إستشارة طبية

2023-06-24 00:46:07 باز کردن / نظر دهید

2023-06-24 00:46:02 يكول المثل ( لا يعيش الإنسان بالحليب وحده فالحب عاطفه لا تمنحها زجاجه حليب مجرده من العواطف )
مختصرها ان الطفل مو بس حليب و حفاظات
الطفل احتياج نفسي و عاطفي
الطفل بيئه سليمه و اسره متماسكه
مصطلح جديد ظهر اسمه #اضطراب_التعلق
المصطلح ظهر بعد ملاحظه أن بعض الاطفال لطيفين و بعضهم الاخر عدائيين بعضهم ودود و بعضهم انفعالي
رغم انه هم اطفال مجرد اطفال بعدهم و توا يبحثون عن شخصياتهم
و بدا الموضوع و بطريق البحث عن الجواب
لكوا انه حتى علاقتك بزوجك او زوجتك او اطفالك الان اله علاقه بنشاتك الأولى و سنتك الأولى ويه والدك و ووالدتك كيف كانت
و كيف انه حتى بيئتك الرحميه الها علاقه ببعض تصرفاتك
الموضوع معقد و مو سهل اعرف
بس ملخصه انه كلما قدمتي الحب و عرفتي شون تتواصلين ويه طفلك اول اشهر بعد الولاده كلما راح يكون بالمستقبل شخص بالغ مشبع عاطفيا يعرف شون يتصرف و شون يحب و شون يعامل الاخر
اضطراب التعلق التفاعلي مصطلح جديد نزل لأول مره سنه 1980 من أهم أعراضه هو التعلق الشديد و الحاجه الملحه والجوع للحب بحيث تحس اكو جزء مفقود بالشخص لا يمكن لأى حب آخر سدها او تعويضها و تلكيه ينتقل من علاقة إلى أخرى على امل الحصول على الحب بس من دون اي جدوى. احساسه بالحب فقده لان انتزع من والدته بالطفوله المبكرة و هو بعز احتياجه للتلامس و الحب
انتزع لان فلانه و فلانه رأيهم أن الطفل لازم ما ينشال لان يتعود على الحضن او انتزع لان الأم حاضره جسديا و غايبه نفسيا بسبب العبء النفسي او أن الأم اصلا غير مستقره نفسيا او أن الاب مشغول بالشغل و ما يكدر يحضن أطفاله لان ملتهي بالشغل
و النتيجه؟
وصلت رسائل عديده للطفل انه انت محروم من الحب روح دور على الحب لنفسك و من تلكاه ما راح يكفيه اي شيء لان استحاله حنان الأم و الاب بالبدايه يعوض
و النتيجه شخص بالغ مدمن للعلاقات العاطفيه المتعددة كل الغرض منها هو الحصول على سد الجوع العاطفي اللي انحرم منه ببدايه عمره
زين و بالاطفال شون يبين هذا الاعتلال النفسي اللي يسمى اضطراب التعلق؟
بالاطفال يبين على شكل انسحاب عاطفي من الشخص البالغ اللي يهتم بيهم و يكون سهل الاستثاره سريع الانفعال و يكون حزين او خائف بدون اي داعي
أكثرهم ما يحبون الموده الجسديه فتشوفه يضوج اذا حضنه الاب او الأم
اضطراب التعلق نادر الحدوث بالمجتمعات المثقفه بس اكثر بالمجتمعات الفقيره و اللي ما توفر حنان و احتضان للطفل
بالمختصر يا جماعه
يرادلنا وقفه و مراجعه لتصرفاتنا لافكارنا للي تعودنا عليه للمباديء الخطأ اللي تربينا عليها
لنظرياتنا الخطأ اللي تكول ( لا تشيليه مو يتعود على الحضن )
لتركنا مسؤوليه حضن الطفل و إسكاته على امه فقط
لهجرنا للرضاعه الطبيعيه و التلامس الجسدي بين الطفل و امه لان الرضاعه الصناعيه اسهل و كمنا نخلي المميه على وساده بصف الطفل و من يجوع يرضع منها
لقدرتنا على الرعايه بأكثر من طفل و احنا ما عدنا وقت للثاني
اقروا اكثر عن الموضوع راح يعجبكم
د. سيف سمير البياتي اخصائي طب الاطفال باز کردن / نظر دهید

2023-06-21 21:58:27 20 شغله غريبه تصير اول ايام الرضاعه الطبيعيه !
1. بعض الالم ويه اول رضعات و اول ايام بعد الولاده
ألم الحلمه و تشققها من الامور اللي تحدث و تحدث كثيرا اول ايام الرضاعه الطبيعيه و مع الأسف الكثير من الأمهات يتركون الرضاعه الطبيعيه بسبب هذا الالم
الخلل يصير لعده أسباب منها سوء الالتقام و لان الطفل ما يعرف يرضع و الام ما تعرف كيف ترضع و بالأخص الطفل الاول
كل اللي عليك تشوفين فيديوهات الرضاعه الطبيعيه و تتعلمين من اليوتيوب شون تتم العمليه
اعرف راح تكولين هي سهله شيرادلها بس صدكيني هي صعبه
و اكو اختصاص كامل اسمه مدرب الرضاعه الطبيعيه
حضرت بيه ندوات و دورات مكثفه بيه
2. طفلك راح يرضع هوايه بأول ايام بعد الولاده
بحيث تحسين بالتعب هلكد يرضع
و اكيد راح تسمعين تعليقات مثل هذا جوعان انطيه مميه
بس هو بالحقيقه هو دا يكبر بسرعه لذلك يحتاج حليب اكثر
الموضوع راح يخف تدريجيا بعد اول اسبوعين
3. راح تحسين ببعض التقلصات الرحميه و انت ترضعين طبيعي
الهرمون اللي يخلي الحليب يتدفق هو نفسه الهرمون اللي يخلي الرحم يتقلص !
4. بعض الحليب راح ينزل من تلقاء نفسه بمجرد تفكيرك بأن طفلك جوعان او تسمعين بكاءه حتى لو انت ما ترضعيه
5. انت تحرقين 500 كالوري يوميا و انت ترضعين طبيعي
لذلك راح تجوعين و تحتاجين اكل
و اذا وزنك زايد
بريجيم بسيط تنزلين الوزن
بس مو هسه وكت الريجيم حبابه
خل نوصل للسنه و سوي ريجيم
6. راح تبقين تتشهين بعض الاكلات
هذا شي طبيعي
و حاولي تكون الخيارات صحيه
7. اول ما طفلك يبدي يرضع راح تحسين بعطش شديد مفاجيء و كأنما كنت بالصحراء لذلك خلي كوب الماء ملازم الك
8. الدوره الشهريه لن تكون منتظمه
بس هذا ما معناه ابدا انه ما راح يصير حمل
فاخذي سبيل الوقايه لان يا عيني نريدك ترضعين الصغير سنه وراها عود خل يصير حمل بلا ما تدرين
9. الرضاعه الطبيعيه سوف تجعلك تشعرين بالنعاس
و السبب هرمون البرولاكتين اللي يحفز إنتاج الحليب ينعس
10. اذا امتنع طفلك عن الرضاعه راح تحسين بألم شديد مع احساس ان الثدي كالحجاره و تحسين براحه تامه من طفلك يرضع
هذا شي طبيعي
11. من ترضعين من جهه ممكن الحليب ينزل من الجهه الاخرى
12. أحيانا و بالحقيقه نادرا بعض الأمهات يصير عدهم بعض الالم من ينزل الحليب
المزعج بالموضوع ان هذا الالم سيستمر لحين الفطام
13. مع تقادم الرضاعه الطبيعيه و خبرتك راح تعرفين اي جهه بيها حليب اكثر
14. ممكن راح تحبين الرضاعه الطبيعيه و تستمرين بيها لغايه ما يصير عمر الطفل 3 سنوات و اكثر
15. بعض الاطفال مو بس يرضعون لان جوعانين
بس يرضعون لان يردون يحسون بالراحه او لان عدهم مغص
16. الكثير من الاطفال ينامون و هم يرضعون طبيعي
و هو شي طبيعي و ما يقلق
17. الاطفال اللي يرضعون طبيعي يجوعون اكثر و يردون رضاعه بين فترات قريبه
18. خروج الاطفال اللي يرضعون طبيعي متكرر اول ايام بعد الولاده و يوصل أحيانا إلى 12 مره باليوم بأول اسبوعين و بعدين يبدي يقل
19. و لان الخروج متكرر فراح يصير عند الطفل طفح حفاظات فاختاري نوعيه حفاظات جيده و اختاري مرهم ويه كل تغيير حفاظ
20. اخيرا ماكو احسن من حليبك و لا يتقارن بيه اي حليب طبيعي و لا يشبهه و لا يتقرب منه
لان ماكو حليب بيه خلايا حيه تدافع عن طفلك بكل حليب العلب
د. سيف سمير البياتي اخصائي طب الاطفال باز کردن / نظر دهید

2023-06-19 23:45:41 بمكان ما تعيطين و تصيحين على الاطفال ليش ما تجربين التالي ؟
هذا البوست للاطفال العنيدين و اللي بس يبجون لاي سبب و اللي بسرعه تنثار عدهم نوبات المزاج
يعني اعرف جيدا انه هم يلحون و يزعجوك لاي سبب و لمختلف الاسباب
بس جربي التالي ليش لا
١. خلي طفلك متحضر !!
شون يعني ؟
يعني دا تروحين للجيران بزياره فهميه اللي راح يصير و شون راح نتصرف حتى ما يتفاجيء
راح ترحون للطبيب احجيله و سوي تمثيليه شنو اللي راح يسويه
تاكدي من انه تحضير الطفل كذلك جسديا
يعني لا تاخذيه و هو نعسان او جوعان
ما بيها شي اذا اخذ البطه مالته وياه او سيارته او لعابتها وياها
احسن ما يطلب وحده من المحل
٢. خليه يختار
اكثر الاطفال اللي اشوفهم مطيعين هم الاطفال اللي اهلهم ينطوهم الخيار و يكولوهم اختاروا
خليه يحس بالقياده و انه هو المتحكم بالقرار
اكيد بالقرارت المو مهمه
مو مثل بعض الامهات من اكولها العفو شو ملهيه بحلكه لو ما فاطمته من المميه و عمره سنه و نص
تكولي مو ما يقبل
٣. افتهم شنو اللي زاعجه
ليش هو هيجي عنيد
تره و الله ما يعرفون يعبرون
و خصوصا ذوله اللي اعمارهم اقل من ٣ سنين
هم ببساطه مدا يفتهمون شيردون منك
و ما يفتهمون شون يردون عليك
و بالتالي شنو يسوون؟
عفيه
نوبه غضب و بكاء و عويل
ما يفتهمون اصلا الموضوع
فهمهم شويه شويه
احجي وياهم ع كد عقلهم ببساطه
٤. الهيه !!
اي جديات احنا ما داخلين بمصارعه
شفته منزعج و ضايج
غير الموود
طلع كتاب و اقراله
او كوله يلا اطلع العب ( هاي بعد كورونا ان شاء الله)
نوبات مجرد لعبه غميضه بسيطه راح تنتهي الازمه مال بكاء
٥. كن معلم
علمه شون يتجاوز نوبات الغضب
نمي بداخله المهارات
الرسم الغناء او اي شي
طفلك يريد يسوي الشي الصح بس ما يعرف لان محد معلمه
انت فهمه و سوي امامه الصح
و هو راح يتعلم
٦. لا تستشيط غضبه
يعني هو يحب الجكليت تجيبين الجكليت و تخلين كدامه ١٠ قطع و هو ما راح يكتفي بوحده و انت تردين تنطين وحده فقط
ليش عرضتي ١٠ جكليتات كدامه؟
هذا نفس الشي بالنسبه لشراء العصير و الجبس
ليش تاخذهم للمحل القريب ؟
اني اجيب اللي اريده
و اختار و انطيه
خصوصا من اريد اعلمه على نظام صحي
٧. استخدم الكلمات الايجابيه و الافكار الايجابيه
يلا جربوا كولوا لطفلك اللي عمره اقل من ٦ سنين لا تكمز ع السرير شنو راح يسوي ؟
اي راح يكمز بالعناد
بس جرب تكوله تعال نكمز بره البيت لان السرير للنوم مو للقفز
و شوف الفرق
استخدم الافكار الايجابية
٨. دائما انطيهم الوجه الحاد من يبدي الونين و النق و النحيب
دائما فهمه انه هذا التصرف غير مقبول بنظره
مو الا تتكلم
مجرد نظره
٩. امدح امدح امدح
١٠. جدول النجمه و عندي بوست مفصل عنه
طبقه مثلا من الطفل ما عاند او ما سوه نوبه غضب
.
.
اخر شي هذا البوست بيه افكار سهله التطبيق و ما راح تلكين نتيجه من اول ايام
بس حاولي و حاول
هدفي مجتمع صحي
و تربيه سهله
د. سيف سمير البياتي
اخصائي طب الاطفال باز کردن / نظر دهید

2023-06-17 18:49:03 هلوووو دكتور اريد ارفع مناعه طفلي ؟
شكد عمره ؟
٩ سنين و ٣ سنين و ٧ سنين !
رضعتيهم طبيعي ؟
لا دكتور ما بيه شبيها المميه !
مع الاسف هذه اول خساره بجوله رفع المناعه و هي الرضاعة الطبيعية
خوما تشتريلهم نساتل و عصير صناعي ؟
يوميه دكتور ابوهم يحبهم ما يرفضلهم طلب
بس هذا مو حب هذا اهمال هذا تدمير للمناعه هذه النقطه الثانيه اللي خسرتيها بسبب الاهمال !!
اوكي بيش ساعه ينامون ؟
دكتور ما ينامون بال ٣ الفجر يلا
بس هيجي فعليا دمرتي المناعه !!! النوم يجدد خلايا المناعه و يعززها ماكو نوم ماكو مناعه
لعد شون شاسوي هسه اكتبلي فيتامينات !!
مو هيجي الموضوع و الله
الموضوع نظام متكامل تبدين ب:
١. رضاعه طبيعيه خالصه بلا مميات
ماكو حليب طبيعي؟
خلص الله و العاذرين بس تحاولين لو قطره تنزل انت بالاتجاه الصحيح
٢. ممنوع النساتل و البسكت و العصير و بالاخص الصناعي و الطبيعي هم قلليه مره اسبوعيا
٣. الفواكه شكد ما تكدرين مره او ٢ او ٣
٤. الخضراوات جزء من كل وجبه
٥. حليب خالي السكر صباحا
٦. و يا ريت لو عسل وياه
٧. لازم لحم لازم لحم لازم لحم
ما حب اللحم دجاج او اكباد او سمك
٨. التعرض للشمس حتى لو ١٠ دقايق
٩. ماكو شي اسمه مشروبات غازيه
١٠. النوم مبكرا النوم مبكرا النوم مبكرا
١١. بكتريا نافعه ( بروبايوتك ) اما على شكل ساشيتات او كبسول او جلاتين او نعزز اللبن من ضمن الطعام اليومي
هيجي تتحصل المناعه
د. سيف سمير البياتي
اخصائي طب الاطفال باز کردن / نظر دهید

2023-06-16 15:00:00 باز کردن / نظر دهید

2023-06-16 14:59:56 ماكو داعي للمضادات الحيويه
و ماكو داعي للفولتارين
و ماكو داعي لأي شي اخر عدا ما ذكر
الا اذا كان الطفل عنده مرض مزمن
و لا تنسون المشاركه
د. سيف سمير البياتي اخصائي طب الاطفال
الصوره تكول هاهيه سويتكم طبيبات ببوست باز کردن / نظر دهید

2023-06-16 14:59:56 خلي ببالك بعض الادويه اللي ممكن تفيدك في حالات الطواريء بالبيت
و اكيد مو معناها هو بديل عن العلاجات و مراجعه طبيب الاطفال نبدي على بركه الله :
خوافض الحراره
و اشهرها الادول قطره
الجرعه هي شخط لكل كيلو !
يعني شون ؟
الادول مدرجه إلى
0.4
0.6
0.8
1 ml
فلما الطفل وزنه 8 كيلو تنطيه لغايه 0.8
و لما وزنه عشره تنطيه 1 مل
و لمة وزنه 4 كيلو تنطيه 0.4
مثلها
الانتي بايرول قطره
مؤشره إلى
0.25
0.5
0.75
1 ml
فلما الطفل وزنه 5 تنطيه 0.5 مل
و لما الطفل وزنه 7 تنطيه 0.75 مل
اي شخط لكل كيلو
الادول و الانتي بايرول و البندول شراب ١٢٠ ملغرام
و اللي يكون لون الغلاف وردي
و انتبه الجرعه مكتوب عليها 120 ملغرام
و هذا جرعته نصف الوزن ٤ مرات باليوم
يعني وزنه ١٠ ننطيه ٥ سيسي
وزنه ٧ ننطيه ٣ او ٣.٥ سيسي
وزنه ٥ ننطيه ٢.٥ او ٢ سيسي
ننتبه على الادول و البندول و شرابات الحراره اللي مكتوب عليها 250 ملغرام
اقروه #250ملغرام
هذه جرعتها ربع الوزن ٤ مرات باليوم
يعني وزنه 10 ننطيه 2.5 سيسي
وزنه 16 ننطيه 4 سيسي
التحاميل
التحاميل اللي مكتوب عليها ١٢٥ ملغرام ممكن استخدامها من وزن 8 إلى 12 كيلوا
التحاميل اللي مكتوب عليها 150 ملغرام
من وزن 10 إلى 15 كيلو غرام
التحاميل اللي مكتوب عليها 250 ملغرام
من وزن 15 إلى 25 كجم
و اخيرا اللي مكتوب عليها 300 ملغرام
من 20 إلى 30 كيلوغرام
عداها و أقل من هذه الأوزان لا تزيدون الجرعه
الفكره مو بسرعه تنزيل الحراره
الفكره ان الطفل يرتاح
بعدنا بخافض الحراره
البروفين ولو ما افضل دون وصفه طبيب
بس البروفين يعطى بجرعه ثلث الوزن ٣ مرات
يعني وزنه ٩ كيلو ننطي الطفل ٣ سيسي
وزنه ١٢ كيلو ننطي 4 سيسي
ممكن نصف الوزن
بس خليكم بالاكثر أمانا
خلصن خوافض الحراره ؟
اي خلصن
و الفولتارين ؟
انسوه لطفا لان أعراضه الجانبيه كثيره و لا يستخدم الا بوصفه طبيب
نروح لخانه علاج الاسهال
و هذا سهل
محلول الارواء الفموي و ممكن تشتريه كباودر و تحضره او سائل جاهز
و تنطي للطفل ١٠ سيسي لكل كيلو بعد كل خروج
مثلا وزنه ٦ كجم و صار اسهال ننطيه ٦٠ سيسي محلول
ال ٦٠ سيسي يعادل رقمين بالمميه
ممكن استخدام أكياس اوبيتباك الزرقاء للاسهال مرتين يوميا لحين توقف الاسهال
القيء
علاجه سهل مع شراب نوفومت العراقي
و الجرعه هي من ٨ إلى ١٥ كجم ننطي الطفل 2.5 سيسي
اكثر من 15 ننطي الطفل 5 سيسي
مصادر أخرى تكول هي 5 سيسي قطعي لكل الاطفال و هي فعلا جرعه جيده و فعاله
و مره وحده
ما فاد نراجع طبيب
قطرات المغص مثل الكولك ايز و الدسفلاتيل و الانتي كاز مكتوبه الجرعه مالتها بالنشره المرفقه و هي ادويه امينه نوعا ما و ماكو اي داعي للخوف منها او تقليل استخدامها لان تخافين منها لان هي امينه
قطره اوبتيباك البروبايوتك الجميل لحالات المغص لعمر اقل من ٣ سنوات تكفي شهر و تستخدم من اول يوم عادي
امينه و خاليه من الاعراض الجانبيه و تستخدم بجرعه ٨ قطرات مره باليوم
قطرات كوليف المستخدمه للمغص كذلك هي 4 قطرات ويه كم قطره من حليبك وراها كملي رضعي طبيعي او 4 قطرات مع كل مميه و انطي المميه بعد نصف ساعه من وضع القطرات
ممكن خزن المميه بالثلاجه عادي ويه القطرات بس شرط ما تكون داخله لفم الطفل ( الخزن لمده ٢٤ ساعه مو اكثر )
الإمساك و كعلاج منزلي بس أوصيك بكل الفواكه المجففه اذا كان طفلك ياكل مثل الزبيب و المشمش و الكشمش و الخوخ و الالو و البقوليات
و كعنصر علاجي تحميله كلسرين تكون خاليه من الاعراض الجانبيه
ممكن استخدام اوبتيباك أكياس الخضراء لحالات الإمساك شرط عبور عمر الطفل سنه
السعال استحاله وصف علاج للسعال دون فحص
بس كعلاج خفيف و بسيط يبرز العسل شرط عبور عمر الطفل السنه
اذا ما توفر العسل علاجات السعال اللي مصنوعه من العسل و جرعتها مكتوبه على الغلاف
تحسس القصبات او الربو
و العلاج هو فنتولين بخاخ يعطى نصف سيسي فنتولين مع ١.٥ سيسي مغذي مالح ( نورمال سلاين ) في جهاز البخاخ و يعطى للطفل
قطرات الماء و الملح امينه على الاطفال من اليوم الأول و ممكن اعطاؤها للطفل من اليوم الأول
و من أشهر هذه القطرات هي اوترفين بيبي او ابيسال
البخاخ الملحي كذلك امين للأطفال مثل الساينومارين
كريمات الحروق و اهمها الفلامازين اللي ممكن يوضع على الجسم عدا الوجه
كريمات الحفاظات مهمه و ضروريه و ابسطها مرهم الزنك اذا الطفح عنيد ممكن اضافه عصاره هايدروكوتزون 1 بالميه مرتان يوميا مع تغيير الحفاظه مستمرا و المحافظه على التهويه
ملطفات الجلد لحالات مثل جدري الماء او لسعات الحشرات ممكن استخدام كالامينا او كولد كريم او فقط ثلج باز کردن / نظر دهید

2023-06-16 00:23:06 20 شغله غريبه تصير اول ايام الرضاعه الطبيعيه !
1. بعض الالم ويه اول رضعات و اول ايام بعد الولاده
ألم الحلمه و تشققها من الامور اللي تحدث و تحدث كثيرا اول ايام الرضاعه الطبيعيه و مع الأسف الكثير من الأمهات يتركون الرضاعه الطبيعيه بسبب هذا الالم
الخلل يصير لعده أسباب منها سوء الالتقام و لان الطفل ما يعرف يرضع و الام ما تعرف كيف ترضع و بالأخص الطفل الاول
كل اللي عليك تشوفين فيديوهات الرضاعه الطبيعيه و تتعلمين من اليوتيوب شون تتم العمليه
اعرف راح تكولين هي سهله شيرادلها بس صدكيني هي صعبه
و اكو اختصاص كامل اسمه مدرب الرضاعه الطبيعيه
حضرت بيه ندوات و دورات مكثفه بيه
2. طفلك راح يرضع هوايه بأول ايام بعد الولاده
بحيث تحسين بالتعب هلكد يرضع
و اكيد راح تسمعين تعليقات مثل هذا جوعان انطيه مميه
بس هو بالحقيقه هو دا يكبر بسرعه لذلك يحتاج حليب اكثر
الموضوع راح يخف تدريجيا بعد اول اسبوعين
3. راح تحسين ببعض التقلصات الرحميه و انت ترضعين طبيعي
الهرمون اللي يخلي الحليب يتدفق هو نفسه الهرمون اللي يخلي الرحم يتقلص !
4. بعض الحليب راح ينزل من تلقاء نفسه بمجرد تفكيرك بأن طفلك جوعان او تسمعين بكاءه حتى لو انت ما ترضعيه
5. انت تحرقين 500 كالوري يوميا و انت ترضعين طبيعي
لذلك راح تجوعين و تحتاجين اكل
و اذا وزنك زايد
بريجيم بسيط تنزلين الوزن
بس مو هسه وكت الريجيم حبابه
خل نوصل للسنه و سوي ريجيم
6. راح تبقين تتشهين بعض الاكلات
هذا شي طبيعي
و حاولي تكون الخيارات صحيه
7. اول ما طفلك يبدي يرضع راح تحسين بعطش شديد مفاجيء و كأنما كنت بالصحراء لذلك خلي كوب الماء ملازم الك
8. الدوره الشهريه لن تكون منتظمه
بس هذا ما معناه ابدا انه ما راح يصير حمل
فاخذي سبيل الوقايه لان يا عيني نريدك ترضعين الصغير سنه وراها عود خل يصير حمل بلا ما تدرين
9. الرضاعه الطبيعيه سوف تجعلك تشعرين بالنعاس
و السبب هرمون البرولاكتين اللي يحفز إنتاج الحليب ينعس
10. اذا امتنع طفلك عن الرضاعه راح تحسين بألم شديد مع احساس ان الثدي كالحجاره و تحسين براحه تامه من طفلك يرضع
هذا شي طبيعي
11. من ترضعين من جهه ممكن الحليب ينزل من الجهه الاخرى
12. أحيانا و بالحقيقه نادرا بعض الأمهات يصير عدهم بعض الالم من ينزل الحليب
المزعج بالموضوع ان هذا الالم سيستمر لحين الفطام
13. مع تقادم الرضاعه الطبيعيه و خبرتك راح تعرفين اي جهه بيها حليب اكثر
14. ممكن راح تحبين الرضاعه الطبيعيه و تستمرين بيها لغايه ما يصير عمر الطفل 3 سنوات و اكثر
15. بعض الاطفال مو بس يرضعون لان جوعانين
بس يرضعون لان يردون يحسون بالراحه او لان عدهم مغص
16. الكثير من الاطفال ينامون و هم يرضعون طبيعي
و هو شي طبيعي و ما يقلق
17. الاطفال اللي يرضعون طبيعي يجوعون اكثر و يردون رضاعه بين فترات قريبه
18. خروج الاطفال اللي يرضعون طبيعي متكرر اول ايام بعد الولاده و يوصل أحيانا إلى 12 مره باليوم بأول اسبوعين و بعدين يبدي يقل
19. و لان الخروج متكرر فراح يصير عند الطفل طفح حفاظات فاختاري نوعيه حفاظات جيده و اختاري مرهم ويه كل تغيير حفاظ
20. اخيرا ماكو احسن من حليبك و لا يتقارن بيه اي حليب طبيعي و لا يشبهه و لا يتقرب منه
لان ماكو حليب بيه خلايا حيه تدافع عن طفلك بكل حليب العلب
د. سيف سمير البياتي اخصائي طب الاطفال باز کردن / نظر دهید

2023-06-12 20:05:11 تعليم الطفل على تنويم نفسه بنفسه
اللي يسمى
#self_soothe
اسهل طريقة و افضل طريقه هي التاخر بالاستجابه للطفل اول ما يكعد من النوم
يعني اعوفه يبجي ؟
لا طبعا مو هيجي الموضوع
ممكن اول اشهر من الواقعي و من المنطقي انه تستجيب للطفل اول ما يصدر صوت او يبجي
بس بعد مرور الاشهر الاولى راح تعرفين و تتعلمين انه مو اول ما يصدر صوت او يبجي تروحيله و تكعديه و تزعجيه
تعلمي اولا انه تراقبين
ممكن مجرد صحوه بسيطه و راح يرجع ينام وراها
اذا تكدرين تعلمي كيف تستجيبين للطفل بالصوت يعني تجاوبيه و تسويله اششش
او مجرد طبطبه
و نجي للمزيد من الطرق :
١. استخدمي اللعبات و اللعابات اللي قريبه من طفلك
دائما خلي لعبه او ٢ قريبه من طفلك اول ما يبدي يريدك او يصحى من النوم او يبدي يبجي راسا انطيه اللعابه حتى يفرح بيها و ينساك
٢. ابدا لا تركضين من اول صوت من ينام
راقبي من بعيد
انطيه فرصه يرجع نفسه للنوم
٣. انت متعوده طفلك ينام بين ذراعك و تردين تعلميه ينام وحده
هذة الموضوع صعب شويه
خليه بفراشه المتحرك يوميه شويه قبل وكت النومه و هزيه بفراشه
كل كم يوم دقيقه
لما يتعلم ينام وحده
٤. اللعبه او البطانيه
اللي اسمها ال lovey
و منزل بوست عنها كامل و عن اختيارها
#lovey
احسن طريقه تخلي طفلك ينام مرتاح
٥. لا تلتزمين بالكماط
هوايه من الامهات تكمط بعد شهرين
بس هو علميا و عمليا ماكو اي داعي للكماط بعد شهرين
الكماط يمنع الطفل يخلي ايده بحلكه و بالتالي يتعلم على النوم لوحده

اكو طرق أخرى تخلي الطفل ينوم نفسه بنفسه بس اكثرها شيوعا هي
مص الاصبع
الملهيه
يمسك الطفل بايديه الاثنين و يخليهم على بطنه
⚘فرك العينين
حضن البطانيه او الشرشف او الفراش
يناغي مع نفسه او مجرد يصدر اصوات مثل هممممم
يفرك شعره
ياخذ لعبه صغيره و يخليها بين ايديه
.
.
شوكت يبدي يتعلم الطفل على تنويم نفسه بنفسه ؟
ماكو عمر معين ابدا
بس اكيد يفضل باول ٦ اشهر من العمر
قسم من الاهل يكولون علمنا ينام نفسه بنفسه من ٤ اشهر
قسم اخر فشلوا الى عمر ٩ اشهر
لذلك ماكو عمر معين
.
.
شنو فوائد انه الطفل يتعلم ينوم نفسه بنفسه ؟
١. راح يمر بالمرحله العميقه للنوم مبكرا و بالتالي راح يطول بالنوم اكثر
٢. هذا جزء من التطور الطبيعي لازم تحرص على تكوينه حاله حال المشي و الجلوس و غيرها
٣. الدراسات تكول انه ذوله الاطفال من يكبرون يكونون اهدء و عرضه بشكل اقل لنوبات المزاج
٤. كلما طفلك اهدا
كلما انت اهدا
و بالتالي تربيه اسهل
د. سيف سمير البياتي اخصائي طب الاطفال باز کردن / نظر دهید