إستشارة طبية

2022-06-16 22:37:50 الطفل الحرك
#Spirited_child
و منو ما عنده هذا الطفل اللي يتحرك ٢٤ ساعه و ما يكعد و ما يعرف يعني شنو كعده
بحيث عمليه سهله مثل تبديل ملابسهم اشبه بالمهمه المستحيله
هنا نحجي عن الطفل الوكح اللي يتحرك هوايه بس تطوره عادي او فوق العادي يعني يحجي و يسولف و يغني و يتعلم
ما نحجي عن متلازمه فرط الحركه وتشتت الانتباه ADHD اللي يتأخر بيها الطفل بالكلام و بعض مناطق التطور اللي اكيد نحتاج نراجع بيها طبيب نفسيه
نرجع لموضوعنا
كلنا عدنا هذا الطفل اللي تحسه موهوب
بره يسموه spirited child
يعني الطفل المفعم بالحيويه
يكون حرك ٢٤ ساعه بس قلبه طيب و عنده كميه مشاعر أكثر من العادي
ما يسمع كلام أبدا و لا كانما أحد يطلب منه
عنييييد عنييييد
دائما يأخذون مسؤوليتهم على عاتقهم و يحبون الاستقلاليه
بس بنفس الوقت
حساسين جدا و طيبين جدا و مليانين مشاعر و احاسيس
بس بالأخير و لأنه هذه هي شخصيتهم اغلبهم راح يكونون ناجحين كبالغين
و السبب بنجاحهم هو قابليتهم على التفكير المستقل
و قدرتهم الغير محدوده انه يصيرون قاده للمجتمع
لا نكسر هذه الروح الحلوه بيهم
اكو أكثر من طريقه للتعامل وياهم
راح اسويها على شكل نقاط :

شنو الأشياء اللي نكدر نسويها للطفل الحرك او
#Spirited_child
القاعده رقم واحد
الروتين الروتين الروتين
وقت فطور مستقر نوعا ما
و فقره لعب يوميا
فقره دراسه
و كلشي يمشي بروتين
مو اليوم انام بال ٩ باجر انام بال ١١
لا تخضع أبدا للقوانين الخاصه بيه
القبول بشروط الطفل الحرك ليوم راح يرجعنا إلى نقطه الصفر
.
الفقره الثانيه
التحضير للمستقبل
مثلا الطفل راح يروح للمدرسه و راح يصعد بالخط
توصيه و تحذره انه ينتبه للشارع يعرف شنو ينتظره
رايح تراجع طبيب و تكوله راح يفحصك هيجي و هيجي و راح يحجي وياك هيجي و هيجي
رايحه زياره الأقارب تكوليله راح نكعد هناك و ما نتحرك و ما نقاطع وراها يقدمولنا الضيافه ما نلعب بالاكل او ما نرميه
يعني تحضير بتحذير للمستقبل
٣. لا للعقوبات و الضرب
عقلهم كبير و يعرف جيدا شون يفكر
و كووومه راح تأخذون نصائح عن اضربه او اذيه او هو مجرد كف و يستعدل !!!
لا يا عزيزي ما يستعدل
يريد تاخذيه تطلعيه يشتري بس بنفس الوقت الا يلبس التيشرت الفلاني !!!
ببساطه ماكو طلعه اذا ما تلبس تيشرت آخر
راح يخضع لهذه الطريقه
لازم تعرف انه تفكيرهم واسع و يعرفون يأخذون قرارات مستقله و الضرب ما راح يزيدهم الا عناد
وشوفوا نقطه ٦
٤. التعاطف التعاطف التعاطف
من يكون بحيره من أمره
شاركه بالقرار اللي يأخذه بطريقه تخليه ما يضوج او ينزعج
عبرله دائما عن حبك و احضنه
هم أذكياء مفكرين من تشوفه يعيط و يصيح هذا معناه نقص مشاعر عوضها بحضن طفلك
٥. كلنا سابقا انه هو يحب ينفذ الامور على عاتقه خليه ينفذها بس بتوجيهك و عنايتك انت
مثلا يريد ينظف الغرفه خليه ينظف بس بوجودك
٦. العقوبه الوحيده الملائمه للطفل الحرك او المفعم بالحيويه هي تكوله " روح اكعد بغرفتك ٥ دقيقه او ١٠ دقيقه "
عزل الطفل بمكان امين ما يؤذي نفسه لفتره تعادل عمره بالدقيقه هي من افضل الوسائل اللي تهذبه
يعني عمره ٥ سنين تعزله ٥ دقائق
عمره ١٠ سنين تعزله ١٠ دقائق و هكذا
٧. الصبر
تحتاج إلى الكثير الكثير من الصبر حتى تكدر تقاوم و تسوي اللي تريده و كلنا عليه بالنقاط السابقه كن متسلحا بالصبر
٨. خليك هاديء على طول الخط
ابدا لا تعصب
لا تعصب لسببين
الاول لان ممكن جدا طفلك يسمعك كلام جارح و ما مستعد نفسيا تسمعه
و الثاني لأن اكيد راح تنتقدك الناس على بروده اعصابك من طفلك متهيج و عصبي و انت بارد الأعصاب
لذلك دائما اوصيك بالصبر و الهدوء حتى تربي هذا الطفل المتمرد الوكح شويه و المحبوب هوايه
#Spirited_child

د. سيف سمير البياتي
اخصائي طب الأطفال باز کردن / نظر دهید

2022-06-15 01:02:42 20 شغله غريبه تصير اول ايام الرضاعه الطبيعيه !
1. بعض الالم ويه اول رضعات و اول ايام بعد الولاده
ألم الحلمه و تشققها من الامور اللي تحدث و تحدث كثيرا اول ايام الرضاعه الطبيعيه و مع الأسف الكثير من الأمهات يتركون الرضاعه الطبيعيه بسبب هذا الالم
الخلل يصير لعده أسباب منها سوء الالتقام و لان الطفل ما يعرف يرضع و الام ما تعرف ترضع و بالأخص الطفل الاول
كل اللي عليك تشوفين فيديوهات الرضاعه الطبيعيه و تتعلمين من اليوتيوب شون تتم العمليه
اعرف راح تكولين هي سهله شيرادلها بس صدكيني هي صعبه
و اكو اختصاص كامل اسمه مدرب الرضاعه الطبيعيه
حضرت بيه ندوات و دورات مكثفه
2. طفلك راح يرضع هوايه بأول ايام بعد الولاده
بحيث تحسين بالتعب هلكد يرضع
و اكيد راح تسمعين تعليقات مثل هذا جوعان انطيه مميه
بس هو بالحقيقه هو دا يكبر بسرعه لذلك يحتاج حليب اكثر
الموضوع راح يخف تدريجيا بعد اول اسبوعين
3. راح تحسين ببعض التقلصات الرحميه و انت ترضعين طبيعي
الهرمون اللي يخلي الحليب يتدفق هو نفسه الهرمون اللي يخلي الرحم يتقلص !
4. بعض الحليب راح ينزل من تلقاء نفسه بمجرد تفكيرك بأن طفلك جوعان او تسمعين بكاءه حتى لو انت ما ترضعيه
5. انت تحرقين 500 كالوري يوميا و انت ترضعين طبيعي
لذلك راح تجوعين و تحتاجين اكل
و اذا وزنك زايد
بريجيم بسيط تنزلين الوزن
بس مو هسه وكت الريجيم حبابه
خل نوصل للسنه و سوي ريجيم
6. راح تبقين تتشهين بعض الاكلات
هذا شي طبيعي
و حاولي تكون الخيارات صحيه
7. اول ما طفلك يبدي يرضع راح تحسين بعطش شديد مفاجيء و كأنما كنت بالصحراء لذلك خلي كوب الماء ملازم الك
8. الدوره الشهريه لن تكون منتظمه
بس هذا ما معناه ابدا انه ما راح يصير حمل
فاخذي سبيل الوقايه لان يا عيني نريدك ترضعين الصغير سنه وراها عود خل يصير حمل بلا ما تدرين
9. الرضاعه الطبيعيه سوف تجعلك تشعرين بالنعاس
و السبب هرمون البرولاكتين اللي يحفز إنتاج الحليب
10. اذا امتنع طفلك عن الرضاعه راح تحسين بألم شديد مع احساس ان الثدي كالحجاره و تحسين براحه تامه من طفلك يرضع
هذا شي طبيعي
11. من ترضعين من جهه ممكن الحليب ينزل من الجهه الاخرى
12. أحيانا و بالحقيقه نادرا بعض الأمهات يصير عدهم بعض الالم من ينزل الحليب
المزعج بالموضوع ان هذا الالم سيستمر لحين الفطام
13. مع تقادم الرضاعه الطبيعيه و خبرتك راح تعرفين اي جهه بيها حليب اكثر
14. ممكن راح تحبين الرضاعه الطبيعيه و تستمرين بيها لغايه ما يصير عمر الطفل 3 سنوات و اكثر
15. بعض الاطفال مو بس يرضعون لان جوعانين
بس يرضعون لان يردون يحسون بالراحه او لان عدهم مغص
16. الكثير من الاطفال ينامون و هم يرضعون طبيعي
و هو شي طبيعي و ما يقلق
17. الاطفال اللي يرضعون طبيعي يجوعون اكثر و يردون رضاعه بين فترات قريبه
18. خروج الاطفال اللي يرضعون طبيعي متكرر اول ايام بعد الولاده و يوصل أحيانا إلى 12 مره باليوم بأول اسبوعين و بعدين يبدي يقل
19. و لان الخروج متكرر فراح يصير عند الطفل طفح حفاظات فاختاري نوعيه حفاظات جيده و اختاري مرهم اساسه الزنك ويه كل تغيير حفاظ
20. اخيرا ماكو احسن من حليبك و لا يتقارن بيه اي حليب طبيعي و لا يشبهه و لا يتقرب منه
لان ماكو حليب بيه خلايا حيه تدافع عن طفلك بكل حليب العلب


د. سيف سمير البياتي اخصائي طب الاطفال باز کردن / نظر دهید

2022-06-10 10:47:15 كيف تنشأ صداقه بين الاخوه !
العديد مننا عدهم اطفال باعمار متقاربه اللي بينهم سنه او اثنين او 3
و تعرفون بحساب العمر هذه السنوات قليله
لذلك ممكن و ممكن جدا الصداقه تكون لطيفه بين الاخوه
هذا البوست هو عن كيفيه صنع صداقه حقيقيه بين الاخوه
و نبدي بالموضوع على شكل نقاط
1. ابدي باللعب الجماعي
الأطفال يحبون اللعب كثيرا
فاختار اللعبه الجماعيه اللي بين الاطفال
المكعبات مثلا
السيارات
سباق الركض
الألعاب الجماعيه مو بس تنمي الذكاء و تزيد التواصل بل تزيد الحب بين الأخوة
2. الحب يحتاج للوقت
و الصداقه كذلك
ما معقوله اول ما ينخلق الطفل الجديد راح يحبه الطفل الأكبر
لا تكوله حبه لاخوك او اختك
بس انطيهم بعض الوقت
3. لا تجبر
ابدا لا تجبر على الحب او اللعب او الصداقه
و تعال بوس اخوك
و جيب هدوم اختك لان زعلت
الموضوع يحتاج إلى وقت و خطط محكمه
4. لا تشتري الألعاب لطفل واحد
كل لعبه هي لكل الاخوه
هذا يعزز شعور عدم الغيره
اي ممكن لعبه او اثنين تخص كل طفل
بس لابد من وجود العاب مشتركه و يتعلمون الدور بينهم
من تأخذهم تشتري العاب اما تشتري لعبه لكل طفل او تشتري لعبه للكل و هي الأفضل
5. تكلم دائما بحب عن العائله
اني احبك لأنك أنت و اخوك جزء من العائله
اني سعيده لاني امكم
اني افتخر بكوني ابوكم
و هكذا
كل فتره سوي لعبه
منو يحب جود؟ و هم يصوتون بنعم أو لا
منو يحب محمد ؟ و من يكول لا مثلا لا تهتم و خلي الباقي يكولون ارائهم
مره على مره راح تشوف التغيير
6. قدم العلاقه بين الاخوه على الحاجات و الالعاب
مثلا
تعاركوا علمود فلان لعبه
اسحب اللعبه اسبوع منهم
7. عزز التواصل بين الاخوه و المحادثات بينهم
مثلا من يضوج لان اخوه اخذ السياره
فهمه انه من الطبيعي انه يشعر بالضوجه بس هو هم اخذ فلان شغله منه
8. هدء الضحيه اولا
يعجبني هذا الرأي لطبيب اطفال رائع نتناقش اني وياه دائما بموضوع التربيه
يكول بيه قبل ما تحاسب المعتدي
طمن الضحيه اولا
مثلا
علي اخذ السياره الشحن من أحمد
احمد بدا البكاء
فهم احمد انه انت متفهم ليش دا يبجي و اسأله شنو تحب نسوي ؟
9. خليهم يلعبون و يهوسون
اسعد اوقات الهم وقت تنطيهم راحتهم
تسألني أم عفيه دكتور كلش حرك
اكولها اي ما شاء الله الله يخليه
تستغرب و تكولي يعني عادي ؟
اكولها دامه يفتهم و يعرف يحجي و يعرف يوصف و يعرف كلشي اي عادي
بعمره كنتي تقرين الجريده و تحتسين القهوه؟
هو طفل
خلق ليلعب
فخليهم يلعبون
10. و بكل هذه التوجيهات و التوصيات خليك بعيد
و خليك مراقب بدون ما يحسون
11. امدح التصرف الجيد
و بصوت عالي
مثلا شفت اخوان اثنين واحد يحب الاخر
كول لاطفالك شفت زياد و جاد شون حبايب و شون يحبون بعض ؟
12. بكل بيت اكو روتين
و هذا الروتين هو أساس كل شيء
لذلك قوانين البيت ما بيها نقاش و تعلم الاطفال على احترام الحدود
مثلا ممنوع منعا باتا العنف الجسدي
13. العمل الجماعي يوصل رساله جميله للكل باهميه التواصل بين الاخوه
مثلا بالبيوت الكبيره تنظيف الحديقه واجب على الكل
او تنظيف غرفتهم المشتركه هم مسؤوليه الجميع
14. لا تقارن ابدا
لا بينهم
و لا باخرين
امدح التصرف الجيد اي
و ذم السيء اي
بس لا تقارن
كانت ١٤ نقطه اتمنى تكون اساس لكل بيت بيه اكثر من طفل
تعبت جاهدا حتى اوصل فكره الاخوه السليمه بيهن
دمتم بود


د. سيف سمير البياتي اخصائي طب الاطفال باز کردن / نظر دهید

2022-06-09 13:17:31 كيف اعلم طفلي الاحترام ؟!
هو شنو تعريف الاحترام اصلا
تعريف الاحترام هو الإعجاب او الشكر بالشخص اللي يقدملنا المساعده او اثر بحياتنا بشكل او اخر
قبل ما ابدي نتعلم من هذا البوست شغله وحده بس #ما_راح_يتعلمون_الاحترام_اذا_ما_احترمتهم
و نكمل طريقنا و نكول شون نعلم اطفالنا الاحترام ؟
6 خطوات تخلي طفلك يتعلم الاحترام نبديها نقطه نقطه
1. كن مثالا جيدا
طفلك يتعلم منك و يعتبرك المثل الأعلى
من ما تحترم والده الطفل او من تعيطين على ابو الطفل او من الأم كلامها غير مسموع من الأخ الأكبر
شون راح يحترم ؟
مثلها احترم رغبات طفلك و احترم ما يحب و ما يكره
مثلا يحب يلبس تيشرت ابيض و انت مصر الا يلبس احمر
ما هو هذا تفضيل يا عيني
هذا خيار
هو او هي ما تحب البيض و انت مصره الا تاكل بيض
ما هو عادي انت ما تحب مركه الشجر يا ابويه
كل واحد اله تفضيلاته و خياراته
مسح شخصيه الاطفال و تفضيلاتهم راح يخلق كائنات مهزوزه ضعيفه
هذا طبعا و اكيد ما يشمل وضعهم الصحي او التعليمي
يعني مو ما افطمه من المميه و عمره عبر السنه و الله الطفل ما يقبل
او ما يقبل يروح للمدرسه و انت عادي ما يقبل و ما تسجليه مثل كم ام اعرفها
المهم ما علينا نروح لنقطه 2
2. من طفلك يقل احترامه الك لا تبالغ برده فعلك
ما راح تعلم طفلك الاحترام اذا رديت عليه بطريقه غير محترمه
3. افهم شنو سبب عدم الاحترام و دائما فكر بطريقه ايجابيه للتعليم
يعني
من طفلك يكون رده ما حلو
لا تكوله ردك ما كان حلو
لا بس مجرد كوله : ليش كان ردك ما حلو ؟
ليش تصرفت بهكذا تصرف ؟
هو راح يكولك لان كنت عصبي
انت تجاوب راسا و منو كال ان العصبي يحقله يرد بهيجي رد ؟
4. التأديب يجب أن يكون واضح و بنفس الوقت انت ما تبين انه انت عصبي او متوتر
يعني يا حبيبي اذا ما تجمع العابك راح اخذهن اسبوع
اذا ما جمعهن و سكت اخذهن اسبوع
و اذا ما جمعهن و بدا يصرخ و يعيط عليك بدون اي احترام تأخذهم اسبوع و تحرمه من التلفزيون مثلا
بدون ان تكون زعلان منه او تظهر هالشي
بس تبينله انه العقوبه زادت لان رده فعله كانت مو لائقه
5. اعطي الاحترام لتنال الاحترام
ادري و الله ان مهمه الابوه و الامومه صعبه
بس هي نفسها المهمه محد جبرنا عليها
و أولادنا ما كالولنا قبل ما يجون انه احنا لازم نصرف عليهم و نهتم بيهم و نكبرهم
هذه اشياء اني و انت اختارينا نكون هيج
المثل يكول
We decided to have kids. Kids didn't decide to have parents.
يعني احنا قررنا يكون عدنا اطفال بس الاطفال ما قرروا يكون عدهم إباء و امهات
و الاحترام ما راح تحصله لان سويت و سويت و سويت
الاحترام راح تكتسبه مو تطلبه لان انت ام او انت اب
و شون احصل هذة الاحترام ؟
بتطبيق النقاط الفوك
6. اعتذر اذا اخطئت تجاه طفلك
ثقافه الاعتذار مطلوبه و ضروريه
و راح تحصل الاحترام المطلوب


د. سيف سمير البياتي اخصائي طب الاطفال باز کردن / نظر دهید

2022-06-06 16:28:11 الوزن_الطبيعي_للأطفال_حسب_العمر

#الاولاد

عند الولادة - - - - - - - - - - 2.6 ل 4.2 كجم
عند شهر - - - - - - - - - - - 3.6 ل 5.5 كجم
عند شهرين- - - - - - - - - 4.5 ل 6.8 كجم
عند ٣ شهور - - - - - - - - - 5.2 ل 7.7 كجم
عند ٤ شهور - - - - - - - - - 5.8 ل 8.4 كجم
عند ٥ شهور - - - - - - - - - 6.2 ل 9 كجم
عند ٦ شهور - - - - - - - - 6.6 ل 9.5 كجم
عند ٧ شهور - - - - - - - - - 6.9 ل 9.9 كجم
عند ٨ شهور - - - - - - - - 7.2 ل 10.3 كجم
عند ٩ شهور - - - - - - - - - 7.4 ل 10.6 كجم
عند ١٠ شهور - - - - - - - - 7.7 ل 10.9 كجم
عند ١١ شهر - - - - - - - - - 7.9 ل 11.2 كجم
عند السنة - - - - - - - - - 8.1 ل 11.5 كجم

عند ١٣ شهر - - - - - - - - 8.2 ل 11.8 كجم
عند ١٤ شهر - - - - - - - - 8.4 ل 12.1 كجم
عند ١٥ شهر - - - - - - - - 8.6 ل 12.3 كجم
عند ١٦ شهر - - - - - - - 8.8 ل 12.6 كجم
عند ١٧ شهر - - - - - - - - 8.9 ل 12.9 كجم
عند ١٨ شهر - - - - - - - 9.1 ل 13.1 كجم
عند ١٩ شهر- - - - - - - - 9.3 ل 13.4 كجم
عند ٢٠ شهر - - - - - - - - 9.4 ل 13.6 كجم
عند ٢١ شهر - - - - - - - - 9.6 ل 13.9 كجم
عند ٢٢ شهر - - - - - - - - 9.8 ل 14.2 كجم
عند ٢٣ شهر - - - - - - - - 9.9 ل 14.8 كجم
عند سنتين - - - - - - - - - - 10.1 ل 14.7 كجم

عند سنتين ونصف - - - - - 11 ل 16.2 كجم
عند ٣ سنوات - - - - - - - - - 11.8 ل 17.5 كجم
عند ٣ سنوات ونص - - - - - 12.5 ل 18.9 كجم
عند ٤ سنوات - - - - - - - - - 13.3 ل 20.2 كجم
عند ٤ سنوات ونصف - - - - 14 ل 21.6 كجم
عند ٥ سنوات - - - - - - - - - 14.7 ل 23 كجم
عند ٥ سنوات ونص - - - - - 15.7 ل 24.2 كجم
عند ٦ سنوات - - - - - - - - - 16.6ل 25.8 كجم
عند ٧ سنوات - - - - - - - - - 18.4 ل 29.1 كجم
عند ٨ سنوات - - - - - - - - - 20.4 ل 32.7 كجم
عند ٩ سنوات - - - - - - - - - 22.3 ل 36.9 كجم
عند ١٠ سنوات - - - - - - - - - 24.4 ل 41.9 كجم

#البنات

عند الولادة - - - - - - - - - - 2.5 ل 4 كجم
عند شهر - - - - - - - - - - - 3.3 ل 5.2 كجم
عند شهرين- - - - - - - - - 4.1 ل 6.3 كجم
عند ٣ شهور - - - - - - - - - 4.7 ل 7.2 كجم
عند ٤ شهور - - - - - - - - - 5.2 ل 7.9 كجم
عند ٥ شهور - - - - - - - - - 5.6 ل 8.4 كجم
عند ٦ شهور - - - - - - - - 6 ل 8.9 كجم
عند ٧ شهور - - - - - - - - - 6.3 ل 9.4 كجم
عند ٨ شهور - - - - - - - - 6.5 ل 9.7 كجم
عند ٩ شهور - - - - - - - - - 6.8 ل 10.1 كجم
عند ١٠ شهور - - - - - - - - 7 ل 10.4 كجم
عند ١١ شهر - - - - - - - - - 7.2 ل 10.7 كجم
عند السنة - - - - - - - - - 7.3 ل 11 كجم

عند ١٣ شهر - - - - - - - - 7.5 ل 11.3 كجم
عند ١٤ شهر - - - - - - - - 7.7 ل 11.5 كجم
عند ١٥ شهر - - - - - - - - 7.9 ل 11.8 كجم
عند ١٦ شهر - - - - - - - 8.1 ل 12.1 كجم
عند ١٧ شهر - - - - - - - - 8.2 ل 12.3 كجم
عند ١٨ شهر - - - - - - - 8.4 ل 12.6 كجم
عند ١٩ شهر- - - - - - - - 8.6 ل 12.9 كجم
عند ٢٠ شهر - - - - - - - - 8.7 ل 13.1 كجم
عند ٢١ شهر - - - - - - - - 8.9 ل 13.4 كجم
عند ٢٢ شهر - - - - - - - - 9.1 ل 13.6 كجم
عند ٢٣ شهر - - - - - - - - 9.2 ل 13.9 كجم
عند سنتين - - - - - - - - - - 9.4 ل 14.2 كجم

عند سنتين ونصف - - - - - 10.4 ل 15.7 كجم
عند ٣ سنوات - - - - - - - - - 11.3 ل 17.3 كجم
عند ٣ سنوات ونص - - - - - 12.1 ل 18.8 كجم
عند ٤ سنوات - - - - - - - - - 12.9 ل 20.4 كجم
عند ٤ سنوات ونصف - - - - 13.7 ل 22 كجم
عند ٥ سنوات - - - - - - - - - 14.4 ل 23.5 كجم
عند ٥ سنوات ونص - - - - - 15.2 ل 24.7 كجم
عند ٦ سنوات - - - - - - - - - 16 ل 26.2 كجم
عند ٧ سنوات - - - - - - - - - 17.6 ل 29.5 كجم
عند ٨ سنوات - - - - - - - - - 19.5 ل 33.4 كجم
عند ٩ سنوات - - - - - - - - - 21.8 ل 38.1 كجم
عند ١٠ سنوات - - - - - - - - 24.5 ل 43.5 كجم

المصدر : منظمة الصحة العالمية
World Health Organization (WHO)

==

د. سيف سمير البياتي اخصائي طب الاطفال باز کردن / نظر دهید

2022-06-06 01:00:46 11 علامة تعني ان طفلك راح يكون ذكي ؟
1. يتذكر جيدا
مثلا يتذكر وين اللعبه مالته
او منو هذا الشخص
او هذا المكان شنو
و يكولك عليه
معناها هذا الطفل موهوب
2. عدهم هذه النظره اللي مميزه الهم
تحسهم اذكياء بالفطره
نظره ما يمكن وصفها
تحسه يعرف انه هو ذكي
اكيد هذه ما نعتمد على الاهل بيها
بس ممكن الاشخاص الاذكياء يعرفوها و يميزوها
3. يربط الاحداث
يعرف شنو دا يصير و يتوقعه
مثال
كلما يروح لبيت جده تطفى الكهرباء صدفه
من يتكرر الموضوع
يتوقع انه راح تطفى الكهرباء
يربط الاحداث شيء باخر
4. ما عنده اي مشكله بالتواصل الاجتماعي
و يصادق الكبير بالاخص
و يتواصل ويه الكبار
و كلما يحب يتواصل ويه الاطفال الاكبر عمرا يكون اذكى
5. تطور اللغه سريعا
بحيث ما توكف عنده الكلمه
يتطور سريعا
و ينطلق بالكلمات و الجمل
6. ما ينامون هوايه
الاطفال الموهوبين ما ينامون هوايه
و يكونون رجال ليل في اغلب الاحيان
الاقكار اللي براسهم تمنعهم من النوم
فما ينامون
7. اصحاب شخصيه مميزه
كان يكونون صاحبي نكته مثلا
او عدهم حس عالي بالمزح و الضحك
يعرف يتلاعب بالكلمات
و يالف القصص
8. حساسين اكثر من اللازم
دمعتهم بطرف عينهم
بحيث ما تكدر تعاتب او تعاقب و راسا يبجي
9. حرك و نشط و يحب الاستكشاف
و يحب يتنقل بين مكان و اخر
10. عنده هوايه خاصه
كلما يحب هوايه معينه
هذا ع الاكثر موهوب بالاخص الفن و الرسم
11. يحبون القراءه جدا
و جدا و جدا
تشوفهم يقرون كثيرا
و يحبون الاطلاع على الكتب
هذه اكثر صفه تخليهم متطورين و متطلعين


د. سيف سمير البياتي
اخصائي طب الاطفال باز کردن / نظر دهید

2022-06-03 22:20:09

باز کردن / نظر دهید

2022-06-03 22:17:16 السلام عليكم دكتور جيت اليوم للاستفسار عن حاله اولادي يعانون من الامساك
و طبعا هم ثلاثه و الثلاثه يعانون من نفس المشكله
اولا ابني الوسط عمره سنه و شهرين دائما عنده امساك و ما يطيب أبدا كلشي حاولت وياه و كلشي سويت بس مدا يصير زين ؟
-اكله و شربه شنو ؟
هو هذا الموضوع الثاني اللي كنت ناويه اكولك عليه ابني بس يشرب حليب باكيتات و حليب اكياس و ما ياكل موتني؟
_اها و تريدين يطيب من الامساك ؟
شوفي امي أذا ما تكطعين الحليب نهائيا ما راح يطيب من الامساك و راح يبقى يعاني
صدك دكتور تحجي مو الحليب بيه كالسيوم ضروري لجسمه
-بس الكالسيوم موجود بكل الأوراق الخضراء و السمك المعلب و قائمه طويله عريضه من الاكلات نزلتها قبل ايام ببوست اتمنى تشوفيها
مختصرها اكطعي الحليب
و زيدي الألياف
و شوفي الفرق
و شون اكطع الحليب ؟
هذا بعد جهدك
الطفل الثاني عمره ٣ سنين و هم نفس الشي عنده امساك و حتى يطلع بالخروج دم و ها دكتور قبل ما تسأل هذا ما يحب الحليب و حاليا دا أعلمه ع التواليت ؟
_اختي العزيزة الامساك في هذه الفتره الانتقالية اللي هي فتره التعليم على التواليت متوقع جدا كل اللي عليك تشجعيه و تكثرين الفواكه و الخضروات اللي موجوده بالصوره جوه و راح تشوفين شون يستعدل
خليه اول كم مره يكعد بالتواليت و يكمل و هو لابس حفاظ و شويه شويه يتعلم
.
زين آخر طفل عمره شهرين و هم عنده امساك و ها دكتور هذا أرضعه طبيعي لان تابعت الصفحه مالتك و هم امساك ؟
اختي متاكده امساك؟
حليب الام اصلا مسهل للبطن
و نوبات اللي يرضع طبيعيا أحيانا يصير عنده خروج متكرر إلى حد ١٢ مره باليوم و الطفل طبيعي و ما بيه شي
اما اذا صار امساك فهذا لان حليبك كله ينهضم
تدرين انه حليبك كله ينهضم و ما يطلع منه شي
و انه اكو اطفال الى ٧ ايام و يعتبر طبيعي دام الخروج ما يسببله الم؟
اي دكتور هو كل ٥ ايام تطلع و كميه كبيره و عاديه و بلا الم !!!
-اذن هذا مو امساك ؛ و اتركي الطفل ما بيه شي
لعد شنو تعريف الامساك؟
تعريف الامساك يعتمد على صلابه و صعوبه الخروج مو على عدد المرات
اكو طفل كل ٣ ايام تطلع طبيعي و اكو كل ٤ ايام تطلع طبيعية و اكو يوميه بس صلبه و قويه و احيانا مصاحبه بالدم
زين دكتور اذا صار بهذا ابو شهرين هيجي امساك شاسوي؟
و لا شي صعب
اولا كثري المي انت و اشربي مي هوايه
رضعي طفلك أكثر من قبل
و اكلي ال #6p
و اذا عمره فوك ٤ اشهر سويله نقيع التين او مهروس البزاليا اي اكله من الاكلات اللي موجوده بالصوره و لا تنسين التمارين راح انزلها بالتعليقات
زين و اذا كان يرضع صناعي ؟
عادي حولي طفلك إلى تركيبه ترهم لمعالجه الامساك
شنو رايك بالحقنه بحالات الامساك ؟
مو باستمرار لان يصير الخروج ما يخرج الا باستخدام الحقنه
زين دكتور اريد حليب صناعي ما يسوي امساك؟
ماكو
بس اكو تركيبه خاصه بالأمساك ممكن تستخدميها
شكرا الك دكتور و لمعلوماتك
_شكرا الك و للكل
.
.

مصطلح جديد اللي هو
6P
Pear عرموط
Peach خوخ
Plums عنجاص مجفف
Prunes عنجاص
Peas بزاليا
aPricot مشمش

د. سيف سمير البياتي
اخصائي طب الأطفال باز کردن / نظر دهید

2022-06-03 19:58:44 السلام عليكم
تعقيبا على حوادث مؤلمة صارت تتكرر وهي عزوف وتردد الناس من اسعاف و نقل المصابين بحوادث مرورية الى المستشفى خوفا من الملاحقات العشائرية على الرغم من برائتهم
قبل ٣ سنوات كنت في طريقي إلى الدوام و كان الجو ممطر بغزارة و كنت متأخر و بسرعة و فجأة السيارة أمامي توقفت حاولت تجاوزها و فقدت السيطرة و ارتطمت مرتين باشجار على حافة الطريق. خلال ثواني ٣ اشخاص احداهم امرأة دخلوا للسيارة و سحبوني وغيرهم اتصل بالاسعاف التي اخذتني للمستشفى بعد ان شكروهم

قبل سنتين واثناء منع التجول بسبب الوباء و اثناء عودتي من الدوام ، سائق شاحنة وسط الطريق يطلب العون و الطريق خالي تماما ، توقفت لأجد الراكب بجنبه لا يستجيب قمنا بسحبه و بدأت عملية الانعاش و صادف مرور سائق دراجة ساعدنا واتصل بالاسعاف التي وصلت و تشكر الكادر من الموجودين و غادروا

غيرنا لا يمتلك انسانية اكثر منا و لا إحساس بالمسؤولية اصدق لكن لديهم قوانين تحمي المسعف بل و تكرمه و تثمن جهوده

لنضع حدا لتلك الممارسات اللا مسؤولة ويجب أن توضع القوانين لحماية اصحاب النخوة و الغيرة من يسارع لمساعدة الآخرين

نتمنى للجميع الصحة والعافية

د.علي اسماعيل عزيز باز کردن / نظر دهید

2022-05-31 18:37:30 دكتور البنية مهزومة ومتقبل تتعالج وبس تبجي ،،،، تكول اني ما ارفع الثدي مالتي وشيصير خلي يصير ....
زين اختي منو كلج لازم رفع ثدي ؟
دكتور كلها تكول لازم ينشال كله لان ينتشر اذا متشيله
اختي منيلكم هذا الحجي ، اصلا مكان العقدة مالتها ممكن ينرفع جزئيا وحالها حال اللي رافعة كليا ، يعني متحتاج كل هالخوف والتأخير
زين دكتور مو العقدة جبيرة ويكول ابو السونار اكو عقد لمفاوية مصابة تحت الإبط
اي اختي تمام ، هذا الحجي كله صح ، بس بصراحة راح نحتاج نبدي بالعلاج الكيمياوي قبل الجراحة حتى نحجّم المرض ونقلل من خطر انتشار المرض .
زين دكتور وميرجعلها؟
يا اختي كله بيد الله ، احنة نسوي الصح وننطي جرعاتنا بالمواعيد المضبوطة ونكمل الجراحة وبعدها الإشعاع وان شاء الله ميرجع ، طبعا موجود خطر العودة بس وظيفة العلاج يقلل هذا الخطر ان شاء الله.

الرسالة /
انه هسة الطب تغير ، ورفع الثدي الكلي بالعالم كله كاموا يتجنبوه لان نتائج الرفع الجزئي تقريبا متساوية وياه ، والحالات اللي مترهم الهة رفع جزئي من البداية فممكن ننطي جرعات كيمياوية واللي تخلي الرفع الجزئي ممكن واكيد بهيج حالة فرق هواي يكون على معنويات المريضة.

د.فرات يحيى محسن اخصائي الاورام والغدد باز کردن / نظر دهید