إستشارة طبية

2022-04-04 11:56:05 رمضان كريم عليكم

شايفين السرك؟
يجي اسد لو نمر لو دولفين ... يسوي حركات معينه ... وباتقان ...

هاي الحركات هل رب العالمين خلقها بالاسد؟ أو النمر؟؟ أو الدولفين؟؟

طبعا لا

ماكو اسد بالدنيا لحاله يمشي على حبل لو يكمز من دائرة لدائرة ...

ولا اكو دولفين بالدنيا يجي لحاله يلعب بالطوبه وي الجهال!!

لعد هذولي شلون صاروا؟؟

صاروا من خلال الترويض..

شنو الترويض؟
الترويض هي عمليه إجبار كائن معين على سلك سلوك معين... في فتره زمنيه معينه.. مع استخدام طريقه العقاب والثواب ...

يعني يجي الدولفين ويحطون كدامه الطوبه.. ويحطوها على مقدمه وجهه.. من يرفض أو ينهزم ... ينضرب ..
ويقيد بقوه ... ويمنع من الطعام .. وغيرها من وسائل الترويض..
ومن يحطها على وجهه ... يتم تشجيعه واعطاءه الطعام مباشره ...

وتكررررر مره ومرتين وعشرين

إلى أن يستنتج الدولفين أنه في سبيل ابقى على قيد الحياة واحصل اكل وما انضرب ، ولا انجلد.. لازم احط الطوبه على وجهي ..

ويتروض !

وتجي الناس للسرك فرحانه بمنظر دولفين يفر طوبه على وجهه وتدفع فلوس حتى تشوف هذا المنظر ... ليش؟؟
لان منظر مو طبيعي! منشوف هذا المنظر بكل مكان !
هذا مشهد شاذ عن الطبيعيه ....

هذا الحجي هسه شنو رباطه برمضان؟

رباطه شفت بكروب وحده فرحانه بزينه رمضان وحاطه ميز بي مالذ وطاب من مجسمات واكل وتحفيات..
والتعليقات من باب المزاح يكلولها هاي شلون باقي على حاله شو جهالنا ميخلون شي بحاله ..

فكان الجواب هو (اخلي بنتي بالحجلة واراقبها وكلما تتقرب وتمد ايدها اضربها علي ايدهاواعيد مره ومرتين وعشره الى ان بعد متتقرب)

هسه احنا شعلينا بيها هي حره بجهالها ..
اي صح هي حره وكل واحد حيحصل نتيجه تربته

السبب الي خلاني اكتب هذا البوست هو كميه المينشنات والرغبه العارمه الي تولدت عند الأمهات بأنه يتبعون نفس هاي الطريقه الانانيه الترويضيه ... !

طفلج مو حيوان وتروضي!!
طفلج انسان عنده ذكاء عالي وحب استكشاف..
استكشافه يبدي من المحيط ثم يتوسع..
اذا محيطه مستكشفه ... شلون حيستكشف الحياه؟
شلون حيتعلم ابسط المهارات؟

انتي بهذا التصرف قضيتي على أهم رغبه عند الانسان الي هي منها برزت النا كل العلوم..
من فيزياء وفلك وجغرافيا ...

رغبه الاستكشاف والفضول ...
رغبه هذا شنو ومنو شنو متكون..
هذا شنو وشلون صار..
هذا شنو وشلون يشتغل ...

مبروك عليج بيتج الملئ بالتحفيات..
ومبروك عليج طفل بعمر الزحف بس ميمد ايده على كلشي!!!!!!!
"مثل الدولفين الي يفر على وجهه طوبه"

الطفل بهذا العمر مو طبيعي يتصرف هيج..!

ملاحظة: هسه تجي وحده تكول لعد شلون؟
الشلون مادام تزوجتي وخلفتي خليج كد المسؤولية.. مسؤليتج تربين طفلج سليم عقليا وجسديا.. ومن ضمن هاي المسؤوليه تتنازلين عن هواي أمور.. وهاي ابسطهن.. ولتخافين من حيشبع طفلج فضوله (بعمر ٥ سنوات تقريبا) محيضل عنده فضول ل التحفيات

امهات انتبهوا ولاتركضين وره كل نصيحه تسمعيها ...

والي كلش هيج تحب زينه رمضان وعدها طفل يزحف.. خليها مكان عالي

ورمضان كريم علينا وعليكم

د.اسماء اسماعيل البدري باز کردن / نظر دهید

2022-04-03 12:06:28 كيف تقوي شخصيه طفلك !
كتبت بالبوست السابق أسباب ضعف الشخصيه للطفل و اهميه ان يكون طفلك صاحب شخصيه قويه بالاضافه لكونه مؤدب و شاطر و خلوق
تعالوا نستكشف الخبطه اللي تؤدي إلى شخصيه أقوى
حافظ على القدوه الحسنه
فالطفل اللي يشوف شخصيه احد والديه مهزوزه و ضعيفه ما راح يكون قوي الشخصيه
مهم جدا ان يتعلم منك كل شيء و من ضمنها هذه الجزئيه
الأم اللي ينكسر كلامها و ما يسمحون الها باي رأي بالتربيه عمرها ما راح تنطي شخصيه قويه لطفلها
الاب اللي ال ( لا ) مالته غير معتبره و محترمه من الأم عمره ما راح يكون قدوه حسنه
لذلك اهتم بهذه الجزئيه و حاول تبرزها
الابتعاد عن الحمايه الزايده
اتركيه يستكشف
يتطين
يقع
ينجرح
يداوم ويه اطفال
و خليه وحده ينهض
ما مطلوب منك تداري كل موقف مثل ما انت الان تتعرض لمواقف و تخلص نفسك منها
خليه يجرب و يستكشف
خليه يعبر عن نفسه و ذاته
الاطفال اللي شخصيتهم قويه هم اللي يعبرون عن رفضهم و حبهم لاشياء معينه
اتركيه يعبر عنها
التحفيز مهم و مهم جدا بس بلا مبالغه
فهمه كيف يتصرف و كيف انه هو بطل و سوف يقدر و سوف يستطيع
اشركي الاطفال بالأحداث المهمه
يعني ماكو داعي الاطفال يبعدون عنك و عن الآخرين
خليه يشارك الحديث و يعبر عن نفسه
الطفل المعزول هو راح يكمل حياته معزول و وحيد
تنميه الذكاء
و عندي رأي دائما اعبر عنه و اكوله ( الاستثمار الوحيد الناجح هو الاستثمار بتعليم طفلك )
كلما وديته مدارس بيها تنميه و تقويه و تعزيز لذكائه كلما صارت فرصته أقوى ان يكون شخصيه أقوى بالمجتمع
فالذكي دائما يكون محترم
لا تقارن طفلك مع أي طفل اخر و لا مع اخوه
لا احسن و لا اسوء
اعطيه حريه الاختيار
اختيار الملابس
الالعاب
اشياؤه الخاصه

الاهتمام بالمظهر الخارجي
فعمرك ما راح تشوف احد شخصيته قويه و ملابسه رثه
اي اعرف ان الملابس قشور
بس مهم جدا ان تهتم بنظره الناس لطفلك
ابتعد عن العقاب اللي يؤذي نفسيه طفلك
مثل الضرب او تكول للناس انه هو معاقب لأي سبب كان
و دمتم بخير
د. سيف سمير البياتي اخصائي طب الاطفال باز کردن / نظر دهید

2022-04-02 16:03:03 باز کردن / نظر دهید

2022-04-02 16:02:59 لو مهما تعبت و ناضلت و قاتلت بالتربيه
و لو مهما حسيت انك حققت المهمه و صار الطفل الناجح الذكي المثابر الخلوق
فهذه كلها تروح اذا كان طفلك ضعيف الشخصيه
ابقاء الاطفال ضعفاء مهمه خطره
يروح كل تعب السنين اللي تعبتها ويه اول مؤثر سلبي
كلنا نريد أولادنا ناجحين
و حتى يصيرون ناجحين لازم يصيرون مبدعين خلاقين منجزين
بس هذه كلها لا تجي شيء بجانب قوه الاراده و الشخصيه

و شون اعرف ان طفلي ضعيف الشخصيه ؟
علامات ضعف شخصية الطفل
- ملاصق لوالديه
- يضيع اشياؤه بسهوله
- ما يلعب ويه الاطفال
- كئيب و يحب البكاء و النق
- منعزل و ما عنده أصدقاء
- ماله اي رأي
- خجول أكثر من اللازم
‏نجي للجزء الأهم بالبوست هو شنو️ ‏أسباب ضعف شخصية الطفل
‏- الاعتماديه التامه على الوالدين
- قله ثقه بنفسه
- حمايه مبالغ بيها
- تدليل زائد عن الحد
- أحيانا القسوه تضيع شخصيته
- معارضه الأم لرأي الاب و بالعكس
- كثر الخلافات في البيت
- كثر المقارنه مع الآخرين
و الحل ؟
هاي يرادلها بوست كامل طويل اخر
مهتمين بالموضوع ؟
هل تبالغون بحماية أولادكم؟..

د. سيف سمير البياتي اخصائي طب الاطفال باز کردن / نظر دهید