إستشارة طبية

2022-05-12 11:41:10 الديدان الدبوسيه و فشل علاجها أو عودتها
الديدان الدبوسيه هي ديدان صغيره تسبب لطفلك حكة مزعجه في أغلب الأحيان
تضع هذه الديدان بيوضها في منطقه المقعد و تكون هذه البيوض بالآلاف و عند حك الطفل للمنطقة تختبيء هذه البيوض تحت الأظافر و بهذا يأخذ الطفل هذه البيوض و ينقلها إلى شخص آخر أو ياخذها إلى فمه ليصاب بالديدان مره اخرى و أخرى و أخرى
للوقاية و العلاج الصحيح عليك بالتالي:
1. أخذ العلاج الصحيح اليوم و بعد أسبوعين اي تاخذه اليوم و تعيد العلاج بعد أسبوعين
2. معلومة يغفل عنها الأهالي و هي أن كل اللذين يسكنون مع الطفل يجب أن يتعالجوا و بجرع يحددها الطبيب و هم ياخذون العلاج للقضاء على كل الدود و البيوض في البيت كله
3. النظافة الشخصيه و غسل اليدين و استخدام التواليت بصوره صحيحه
غسل اليدين أهم عامل بمنع العدوى و يفضل تقصير الأظافر و تفريش أصابع اليدين و الغسل لدقيقة كامله هو مفتاح نجاح العلاج
4. الحرص على الحمام الصباحي لإزالة البيوض و تغيير الملابس الداخلية
مع الانتباه إلى هذه الملابس و اعتبارها ملابس ناقلة للمرض
5. أخذ حذرك عند نقل الملابس الداخلية و ملابس النوم يعني لا ترجيهن و إنما بحذر تعاملي وياهن و اغسليهن بمي حار و اكويهن
الملابس المشمولة هي الملابس الداخلية و ملابس النوم الخاص بالطفل
6. و أخيرا اذا كل هذا سويته و ما فاد بلغ المدرسه أو الروضه انه طفلك ما كاعد يستجيب للعلاج و أنه المدرسة كلها تحتاج للعلاج


د. سيف سمير البياتي اخصائي طب الاطفال باز کردن / نظر دهید

2022-05-10 23:27:29 ٢٠ نصيحه حتى تحفز شهيه الاطفال
١. احرص على وجبه الفطور و دائما خليها تكون صنع في المنزل مو اكل جاهز و بسكت و كيك جاهز
لا
بيض او جبن مع قطعه خبز و حليب مثلا
٢. انطي مي قبل الوجبه ب ٣٠ دقيقه
مو تنطي حليب و عصير !
٣. الاكل كل ساعتين الى ٣ ساعات
بس وجبات صغيره
خصوصا مرضانا اللي عدهم سكر
٤. اكل بين الوجبات صحي لازم مثل الوجبات
Happy meal
اللي هي فواكه و خضراوات تعزز جدا من شهيه الاطفال للغداء
٥. زبده الفستق خليها جزء من فطور الطفل او وجباته الصغيره
طبعا مسحه صغيره منها تعزز النمو و الوزن
٦. لا تعتبر الحليب وجبه ابدا
الحليب مو وجبه
الوجبه مو حليب
الحليب ما يعتبر وجبه
ماكو مبدا هو او هي ما اكلوا اذن انطيهم حليب
الحليب مو وجبه
الوجبه مو حليب
اكرر لو كافي؟
كرروا انتوا بالتعليقات بلكي توصل الرساله
٧. قدم الاكل اللي يحبه بالصيغه اللي يحبها
قسم يحبون الاكل مقرمش قدم الاكل مقرمش
قسم يحبوه يكون شويه هلامي القوام قدمه هلامي القوام
٨. قدم الاكل بطريقه فنانه و ممتعه و ملونه
٩. قدم الاكل بطريقة القضمات الصغيره
يعني كميه صغيره من كل شيء
ماكو مانع انه ننطي الطفل اكثر اذا حب
١٠. اللبن هو صديق المعده
اللبن ممكن ننطي وياه فواكه ما يحبها
و اللبن وحده اصلا يعزز المناعه لان بيه بكتريا نافعه
ما حب اللبن عادي
١١. لا تنطي الطفل اكل بطعم لاذع قوي مثل الفلفل الحار او حتى مكان الاكل لا يكون بيه روائح قويه ممكن تسد نفس الطفل
١٢. ضيف بعض المنكهات مثل الكمون و الحلبه و اكو انواع كثيره للبهارات الحلوه للمذاق و اللي تزيد شهيه الطفل
اكيد لا تبالغ
القليل يكفي
١٣. بلا اضافه الكثير من الزيت و الدهن للاكل
كلما اقل كلما احسن
١٤. تاكد من انه طفلك يلعب يوميا و يتحرك
مو مكابل الايباد او التلفون او التلفزيون و تكول ما ياكل
طبعا ما ياكل اذا ما يتحرك
١٥. خلي الاكل بمكان مفتوح و بارد
كلما المطبخ حار راح ياكل الطفل اقل
١٦. لا تناقش امور مزعجه للطفل اثناء الطعام
مثلا ها عندك واجب !!
او من تكمل غداء يلا واجب
خصوصا اذا يكره الواجب
راح يكره الاكل و الواجب و يكرهك كذلك
لا تحجي بالاكل كذلك
احجي مواضيع لطيفه مثلا راح نروح للزوراء او تتذكر من رحنا للجزيره و راح تتفاجيء انه المواعين انمسحن
١٧. الزنك جدا يعزز الشهيه
الزنك متوفر بالكازو و الخبز الاسمر و البيض
عزز محتوى الزنك طبيعيا
لا ننسى انه كثر الزنك يسوي قيء فلا تاخذ زنك بكيفك
١٨. دائما الاكل نريده اكل بيت
الوجبات الجاهزه ما نعرف شكد بيها محتوى سكري
١٩. التحليه لازم تكون صحيه
فواكه مثلا
٢٠. اخيرا لا تجبر لا تجبر لا تجبر
كرهوا الاكل و كرهوا المجتمع من وره جبركم
اللي كاعد تسووه خطا
و راح يوديهم لفشل النمو قريبا
و لمشاكل نفسيه لاحقا


د. سيف سمير البياتي
اخصائي طب الاطفال باز کردن / نظر دهید

2022-05-08 09:54:23 كم شغله صغيره مهمه للمقبلين على الزواج و المتزوجين و اللي عدهم أولادهم بين قوسين للكل
1. التربية تبدأ مبكرا من اول اختيارك لشريك حياتك فمثل ما للشاب حق الاختيار تستطيع الأنثى الرفض او القبول
2. اذا انت من جماعه ضرب الطفل فاترجاك لا تقرأ باقي البوست ماله داعي تتعب نفسك
لان يوم وصلت لمرحله تمد ايدك على طفلك فاعرف إنه إنت تأخرت بالتربية لدرجه انه طفلك بدا يعرف انه التصرف الخطأ و أصر إنه يسويه لأنه ما كنت تصححله الخطأ قبلها
3. التربيه كلمه فأحسن اختيار كلماتك
مثلا لا تكوله إنت احسن من أخوك أو بالعكس و تخليه يكره اخوه أو اخوه يكرهه
4. عمر اللعب و التنطنط ما كان عيب أو جريمه للطفل فبعمره إنت مثلا ما كنت تتصفح الجريده و تحتسي القهوه
5. اي إهمال لمبدا العداله بين الإخوان أو الأخوات راح يعزز مبدأ الكره بينهم
6. اذا عندك فلوس زايده و الله مفضل عليك استثمرها بتعليمهم بأفضل الطرق بدروس أو مدارس أو دورات أو لغه ثانيه أو أي شي
7. اذا كان طفلك شاطر لا تلومه اذا ما أخذ 100 خليك دائما محفز إنه يطلع نتيجه افضل
مو كلشي بالدنيا هي المدرسه
فالنجاح بالحياه مو شرط يكون نجاح بالمدرسه
من حقك طبعا تحفز طفلك و تعلمه
بس لا تكسر نفسه
و لو عندك اخ اقل مستوى من اخوه ابدا لا تكوله أخوك احسن منك
8. البكاء ما راح يغير النتيجه
و ان البكاء ابدا مو وسيله حتى يحقق مبتغاه
طبعا هذا لاطفال أكبر من عمر سنة أو سنة و نصف
9. الروضه اشجع عليها و من عمر سنتين و هي مو رفاهية و لا لأن انت موظفه أو ما عندك وكت
صح اخرتنا كورونا عن هذا الموضوع
بس للمستقبل ان شاء الله خلي ببالك هذا الشي
و هي مفيده
اي يتمرض هوايه اللي يداوم روضه هاي معروفه
بس كولي شخصيته شلونها
و تفاعله شونه ؟
10. علمه بعض الأشياء بالاضافه للدروس
موسيقى مثلا ؟
رسم ؟
قراءه قرآن؟
رياضه ؟
11. مو كل كارتون كارتون
الكارتون حلو و أفكاره حلوه و ممتعه
بس انتبه للي يتفرجه
اشوف مثلا أفلام كارتون .... او أفلام كارتون ......
و اشوف كميه الكلمات البذيئه و الغير مريحه و اللي ما اتمنى أولادي يسمعوها
أفلام أخرى على شكل كارتون بيها ألفاظ سوقيه و هي موجهه للكبار و حتى بيها ألفاظ مشينه تلكوها على اليوتيوب
اشوفها نوبات عند أطفال مشغليها!!
12. لا للتهديد و الوعيد
تريد تعاقب عاقب الان
اسحب التلفون أو اسحب اللعبه الفلانيه
و تأكد انه لو رجعت بكلامك راح تخسر الكثير من مصداقيتك
13. مبدأ هو طفل ما اعاقبه يشبه كثيرا طفلك من يراهق و تشوفيه يشرب مخدرات و تعوفيه
العقوبه تبدأ من عمر سنتين و يعرف انه هذا اللي سواه خطأ
14. جمله ( مو هو يحب المميه أو يحب الملهيه أو هو يحب الحليب المطعم أو أو أو )
تشبه كثيرا مو هو يحب المخدرات فاتركه يشربها
نفسها
هو هذا اللي دا يدمن المخدرات نفسه من كان صغير ما كانت امه أو ابوه يعلموه الخطأ و تاركيله الحبل على الغارب
15. اذا الله مفضل عليك من خيره مالها اي داعي تحسسهم إنه هم ملوك و كل شيء مجاب و هذه التربيه اللي هي لا تربيه
لازم يعرفوا إن الشي ممكن يكون متاح
و ممكن لا
و لا تحسسهم إنه هم أعلى من باقي البشر
كلنا سواسيه
د. سيف سمير البياتي اخصائي طب الاطفال باز کردن / نظر دهید

2022-05-06 14:24:31 20 خطا تسويه و ياثر على نوم طفلك جمعتهن ببوست
1. إهمال التوقيت :
يعني ابنك نعسان و يفرك بعينه و يكولك تعبان و انت تكوله لا بعد وكت انتظر انتظر شو من وكت نايم
2. أكبر غلط تسويه هو إهمال الروتين
يعني قصه قبل النوم و التغسيل و تفريش الأسنان قبل النوم و أنه يطفي الضوء
أهم شي لنوم ناجح هو الروتين
3. ماكو شي اسمه اليوم اسهر لان باجر عطله يوميه نفس الروتين و نفس التوقيت
4. الاعتماد على شخص واحد يعني أما الأم أو الاب أو المربية
المفروض كل يوم واحد يتشارك بنوم الطفل و الروتين اللي قبله حتى لا يصير ملتصق بواحد فقط
5. هاي للأمهات اللي اطفالهم يرضعون: مو كلما يبجي أو تصدر صوت تركضيله نوبات كثيره هو و نايم يبجي و يرجع ينام لا تخربين نومته
6. يروح الطفل للنوم و باقي البيت بيه حفله و خطار أو بالعوائل الكبيره بقيه الأطفال يلعبون و يضحكون
لازم تنظيم وقت أو ع الأقل من يروح طفلك ينام باقي البيت هاديء
7. لا تتشارك الفراش ابدا من البدايه مع طفلك لأن ما راح تضمن تخليه ينام وحده ابدا
8. ترك الطفل ينام هوايه صباحا و مثل ما كلنا ابدا لا تخلون الاغفاءه الصباحية تطول أكثر من ساعتين
9. ماكو لعب الصبح و ماكو طلعه و ماكو دراسه بوقت الصباح لازم
من أهم معرقلات النوم الكافي ليلا
لازم يطلع و يلعب و يضحك و يكمز الصبح
10. النقطه 9 كلش مهمه هو أنه أكثرنا ما نخلي الطفل يتعلم شون ينوم روحه يعني تخلوه بالفراش نعسان المفروض مو نايم
11. تغيير وقت النومه من بيت إلى آخر يعني من تاخذين الأطفال لبيت اهلك أو أهل زوجك تغيرين وقت نومتهم و هذا يتعارض ويه الروتين
12. تأخرك بتشخيص اذا كأن الطفل عركان أو مبلل نفسه بحيث يبجي أو ما ينام و هو خطيه ظروفه ما تساعد
13. عدم تنظيمك لوجبات الطعام و مثل ما كلنا حتى تربين صحيح روتين روتين روتين
14. افتراضك الخطا انه كلما راح يتأخر باليل راح يتأخر بكعده الصبح
15. عدم ادراكك كم ينبغي أن ينام الطفل في كل فئه عمرية و اكو بوست موجود عن الموضوع بالصفحه
16. اهمالك للضوضاء البيضاء و اخفات الصوت بصوره شديده بحيث يعم الهدوء و هذا غلط و نزلنا بوست عن الضوضاء البيضاء و كانت تعليقاتكم كلش حلوه و تعلمنا من بعض
17. الاستسلام: من تردين تسوين مثل البوست و التوصيات اللي بهذا البوست و ابنك يقاوم التغيير رأسا تخضعين له و ما تكملين التغيير و تمشين نظامه
18. التغيير من الكاروك الهزاز إلى السرير الثابت مبكرا و طبعا هي بحدود السنتين أو يكوم يطلع من الكاروك
19. تاخذيه و بدون سابق إنذار للفراش و تكوليله نام فمثل ما كلنا للنوم اكو طقوس يعني
سدي التلفزيون
و فرجي أسنانه
و كوليله راح ننام
و سدي أضويه البيت أو يفضل تقللين الإضاءة
20. سماعك لآراء الاخرين على أساس أنه هم أخبر منك بتربية أولادك و لأن هم مربين اطفال و هذا غلط كبير


د. سيف سمير البياتي اخصائي طب الأطفال باز کردن / نظر دهید

2022-05-04 10:18:33 جدري الماء- chickenpox
اجدادنا العظماء سموه (جدري الماء) يجوز قصدهم اليصاب بيه يصير چنه جدر ماي حار ، على اي حال جدري الماء من اشهر الامراض الانتقالية والاطفال من يسمعون بيه عبالك سامعين بفلم رعب
شنو تعريفه ؟
هو مرض فايروسي يسببه (varicella zoster virus (VZV
شون ينتقل؟
ينتقل للاشخاص بطريقتين اما بالملامسة المباشرة للشخص المصاب او عن طريق الرذاذ اليطلع لمن الشخص يعطس او يگح بالضبط من السوائل الموجودة بالفم.
المن يصيب بالاكثر؟
جدري الماء يصيب الاشخاص عادة من عمر يوم إلى عمر ١٠٠ سنه وهو مرض بسيط كم يوم ويروح بس المشكلة اذا صار ب٣ فئات واعراضه بيهم تصير قوية ؛ الكبار و الحوامل والعدهم المناعة موتمام
زين ليش نخاف منه بذوله الفئات ؟ ،
باختصار الكبار يزود عدهم نسبه الاصابه بذات الرئه خصوصا بالمدخنين وهذا الالتهاب احيانا يكون قاتل ، الحوامل وخصوصا باول ٣ اشهر الحمل ممكن يسوي تشوهات ولادية بالجنين وان كانت نادرة بس موجوده ، وبالنسبة للمناعتهم ضعيفه فهاي الفئة كلشي يصير بيهم نخاف منه .
شنو مراحل المرض و شون يبدي؟
-المرض معروف يبدي بطفح (طگاگ شكله بالصورة ادناه حب زغار وردي او احمر بداخله سائل او جراحه ومن يتگشر يصير اسود) يطلع بالوجه وقشرة الراس وبالصدر والبطن والظهر و قليل يصير بالاطراف ، الطفح هذا وياه حكة وارتفاع بدرجة حرارة الجسم ومرات صداع والمريض ماله خلگ ، من گد الحكة مرات بمكان خدوش الحكة يصير عنده التهاب بكتيري
- زين بيا وكت المريض معدي؟؟
سؤال وجيه ، المريض معدي ب ٢-٤ ايام قبل ظهور الطفح الجلدي الى حد تقشر آخر طگاگة ، ولمن الشخص يلگف الفايروس ما يطلع بيه بسرعة انما يبقى ١١-٢٠ يوم يله تطلع الاعراض اللي هي اسمها فتره الحضانة
شون يصير التشخيص؟
-طبعا التشخيص عادة بالفحص ومرات مبينه و معروفه يجون جهال اختك واحد منهم بيه جدري الماء و وره فترة يطلع باطفالكم لو اكو طالب بالمدرسة بيه جدري الماء و بس ابننا لگف الفايروس.

هسه اذا ثبت عيد و ابننا بيه جدري الماء شنسوي ؟؟
اول شي ممنوع اي تلامس جسدي وي المريض و نعزل شغلاته وحده ، الخاولي والخاشوگة وهاي السوالف ، و نقرض اظافره حتى مايأذي نفسه بالحكة و مايلطش الفايروس جوه الاظافر لمن يحك وبالتالي ينتقل لغيره بسهولة ،ويسبحونه يومية ، اذا عنده دوام ياخذ اجازة يطگله ١٤ يوم
زين دكتور ماله علاج ؟
طبعا اله علاج يراجع الطبيب اول ما يطلع الطفح و يكتبله علاج مضاد للفايروس و نوبات يكتبله دوه التهابات اذا عنده علامات التهاب بالجلد
اول ما تشك بطفلك بيه جدري الماء راجع لان كلش يقلل
أولادي من صار بيهم قبل كم سنه راسا بديت زوفيراكس و فعلا كانت الاصابه خفيفه
مرضايه كذلك كلما أبكر كلما احسن
هذا المرض هو و فايروس الهربس كلما تروح للطبيب اسرع افضل لان اذا تاخرت بعد ٧٢ ساعه فعاليه الدواء تكون بيها علامه استفهام
صباحكم عيد


د. سيف سمير البياتي اخصائي طب الاطفال باز کردن / نظر دهید

2022-04-30 21:06:45 بعد كل ولاده طفل نروح و نبارك للعائله المولود الجديد
طيب شنو متطلبات الروحه ؟
١. قبل ما تروحون خطار اخذوا موعد من الناس اللي رايحلهم
٢. اخذوا اكل وياكم بالاخص اذا الام و الاب ساكنين وحدهم بيتزا مثلا او لفات شاورما حتى لو لفات فلافل ما عدها وكت الام و راح تعجبها الهديه
٣. اغسل ايديك قبل ما تدخل و قبل ما تشيل الطفل
٤. اذا انت مريض لا تروح و اذا عندك طفل مريض لا تاخذه
٥. احتفظ بنصائحك لنفسك
ما يحتاج لنصيحتك
عدا اذا نصحتي الام تتابع الصفحه
هاي اوكي
عداها سوالف التكحيل و الثوم و الكبسوله ع الصرة و ممتون و مصروع و من هاي الخرافات عوفيها لا تكوليها
٦. اذا تكدرين تقدمين المساعده قدميها مو عيب
تحتاج الام الى الراحه
و اذا كلش صديقتك اساليها محتاجه شي اجيبه ويايه؟
٧. دائما طمني الام
الام اللي والده توا تكون هرموناتها متخربطه
تشوف نفسها سمينه او ما حلوه او او
كوليلها شطالعه
شكد لطيفه
شكد حلوه
راجعه احلى من قبل
٨. مو ترحين و تاخذين جهالك الاثنين اللي انت بالكوه جارعتهم و جارعه وكاحتهم و تبلش المره تنظف وراكم
و تزيدين الهوسه هوسه
شكرا لا تجين احسن
٩. طلبتي موعد و ما قبلوا او اعترضوا
عادي و شنو يعني
مو تسويها سالفه
من حقهم لان تعبانين
١٠. بلا صور بلا صور بلا صور
منو يكول يقبلون
و منو يكول عاجبهم
و لا تنسين لا تنشرين الصور لان منو يكول يقبلون
الصور تدخل من باب الحريه الشخصية غير مسموح نشرها
١١. لا تسالين هوايه
هن كم سؤال و بس
لا تحققين
١٢. مو تهملين الاخ او الاخت الاكبر للطفل علمود لا يحس بالغيره و عدم القيمه
اخذيله هديه مثلا
راح تكون لطيفه
١٣. ممنوع تقبيل الطفل المولود ممكن تؤذيه و تمرضيه و اكثر من حاله منشورة عن وفيات صارت عند حديثي الولادة بسبب قبلة
١٤. اذا حسيتي الطفل جوعان انطيه لامه
١٥. مو الا و مو شرط تشيلين الطفل عادي يجوز امه ما تقبل
١٦. حتى لو تكولك جيبي الجهال و تعاي
تره دا تكذب عليك
ما تريد
و اصلا مو مناسب
لا ترحين انت و اولادك ابدا للي والده جديد
١٧. لا تخلين عطر قوي من ترحين
و اكيد ممنوع التدخين
١٨. ابدا لا تكعد الطفل
غير مسموح
١٩. لا يكون صوتك عالي
٢٠. اذا الام ترضع طبيعي لا تكوليلها هاي شنوو بعدك ترضعين طبيعي و هذا التخلف
بالعكس اللي ترضع طبيعي هي الصح
٢١. ابدا لا تضوجين اذا شفت الام غير شكل او متوتره او عصبيه
مو معناها غير مرحبه بيك
٢٢. لا تطولين هوايه بالزيارة حاولي تكون حوالي نص ساعه
.
.
و بس
د. سيف سمير البياتي
اخصائي طب الاطفال
اخر ملاحظه قبل ما اروح مو تاخذين سيت كلاصات لو بطانية احبك عندها مال عرسها ما يحتاج باز کردن / نظر دهید

2022-04-28 21:34:14 هو شنو اعراض التسنين؟
تعالوا نشوف شنو اعراض التسنين
اللعاب و الكثير من اللعاب و المزيد من اللعاب
و اللعاب راح يستمر الى ٣ سنوات
الانزعاج و الشعور بالانزعاج و كثر الالتصاق بالام او الاب
لا تلومهم ابدا
تتذكر شون من طلعلك سن العقل ؟
اي التسنين مزعج و حقهم
علك اللسان و العض على اليدين و حك اللثه بالملهيه او المميه و تحسه يمضغ بشي
تغيير طبيعه النوم
فالطفل تتغير نومته بهذه الفتره
بعض الجفاف بالبشره بالأخص منطقه الذقن
بسبب كثر اللعاب
الكثير من سحب الاذن و الطفل يرتاح من تلعب باذنه
الكثير من الضرب على الراس او سحب الشعر
تغيير طبيعه الخروج فيكون الخروج لين قليلا
بس عمر التسنين ما يسبب اسهال حاد
ممكن تغيير بسيط فقط بطبيعه الخروج مو اكثر
التسنين ما يسوي حراره بس تحس الطفل حار
يعني من تمسكه تحسه حار
بس من تقيسه ابدا ماكو اي ارتفاع بالحراره
لذلك قيسي الحراره و تاكدي
اي حراره فوك 37.2 نراجع طبيب
لان التسنين ماله علاقه مهما كالولك ام حمودي و ام عبودي
اللثه تبدو متورمه و حمراء
فقدان الشهيه مرافق للتسنين
كيف لا
و هي مدخل الفم
كل اللي عليك هو تبرد الطعام حتى يسكن اللثه ببرودته
شوكت يبدي التسنين ؟
شهرين إلى 3


د. سيف سمير البياتي اخصائي طب الاطفال باز کردن / نظر دهید

2022-04-26 21:34:47 باز کردن / نظر دهید

2022-04-26 21:34:39 اليوم أعلنت هيئة سلامة الغذاء المصرية قرارها النهائي بعد فحص عينات من إندومي و هو سحبة من الأسواق لعدم صلاحيتة للإستخدام البشري
و فعلا سحبت الشركة ما يقارب ٣/٤ مليون عبوة حتى الآن.
التحاليل أثبتت سلامة الشعرية لكن عدم صلاحية أكياس الشطة و نكهات الدجاج و الخضروات لإحتوائهم على كميات من سموم أفلاتوكسين و بقايا مبيدات أعلى من الحد المسموح به.
اؤكد على موضوع تناول شعريه الاندومي بلا منكهاتها و بلا الشطة مالتها
و اؤكد كذلك على موضوع الابتعاد عن الجبس و الطعام خارج المنزل و الالتزام بطعام المنزل الصحي النظيف
#الاسهال_عدوى


د. سيف سمير البياتي اخصائي طب الاطفال باز کردن / نظر دهید

2022-04-26 10:25:19 70 بالميه من الاطفال ينامون الليل بطوله بدون حتى كعده على الرضاعه بعمر 3 أشهر
خلي هدفك انه طفلك ينام الليل بطوله بهذا العمر
و كوني مع الاغلبيه
اي اعرف اكو 30 بالميه ما ينامون
بس 90 بالميه راح ينامون الليل بطوله بعمر 6 أشهر
يبقون 10 بالميه ذوله مشكلتهم مشكله
المهم ما علينا
تعالوا نتعلم شون نخلي الطفل ينام الليل بطوله بعمر 3 أشهر
خطوه بخطوه
10 خطوات
1. الكماط
الكماط الليلي بالأخص
الكماط يضمن نومه هانئه و يخلي النومه تطول و تطول و تطول
الكماط لازم يكون خفيف و ما يشمل الساقين
2. الروتين الروتين الروتين
ابدي مبكرا
ابدي من اول يوم
يكعد من النوم
غيري حفاظه
ارضعيه
العبي معاه
وراها غيري الحفاظ
ارضعيه
ظلمي جو الغرفه
و حسسيه انه بدينا بالنوم
و خليه ينام
3. اكدي على رضاعه الصبح
بين ال 7 صباحا و ال 7 مساءا
او بين ال 8 صباحا و ال 8 مساءا
شويه شويه راح يتعلم ان الليل للنوم و الصبح للرضاعه
4. راقبي شكد ينام بين ال 7 و ال 7
اذا ينام هوايه
ايقظيه
بس بنفس الوقت خليه ينام
بس لا تطول الاغفاءه اكثر من ساعه إلى ساعه و نص بهذا الوقت من ال 7 صباحا لل 7 مساءا
5. رتبي ظروف النوم جيدا
غرفه معتمه
أجواء هادئه
ضوضاء بيضاء
كماط
حمام دافيء
6. تعلمي علامات النعاس و لا تهمليها
يعني مو خليه يتعب حتى ينام زين لا لا
و اعرفي شنو علامات النعاس
مثل من يتجنب النظره الك
او يتثاوب
او يفرك بعينه
هاهيه حضري أجواء النوم
7. رضعه مشبعه بنص النوم تخليه ينام اطول
اني ضد هذه الفكره
لان الطفل ما راح يعرف شنو شعور الشبع و الجوع
بس كتبتها لان فعلا تطول نومه الليل
8. اعتام الغرفه ضروري و ضروري جدا
و مو رفاهيه
و اذا عبالك الشمعه اللي تشغليها بأول ايام راح تفيد ابو صفار فهي ما تفيد و لا تكسر جزيئات ابو صفار و بس تفسد النوم و ما تعلمه ابدا على النوم
9. ابدا لا تركض لطفلك اول ما يتنحنح او يصدر صوت او بكاء بسيط لان اغلب المرات راح يرجع للنوم وحده و ركضك تجاهه راح يكعده فقط و يخرب نومته للمستقبل
10. اخر نقطه للقادرين فقط و الأقوياء فقط اللي يخلون اطفالهم ينامون وحدهم بدون هز او رضاعه
يعني خلي طفلك بسريره و هو صاحي حتى يتعلم على النوم وحده


د. سيف سمير البياتي اخصائي طب الاطفال باز کردن / نظر دهید