمانية.. راتبه ٥٠٠٠ يورو .. طلعولي جواز وهوية.. اتصنفت مواطن من دول العالم الأول ..
انس :
اليوم صار عمري ٦ شهور .. ابوي بطلع من وجه الصبح عالمدرسة وبرجع بتغدا وبعدها بكملها دروس خصوصية منشان يمشي الحال .. بديت أتعلم أحكي شوي شوي .. ماما بتتركني الصبح عند جدتي منشان اتداوم بالمدرسة وهي رجعانة بتاخدني وبنزلنا الباص عأول الشارع ومنكمل مشي ..
بيتر :
اليوم صار عمري ٦ شهور .. عايشين بفرانكفورت .. بابا بداوم ٦ ساعات وبرجع منتغدا وبعديها منطلع نلعب بالحديقة اللي جنب بيتنا ونطعمي البط .. بديت أتعلم الرسم والحروف .. كل يوم بروح مع ماما عشغلها الصبح ببلدية فرانكفورت .. عندهم حضانة تحت مع منطقة ألعاب بضل ألعب وأتعلم فيها مع ولاد أصحاب ماما بالشغل ..
انس:
لبست تيابي ورايح عأول يوم بالمدرسة .. سجلني ابوي بالمدرسة اللي جنب بيتنا .. بين المدرسة وبيتنا كان ٣ شوارع وطلعتين .. صحيح اندعسوا كثير ولاد عطريق هالمدرسة.. بس ابوي طلع معي اكتر من مرة وورجاني شلون اروح وارجع .. وانّي انتبه من السيارات وما أرد ع أي واحد بجبلي بوظة ببلاش!! مصروفي صار خمس ليرات باليوم من بعد ما جابت امّي اخوي الجديد وزادت المصاريف.
بيتر:
لبست تيابي ورايح عأول يوم بالمدرسة .. سجلني بابا بأحسن مدرسة حكومية بفرانكفورت .. وكان باص المدرسة يجي ياخدني من باب البيت مع المرافقة كل يوم الصبح ويرجعني عباب البيت .. مستحقاتي الشهرية زادت ل ٣٠٠ يورو بعد ما ماما جابت أخوي الجديد وزادت المصاريف.
انس:
خلصت توجيهي وجبت معدل منيح .. كنت بدي أدرس طب بشري بس ما صحلي مقعد حكومي فدرست هندسة معلوماتية .. أبوي انجلط ومات عالخمسين .. وصرت بعد دوام الجامعة أشتغل بمطعم جنب بيتنا منشان نقدر نعيش.
بيتر:
خلصت الهاي سكوول بمعدل تراكمي جيد .. وصحلّي مقعد جامعي ببلاش بجامعة فرانكفورت في كلية الحاسوب.. وكنت بعد الجامعة أساوي شوية برامج وأتعلم عليها.
انس:
اتخرجت بامتياز وبعدين اشتغلت بمصنع أدوية .. دوامي ١٢ ساعة باليوم و ٦ أيام بالأسبوع .. راتبي 7000 ليرة وزاد بعدين شوي قدرت اشتري سيارة صغيرة قديمة بالتقسيط لاروح واجي فيا ...
بيتر:
اتخرجت بمعدل جيّد .. وبعديها اشتغلت بمصنع أدوية بفرانكفورت مبرمج حاسب آلي راتبي ٧ آلاف يورو ودوامي ٨ ساعات خمس أيام بالأسبوع. ما بحتاج سيارة لانه القطار بوصل لكل مكان.
انس:
اليوم حققت حلم حياتي وعمري 30 سنة .. صارلي ٧ سنين بصمد من راتب هالمصنع .. أخيرا سجلت وبدي أروح أكمل ماستر بألمانيا.
بيتر:
مامي ضغطت علي عشان أكمل ماستر .. فكملت ماستر بجامعة فرانكفورت واتخرجت عمري هلأ ٣٠ سنة.. اتجوزت وصرت مشرف عالقسم وراتبي ١٠ الاف يورو وبرجع الساعة ٤ العصر.
انس:
خلصت ماستر واتجوزت بنت ألمانية معي بالجامعة .. توظفت مدير قسم بمصنع أدوية بفرانكفورت وأخدت الجنسية الألمانية صار راتبي ٣٠ ألف يورو شهرياً وبرجع عال ٤ العصر.
بيتر:
اليوم جابولنا مدير جديد كتيير شاطر ألماني بس أصله من سوريا .. صحيح ببين عليه عمره ٥٠ سنة بس هو لسا بالثلاثينات بس إنسان مبدع.. ليش يترك بلدو؟؟!! انا مابعرف كيف تركوه يهاجر ؟؟؟؟!!!!!
87 views16:14