2023-02-24 17:42:40
ماذا تتوقعين بعد ولاده طفلك !
اشياء جديده ممكن كام جديده تتفاجئين منها و اذا ام قديمه راح تعرفين هذه الأشياء و تكونين حافظتها
نبدي باول شي
تغيير المكان صعب مو بس عليك بل على طفلك كذلك !
الكثير من الامهات عند ولادتهم اما يروحون لبيت اهلهم او يجون اهلهم يمهم
و بعد ما ترجعين لبيتك
طفلك راح يتغير
ما ينام
او يسهر
او ينمغص
هذا هو العادي
و جزء من تكوينه
لا تخافين فتره و يتعود
و اذا تكدرين ترجعين من وقت لبيتك او سكنك الخاص التعويد اسهل
راح تشتاقين لاهلك و لأي أحد كان يرعاك و يرعى طفلك من ترجعين
تشتاقين جدا لليد المساعده
و هذا ويه الظرف الحالي دا تصير اصعب و اصعب لان الكل عدها مشاغل
هذه الفتره راح تكون صعبه نوعا ما عليك
متوقع انه ما راح تكونين سعيده
مؤلمه؟
اي اكيد مؤلمه سواء ولدتي طبيعي او قيصري
الإمساك مثلا
و التهاب الجروح
و الم الثدي
ممكن و وارد
تحضري لذلك
الرضاعه الطبيعيه ممكن تكون مؤلمه
بغياب مدرب الرضاعه الطبيعيه و وعينا المعتمد على تجارب الامهات الكبار بالعمر
راح تكون الرضاعه الطبيعيه صعبه
من تشقق الحلمه
الى انسداد القنوات
الرضاعه الطبيعيه مو سهله بس راح تسهل خصوصا بقادم الايام
هل الموضوع يسوه كل التعب و الالم؟ طبعا يسوه
هذا حليبك
حليب الام
مو حليب بقري محور حتى يحاول يشبه حليب الام
حاولي و بعدين من تسهل تكولين الله سهله الامور في اغلب الاحيان
من الطبيعي ان تشعرين ببعض الكابه و الضيق
و تشوفين نفسك تبجين بلا سبب
هذا بسبب الهرمونات و التغييرات اللي مريتي بيها
اذا الموضوع شديد و بدت عندك وساوس راجعي طبيب نفسيه
راح تشعرين بالتعب و الكثير من التعب
بس تحسين انه عندك طاقه للمزيد
تعب المسؤوليه
و تعب القادم الجديد
و تعب الولاده
شريكك اذا كان متعاون سيمر معك بالضيق
لا تتفاجئين انه يصير متضايق او عصبي
ثقل المسؤوليه عليه ليس بقليل
اعرف انت تتعبين اضعاف
بس هذا لا يعني ابدا ان الرجل سوف يمر بحالات شده مثلك
شويه عيننا عليه و نراعي مشاعره
خلصنا هسه من التغييرات المتوقعة معك
خلينا نهتم باللي يصير ويه طفلك
اولا
ابو صفار
هذا نهتم بيه و نهتم جدا
خصوصا لو دمك سالب و طفلك موجب
او دمك O و دم طفلك A او B و موجود بوست عن الموضوع بالصفحه
و اذا صار ابو صفار بطفلك الغير مكتمل
يعني اقل من ٩ اشهر كامله
لا تتفاجئين ابدا من شكل طفلك و بالاخص اذا ولاده طبيعيه فالراس يكون هرمي الشكل و العيون منفوخه قليلا
مع الكثير من صوت الخنفره الانفيه
حاولي قدر الامكان تحافظين على الحبل السري ناشفا و ما يوصله الماء
الحياه باول ايام عباره عن تغيير حفاظات و الكثير من الحفاظات كلما يرضع يصير عنده خروج و هذا العادي و بالاربعين يتغير و يقل
خصوصا اذا كانت رضاعته طبيعي
كل أنواع الطفح الجلدي راح تشوفيها بطفلك اغلبها حميد و ما تحتاج علاج
و بعض افرازات العيون القليله هم ما تحتاج علاج
اذا كثيفه لا بد من مراجعه الطبيب
اي راح تشوفين طبيبك هوايه و بصراحه احسنلك مما تشوفين ام حسام جارتكم اللي كل افكارها خطا
الكثير من الامهات تراجع عندي اسبوعيا اول شهر او اثنين
و تسألني دكتور هو اني اجي هوايه لو شنو السالفه؟
جوابي يكون ابدا مو هيجي الموضوع انت تجين مثل اي ام طبيعيه لا اكثر و لا اقل من الطبيعي
المغص طبيعي و اعتيادي بس تجنبي كثر الرضاعه و حضري البروبايوتك من اول يوم
كلش فرق لاحظت اما ان المغص اخف او ما يحدث
صح في بعض الحالات ما اختلف شي
بس المناعه اللي يوفرها تسوه
اذا حصل المغص حضري قطره سيمثكون عند الحاجه او قطره كوليف خصوصا انه كوليف تزيد الوزن و تقلل المغص
بالاخير و مع كل الحب لأول اسبوع من العمر
راح يمر و راح تسهل الامور شيئا فشيئا
خليك انت واثقه من شغله وحده ( طفلك مو هو اللي اختارك فخليك خياره الحلو)
و رضعيه طبيعي
د. سيف سمير البياتي اخصائي طب الاطفال
1.4K views14:42
إ
