إستشارة طبية

2023-05-06 21:46:28 وقفت الرضاعة الطبيعية لاسباب معينه وهسه اريد أرجعه اكو امل؟

هواي من المثبطين حيكولون
ليش تعذبي ميحتاج هاهيه تعود على الممه خلي مرتاح ..
او يطلعون بنظرية السم ويكلج
ميصير بعد يرجع يرضع حليبج صار سام ⁦ ⁩

والحقيقة لايصير سام ولا شي بالعكس
كلما رجعتي حاولتي ترضعي حتحصلين فوائد اعلى من التعب

الابحاث كانت ولازلت تؤكد ان الرضاعة الطبيعية تؤثر بشكل مباشر على صحه الطفل الرضيع لطول عمره مو فقط وهو صغير واهم هاي التاثيرات هو تزويد الطفل :
بالدهون المهمه جدا لذكاءة ونموه العصبي
والاجسام المناعيه
والبروبايتك
والبروبايتك نقصها حاليا يرجعوه لهواي امراض ف الرضاعة الطبيعية اول مصدر تزودين طفللك بي حتى تطورين من صحه امعائة

ندخل بالشرح العملي مباشره :

قد يستغرق الموضوع اسبوع⁦ ⁩ أو قد يأخذ اشهر..

⁦ ⁩الخطوة الأولى : ملامسه skin to skin (ملامسة الجلد للجلد) يعني تنزعين الملابس الفوك والطفل تبقي بالحفوظة وتحطي على جسمج يم گلبج..

هالشي جدا جدا مفيد من هواي جوانب :
١.يحفز ادرار الحليب بصدر الام حيث تعمل الملامسه على رفع هرمون الحب⁦ ⁩ (الاوكسيتويسين) وهو ايضا مسؤول عن ادرار الحليب..
٢.شعور الطفل بالحب والحنان وبقربه من دقات قلب امه
٣.تنظيم حراره جسم الطفل ⁦ ⁩
٤. الشعور بالراحه والسكينه للام
٥. يزيد من ترابط الام بالطفل⁦ ⁩ ( يعني الموده والحب مو تكولون لاااا بعدين يلزك بيها ويتعلق )
٦. ينقل البكتيريا النافعة من جلد الام وبالتالي تحسن المناعة
٧. مهدئ للطفل ومقلل للبكاء ومسكن طبيعي للالم.

هاي الخطوه اتمنى كل الامهات تسويها حته الي ترضع بس صناعي .. لاتحرمين الطفل من هاي الفوائد ..

وكلش انصح تستخدمين شيالة كوكو لتطبيق هذا الشي لان المدة لازم طويلة والشيالة تفيدج تتحركين براحتج اضافه الى انه طريقة استخدامها ماتخلي حاجز بينك وين الطفل مثل الانواع الاخرى الي تصير مثل حقيبه حعتزل الطفل عن جلدك

المهم نرجع لموضوعنا ..
⁦ ⁩شكد يبقى الطفل هيج ؟
⁦ ⁩٤٥ دقيقه..⁦ ⁩ فما فوق
اقل من هالمده ما ينطي المفعول المطلوب

⁦ ⁩زين شوكت اسويها؟
⁦ ⁩وقت الطفل شبعان ونظيف ومرتاح ميهم سواء ليل أو نهار

هاي الخطوه تستمرين عليها اسبوع⁦ ⁩ أو اقل حسب كل طفل..
بعض الأطفال سبحان الله مجرد يصير بهيج وضع تلقائيا يكوم يدور على الصدر..
واكو يطول يلا..

⁦ ⁩الخطوة الثانية :
انطي الرضعة المعتادة بس قللي شوي منها أو قبل ميكملها شيلي وحطي على صدرج..

ومره على مره قللي الحليب وطولي مده بقاءه على صدرج

ليش نسوي هيج؟
لان اصلا الحليب عندج قل، وبالتالي مرح يشبعه لو حطتي مباشرة .. لكن بهاي الطريقة رح يتحفز الصدر بالتدريج..

⁦ ⁩زين ليش ما أحطه راسا على صدري؟
⁦ ⁩غالبا رح يرفض لان الطفل من يكون جوعان ومتعود على طريقه سريعه ميتحمل يكعد يبذل جهد ويرضع ..

زين لعد خوب اجوعه .. ورح ينجبر على صدري
هاي الطريقة ما احبذها لان هالشي رح يصير غصب والطفل يكره الغصب ويكره الشي الي انغصب عليه حاله حال الكبار .. واحنا منريده يكره صدر امه.

⁦ ⁩الخطوة الثالثة :
طبعا يفضل استخدام الشفط (المضخه الإلكترونية أو التفريغ اليدوي، ولا انصح بالأداة التي تحتوي على جزء سيليكون مثل الكره)
(اي وقت وشكد متكدرين مده) حته يزيد انتاج الحليب الي بصدرج ..
بس مو شرط هالخطوه.. ممكن الزيادة بالتدريج بأن كل مره يرضع الطفل أكثر رح يزيد الحليب.

⁦ ⁩الخطوة الرابعة :اذا منجحت الخطوه السابقه (الثانيه) وبقى الطفل يرفض يرضع مباشر نستخدم جهاز nursing system (NS)

⁦ ⁩شنو هذا الجهاز؟
⁦ ⁩جهاز بسيط متكون من :
١.قنينه أو وعاء
٢.صونده رفيعه ( مثل مال مغذي)
٣. شريط لاصق

وين الكاه؟
حسب علمي غير متوفر بالعراق (موجود بامازون) .. لكن تكدرين انتي تسوي لان بسيط..

⁦ ⁩زين شلون يستخدم؟
⁦ ⁩نحط بداخل الوعاء (سواء علبه عاديه او ملعقه سيريلاك أو ممه او كلاص) الحليب الي اعتاد الطفل يشربه ونحط بداخله الصونده ونثبتها باي طريقة ونخليهم بمستوى أعلى من مستوى صدر الام ..
ونلزك طرف الصونده بصدر الام (بحيث حللك الصونده يصير وي الحلمه)
واللصق يصير بالجانب حته لايأذي لثه الطفل .

من يبدي يمص رح يطلع له راسا الحليب الي متعوده فحيتشجع ويبقى يمص وبالتالي حيتحفز الصدر اكثر واكثر ورح يرجع يربط مصدر الغذاء من صدر الام مو مو زجاجه...

نستمر فتره ونقلل الحليب الي بالقنينه بالتدريج إلى أن يصير بصدر الام كميه جيده من الحليب نستغني عن الجهاز
ونكون رجعنا الطفل لحضن امه ⁦ ⁩ باز کردن / نظر دهید

2023-05-04 19:18:53 شفت عدم معرفه كبيره بموضوع ثقب الاذن
و انه ثقبنا بعمر يوم و ما صار شي
او ثقبنا بالابره و ما صار شي
حبيت اوضح النظره الطبيه للموضوع حتى نزيل الغبار كما في كل المنشورات و هذا هو هدف الصفحه
التراجي و وضع التراجي
موضوع امين جدا اذا تم بايادي امينه و بتعقيم صحيح
افضل عمر ؟ ماكو افضل عمر بس كلما اكبر احسن حتى الطفله تعرف تداري الموضوع
بالابره لو بالجهاز؟ اكيد بالمعقم اكثر و هو الجهاز
بالبيت يم الجده لو يم ممرض ؟ اكيد يم ممرض
تحضيرات معينه؟ تمسح المنطقه بالكحول مرتين قبل الثقب
شنو اسوي بعد الثقب؟ اي مرهم مضاد حيوي لعده ايام حوالي اسبوع مرتين باليوم للمنطقه
شوكت تطيب ؟ العمليه تاخذ من ٦ الى ٨ اسابيع حتى تطيب
شنو اسوي خلال هاي ال ٦ الى ٨ اسابيع؟
احرصي يوميا انه تدورين الترجيه بالمكان
يحتاج اخلي تراجي طبيه لو راسا الذهب ؟
الذهب من المواد اللي نادرا ما تسوي حساسيه خصوصا العيار العالي مثل ٢١ لذلك اثقب و راسا خلي الذهب مو الا طبيه
اصغر عمر اكدر اخلي ؟
افضل بعد لقاح الشهرين باسبوعين حتى ياخذ لقاح الكزاز
اكو مخاطر بالثقب؟
طبعا الالتهاب ممكن و ممكن توكع و يبلعها الطفل بغياب الرقابه
شون اعرف صار التهاب ؟
المنطقه تصير حمره و كلش مؤذيه و هنا راسا نشيل الترجيه و نراجع الطبيب
توصيات اخرى؟
لا تغيرين الترجيه او تنزعيها الا بعد ٦ اسابيع
شو احنا خلينا بعمر يوم و ما صار شي ؟
الجمله اللي تشبه هو طلع بالسياره بس ما اندعم
او راح للحرب و ما انجرح
او الام اللي نطت سكوه و ابنها ما مات
هذا العلم هيجي يكول
تحياتي الكم
د. سيف سمير البياتي
اخصائي طب الأطفال
المصادر :
NHS موقع الصحه البريطاني
AAP الاكاديميه الامريكيه لطب الاطفال باز کردن / نظر دهید

2023-05-04 12:04:12 الحياة باول ٣ اشهر من دخول الطفل هي عبارة عن الم بعد الولادة على هرمونات مخربطه على اكتئاب بعد الحمل و مشاكل الرضاعة و تشقق الحلمه و اذا صناعي ها الحليب والمه ها الحليب ما والمه وراها يبدي يبجي بسبب او بدون سبب
و لذلك عليك ب:
١. نامي باي وقت يسمحلك بالنوم
حتى اذا مو نوم بس راحة
٢. اخذي حمام باي وقت يصير عندك مجال لان هذا يعتبر دلال و رفاهية
٣. اكلي مجمد و اطبخي مره او مرتين بالاسبوع وين بيك حيل و عندك وقت
عادي اكلي دلفري
٤. تعودي على منظر التراب بالبيت لا يهمك الموضوع كلش
و اذا كلش كثر التراب ارسمي قلب على التراب اصلا عادي
.
.
المهم هو طفلك و نفسك
د. سيف سمير البياتي اخصائي طب الاطفال باز کردن / نظر دهید

2023-05-03 20:43:51 من افضل الخيارات لعلاج الاسهال هو ماء الرز
و يفضل الرز الابيض
يعني اي رز موجود
الطريقة سهله
كوب رز مقابل ٦ اكواب ماء
و خليها تفور على النار دون اي ملح
وره ١٥ دقيقه راح يصير عندك محلول عكر
هذا المحلول تكدر تصفيه و تاخذ الماء او مجرد تصفيه و تنطيه للطفل
ممكن جدا اعطاؤه من عمر ٤ اشهر ( ١٢٠ يوم ) لعلاج الاسهال
#brat
مو بس هاي ماء الرز مريح للمعدة و يقلل القيء
في حين ان الحليب و السكر و البرتقال و المشروبات الغازيه و العصير جدا يزيدن من حده الاسهال
دائما تذكروا برات Brat اللي هي اغذيه الاسهال
BRAT
Banana موز
RICE رز
APPLE تفاح
Toast التوست الابيض
د. سيف سمير البياتي
اخصائي طب الاطفال باز کردن / نظر دهید

2023-05-03 00:34:41 انا طفل صغير عمري ٣ سنوات
اريد احجي رسالتي بصورة مطوله فتحملوني
بعد السنه بدا وزني ما يصعد هوايه
و بقيت ثابت على ال ١٤ كيلو شهر و ٢ و ٣
اللي صار حرفيا هو العذاب بحد ذاته
ما خلت امي تحليل ما سوته
كلشي يعني كلشي
بس امي لحظه
اني بعد السنه ازيد بمعدل ٢ غرام فقط باليوم
و بالسنه ازيد من كيلو الى ٣ كيلوات فقط
يعني عادي وزني يثبت
عادي جدا مو بس عادي
خصوصا ويه الحركه و التكميز اللي اسويه
ثانيا اني باول سنه ٢٤ ساعه اشرب بس سوائل و الاكل سهل و لين
و جيتي انت تنطيني اكل
هلوو و اني يصرفلي و اني احب كلشي سهل بالدنيا
اريد سوائل و بس لذلك ما احب الاكل
و انت هم ما مقصره و تنطيني حليب باكيتات و عصير صناعي و طبيعي و اني اشرب خوما اكول لا !!!!
و طبعا راح اشبع و ما راح اكل
و لا راح اكل اذا انطيتيني قطعه كندر
اني ما احتاج للطاقه بكدك
اني تكفيني ١٠٠٠ كالوري باليوم
امي الكريمه قللي السكر بالعصير و الاكل و شوفيني شون راح اكل
السكر الزايد يتحول الى دهون و الدهون راح تاذي قلبي الصغير
قللي السكريات فقط بالمناسبات
اني ما اعرف اكول لا للحلو
المفروض انت تعرفين شنو اللي يفيدني و شنو اللي يضرني
تدرين انه المصاصه تسد شهيتي لمده ٣ ايام !!!
تدرين ان السكر يضعف مناعتي ؟
لذلك امي الغاليه قللي السكر بكد ما تحبيني و وعد مني اني راح اتغير ثم شغله ثانيه اني الحليب هو بيه سكر اللاكتوز ليش تضيفين سكر اخر للسكر
صدك تحجين ؟
و بعدين تكولين ما ياكل
طبعا ما اكل
مسدوده نفسي من السكر
امي الكريمه هذا عمر الاستكشاف احب امشي اركض اكمز
لذلك اني ما احب التزم باتيكيت المطابخ
وفريلي الاكل و اني اروح و ارجع اكل
و كل شويه انطيني وجبه صغيره
عادي ما امل
مهم عندي اللعب جدا و اهم من الاكل كذلك
.
.
فدوه لعينك يا امي كافي جمله ما ياكل
لابويه ... ما ياكل
لبيبتي .... ما ياكل
لخالتي .... ما ياكل
شعيتي بالطاقه السلبيه و نقلتيها الي
حتى لو اريد اكل هم بطلت
هلكد كلتي ما ياكل
اني احب اكل على مزاجي و ما احب احد يكولي لا تاكل
كثر الملحه ويايه تسوي عندي احباط
و احيانا هذا الاحباط يوصل مرحله انه اني اكره الاكل و لسنين طويله
خصوصا اذا خوفتيني او ضربتيني علمود الاكل
راح اكره كل الاكل
لان يذكرني بالتجربه السيئه اللي سويتيها من ما اكلت
امانه
تتركيني
اني اعرف من اجوع
و اكل متى يعجبني
لا تسوين عندي عقده نفسيه من الاكل
.
.
لو حسيتي اني شاحب او وزني اقل من الطبيعي اي طبعا من حقك ترحين للطبيب و اللي راح يفحصني و يدزني تحاليل و من اهمها فقر الدم اللي اصلا يسوي فقدان شهيه
لذلك امي فلوس التحاليل وفريهن للتنويع الغذائي و جيبي لحم و بيض و لبن و جبن و اطبخي
اني بصحه جيده دامني العب و حرك و وزني و طولي ضمن الطبيعي
فقدان الشهيه اللي عندي ناتج بسببك انت
اولا من كثره السكريات باكلي
و ثانيا من كثره الملحه بموضوع الاكل يا امي
و بس
د. سيف سمير البياتي
اخصائي طب الأطفال باز کردن / نظر دهید

2023-05-01 00:08:50 10 صعوبات للام الجديده !
الامومه رحله شاقه لا شك في ذلك
و لكن إلى اي مدى هي شاقه ؟
تعالوا نستكشف اكثر 10 صعوبات تواجهها الامهات الجديدات :
1. #هي_منطقه_غير_مكتشفه
يمكن أن تقرئي كل البوستات هنا
كل الكتب اللي تخص الطفل
كل المقالات اللي تخص التربيه
بس تبقى الامومه منطقه غير مكتشفه غير معروفه مجهوله
هي تشبه ان ينطوك طفل صغير عمره ساعات و يلا تفضلي مارسي الامومه !
2. #التعب_الشديد
أحيانا يمكن أن ترزقي بطفل لا ينام ابدا
لا يعرف النوم ليلا او نهارا
و ممكن يطول عدم قدرته على النوم لغايه ٦ اشهر
ما يبهرني حقا هو قدرتك العجيبه على عدم النوم و الاستيقاظ ٢٤ ساعه
التعب ممكن يستغرق ايام
و ممكن يستغرق اشهر
و ممكن سنين
على حسب الطفل و شكواه
3. #توقعات_واراء_الاخرين
اكيد جربتي هالشي و انت حامل
قسم يكولون ليش ما نام الطفل الليل كله و شعجب كل الليل يكعد وياها شويه اراء تخص التربيه
4. #توقعاتك_العالية
توقعاتك العاليه بأن الطفل سيكون هاديء و حباب و لطيف و ينام هوايه حتى لو كنت اما للمره الثانيه
ابدا التوقع ما يشبه الحقيقه و هذا راح يصيبك بالأحباط
5. #هناك_كتيب_بس_ما_يرهم_على_طفلك
قريتي كلشي صح؟
تتابعيني و انت بعدك بنيه ؟
تعرفين كلشي و تعلمتي مني و من غيري كلشي !
بس ممكن طفلك ما يتبع و لا اي قاعده اكتبها هنا
6. #احساس_جسدي_غريب
جسمك يحتاج فتره ليعود إلى فتره قبل الحمل
بس ويه كميه النزف و الجروح و الخيوط و الام الصدر راح تحسين بغرابه بجسمك
كل شيء سيبدو غريبا
فتره و تعدي و راح ترجعين مثل قبل
7. #احساسك_انه_كل_ما_تفعليه_خاطيء
لو مهما بلغ غرورك فانك حين تصبحين اما راح تسألين هذا السؤال ( هو التصرف هذا صح لو خطا؟ )
8. #هذا_الوقت_يمر_ببطء_شديد_او_سرعه_شديده
غريب هذا الوقت رغم ان المغص و ايامه تحسيها طويله
الا انك فجاءه وصلتي لعمر ٤ اشهر و بدت اعراض التسنين !!!!
9. #انت_لست_انت
انت شخص جديد حين تصبحين اما
طلعه المول صعبه
طلعه النادي اصعب
طلعه السووك اووو شكد صعبه
بس فتره وره فتره راح ترجعين و تحاولين تعودين بس اول فتره انت لست انت
10. #لا_توجد_رفاهيه_الانطفاء
وحده من اصعب أمور الامومه هو انك عمرك ما تكدرين تنطفين فتره
عدم الإطفاء شعور متعب لذيذ مهم و مبهم
بس هذا عدم الإطفاء راح يتحسن شويه شويه
و راح تكدرين تاخذين راحه بس بعد حين
د. سيف سمير البياتي اخصائي طب الاطفال باز کردن / نظر دهید

2023-04-28 01:16:21 اليوم البوست غير
اليوم البوست هو للي راح يكونون امهات لاول مره !
هو عن التحضير للقادم الجديد
اهديك 20 نقطه عن التحضير للقادم اتمنى تفيدك بمشوارك
1. تحضري للرضاعه الطبيعيه
على الرغم من ان الامر قد يبدو بديهيا و سهلا الا انه ليس بالسهوله المتوقعه
ليش مهمه هالنقطه؟
لان هذا ما يريده طفلك اول ما يجي !
هو هذا المطلوب منك باول ساعات
لذلك خلي هذه النقاط ببالك
1. كثري من وضع طفلك بعد الولاده جلده على جلدك
2. خططي لاكلك جيدا فالحليب يريد تغذيه جيده
3. تشجعي لارضاع طفلك و تاكدي انه حليبك هو افضل غذاء لطفلك لذلك كوني مستعده عاطفيا
2. حددي طريقه الولاده
طبيعيه او قيصريه
بعد التشاور مع طبيبتك
اكيد اكو مخططين للولاده الطبيعيه و انجبوا قيصريه و اكو العكس لذلك تشاوري مع اهلك و زوجك و الاهم طبيبتك بخصوص طريقه الولاده
3. تحضري نفسيا للمهمه الجديده
انت عندك حمل و راح ينضاف حمل اخر
لذلك كوني مستعده
4. و من بعد اهتمام الكل بك و بحملك و ادويتك راح يتحول الاهتمام للمولود الصغير
ممكن تضوجين
تتضايقين
بس هذا هو اللي راح يصير اعتادي الامر
5. الصبر مفتاح الفرج
اصبري على كل شيء
فالصبر هو اللي راح يكون رفيقك برحلتك ويه الامومه
6. تحضري لبعض التغييرات الجسديه بعد الولاده
فمن الطبيعي ان تحسين ببعض التعب و الخمول بعد الولاده و خصوصا بعد الولاده القيصريه
7. حضري شخص يساعدك بعد الولاده زوجك والدتك او اي احد تحبين يساعدك
8. و على الرغم ان المال لا يجلب السعاده لكن المال هو من الاشياء الضروريه في الحياه
لذلك خططي لمكان ولادتك جيدا
فجيكي المصاريف و شوفي الولاده شكد راح تكلف
9. اذا الامور الماديه على الحافه فلا تبالغين بالمشتريات للطفل
قطع بسيطه تفي بالغرض
10. حضري الاشياء جيدا مثل ملابس او محرار او حفاظات
فيتامين k ابره احتياط
محرار
ملابس للطفل
و خليها بحقيبه المستشفى
11. لا تلبسين طفلك ملبس جديد ما مغسول فاغسلي كل ملابسه
جهزي البيت جيدا قبل الولاده لكل المتطلبات
12. حضري اسم الطفل بالاتفاق مع الاب
مو ناقصه ابدا توتر بعد الحمل
اذا تعرفين الجنس اختاري اسم من يكبر طفلك يشكرك على حسن اختيارك اله
13. فيتامين دي ضروري و ابدي بيه من اول يوم اذا ترضعين طبيعي
14. تعلمي الاشياء الصح
باعي فيديوات عن الرضاعه و شون تتم
ما عدنا مع الاسف لحد الان و احنا بسنة 2021 ثقافه مدربه الرضاعه الطبيعيه
لذلك تعلمي انت
اليوتيوب يعلمك
بوستات هنا تعلمك عن الالتقام و الرضاعه الطبيعيه و تشقق الحلمه و غيرها
15. كوني منفتحه للخيارات الجديده
مثل قطره بروبايوتك بعد الولاده مباشره ممكن تقلل المغص و تحمي طفلك من الامراض قد يصفها لك طبيبك
16. حاولي تقللين خطارك بعد الولاده مباشره
انت بحاجه للراحه
لذلك قللي العدد و اخبري اصدقائك بالتدريج و حددي موعد زيارتهم الك بالموعد اللي يناسبك انت
17. حضري مكان نوم جيد لطفلك
مكان امين
بدون وساده
مريح
مظلم ليلا
مضيء نهارا
معتدل الحراره
18. اقري عن المغص كثيرا فهو الرعب القادم لمده ٣ اشهر قادمه اقري عن السيمثكون و البروبايوتك و الكوليف
19. جدي طبيب اطفال جيد لطفلك قريب عليك حتى يستمر بمتابعته
20. اقري الصفحه هذه يوميا
بيها بوستات تنزل من 5 سنوات عن كل خطوه
افتخر بيها
و افرح من تكولي ام اني ما احتاجيت لطبيب لان اتابعك
اقري بيها و تثقفي و عوفي سوالف الثوم و السكوه لامهات الثوم
انت تستحقين الافضل
د. سيف سمير البياتي اخصائي طب الاطفال باز کردن / نظر دهید

2023-04-26 16:05:47 اذا ابني بلع علكه صحيح راح تلزك بمعدته؟
من الاسئله اللطيفه و الاعتقدات الخرافيه اللي كلنا سامعيها بس الجواب هو لا
راح تعبر خلال يوم او اثنين و تختلط مع الخروج و تطلع لان ما عدنا انزيمات هاضمه للمواد اللي بالعلكه يعني ما نكدر نهضمها
طيب دكتور شنو رايك بالعلكه؟
مخاطر علك العلكه أخطر من بلعها
لان تعرفون هي مصنوعه من السكر وممكن جدا تسبب تلف للاسنان و تسوس
و بيها خطر آخر بالأخص الأطفال الصغار انه ممكن يشهك بيها و تسد مجراه التنفسي
ممكن تسوي انسداد امعاء؟
اكو حالات مثبته انه مسويه انسداد امعاء بس اكيد بحالات البلع المتكرر للعلكه او انه الطفل اخذ كميه كبيره و بلعها
اوكي دكتور شكرا جزيلا بس باي عمر تنصح بيها؟
من الطفل يكبر و يزول عنه تقريبا خطر الاختناق و يعرف العفو ( يبصق):spitting اللي يصير بعمر ٥ سنين
د. سيف سمير البياتي
اخصائي طب الأطفال باز کردن / نظر دهید

2023-04-25 20:03:14 الشهيگة ( الحازوقة عند الجنين)

الحازوقة عند الجنين قد تكون في معظم الحالات رد فعل طبيعي وجزء من الحمل، غالبًا لا تتمكن الحامل من التعرف عليها رغم شعورها بحركة غريبة، وذلك يعود لعدم مقدرتها على التفريق بين الحازوقة وركلة الجنين، يمكن رصد الحازوقة بطريقة أكثر دقة عبر الموجات فوق الصوتية.

يختلف الشعور بالحازوقة عند الجنين من حامل لأخرى، وغالبًا ما يعتمد هذا على موضع المشيمة، فقد تبدأ بعض الحوامل بالإحساس بالحازوقة عند الجنين في وقت مبكر من الأسبوع السادس عشر، بالمقابل قد تتأخر الحازوقة بالظهور عند الجنين حتى الأسبوع العشرين إلى الرابع والعشرين من الحمل ما يجعل بعض الحوامل لا يلاحظنّ الحازوقة.

من الجدير بالذكر أن الحازوقة قد لا تصيب جميع الأجنة، لكنها قد تظهر بشكل ملحوظ عند البعض، فقد يعاني بعض الأجنة في الرحم من الحازوقة مرة أو عدة مرات خلال اليوم.

أسباب الحازوقة عند الجنين

على الرغم من أن الخبراء لم يجدوا السبب الواضح للحازوقة في الرحم، لكن يوجد بعض النظريات لحدوث الحازوقة تتمثل في الآتي:

ضغط السائل الأمنيوسي

تساعد الحازوقة عند الجنين في التحكم بكمية السائل في الكيس الأمنيوسي، إذ يحث ازدياد الضغط الناتج عن ارتفاع السائل الأمنيوسي الجنين على الحازوقة وابتلاع الفائض من السائل الأمنيوسي.

نمو الرئتين

تحفز الحازوقة نمو رئتي الجنين، إذ تسمح الحركات الدقيقة للحجاب الحاجز له بممارسة التنفس، فعندما يتنفس الجنين يبتلع السائل الأمنيوسي، مما يؤدي إلى تقلص الحجاب الحاجز الذي لم يكتمل بعد، بالتالي يصاب الجنين بالحازوقة في الرحم.

التفاف الحبل السري

يعد التفاف الحبل السري من أخطر الحالات الطبية التي قد تؤدي إلى إصابة الجنين بالحازوقة، غالبًا ما يحدث هذا في الثلث الثاني والثالث من الحمل، إذ تكون الحازوقة بهذه الحالة دلالة على ضغط والتفاف الحبل السري حول عنق الجنين. 

الفرق بين الحازوقة وركلة الجنين


يعد التتبع والتقصي اليومي لحركة الجنين الملحوظة الطريقة المثلى لتحديد ما إذا كان الطفل يعاني من الحازوقة أو يقوم بالركل فقط.

قد يقوم الجنين بالركل في حالات محددة، مثل: بقائه في وضعية غير مريحة بالنسبة له، أو عند تناول الحامل المشروبات أو الأطعمة شديدة البرودة أو السخونة أو السكرية.

إذ تنتج ركلة الجنين عن تحفيز حواسه، قد تشعر الحامل بركلة الجنين في أجزاء مختلفة من بطنها مثلًا في أعلى أو أسفل أو جانب البطن، وتتوقف هذه الركلات عندما تغير الحامل وضعيتها.

في حين تشعر الحامل بالحازوقة أثناء جلوسها بشكل ثابت، وتبدو على هيئة رعَشات منتظمة الإيقاع أو نبض، ويكون هذا الإحساس قادم من منطقة واحدة من البطن.

متى يجب زيارة الطبيب؟

غالبًا ما تكون الحازوقة عند الجنين أمرًا طبيعيًا لا يستدعي القلق، لكن يجب أن يقل تواتر الحازوقة مع اقتراب موعد الولادة، إذ قد تدل الحازوقة المتكررة والمستمرة إلى وجود مشكلة في الحبل السري.

فيما يأتي الأعراض التي تتطلب منك زيارة الطبيب:

تكرار الحازوقة أكثر من أربعة مرات يوميًا بعد الأسبوع الثاني والثلاثون من الحمل.
نوبات الحازوقة مستمرة لأكثر من ربع ساعة.
ازدياد مفاجئ في الحازوقة عند الجنين يصاحبها ارتفاع في حركة الجنين.  باز کردن / نظر دهید

2023-04-25 00:42:17 الأفكار الدخيلة Thought Insertion:

في كلّ ليلة قبل النوم، تطلب ابنتي (مينا) مني أن اشاهد معها (قسراً) حلقة من إحدى المسلسلات الكارتونية التي تعشقها: أنا أفضّل غامبول صراحة، لكنها تشغف التنويع بين سبونج بوب وكلارينس وسندباد وغيرها.
في الليلة الماضية، صُدمت حين شاهدتُ هذا الحوار البليغ الذي دار بين سبونج بوب وصديقه الأبله بسيط. يطلق على هذا الحوار في الطبّ النفسي بالتفكير الدخيل، وهو نوع من الارتياب (paranoid) الذي لا تجده إلا في حالاتٍ نادرة عند مرضى الشيزوفرنيا.
لو تمعنتم في الحوار لوجدتم أن «سبونج بوب» يخاف أن لا تكون ذاكرته ملكاً له، بل دخيلة عليه، أو مزروعة في رأسه. ويجيبه «بسيط» باحتمال أن يكون الفضائيون قد استبدلوا أفكارهم بأفكارٍ أخرى...! يعتقد مريض (الأفكار الدخيلة) أن الآخرين يستطيعون التلاعب بأفكاره وتصرفاته، كما في مسرحية عطيل، حين حاول إياغو أن يزرع فكرة خسيسة مفادها أن ديدمونة تقوم بخيانة عطيل مع أعز أصدقائه.
دائماً أفكر في هذا العارض العجيب (الأفكار الدخيلة)، ودائماً أفكر كيف يمكن للفرد أن يسيطر على تفكير الآخرين ويخدعهم بأبشع الطرق وأقساها، أو الدخول إلى أفكارك واستبدالها بأفكار أخرى. الأقسى من كلّ ذلك، كيف يرتضي الإنسان العاقل أن يسلّم عقله للأوهام بنفسه؟ وكيف يقبل أن يُملأ رأسه بالتضليل والكذب والذرائع؟ وكيف يرتضي أن يكون ضحية التلاعب بعقله أو أن يُحاوَل إقناعه برؤية الأشياء بطريقة لا تمت إلى طريقته ومصلحته؟

$$$

د.حميد يونس
أخصائي الطب النفسي باز کردن / نظر دهید