2022-04-20 00:03:10
الصيف راح يبدي و الكثير من الامهات يستخدموه لتعليم الاطفال على التواليت
ناشر هنا بوستات متعدده عن تعليم التواليت بس هذه الخطوط العامه
1. طولي بالك الموضوع مو سهل
2. اصبري كثيرا
3. مالك علاقه بغير احد او تجارب شخصيه لاخرين
4. ديري بالك تضربين
5. خلي ايمان بنفسك انه انت تكدرين
6. ابدي الان اذا ما بديتي
7. ابدي من ١٨ شهر الى سنتين لا تاجلين بعد السنتين ابدي ولو خطوات اوليه
8. فرغي جدول اعمالك لفتره من اسبوعين الى شهر
9. اول خطوه بلا حفاظ صباحا
10. توقعي شوكت يصير عنده ادرار او خروج
اول ما يكعد مثلا يروح يتدرر و بعد ربع ساعه من الاكل يروح للخروج
11. احجي و علميه الكلمات الاساسيه
12. تخيلي البزونه يعلموها ابنك تتخيلين ما يتعلم؟
لا يتعلم بس شدي حيلك
13. اول ايام خلي ال potty اللي هو القعاده بغرفه العابه و خليه يكعد بيها هو و ملابسه للتجربه
14. شجعيه و صفقيله و اضحكيله و غنيله كلما يكعد
15. عادي عادي اكو خسائر كلنا ندري يعني شويه منا شويه منا عادي لا تعصبين
17. اذا عندك فلوس حلوه اشتري اللعابه اللي تسوي ادرار و خلي يشوفها و يخليها تسوي ادرار بيده
18. عادي يغلط و يتدرر وره ما يكوم من مكانه تصير لا تقلقين
19. بيوم يحقق الهدف احتفلي احتفال كبير حتى يتشجع
20. فهميه انه الموضوع مو عيب و شوفيه فيديوات لحيوانه المفضل يقضي حاجته
21. خلي الكل يشجعه مو بس الشغلات السلبيه تكوليها عنه
22. اذا ما يحب الحمام خليه يحبه و جيبي لعابات بالحمام
23. كلما يكبر و يصير اكبر المهمه راح تصعب لا تتاخرين لل ٣ سنين تحت اي ظرف
24. هدفنا الاول تعليم الطفل يكون جاف و متعلم نهارا و بالليل سهله يحلها الحلال
25. عمتك من تكولك اني اعلمهم من عمر ٩ اشهر و عمر ٨ اشهر كذابه و دا تبالغ
26. اي ادرار و اي خروج بالليل ديري بالك تعاقبيه
27. عيوني اختي لا تضربين و لا تعنفين اني جايك من المستقبل و اكولك من تضربين راح تاخرين الطفل و شايف اطفال عمرهم ١٠ سنين بعدهم لابسين حفاظات بسبب الترهيب
28. الادرار بالليل عادي يستمر الى ٥ سنين بعدها نراجع طبيب و ما يتعالج الا بال 6 سنين
29. السوائل تتقلل ليلا و ماكو عصير بعد ال ٤ عصرا
30. علميه يدخل الحمام قبل النوم
31. من البدايه علميه الخصوصيه و انه يسد الباب وراه و شون ينظف نفسه
32. الاب مشتاقيلك من زمان شونك ؟
كل المطلوب منك تتحملها للام بهاي المرحله اذا ما تحملتها عادي انت علم الطفل
33. لا تتكاسلين اتعبي شويه ترتاحين اكثر و هو بالاخير قرف الحفاظ هم مو قليل و هم لازم تخلصين منه
34. شجعي شجعي و استمري بالتشجيع لما تتم المهمه تمام
35. اختاري دائما القعاده اللي ما تكون بشكل كرسي و انما اللي تكون ثابته على الارض
36. ابدا لا توصفين اللي بالحفاظ بكلمات مرعبه مثل عيع و مقرف
37. اول ما يخطا و يتدرر على نفسه بسرعه غيري ملابسه حتى لا يتعود على البلل
38. اول ما تعلم الطفل ابدي لبسيه ملابس داخليه
39. اذا عنده اخ كبير خليه يستخدم التواليت كدامه و فهميه انه كل البشر يستخدموه عادي
د. سيف سمير البياتي اخصائي طب الاطفال
5.8K views21:03
إ
