إستشارة طبية

2023-04-08 22:45:06 صديقي طبيب عيون محوليلهم حاله اليوم
رايح الاب للمركز الصحي يشتكي انه ابنه ما يشوف
المركز الصحي محولهم لاستشاريه العيون
الطفل عمر ٩ سنوات و يشتكي انه عينه ما يشوف بيها
يكول دا اكوله اكعد استريح و ثبت راسك
طفل عادي صعب انه يطاوعك
الاب صار عصبي على الطفل
اني هديته كلتله بس شويه تره طفل
المهم فحصته الولد عنده انفصال بالشبكيه
سالته كلتله يابه انت تضربه؟
الاب كال اي اضربه دائما على علباته ( الرقبه من الخلف )
كلتله هو هذا السبب و الله اعلم راح يرجع يشوف لو لا و تعاملنا وياه
.
.
خليكم متيقظين
الاطفال اهش مما تتصورون
د. سيف سمير البياتي اخصائي طب الاطفال باز کردن / نظر دهید

2023-04-08 00:17:58 المغص
مغص الطفل
او الغازات
مغص ٣ اشهر
متلازمه الطفل الازرق او البنفسجي
سموها اللي يعجبكم
تعريفه العلمي هو بكاء الطفل بدون اي سبب مرضي لاكثر من ٣ ساعات بعدد ايام اكثر من ٣ ايام بالاسبوع لفتره اكثر من ٣ اسابيع
المغص يبدي مبكرا من الاسبوع الثالث او الرابع
و هنا الوم شويه على بعض الامهات اللي تحضر قطرات المغص اول ما يجي الطفل
هنا نادرا ما يكون السبب هو المغص
ثاني شي الاطفال الغير مكتملي النمو بعدين يصير عدهم المغص بعد ما يكتملون و يكملون الشهر التاسع يعني ينحسب الاسبوع الثالث من الموعد اللي المفروض ينولدون بيه
لهذا يكونون هادئيين بالبدايه بس بعدين يبين عندهم المغص
يسموه مغص ٣ اشهر
لان بالعاده يختفي بعمر ٣ اشهر
ولو احيانا يستمر الى ٦ اشهر
اتفاجيء من امهات مستمرات عل قطرات المغص الى عمر فوك ال ٤ اشهر !!
بكاء الطفل الغير مرضي فوق ال ٤ اشهر هو التسنين
اما الاسباب المرضيه فكثيره و هي مو موضوعنا
نكمل البوست
الاسباب ؟
غير معروفه
بس الثابت انه كلما توترت الام بفتره الحمل كلما احتماليه المغص تزيد
احيانا يكولون عدم نضوج الامعاء
و قسم يكولون هو الحليب اصلا معروف يسوي غازات
كثره الاغطيه تزيد المغص
و اهمال اطفاء الاضويه كذلك
المهم اسبابه هوايه بس اهمها و اوضحها هو توتر الام فكلما كانت متوتره كلما الطفل متوتر
.
.
الاعراض هي واضحه
بكاء بدون سابق انذار
و الطفل يصير احمر او ازرق من المغص
البكاء يبدي المغرب الى نهايه الليل
و ما يسكت لا برضاعه و لا ملهيه و لا اي شي
الطفل بطنه منفوخه و كبيره
بس الطفل نموه زين
و اموره ماشيه
و ما عنده اي مشكله عضويه
المشكله بالام اللي ممكن تفوت بمرحله الكابه اكثر من غيرها من الامهات
.
.
العلاج
الصبر
الصبر
الصبر
الصبر
الصبر
الصبر
و الكثير من الصبر
اذا ترضعين طبيعي انتبهي لاكلك
القهوه تسوي سهر
البقوليات يسوي مغص
الخيار و البرتقال و الطماطه ممكن يسوي مغص
الحليب و مشتقاته جدا تسوي مغص
و استخدمي الملهيه جدا تقلل المغص
بس لا ننسى الملهيه تنترك بعمر ٦ اشهر حتى لا تاثر على الاسنان
اهم شي التربيت على الظهر بنص الرضعه و بنهايتها
و لا ننسى الجو المعتدل اساس الحل لاغلب مشاكل الرضع
من يبدي يبجي احمليه بالمسكه السحريه اللي هي ينام مستلقي على ذراعك
انطيه لوالده يحمله
ضيفي برد لجو الغرفه
قللي الاغطية
الكماط يساعد على الراحه بس لا ننسى الكماط ما يشمل الساقين ابدا
احضني طفلك اكثر
اهمسي باذنه اشششش اششش
التدليك جيد جدا و خصوصا بالزيت
الحمام خيار جيد للطفل قبل النوم
اذا ما فاد طلعه صغيره بالسياره ممكن تكون مفيده جدا و نلجئلها في بعض الاحيان
و اخيرا و قبل لا ننتقل للادويه لا ننسى الضوضاء البيضاء مثل صوت المروحه او المكنسه الكهربائيه او السشوار
نروح للادويه :
قطرات الكوليف مفيده و مفيده جدا في حالات المغص المقاوم للادويه الاعتيادية مع فائده أخرى تتمثل بزياده الوزن و زياده الرضاعه
قطرات السيمثكون المنتشره و الرخيصه ممكن تفيد مثل الانتي كاز و الدسفلاتيل و كوليك ايز و غيرها
قطرات البروبايوتك اللي ممكن تستخدم كوقايه و كعلاج للمغص
وقايه لان شافوا انه إعطاء البروبايوتك المخصص للمغص من البدايه ممكن يمنع حدوث المغص ( و هي ملاحظه مجربه و فعلا اكو فرق واسع )
او ممكن تعطى كعلاج للمغص في حال حدوثه
و بس
د. سيف سمير البياتي
اخصائي طب الاطفال باز کردن / نظر دهید

2023-04-08 00:17:05 طفلي يرفض الطعام..!

مالحل؟

هناك أمور مهمة يجب على كل أم معرفتها، وستساعد كثيراً في تعديل سلوك الطفل وتغذيتة:

١. الاطفال يتأثرون بما نفعل لا بما نقول، الآباء قدوة لأبنائهم ويتأثرون بما يفعلون، اذا كان الوالدين لديهم عادات غذائية صحية، بالتالي الاطفال سيكون لهم عادات غذائية صحية لا محالة.

٢. يجب وضع قوانين غذائية في المنزل وتعليقها كلوحة على الحائط في غرفة الطعام وتطبيقها مهما كانت الظروف مثال (ممنوع الحلويات، اكل ثلاث وجبات في اليوم مع سناك صحي ) القوانين تخلق حدود للطفل ومع مرور الأيام سيتعلم الطفل ان لا يتعداها.

٣. الإبتعاد عن الاكل العاطفي، الاكل ليس لهاية لتسلية الطفل او لعبة او جائزة تقدم للطفل لمكافأته على انجازة (مثال اذا كان الطفل يبكي تعطينة الحلويات ليهدأ او اذا فعلت كذا سأعطيك حلوى ) لان هذا سيربط الطعام بالمكافآت واذا لم توجد المكافآة لن يأكل الطفل.

٤. يجب أن تجتمع الاسرة عالاقل على وجبة واحدة في اليوم وعلى طاولة واحدة بوقت ثابت كل يوم، في البداية سيرفض الطفل الجلوس ولكن مع الايام سيعتاد هذا الروتين

٥. من قوانين المائدة ان الطفل اذا لم يعجبة الطعام ليس من الضروري ان ياكلة ولكن يجب ان يجربة، ومع تكرار هذه العملية ومع الايام سيعتاد لا محالة، لذلك عندما تحين وقت الوجبة لا تقولي لطفلك "عليك ان تأكل وجبتك" وانما قولي عليك ان "تجرب وجبتك".

٦. الطفل عندما يقول لم يعجبني الطعام هذا يعني انه لا يعرفة ولم يجربة كفاية ليتقبلة، الطفل يحتاج ١٢ مرة متتالية يجرب فيها صنف جديد من الطعام ليتقبلة لذلك اذا قال الطفل لم يعجبني الطعام يجب ان لا تجبرية ولكن قولي له " انت لم تجربة كفاية لتتقبلة بإذن الله عندما تجربة المرة القادمة ستتقبلة"، التغذية السليمة تأتي بالممارسة وتجريب اصناف جديدة بانتظام.

٧. عندما يرفض الطفل الطعام يجب فتح باب النقاش معه وتعويده على التعبير عن سبب رفضة للطعام مثال ( ارفض الطعام لانه مر او حلو او مالح او ملمسه لم يعجبني).

٨. في اول سنتين من عمر الطفل يجب ان يجرب اكبر قدر من الاطعمة ويعتاد عليها وخصوصا الخضار، لان من عمر ٢ الى ٤ سنوات كل طفل يمر بمرحلة فوبيا تقبل الطعام الجديد neophobia وشدتها تكون على حسب بيئة كل طفل, فإذا كانت لدية خلفية من قبل بالاطعمة وقام بتجربتها ستمر هذه الحالة بسلام.

٩. الأم عليها فقط أن تحدد ماذا يأكل ومتى يأكل الطفل، والطفل هو من يقرر إذا سيأكل أم لا وهو من يحدد الكمية، ثقي بطفلك فقط.

١٠. تثقيف بفوائد الاكل واهميتة عن طريق القصص والأنشطة .. مثلا ربط الحلويات بالمشاكل الصحيه كالتسوس والبدانه والخمول والأمراض.. عن طريق ملصقات مثلا.. أو مجسمات..

١١. التسويق للأكل وتسمية الأطعمة مثال ( سبانخ الأبطال او بروكلي الاقوياء)

١٢. التعبير عن الطعام بشكل غير مباشر يعني مثلا تاكل الام طعام صحي وتقول واو طيب كلش..
واذا تناولت حلويات أو أكل غير صحي تعبر عن الاستياء.. مثلا اخ سني وجعني لان اكلت جكليت.. أو معدتي ثكلت من الاكل
وهكذا..

منشن الأمهات الي ممكن يفيدها البوست

د.اسماء باز کردن / نظر دهید

2023-04-06 11:56:51 يلا خلي ننظم نوم الطفل
اليوم اول يوم نولد بيه الطفل و رجعتوا الحمد لله على السلامه للبيت
نبدي بأول صباح و اول يوم خطوه بخطوه
افتحي الستائر و دخلي الضوء للبيت قدر الامكان
يلا بسرعه و كلما صبح ابكر كلما احسن
اي عسكريه و نشاط هاهيه
احجوا وسولفوا و تحركوا و لا كانما اكو طفل نايم
الصبح ما انخلق للنوم الصبح للضوء و الضوضاء و الحركه
غيري ملابس الطفل
هسه تكولين دكتور قابل راح يروح للدوام
اي بعد كم سنه يروح للدوام
اريد احضره للدوام حتى ما يكره كعده الصبح
غيري الحفاظ و بدلي ملابسه مال نوم إلى ملابس مرتبه
هسه شنو؟
اكيد الريوك
خليه جلده على جلدك حتى اذا ترضعيه صناعي و رضعيه
و طبعا اكيد يا ريت لو رضاعه طبيعيه
اكيد مو بس هذا الطفل عندك
بس خليه بقربك حتى لو تشيلي و تفترين بالبيت
تذكري الصبح للضوء و الضوضاء
رضعي طفلك صباحا
الاكل كله تركيزه الصبح
ركزي رضاعتك الصبح
لا تنسين راح يغفى حاولي تكعدي و استمري بالرضاعه
و احجي وياه و غنيله و احجيله قصص
تربيت لطيف على الظهر بعد كل رضعه هي الهدف حتى يكعد و حتى يفرغ الهواء من المعده
خلصت الرضعه الأولى الصباحية خليه يسوي خروج !!!!
شووون؟
ببساطه ارفعي رجليه
علميه و كانما عندك طفل عمره سنه و يسوي خروج
حركه البايسكل كلش مريحه و ممكن يصير اصلا بعدها خروج
هسه وقت فراغ العبي ويه الطفل غنيله اقريله قصه
دا احجي عن طفل عمره يوم واحد
اي نعم دا احجي عن طفل عمره يوم تذكري دائما
الصبح للضوء و الضوضاء
هسه بدا ينعس ويريد ياخذ القيلوله اعرفي شوكت ينعس ببساطه يبدي يتثاوب او يرمش على البطيء
هنا حاولي توديه بفراشه
بفراشه يعني بفراشه
يعني مو بكرسي السياره او غير مكان
لا بالمكان اللي ينام بيه و مخطط انه ينام بيه حتى يتعود عليه
اوكي هذه اغفاءه بقي الاضويه مفتوحه بقي الستائر مفتوحه و بقي الضوضاء موجوده
مثل موسيقى او اي شي آخر مثل غساله او غيرها
هاهيه ابني كملت ساعتين كعدي خلص
لا تخلين الاغفاءه تطول أكثر من هيجي يكفي
ساعه و نص إلى ساعتين كلش كافي
و عيدي الفوك كله لما يجي الليل
اجا الليل
نكمل البوست :
تأكدي انه اقل شي فد ساعتين صاحي قبل وقت النوم
و حددي وقت نوم ثابت
٨ ليلا؟.
٩ ليلا ؟
انت حره
بس كلش يحتاجون للنوم فخلي ينام مبكرا
خلص طفي الاضويه و تتذكرين شنو كتبت مسبقا عن الضوء ؟
الضوء الأبيض يتعارض ويه النوم
اغلقي الستائر
و شغلي اخفت ضوء عندك بالغرفه
و بلا صوووت
و لا حتى همس ماكو ماكو
لبسي بجامه النوم و اختاري تكون واسعه و مريحه و اهم شي جو الغرفه المعتدل اقل من ٢٤ درجه
آخر شي هو روتين النوم و اللي هو شون تنعسيه اما بالهز الخفيف او التقبيل على الراس وتخليه بفراشه نعسان بس مو نايم حتى يتعلم ينام
من تشوفيه كلش نعسان هاهيه خليه بفراشه
اذا رجع بجى من تخليه حاولي ثاني ترضعيه و تربتين على ظهره و لما قريب يغفى نومي بفراشه
لا تكعديه أبدا اذا نام علمود رضاعه بس اول اسبوعين ما يصير ينام أكثر من ٤ ساعات
بس هو بعدين راح ينام فترات اطول اطمئني
اذا كعد باليل لا تفتحين الاضويه اخذي و رضعيه اذا كان محتاج رضاعه او بدلي الحفاظ اذا كان متوسخ بس أبدا لا تفتحين الضوء و الأهم منها أبدا لا تحجين وياه و لا تناغيه
الليل وجد للراحه
من تربتين على ظهره باليل لا قوي بحيث يكعد و إنما شي يشبه المساج حتى ينام أكثر
خلي وقت الجلد على الجلد بس للنهار أبدا لا تستخدمين هذه الطريقه باليل و إنما لابس فقط
أبدا لا تغيرين الحفاظ الا اذا كان اكو خروج بالحفاظ او الطفل صار عنده طفح حفاظات عداها ما يحتاج
من ترضعيه بالليل رأسا رجعيه للفراش مالته لا تناغين و لا تحجين
و بالأخير الملخص :
طقوس الليل غير طقوس النهار
و هذه ملخص خبرتي كطبيب اطفال و كاب أكتبها الكم
و عندي عشرات الأمهات و الآباء اللي متبعين هذا النظام و طفلهم منظم مثل البوست و أكثر
هذا اطول بوست عن هذا الموضوع بالصفحه
و اعيد نشره كل فتره
اتمنى فادكم الموضوع مسبقا
كلمه شكرا كافيه
و للي اول مره يقروه اضيف :
قطرات البروبايوتك خليها من ضمن النهار اليومي الصباحي
هي و قطرات فيتامين دي نريده يبدي صح و بنشاط حبابه
د. سيف سمير البياتي
اخصائي طب الأطفال
#نوم
#نوم_الرضيع باز کردن / نظر دهید

2023-04-03 00:37:38 فيتامين دي
الملخص و المفيد
هذا البوست للكبار و الصغار راح اكتب ملخص عنه بطريقه السؤال و الجواب اللي اكتب بيها البوستات الطويلة:
صدك هو مهم لو شغله تجاريه ؟
فيتامين دي من الفيتامينات المهمه للجسم
الناس تتصور ان فيتامين دي يتدخل فقط بالعظام و الاسنان
بس فيتامين دي يتدخل بشغل البنكرياس و انتاج الانسولين
فيتامين دي يمنع الهشاشه
فيتامين دي دا يشوفون اله علاقه بالامراض السرطانيه
حتى بكورونا شافوا انه كورونا اكثر شده بالاشخاص اللي عدهم فيتامين دي قليل
قسم من البحوث ربطته بعلامات مثل الارهاق و الاكتئاب
ادله اخرى عن علاقته بالسمنه و حتى الضعف الجنسي لدى الرجال
زين ليش على غفله صار هيجي موضوع فيتامين دي مهم و شغله اخرى شو كلها صار عدها نقص هسه
يعني ما سمعت عراقي سوه تحليل و طلع طبيعي ؟
لا هنا شويه نختلف
اكو الكثير من العراقيين كبار و صغار طلع عدهم فيتامين دي طبيعي
بس اي الكثير او اغلب العراقيين عدهم نقص فيتامين دي
و السبب؟
نمط حياتنا و شمسنا الحاره و تجنبنا للشمس و حتى طبيعه لبسنا بالاخص النساء و بشرتنا السمره اللي تحتاج الى تعرض اكثر للشمس و طبيعه اكلنا
منين يجينا فيتامين دي ؟
فيتامين دي يجي من الشمس
بحيث كعده صغيره بالشمس ممكن تنطيك 50 الف وحده دوليه بس كعده بشروط خاصه اولها ان جسمك اغلبه مكشف
دكتور يعني اني من اطلع بالشمس لابس تيشرت خفيف ما اخذ فيتامين دي كفايه؟
خلي اشرحلك التفاصيل
اذا انت بافريقيا و على خط الاستواء و اغلب جسمك مكشف و متمدد مو واقف و بشرتك فاتحه و مو سمين هذا التعرض لمده 5 دقايق ينطيك 1000 وحده دوليه من فيتامين دي
يعني انت تمشي بالشمس و لابس شورت و تيشرت بلا ردن تحتاج و نفس المواصفات فوك تحتاج 10 دقايق
تخيل لعد امهاتنا و خواتنا اللي محجبات و بس وجههم و ايدهم طالعه شكد تحتاج ؟
الجواب 50 دقيقه بنفس المواصفات اعلاه
لذلك الملابس عامل محدد لفيتامين دي و كميته
زين شكد نحتاج من فيتامين دي؟
سهله
جوه السنه ٤٠٠ وحده دوليه
فوك السنه ٦٠٠ وحده دوليه
الحوامل و المرضعات 800 وحده دوليه
كبار السن 800 وحده دوليه
عدا الشمس وين موجود فيتامين دي؟
كومه اكلات مثل الحليب و الجبن و اللبن و السمك و صفار البيض و الكبده
زين بالخارج دكتور هم هيجي مهتمين بفيتامين دي ؟
بامريكا مثلا تشوف الاطعمه مدعمه بفتامين دي
فتلكه مكتوب على العلبه عصير مدعم بفيتامين دي
او لبن مدعم فيتامين دي
من الاشياء اللي شفتها كاسه لبن صغيره مكتوب عليها مدعم ب 500 وحده فيتامين دي !!
يعني هي بهاي الكاسه بيها احتياجنا اليومي
عدا تدعيم الاغذيه اكو توصيات باخذ فيتامين دي؟
اي نعم بالازمه الاخيره مال كورونا و لان الناس بقوا بالبيوت نصحت بريطانيا مواطنيها باخذ فيتامين دي بجرعه ٤٠٠ وحده دوليه لكل المواطنين
زين اني اطلع بالسياره هوايه و اشتغل سايق تكسي معقوله ما اخذ فيتامين دي؟
او اني اخلي طفلي بالشمس وره الشباك ما يكفي هذا التعرض بمكان فيتامين دي؟
لا ابدا الاشعه اللي تصنع فيتامين دي ما تعبر الزجاج فمعناها انت تحصل فقط الحراره لا اكثر
شوكت احسن وقت للتعرض للشمس حتى احصل فيتامين دي؟
شوف احنا هنا و بالعراق لما تسمع هذه المعلومه راح تضحك لان الوقت ما معقول
بصراحه حتى تحصل احسن تعرض و احسن شمس بالعراق يكون بين ساعه 11 الى 3 ظهرا
بس هذه الفتره هي الحاره جدا
ننتظر الشتاء و الربيع و نتعرض بهذه الاوقات
هل فيتامين د خالي من الاعراض الجانبيه ؟
ماكو شي خالي من الاعراض الجانبيه
حتى الماء ممكن يكون قاتل للاطفال تحت شهرين اذا اعطي بكثره
فممكن يزيد مستوى الكالسيوم و بالتالي يزيد تكون الحصى
كم قطره انطي لطفلي او اني شكد اخذ؟
تختلف الجرع باختلاف الشركه لذلك اسال طبيبك او اقرا النشره المرفقه
مثلا الشركه المصنعة لهذة القطرة هي شركه الادوية في سامراء
ال ٤٠٠ وحدة دولية تعادل قطرتين
و ال ٦٠٠ وحدة دولية تعادل ٣ قطرات
بصراحه ليش تنطي فيتامين دي للاطفال؟
اتمنى اؤسس لمجتمع مناعته اقوى
يبدي من فيتامين دي و البروبايوتك
و ينتهي بالابتعاد عن السكريات و الحلويات و العصير
لاطفال تاكل اكل بيت مو اكل مليان ملوثات صناعيه
و جهال تشرب حليب طبيعي ! مو حليب بقر صناعي
د. سيف سمير البياتي اخصائي طب الاطفال باز کردن / نظر دهید

2023-04-03 00:00:23 رفض الرضاعه الطبيعيه
من أكثر المواضيع اللي تشغل الأمهات و اللي تحسسها بالضغط و الشد النفسي و العصبي
اغلب الاحيان يكون الرفض مو لأجل الرفض و انه ما يريد يرضع لانه الطفل مزاجه متعكر و ما يريد
و تلكيه ياخذ شويه و يسد جوعه و بعدين يرجع ياخذ و يبطل و يبجي
هذا مزاج متعكر مو أكثر
و الدليل وزنه و نموه دا يزيد طبيعي
كل اللي عليك تاخذين نفس عميق و ترتاحين أكثر و أكثر
ارتاحي بالكرسي الهزاز مثلا
اخذي نفس عميق و رضعي بهدوء قللي توترك هو شويه شويه راح يرتاح و ينزل الحليب
اذا ظل توترك و توتر طفلك مستمر
غيري جو شويه
شوفي مسلسل
شوفي فلم
اطلعي
و حاولي مره ثانيه و انت مرتاحه
طيب شنو الأسباب اللي تخلي طفلي يكره الرضاعه الطبيعيه عدا المزاج المتعكر
نقسمها إلى
اولا اسباب تتعلق بالطفل نفسه
١. الطفل متيه بين الرضاعه الصناعيه و الرضاعه الطبيعيه لهذا اول شهر لا تدخلون مميه رجاءا و لا حتى ملهيه
٢. الطفل تعبان او ما نايم او صارله فتره هوايه كاعد
٣. الطفل يرفض الرضاعه من ثدي واحد فقط لأسباب مثل حجم الحلمه او قله الحليب او الوضعيه الغير مريحه
٤. فتره اللقاح
٥. المرض
٦. الالهاء بغير اشياء مثل التلفزيون او صوت الموبايل او الأصوات
٧. التسنين
٨. الحر و البرد و خصوصا موضوع اللف الزايد
٩. فرط استخدام الملهيه
ثانيا اسباب تتعلق بالثدي
١. غزاره نزول الحليب
٢. قله إنتاج الحليب
ثالثا اسباب تتعلق بآلام
١. التعب النفسي و الجسدي
٢. الشد العصبي
٣. ماخذه ادويه مثل ادويه السعال اللي شويه تخليها نعسانه و منهكه
٤. ماكله اكل غير طبيعي او مؤذي
٥. مشاكل الدوره و ما قبل الدوره
٦. حبوب منع الحمل ممكن تسويك شويه عصبيه

.
.
طيب شنو اسوي ؟
اولا كوني صبووووره جدا انتظري
اخذي راحتك
لا تقلقين
قللي توترك
لا تجبريه على الرضاعه
من تجبريه راح يبجي راح يزيد توترك
ثانيا
امشي و رضعي طفلك
اي و الله مدا اتشاقه
امشي و شيلي طفلك واكف و رضعي طفلك و انت تمشين
ثالثا
غيري طريقه الرضاعه مو كل مره نفس الوضع
مره هو نايم بصفك
مره خليه بالطريقه المعتاده
مره انت اكعدي
رابعا
اكثر شي قريته من قصص لامهات رجعوا طفلهم للرضاعه الطبيعيه
هو انه طبت وياه للحمام و رضعته بالبانيو بمساعده زوجها او اي وحده تساعدك
المي يعمل على اراحتك و اراحه طفلك
خامسا
حاولي ترضعين طفلك بعد ما ياخذ طفلك الحمام
هذا طبعا اذا طفلك يحب الحمام
اذا ما يحبه لا اتركي هاي النقطه
سادسا
توقعي شوكت راح يكعد من النوم
اول ما يكعد من النوم او بالاحرى راح يكعد خلي الحلمه بفمه
سابعا
و انت دا تلعبيه و تضحكيه و تداعبيه خلي الملهيه بحلكه بس شفتي مزاجه حلو و دا يلعب خلي الحلمه بفمه
ثامنا
اذا الطفل كلش متعود على المميه راح اعلمك طريقه انه تخلين حلمه الثدي تشبه المميه و هي بأن تخلين قطعه ثلج على الحلمه و راح يشوفها الطفل اسهل
ممكن تكدرين تستخدمين الحلمه الصناعيه اللي موجوده بالصيدليات و اللي اسمها
Nipple shield
تاسعا
رضعي طفلك بكرسي هزاز
عاشرا
قطري كم قطره من حليبك بفم طفلك
حادي عشر
جربي المساج و لمده ٥ دقائق قبل الرضاعه بالأخص اذا طفلك متقبل للمساج
ثاني عشر
غني لطفلك
يعرف صوتك و هو ببطنك
غنيله راح يهدأ
ثالث عشر
شغلي موسيقى هادئه مريحه الك و لطفلك
د. سيف سمير البياتي
اخصائي طب الأطفال باز کردن / نظر دهید

2023-04-02 19:28:31 كثير تجينا حالات ثأليل ( فالول ) بالمناطق التناسلية والمشكلة تكون منتشرة بشكل فضيع فحبيت اخليلكم بعض النقاط تخلوها ببالكم اذا صار هذا الشي :
١- المرض معدي يعني اذا ظهر عندك لا تتقرب لزوجتك الى انت تلكي حل .
٢- دكول دكتور هو حبوب وطالع واذا انتظر واذا عديت زوجتي شنو المشكلة ؟
المشكلة انو بعض انواع الفالول بالمناطق التناسلية يتحول الئ سرطانات وخصوصاً بالنساء .
٣- دكتور اشو دكول بعض الانواع ليش هو الفالول بي انواع ؟
اي بي مئات الانواع والنوعين ١٦ و١٨ هي اللي تسبب سرطانات بعنق الرحم
٤- زين شلون راح نعرف رقم الفالول اللي عندي ؟
ما راح تكدر تعرف لان رادلها تحليل خاص لمعرفة النوعية وهذا ما متوفر عدنا بالعراق على حد علمي .
٥- دكتور زين الاجانب شلون يحمون نفسهم من الفالول. بهاي المناطق ؟
بالحقيقة بالخارج اكو لقاح ضد الفالول يلقحون البنات بس الابتدائية علمود تنحمي طول عمرها البنت من الفالول
٦- زين شنو الشغلات اللي ممكن تنشره ؟
شغلة مهمة تنشره وهي حلاقة المنطقة بالموس او الشيرة ببدال مو فالولة اثنين راح تصير عشرات فلازم تزيلون الشعر من هذه المنطقة بمكينة كهربائية تخصصوها لهاي المنطقة فقط يعني مو نفسها اللي تزين بيها لحيتك لان راح ينتقل لوجهك
٧- شنو العلاج بلا زحمه ؟
لازم تعرفون هيجي مرض اله طريقتين بالعلاج فقط الطريقة الاولى :
هي انو الطبيب يوصفلك علاج خاص يحرق الفالولات شنو مساوئ هاي الطريقة ؟
المساوئ ممكن انو الشخص يخلي هواية علمود عود يطيب بسرعة وهو راح يحرگ المنطقة وبليه شي هي المنطقة حساسة ادورة بدال ما نعالج فالول راح نعالج فالول وحروق وانسلاخ الجلد وشغلة لخ ممكن تاخذ وقت طويل بالعلاج وممكن متستجيب في بعض الحالات للعلاج ولطالما هي موجودة تكون مصدر للعدوى والانتشار فمجرد لمس الفالول ولمس منطقة ثانية راح نعدي المنطقة الجديدة
٨- الطريقة الثانية بالعلاج وهي الكوي :
عادة المستشفيات وعيادات الممرضين وبعض الاطباء يستخدم جهاز لكوي هذا الفالول للتخلص منه وهذه الاجهزة طبعاً تاخذ وقت وممكن يصير نزف والمشكلة النزف راح يزيد الانتشار يعني تشيل منا ويطلعن منا وممكن تكون اجهزة جراحية قوية حارقة فتترك اثر بالجلد
٩- شنو افضل حل ؟
حالياً دنستخدم بالعيادة الليزر الاصفر او جهاز الايكو والنتائج رائعة جداً لانه بعد التخدير جهاز يكوي الثاليل وبنفس الوقت يمنع النزف يعني ازالة ثاليل زائد دم ماكو والاجراء يتم بدقائق وتخلص من المشكلة بدقائق بدون دوخة واقل عرضه لعودة الفالول..
بعض النساء من يطلع هذا الفالول تروح لطبيبة امراض نسائية فطبعاً الطبيبة راح ادخلها مستشفى وتخدير عام يعني راح تعرض نفسها لمخاطر التخدير وكذلك الجهاز اللي يستخدم بالعمليات هو مخصص للعمليات الجراحية فيكون حارق ويترك اثر قوي فالافضل




.
.
#الدكتور_ياسر_الشمري
دكتوراه أختصاص بالأمراض الجلدية والحساسية وتجميل الجلد
تدريسي في #كلية_طب #الجامعة_العراقية باز کردن / نظر دهید

2023-03-31 22:03:49 باز کردن / نظر دهید

2023-03-31 22:03:44 و ولدتي طفلك
و صرت انت و طفلك وحدكم
و غيرتي ملابسه و خليتيه بفراشه نايم و صافنه على ضحكته و هناك كلتي ويه نفسك ( هاي اني شسويت!!!!)
معقولة اني ادبرها!
معقولة اني صرت ام و راح اسوي المطلوب مني !
صدك راح ادبرها و ادبر الامومه !
هذا الصوت موجود برأس كل أم جديده
برأس كل أم حريصه و ناويه تتم المهمه
هذا الصوت اسمه الشعور بالذنب
و حتى تتجاوزيه هذه النقاط لك :
تاكدي انه انت ما تسوين اي شي خطا !
هذا يستدعي الكثير من المعرفه و الاهتمام
حاولت بكل جهدي و خلال ٣ سنوات اعرفكم بكل شي صح و انه تبعدين كل البعد عن إيذاء طفلك
لا تلومين نفسك لان غسلتي لطفلك مثلا و تمرض لان عمر المرض ما يجي من النظافه
و لا تلومين نفسك لان ما خفضتي الحراره
انت الافضل دامك تسعين للافضل بس سوي كلشي صح
و الا اكيد لومي نفسك لو صدكتي مثلا انه الثوم يعالج ابو صفار !!!
او مثلا لو انطيتي دبس لطفلك و هو بعده عمره ايام و سديتي معدته
او اعطيتي سكوه و صار عند طفلك عجز كلوي
او ظليتي مستمره على النستاكورت اكثر من 5 ايام
و غيرها من التصرفات اللي كتبت عنها بوستات طويله
دائما خلي خطه مضاده للشعور بالذنب
مثلا تنقهرين لان ترحين لدوامك
بالمقابل انت كرري ويه نفسك انه الدوام مثلا هو لأجل طفلك
و انه الشهاده اللي راح تاخذيها مثلا هي لزياده مستواك العلمي
و انه اي خطوه ممكن تشعرين بالذنب بعدها هي لأجلك اولا و لتحقيق هدف اخر
ابتعدي عن من يحسسك بالذنب
اكيد عرفتوا منو؟
من تبدي المعزوفه انه كله بسببك اطلعي من الغرفه و لا تناقشين ابدا
هذا يعادل اقوى رد في العالم
من تحسين بالحيره و انه هل هذا التصرف صح او خطأ فكري بالواجهه الاخرى من الموضوع !
يعني شون
يعني لو اني ما مسويه شنو كان صار ؟
لو اني ما اداوم شون ادبر المصاريف
لو اني ما اخذ الشهاده الفلانيه شراح يصير ؟
اخذي وقت مستقطع مع طفلك يوميا
اخذي راحه و اطلعي ويه طفلك
تنفسي بعمق
و اكلوا بمكان هاديء
و غيري جو
صعبه؟
مجرد ارتاحي و اخذي قيلوله راح تتغير حساباتك بعدها
تذكري دائما
كلنا عدنا تحديات
انت
و زوجك
و ترامب
و اللي دا يكتب هذه الأسطر
كلنا عدنا تحديات
و لازم نخطا في مكان ما
بس هنا لازم نفكر جيدا انه اذا ما مستعده للتحديات ماكو داعي نزيد التحدي تحدي
و اذا كانت امورك صعبه و طفلك صعب ماكو داعي نزيد الصعوبه و نجيب طفل رقم 2 او 3 او 4
نمشي بهدوء و نقرر جيدا و ما نزيد التحديات علينا و على أنفسنا
و شنو يعني اذا اخطئتي؟
لا تظلين تلومين نفسك
اي بالشهر مره او اثنين اطلبي دلفري
و اي صح العياط على الاطفال خطا بس احيانا تعيطين
انت مو من واجبك تتابعين الطفل ٢٤ ساعه باليوم فأنت مسؤوله بقدر والد الطفل عن مراقبه طفلك
هذا لن يدوم للأبد
احساسك بالضياع و الذنب لن يدوم
الاطفال يتغيرون
و طفلك سيتغير
خففي من تحميل نفسك كل هذا
فأنت بالاخير الام
د. سيف سمير البياتي اخصائي طب الاطفال باز کردن / نظر دهید

2023-03-31 22:01:42 ماكو شي اسمه كل ساعتين لازم الطفل يرضع
الطفل يرضع عند حاجته الا في حالات معينه محدوده
بصورة عامه الرضاعه تكون كالتالي
من عمر اليوم إلى عمر الاسبوعين
الطفل يرضع 8 الى 12 مرة باليوم يعني ممكن عادي ينام ٣ ساعات و حتى 4 ساعات
من عمر اسبوعين الى عمر 2 اشهر
يبدي يرضع من 6 الى 8 رضعات باليوم
يعني يبدي يقل و يصير من الطبيعي انه ينام 5 ساعات
من عمر 3 اشهر الى 5 اشهر
تقريبا 5 الى 6 رضعات
و يكعد المفروض مره الى مرتين ليلا
من عمر 6 الى 8 اشهر
يرضع 3 الى 5 مرات و ينام الليل بطوله
من عمر 8 اشهر و اكثر
3 إلى 4 رضعات
بعمر سنة :
يتحول الحليب الى كوب و مرتين فقط اما 2 حليب او 2 لبن او 1 حليب و 1 لبن او 1 لبن و 2 جبن مثلثات
المهم حصته من الحليب و مشتقاته مو اكثر من وجبتين الى 3 وجبات
طبعا التقليل تفاديا لفقر الدم
هذا الجدول يتبع الاثنين طبيعي و صناعي
و مثل ما نشوف كلما يكبر الطفل تقل الرضعات
لان حجم المعده يكبر
و حجم الكبد يكبر اللي هو العضو المسؤول عن خزن الطاقه حتى ما يصير هبوط سكر
و لان معدل النمو يتباطيء فكان يزيد بمعدل 30 غرام باليوم و قل الى 8 او 10 غرامات باليوم
موضوع كميه الرضاعه؟
سهله جدا
شكد ما يريد الطفل
ممكن عمره سنه و بعده يشرب فقط رقمين بس نموه حلو
و ممكن عمره ٤ اشهر و يشرب 8 ارقام
اتبعي احساس طفلك
عززي مفهوم الجوع و الشبع عند طفلك
التربية مو ترضعيه اكثر راح يكبر اكثر
التربيه هو الاهتمام بعقله و تعليمه حتى عقله يكبر
في الاخير عقله راح يقوده مو كرشه
د. سيف سمير البياتي اخصائي طب الاطفال باز کردن / نظر دهید