إستشارة طبية

2023-05-15 22:51:28 الزميل د.ازهر اخصائي الاشعة والسونار يتحدث عن حالة زارته /

من الاستشارية الصباحية
اجت مريضة وياها ٣ بنات حلوات اعمارهم بين ٣الى ٧ سنوات
المريضة: السلام عليكم دكتور وتبجي
اني :عليكم السلام ليش تبجين خير
المريضة:دكتور اني حامل وعندي ٣ بنات وزوجي راح يتزوج عليه لان خلفتي بنات.

الى متى تبقى النساء هي المسؤولة بنظر بعض الرجال عن تحديد الجنس؟
وطبعا هذا خلاف العلم ،هو الرجل المسؤول.
وعلى عناده طلع عدها ولد ومخلي رجل على رجل هم
دهاك يلا
#البنات_المؤنسات_الغاليات باز کردن / نظر دهید

2023-05-14 22:40:48 و خلينا الطفل على الشمعه مال بيت و ما نزل ابو صفار !
او مدا ننام ٢٤ ساعه فاتحين الضوء حتى ينزل ابو صفار !
ابو صفار قديما كان يتعالج فقط بتبديل الدم
إلى أن اكتشفت جين وورد ان ضوء الشمس تقلل ابو صفار !
جين وورد ما كانت تحب الحضانات و تؤمن بإن الاطفال لازم يتعرضون للشمس فكانت تاخذ الاطفال تشمسهم
و يوم من الايام لاحظ طبيب انه جزء من الطفل راجع طبيعي و جزء اخر باقي بيه ابو صفار اللي هو الجزء اللي ما تعرض للشمس
لما سئل جين وورد كالتله انه كانت تشمس الطفل عدا هذا الجزء
بعد فتره كان اكو طفل داخل مستشفى بابو صفار و أخذوا عينه من الدم منه و نسوها بالشمس و من سووا تحليل لكوه اقل من المتوقع !!!!
الطبيب اللي سحب العينه هو نفسه الطبيب اللي لاحظ انه الطفل المتشمس من قبل جين وورد قل ابو صفار عنده !!
هذا الاختراع قاد لاكتشاف انه جزيئات ابو صفار تتحلل عند تعرضها لطول موجي معين
و بعد 10 سنوات صار هو هذا العلاج الرئيسي و لكوا انه الضوء الأزرق اللي طوله الموجي بين 460 إلى 490 هو اللي يكسر جزيئات ابو صفار و يحولها إلى جزيئات غير مضره تطرح عن طريق الادرار
المؤسف بالموضوع انه هذا الطول الموجي اللي يكسر جزيئات ابو صفار ما موجود باي شمعه نيون او ضوء بالبيت و مجرد تضيع الوقت اللازم للحصول على العلاج و تقلق نوم الطفل و الأم
بالمختصر علاج ابو صفار العلمي
اما خفيف في اغلب الحالات و ما يحتاج علاج
او شديد قد يحتاج علاج ضوئي او تبديل الدم
الباقي كله خرافات مجرد تؤخر الطفل للحصول على العلاج مثل ما صار بهوايه اطفال تأخروا على العلاج الضروري بسبب ايمانهم بالشمعه او بالثوم او بكاسه اللبن او محبس الأم أو أو أو أو و غيرها من الخرافات المؤذيه
دمتم بود
د. سيف سمير البياتي اخصائي طب الاطفال باز کردن / نظر دهید

2023-05-11 23:10:59 ابني يضرب راسه بالحايط من يزعل !
بنتي تسحل روحها بالكاع اذا ما اشتريتلها بيبسي !
ابني يضرب اي شي بالكاع و يكسر كل شي اذا ما انطينا اللي يريده !!
تعرفون هذه شنو اسمها
هذه اسمها " نوبات الغضب "
و هذا راح يبدي من عمر سنه و يستمر لغايه 5 سنوات
ممكن مره بالشهر ممكن مرتين باليوم
نوبات يزرق و يغمى عليه من العصبيه و العياط
و الاب يكول حبيبي صدقه عصبي على جده او على عمه او على خال الطفل و غيرها من التفسيرات الغير منطقيه
الموضوع فكر بيه و اطلع من البوست بهذه الجمله ( طفلك هيجي يسوي حتى يلفت انتباهك في اغلب الحالات )
بس احيانا يسويه لان جوعان او عطشان او ما يعرف يعبر عن نفسه لان ما يتكلم او ما يعرف يسوي الشغله لوحده
زين شنو اسوي ؟
1. اول شي اعرف ليش صارت النوبه ( مجرد جذب انتباه / جوعان / ما يعرف يعبر عن نفسه )
2. اهم شي يفرق ويه الطفل هو شون راح تتجاوب ويه الطفل
3. احفظ هذه النقطه جيدا
اعطاء الطفل ما يريد راح يخلي النوبات تستمر الى عمر 5 سنوات
4. مبدا ضرب الطفل راح يخليه يعيدها
مبدا الصراخ على الطفل راح يخليه يعيدها
5. تجاهل الطفل تماما هو الحل
بس مو دقيقه او دقيقتين لازم تتعلمين على الصبر
6. نعيد نقطه ٣ اعطاء الطفل اللي يريده راح يعزز عنده هذا السلوك
7. ممكن الهاء الطفل بلعبه او كره او نكته او ضحكه
8. انطيه الخيارات حتى لا تصير مثلا تلبس القميص الاحمر او الاخضر
9. جرب عباره ( اذا ما تنصي صوتك اني ما اسمعك )
10. بلا حركات الاستفزاز للاطفال يعني تنطيه الريمونت و هو يشمره و انت تعرفين راح يشمره و تنطيه الريمونت !!!
11. احجي وياه و افهمي منه شنو يريد
12. الجوع محفز لهذه النوبات فلا تخليه جوعان
13. من يهدا فهميه انه استخدام هذا الاسلوب بالعياط او التصرفات ما راح يفيد بشيء
14. حاولي قدر الامكان تمنعين تدخل الاخر في حال عاقبتي طفلك ( العقاب يبدا بعد عمر سنتين )
15. مبدا خطيه انطيه اللي يريده هو مبدا التكاسل اللي راح ينتج عنه طفل مدلل غير راضي عن اي شيء و كل شيء
دمتم بود
د. سيف سمير البياتي اخصائي طب الاطفال باز کردن / نظر دهید

2023-05-11 10:09:04 انا طفل صغير عمري شهر
اريد اشتيكلكم من فد شي و احجي الكم شويه
و يا ريت تسمعوني
انا جيت بعد ٩ اشهر من الحمل و ما احجيلكم ع الراحه اللي كنت بيها
متمدد و كاعد و كلشي ما اسوي
حتى ما اكل و لا اشرب
الاكل يجيني عن طريق الحبل السري
و الفضلات هم تروح عن طريقة
لحد ما نزلت و جيت ع الدنيا و راسا كطعوا الحبل السري
شويه بجيت
وبديت اخذ نفس وحدي و اعتمد على نفسي شويه
حسيت باحساس غريب
بس اوكي ماشيه الامور
بديت اخذ رضاعة كل شويه و ماشيه الامور
الى ان رحت للبيت
لفوني بوصله فوكاها وصله فوكاها بطانية و دخلوني غرفة حارة عينن فرن صمون
و بديت ابجي من الحر
ابجي
ابجي
امي كامت تنطيني رضاعه اكثر
و اني اصلا معدتي صغيرة
و بطني تنفخ اكثر و ابجي
و امي ترضعني اكثر
و اني ابجي اكثر
كمت اسمعهم يكولون اهووو شو مزعج هذا
امي اني مو مزعج اني حران او ممتلي من الغازات و كثر الرضاعه بس ما اعرف احجي
انت دا تزيدين الامور
المهم اكملكم
ثاني يوم جتي حبوبتي فكست عيوني بالكحل
زين حجيه الكحل ليش ؟
الكحل بيه رصاص
الكحل كله وصخ و عيوني التهبت
و هم تاذيت و بجيت
و هم كالوا اهووو بس يبجي
تره صوجكم انتوا مو صوجي
اليوم الثالث يا عيوني صار بيه ابو صفار
ودوني طبيب فحصني
كال عادي بس رضاعه ما يحتاج شي
و هم رجعنا للبيت
الحبوبه ام الكحله هم جابت ٧ فصوص ثوم خلتها عليه
ما احجيلكم ع الريحه لعبت نفسي
و نفس امي و ابويه و عشيرتي
بس ما بيهم يحجون لان حبوبتي تزعل
و هم اني شسويت ظليت ابجي
ابويه الله يهديه جاب شمعه نيون حتى يروح ابو صفار
و خرب الساعه البايلوجيه مالتي
لا اعرف انام لا ليل و لا نهار
و ما اعرف ياهو الليل و ياهو النهار
وراها عادي نزل ابو صفار وحده
و لا الثوم و لا الشمعه نزلوا ابو صفار و لا الهم اي دخل بالسالفه يعني
هنا لازم اوصل رسالة لامي
تره سهل موضوع انه ما ابجي
مجرد انطيني الرضاعه لما اجوع
و اعرفي شوكت اجوع
مو كلما ابجي تنطيني رضعه
ما يجوز اني حران متضايق او مجرد اريدك بقربي
و كلش احب تمشين بيه و تعرضيني لجو لطيف معتدل
لليوم السابع و ما وكعت سرتي
شسسواا
عذبوني حرفيا
باريستول و اموكسيل خلوها على السرة و كل انواع الخرافات طبقوها
لحظه بس افهمكم
السره عادي ما توكع لغايه ٤٥ يوم
و ما تحتاج بس تنترك بدون ما يوصلها ماء و خارج الحفاظه و الافضل معرضه للهواء و هي توكع
خرافات الباريستول و الاموكسيل احتفظوا بيها لنفسكم
المهم بالاسبوعين وكعت السرة
برزت السره شويه
وصار فتق سرة عادي
يصير عند ٤٠% من الاطفال
شجابوا؟
اي جابوا حزام ضيق
دمرني
لا خلاني ارضع
و لا خلاني اتحرك
و هم بجيت
و هم كالوا ليش تبجي !!!
يا يابه ابجي من الفرح غير من ظيمكم
المهم
ودوني طبيب الطبيب كال يابه لا تلبسوه حزام هو وحده يروح عادي اتركوه
المهم دا اكبر و انمو على حليب امي و بجيت مره او ٢
راسا ام امي حتى تغث ابويه كالت ليش ما تنطوه حليب مساعد حتى من تطلعون او تطبون يتعلم يرضع
على اساس مكطعيها للطلعات
مو هن ٣ او ٤ مولات حتى حفظتهن و اني ببطن امي
و بما انه اني افضل الرضاعه الطبيعيه لان اسهل و تقربني من امي
حليب البقرة شجابه بالنص و ليش
المهم ابويه جاب حليب غالي و انزرف جيبه
بس عادي اني ما حبيت الحليب و ظليت اتقيا
و غيروا النوعيه و نفس الشي سويت
و ودوني لطبيب
كاللهم و عليش خليه على حليب امه و انتهى الموضوع
حليب البقرة شنو بيه
اكيد عرفتوه لهذا الطبيب
و بس
هذه معاناتي ببساطه
اتمنى توصلوها لكل الامهات
د. سيف سمير البياتي
اخصائي طب الاطفال باز کردن / نظر دهید

2023-05-10 19:58:34 باز کردن / نظر دهید

2023-05-10 19:58:22 أكثر مكان امين لنوم الطفل هو سرير منفصل
و النومه على الظهر
الفراش خالي من الوساده و بدون غطاء الراس
للحمايه من متلازمه موت المهد ( مثل الصوره)
نص اللي توفوا بهذه المتلازمه كانوا لابسين غطاء راس
بدون بطانيه اذا تكدرين تتحكمين بجو الغرفه اول سنه
و اذا الجو بارد فالكماط كافي
او وضع الطفل بكيس النوم ( الصوره الثالثه )
او تغطيته مثل الصوره الرابعه انه البطانيه مغطيه نص الطفل و مضبوبه جيدا
بنفس غرفه الام و الاب اول ٦ اشهر على الأقل
و الأفضل اول سنه
مع جو معتدل بين ٢٠ إلى ٢٤ درجه
الفراش اللي تحت الطفل مضغوط و ما ممكن يغوص بيه الطفل( الصوره الثانيه)
اعرف انه احيانا الام تنام و طفلها بحضنها بس لازم قبل ما تنام تاخذ حذرها
انه هي اولا نايمه بغرفتها
ماكو بطانيه قريب انف الطفل
ماكو العاب قطنيه و الفراش مضبوب و مضغوط جيدا
ارجع و اكول احسن مكان لنوم الطفل هو سريره الخاص مثل الصوره
تمنياتي الكم و لاطفالكم بالسلامه
د. سيف سمير البياتي
اخصائي طب الأطفال

####

معلومات طبيه عن كثير من الأمراض

https://t.me/doctoristishara1 باز کردن / نظر دهید

2023-05-09 20:26:14 اليوم اجاني طفل عمره 11 ساعه بالمضبوط مصخن !
الحراره بهيجي اعمار خطره
فاكيد السؤال يكون وين ضاميه للطفل؟
جده الطفل: اوو دكتور متنا من الحر اني و امه سدينا البانكه و طفينا المبرده مال الصاله و احنا بعيدين بالغرفه !
ليش هيجي سويتوا؟
و الله دكتور اني ادري غلط بس امي هيجي كالت ( ام الجده )
المهم فتحت الاغطيه حرارته 38 درجه
بعد ربع ساعه قسنا حرارته 36.9 درجه
و هم ما اطمئنيت
دزينا تحاليل و راقبنا رضاعته و الحمد لله الامور بالسليم
نؤكد على موضوع ( حمى الجفاف )
المولود الجديد من يتعرض للحر الشديد يجف و من يجف ترتفع حرارته و من ترتفع حرارته يجف اكثر و يزيد السوء سوء
حمى الجفاف حقيقيه
د. سيف سمير البياتي اخصائي طب الاطفال
ملاحظه: ام جده الطفل صاحبه النصيحه نايمه بغرفتها ع السبلت

$$$$

معلومات طبيه عن كثير من الأمراض

https://t.me/doctoristishara1 باز کردن / نظر دهید

2023-05-08 13:58:24 21 نصيحه حتى تحفز شهيه الاطفال
١. احرص على وجبه الفطور و دائما خليها تكون صنع في المنزل مو اكل جاهز و بسكت و كيك جاهز
لا
بيض او جبن مع قطعه خبز و حليب مثلا
٢. انطي مي قبل الوجبه ب ٣٠ دقيقه
مو تنطي حليب و عصير !
٣. الاكل كل ساعتين الى ٣ ساعات
بس وجبات صغيره
خصوصا مرضانا اللي عدهم سكر
٤. اكل بين الوجبات صحي لازم مثل الوجبات
Happy meal
اللي هي فواكه و خضراوات تعزز جدا من شهيه الاطفال للغداء
٥. زبده الفستق خليها جزء من فطور الطفل او وجباته الصغيره
طبعا مسحه صغيره منها تعزز النمو و الوزن
٦. لا تعتبر الحليب وجبه ابدا
الحليب مو وجبه
الوجبه مو حليب
الحليب ما يعتبر وجبه
ماكو مبدا هو او هي ما اكلوا يلا تعال هاك حليب
الحليب مو وجبه

٧. قدم الاكل اللي يحبه بالصيغه اللي يحبها
قسم يحبون الاكل مقرمش قدم الاكل مقرمش
قسم يحبوه يكون شويه هلامي القوام قدمه هلامي القوام
٨. قدم الاكل بطريقه فنانه و ممتعه و ملونه
٩. قدم الاكل بطريقة القضمات الصغيره
يعني كميه صغيره من كل شيء
ماكو مانع انه ننطي الطفل اكثر اذا حب
١٠. اللبن هو صديق المعده
اللبن ممكن ننطي وياه فواكه ما يحبها
و اللبن وحده اصلا يعزز المناعه لان بيه بكتريا نافعه
ما حب اللبن عادي لا تدك و تلطم
١١. لا تنطي الطفل اكل بطعم لاذع قوي مثل الفلفل الحار او حتى مكان الاكل لا يكون بيه روائح قويه ممكن تسد نفس الطفل
١٢. ضيف بعض المنكهات مثل الكمون و الحلبه و اكو انواع كثيره للبهارات الحلوه للمذاق و اللي تزيد شهيه الطفل
اكيد لا تبالغ
القليل يكفي
١٣. بلا اضافه الكثير من الزيت و الدهن للاكل
كلما اقل كلما احسن
١٤. تاكد من انه طفلك يلعب يوميا و يتحرك
مو مكابل الايباد او التلفون او التلفزيون و تكول ما ياكل
طبعا ما ياكل اذا ما يتحرك
١٥. خلي الاكل بمكان مفتوح و بارد
كلما المطبخ حار راح ياكل الطفل اقل
١٦. لا تناقش امور مزعجه للطفل اثناء الطعام
مثلا ها عندك واجب !!
او من تكمل غداء يلا واجب
خصوصا اذا يكره الواجب
راح يكره الاكل و الواجب و يكرهك كذلك
لا تحجي بالاكل كذلك
احجي مواضيع لطيفه مثلا راح نروح للزوراء او تتذكر من رحنا للجزيره و راح تتفاجيء انه المواعين انمسحن
١٧. الزنك جدا يعزز الشهيه
الزنك متوفر بالكازو و الخبز الاسمر و البيض
عزز محتوى الزنك طبيعيا
لا ننسى انه كثر الزنك يسوي قيء فلا تاخذ زنك بكيفك
١٨. دائما الاكل نريده اكل بيت
الوجبات الجاهزه ما نعرف شكد بيها محتوى سكري
١٩. التحليه لازم تكون صحيه
فواكه مثلا
٢٠. البروبايوتك عالم جميل
ممكن فقدان الشهيه و الانتقائيه تتحسن لو بس ضفت بروبايوتك للغذاء اليومي لطفلك
٢١ . اخيرا لا تجبر لا تجبر لا تجبر
كرهوا الاكل و كرهوا المجتمع من وره جبركم
اللي كاعد تسووه خطا
و راح يوديهم لفشل النمو قريبا
و لمشاكل نفسيه لاحقا
د. سيف سمير البياتي
اخصائي طب الاطفال باز کردن / نظر دهید

2023-05-07 20:26:23 يااا
خطيه!!
عنده بس بنات!!

يا ... هم حامل ببنيه ! يلا ميخالف !!

البنات.. المؤنسات الغاليات

قبل فترة نزل فلم كارتون مولان ..
يحجي بي رسائل كلش حلوة..

خلاصتها...

اكثر شخص مستعد يخاطر بروحه، ويسوي شي فوق العادي هو بنتك من تحبك

بنتك ، حتتحمل الي يخطر على البال والي مايخطر على الخاطر

عدها قوة تفوق قوة الرجل، في التحمل والتضحيه .. علمود الي تحبهم ..
ابوها، اخوها، زوجها، ابنها

اي، مستعده تشيل السيف وتقاتل، حرفيا ومجازيا
مستعدة تتخلى عن انوثتها وجمالها خاطر تحمي الي تحبهم
البنت قويه وكلش قويه، وقوتها بعاطفتها

البنية وظيفتها وظيفة عظيمة،

ورب العالمين خلقها بعد ما خلق ابونا ادم، حتى يبقى يتذكر حياته شلون جانت بدونها (كلها عباره عن وحشه)

الجاهليه الاولى هم الي زرعوا افكار التخلف والرجعية،
وللاسف لليوم اكو بعدهم بعقليه الجاهليه ..

قال رسول الله صلى الله عليه وسلم: (من كانت له أنثى فلم يئدها ولم يهنها ولم يؤثر ولده عليها أدخله الله الجنة)
يعني مجرد يكون عندك بنت، وتربيها تربية زينة، ومتقهرها ولا تميز بينها وين اخوها ولا تاذيها، رب العالمين يجازيك بالجنة

قال رسول الله صلى الله عليه وسلم:
( لا تُكْرِهُوا الْبَنَاتِ فَإِنَّهُنَّ الْمُؤْنِسَاتُ الْغَالِيَاتُ)
تكرهوا: يعني تجبروهم على شي مايردوه

وقد روي أَنَّ رَسُولَ اللَّهِ صَلَّى اللَّهُ عَلَيْهِ وَسَلَّمَ خَرَجَ يُصَلِّي وَقَدْ حَمَلَ عَلَى عُنُقِهِ أَوْ عَاتِقِهِ أُمَامَةَ بِنْتَ زَيْنَبَ فَإِذَا رَكَعَ وَضَعَهَا وَإِذَا قَامَ حَمَلَهَا.

يعني النبي ديصلي وهو شايل امامه، ومن يركع يخليها بالكاع ومن يرجع يصلي يشيلها

هاي الامثلة الي لازم نحتذي بيها بتربيه بناتنا ... .

والنبي صلى الله عليه وسلم لم يكن له إلا بنات
ولم ينقص من ذلك من شأنة شئ صلى الله عليه وسلم

د.اسماء البدري باز کردن / نظر دهید

2023-05-06 21:46:29 ⁦ ⁩الخطوة الخامسة :
العامل المساعد لادرار الحليب هو الاكل او الاعشاب الي تساعد على تحفيز تكوين الحليب
⁦ ⁩العامل الأساسي لادرار الحليب هو عمليه مص الطفل كلما طالت وكلما تكررت اكثر تحفز الانتاج اكثر
⁦ ⁩الاكل عامل مساعد حيساعدك لكن ضروري تخلين الطفل يرضع حتى لو كان كميه الحليب قليلة او شبه معدومه

زين شنو هذا الاكل؟
طبعا التنويع بكل الاكل الصحي والمفيد والتركيز على الاكل المساعد لادرار الحليب ويشمل :
١.الحلبة
٢.الحبه الحلوه (الشومر)
٣.الينسون
٤.الشوفان
٥.الجزر
٦.الراشي والسمسم
٧.الحلاوه الطحينيه (الي بيها راشي )
٨.التمر والدبس
٩. السبانغ والشوندر
١٠.وطبعا اكيد الماء ثم الماء ثم الماء.. والعصائر الطبيعية والشوربات
١١.المشمش
١٢.الشعير
١٣.الكمون
١٤.اوراق الريحان
١٥.اللوز
١٦.البطاطا الحلوه
١٧.الحمص
١٨.الدهون الصحيه والزيوت(زيت زيتون وزيت جوز الهند والافاكادو )
١٩.السلمون
٢٠.وهنا انصحكم بمنتج مختصر هواي اعشاب مما سبق ذكره ومسوي على شكل شاي
تابعي التعليقات اشرح اكثر عنه هناك

وتجنبي الاكل المثبط لإنتاج الحليب (يفيدج من تفطمي ) ويشمل:
١.الزعتر
٢.النعناع
٣.الكرفس
٤.الملفوف واوراق الملفوف( تستخدم الاوراق عند الفطام بوضع ورقه ملفوف داخل حمالة الصدر)

وانتهى

منشن الأمهات الي حابه تستفاد من المعلومات ومحتاجه ترضع الطفل

السؤال الازلي ليا عمر نكدر نسوي هالاشياء
اي عمر ممكن مدام هو ضمن فتره الرضاعه لكن افضل النتائج هي لاعمار جوه السنه وكلما اصغر كلما استفاد اكثر

الرضاعة الطبيعية كنز والكنز يحتاج حفر وتعب وتنقيب مو كلشي مرات نحصله بسهوله

د.اسماء البدري باز کردن / نظر دهید