إستشارة طبية

2023-01-06 12:51:14 باز کردن / نظر دهید

2023-01-06 12:50:48 بوست طويل عن الاشياء الطبيعيه بالجهاز الهضمي باول سنه !
اول سنه هي مرحله انتقاليه للنضوج لذلك بيها بعض الاعراض اللي تكون طبيعيه تماما
خلي نبلش بيها تباعا :
مغص ٣ اشهر
٢ من كل ٥ اطفال يصير عدهم مغص ٣ اشهر
و بيها الطفل يبجي لمده ٣ ساعات متواصله يوميا و بالاخص بعد الشهر الاول و يستمر لغايه ٣ الى ٥ اشهر
نظيف و مرتب و شبعان بس يبجي
هذا جزء من التطور الطبيعي للطفل و اكو الكثير من العلاجات اللي ممكن تخفف عن الطفل مثل السيمثكون و الكوليف و البروبايوتك بس بالاخير المغص يروح وحده بعمر ٣ الى ٥ اشهر
الجديد بالموضوع انه ممكن الوقايه من المغص باستخدام البروبايوتك من اول يوم مثل قطرات الاوبتيباك المثبته فعاليتها بأحد الدراسات
الارتجاع
هو حاله عوده محتويات المعدة الى المريء و بيها الطفل يرتجع الحليب بقوه
بس من تشوف الوزن جدا طبيعي و الطفل طبيعي و وزنه دا يصعد طبيعي
و هذا يطيب بعمر ٦ الى ٩ اشهر
و ممكن يستمر الى عمر سنتين
و هو هم كذلك طبيعي
و هم يكولك انه الارتجاع يقل اذا استخدمت بكتريا نافعه من اول يوم
الامساك الوظيفي
الاطفال ممكن كل ٣ ايام يلا يصير عدهم خروج
و ممكن كل يوم
و ممكن يوميا مرتين
لذلك فان تعريف الامساك هو ان الطفل خروجه يكون اقل من مرتين اسبوعيا!!
اما اطفال الرضاعه الطبيعيه فممكن يصير عنده خروج كل اسبوع مره طبيعيا
و الامساك ملازم للحليب الصناعي
دام اكو حليب اكو امساك
فلما الطفل يبدي ياكل و ينفطم من الحليب يطيب من الامساك
استخدام البروبايوتك يقلل من كثافه الخروج شويه
الاسهال الوظيفي و هذا يسموه
Toddler diarrhea
و يصير عند الاطفال من عمر ٦ اشهر الى ٤ سنوات
و يكون الاسهال مزمن بس الطفل نموه جيد و ما عنده طفح حفاظ
و من تاخذ معلومات من الاهل يكون من ضمن اكل الطفل سكريات او برتقال او عصير و الحل نقلل العصير و الحلويات و تمشي امور الطفل
الحازوقه
و لا تعني اي شيء مرضي و الامور سوف تسير على ما يرام
احمرار الوجه و التشنج و كانما الطفل عنده امساك مع كل خروج و يكون الخروج طبيعي القوام !
و السبب ان الطفل لا يعرف ان يرخي العضلات السفليه و يقلص عضلات البطن !
لذلك هذا شيء طبيعي و لا يحتاج لأي شيء
هذه الحاله اسمها الحزق
و تقل جدا باستخدام البروبايوتك
اهم شي بهذا البوست شون اعرف انه طفلي عنده مرض و لازم اراجع طبيب باسرع وقت
هذا نحفظه و نطلع بالبوست بيه
1- فقدان الوزن.. او تأثير سلبي علي النمو و البلوغ
2- حرارة
3- طفح جلدي
4- صعوبة او الم في البلع
5- قيء شديد مستمر
6- قيء او براز يحتوي على دم
7- قيء اصفر
8- اسهال مزمن اكثر من اسبوعين غير مفسر
9- الم في البطن بعيد عن السرة للاطفال الاكبر و يعرفون يعبرون عن المهم
10- الم شديد في البطن يصحي الطفل من النوم او يتعارض مع فعاليته او لعبه


د. سيف سمير البياتي اخصائي طب الاطفال
شلون تكي؟ باز کردن / نظر دهید

2023-01-05 18:03:51 دليلك الشامل للرضاعه الصناعيه !
الرضاعه الصناعيه تحتاج إلى أسس و قواعد حتى تتم بصوره صحيحه دون ما يتاذى طفلك
نبدا بالتدريج :
اختيار الحليب الصناعي :
اختار اللي يناسب جيبك و اختار الحليب اللي بيه عروض مجانيه او علبه زائد علبه
على الرغم من الترويج المبالغ بيه لأنواع الحليب الصناعي الا ان و لا واحد منهن يشبه الحليب الطبيعي فلا تدوخ نفسك و تشغل جيبك
زين شلون اعرف الحليب يناسبه ؟
تعجبني هذه الجمله من اخصائي رضاعه طبيعيه مصري بأحد محاضراته كال ( كل أنواع الحليب تناسب طفلك بأغلب الاحيان الا الحالات المرضيه بس يبقى طفلك مو كل حليب يناسبه )
لذلك مالك غير تجرب النوعيه و تختار
كيفيه تحضير الحليب !
اقري العلبه
اقري العلبه
شوفي الكيله
الكيله كبيره لو صغيره
الكيله الكبيره مثل السيميلاك و ال S26 تكفي رقمين حليب
الكيله الصغيره مثل كيكوز و نوفلاك و بريملاك و بيبلاك و ايفولاك و غيرها تكفي رقم واحد حليب
هل ضروري افور المميه قبل الرضاعه ؟
اي ضروري
#لا_تعتبرين_نفسك_معقمه_اذا_ما_تفورين_المميه
عداها اهلا بالاسهال
اذا امكانياتك زينه اشتري معقمه
عداها التفوير ١٠ دقايق تحمي طفلك من الالتهابات المعويه
الحليب اول او المي اول؟
المي اول و بعدها نضيف الحليب
ع طاري المي ضروري افور المي قبل الرضاعه؟
اي ضروري
ضروري اشتري مي خاص مال اطفال ؟
لا مجرد مصرف زايد
أكدر افور المي المعقم او المي المخصص للاطفال؟
اي نعم
لعد اي مي هو صالح للمميه؟
نفس المي اللي تشربه حضرتك شرط تفويره
كيف نذيب الحليب ؟
اهم شي نذيب الحليب بالدوران مو بالرج حتى لا يصير بالحليب غازات
كل شكد الطفل يرضع ؟
ماكو رقم معين بس اذا طفلك طبيعي فان طفلك يرضع من ٨ إلى ١٢ مره بأول اسبوعين
بعدها يقل إلى ٦ إلى ٨ مرات بعد الاسبوعين
ضروري اكعد الطفل للرضاعه؟
ابدا فقط اول اسبوعين اذا مرت ٤ ساعات يلا تكعديه
ما هي أفضل نوعيه مميه ؟
توجد مميات بنوعيات جيده و نوعيات خاصه للمغص و أخرى للارتجاع و أخرى للاطفال اللي يرضعون طبيعي حتى لا يصير اختلاط للحلمه
المهم ما عدنا هذا التنوع بالاختيار
كل اللي اطلبه منكم انه تشترون المميه بقياسات مضبوطه و الابتعاد عن المميات المغشوشه اللي قياساتها خطأ و مع الأسف هي منتشره بشكل كبير
المميه زجاج لو نايلون افضل؟
ما يفرق دام النايلون مكتوب عليها BPA free
كل شكد ابدل المميه ؟
من تنكسر او من تنحذف الارقام
حجم حلمات الببرونات؟
توجد ٣ أحجام للحلمه مال مميه
تبدي من اقلها و اضعفها للاعمار من 0 إلى 3 اشهر
إلى متوسطه للاعمار من ٣ إلى ٩ اشهر
و اخيرا أكبر حجم للاعمار أكبر من ٩ اشهر إلى سنه
و بعد السنه؟
مع السلامه مميه
الحليب يعطى بالكوب و فقط كوبان باليوم
حجم المميه ؟
اول ٤ إلى ٦ اشهر تكفي الطفل المميه ام ٤ ارقام
بعدها ممكن تغير إلى حجم أكبر اذا طفلك يحب
أكدر اخزن الحليب بالثلاثه؟
نعم اي أكدر و تبقى لمده ٢٤ ساعه عادي
ضروري احمي المميه من اطلعها من الثلاجه؟
لا مو ضروري اذا طفلك يحبها
كيف اعطي طفلي الرضعه ؟
اولا ارفعي راس طفلك
ممكن ان تجلسيه بحضنك بعد ما تكونين كاعده بكرسي مريح و ترفعين راسه
ممكن تخلين راسه على ذراعك
ممكن تكعديه على صدرك
او على ركبك و انت متمدده
تأكدي كلما ترفعين راس طفلك اكثر
كلما الغازات اقل
اي ارفعي طفلك
و بالأخص اذا طفلك عنده ارتجاع
و بعد ما قررت ارفع راس الطفل كيف انطيه الرضعه ؟
أقلب المميه و امليها بحيث ما يشفط اي كميه هواء و تكدر تميلها بحيث تكون الحلمه دائما ممتلئه
أكدر اخلي المميه على وساده و هو الطفل يرضعها؟
اذا اهلا بالتهاب الاذن الوسطى
أكدر اخلي الطفل يرضع مميه و هو بفراشه و راسه ما مرفوع ؟
اذا اهلا بالتهاب الاذن الوسطى
رفع راس الطفل ابدا مو رفاهيه
معدات تساعد الرضاعه ؟
مخده الارضاع اختيار جميل و لطيف
أكدر اخلي بعض القطرات مع الحليب ؟
بعض انواع السيمثكون ممكن اضافتها للحليب و مكتوب هالشي بالنشره المرفقه
قطره كوليف ما تشتغل اذا ما تضيفها للحليب لذلك واجب اضافتها
قطره فيتامين دي كذلك ممكن اضافتها للحليب
قطره البروبايوتك مثل اوبتيباك ممكن اضافتها للحليب
كافيسكون الاكياس ممكن اضافته للحليب
أحيانا نضيف سيريلاك رز او شوفان للحليب في حالات الارتجاع


د. سيف سمير البياتي اخصائي طب الاطفال
#دليلك_الشامل باز کردن / نظر دهید

2023-01-03 22:51:18 شلون تسهل عمليه الخروج للاطفال اقل من عمر سنه ؟
السنه الأولى مليئه بالتغييرات و بالاخص الاشهر الأولى
فمن خروج اسود اللون يسمى العق إلى خروج اصفر او اخضر حسب نوعيه الرضاعه و حسب متغيرات أخرى
و من خروج متكرر اول ايام يوصل إلى ٨ مرات باليوم إلى خروج كل يومين او ٣ ايام
تعالوا نتناقش بعلميه ببوست طويل عن هذا الموضوع !
كم يوم يمكن أن يمر للطفل الرضيع بدون خروج ؟
بأول ايام من العادي ان يصير عند الطفل خروج ويه كل رضعه بالاخص اذا الرضاعه طبيعي و حتى بعض انواع الحليب الصناعي و بعدها يبدي يتأخر لنصل إلى التأخر لايام معدوده
لذلك من الطبيعي ان الطفل اللي يرضع طبيعي يصير عنده خروج كل أسبوع مره
اما الطفل اللي يرضع صناعي فننتظره لغايه ٥ ايام
هو شنو تعريف الامساك ؟
الامساك مو عدد ايام مثل ما لاحظنا بالاطفال
الامساك هو قوام الخروج و صعوبته ( نخلي علامه على صعوبته لان بعدين نشرحه )
الامساك من يكون الطفل متوتر و رافض الرضاعه و بطنه منتفخه !
شنو اللي يسبب الامساك عند الاطفال ؟
اولا الحليب البقري هو السبب رقم واحد لذلك يقل بالحليب الطبيعي و أحيانا الأم اللي ترضع طبيعي من تشرب حليب بقري يصير عند الطفل امساك
المرض مثلا يقلل الرضاعه فيقل الحليب الواصل للامعاء فيصير امساك
هل يشكل المرض دلاله لحاله مرضيه معينه !
نادرا ما يشكل الموضوع دلاله لحاله مرضيه
بس واحد يخليها بباله مثل خمول الغده الدرقيه
او ضيق فتحه الشرج
زين ليش يعصر و الخروج طبيعي القوام و حتى لين او سائل ؟
ببساطه لان ما يعرف
الخروج عمليه معقده تحتاج لتوازن بين عمليه ابساط عضلات الشرج و الضغط على عضلات البطن
لذلك تشوفه يصفر و يخضر و يحمر و بالاخير الخروج سائل جدا !
ببساطه ما يعرف
كيف اساعد الطفل على الخروج ؟
اذا لاحظت ان الخروج تأخر بعد ٥ ايام للاطفال اللي يرضعون صناعي و اسبوع للاطفال اللي يرضعون طبيعي
ممكن الاستفاده من استخدام عيدان تنظيف الاذن لتحفيز المقعد
و طبعا من بعد تغميس هذه العيدان بماده مرطبه مثل الفازلين او زيت الزيتون او زيت جوز الهند
الطريقه الثانيه هي باستخدام المحرار بنفس الطريقه أعلاه
نذكر ان الاستمرار على الطريقه أعلاه سيء جدا و راح يخلي الخروج ما يخرج الا بهذه الطريقه لذلك نستخدم هذه الطريقه اقل عدد مرات
الطريقه الثالثه اذا تخافين من التحفيز المقعدي مجرد وضع قطعه قماش دافئه على المقعد تحفز الخروج
الطريقه الرابعه هو مساعده الطفل على الخروج بأن تضعه بوضعيه القرفصاء و تسحب فخذه للأعلى
حمام دافي للطفل راح يساعد الطفل على الخروج بالاخص اذا سويت مساج وياه
جرب تحاميل الكلسرين و هي ماده طبيه امينه جدا و تحفز الخروج و هم ما نستخدمها كثيرا لان يصير الخروج ما يخرج بدونها
الطرق اللي ذكرت فوق هي لتسهيل الخروج
طيب شلون اخلي العمليه من ذاتها اسهل ؟
طرق تخلي الخروج اسهل؟
اذا ترضعين طبيعي اكلي حلو مثل البرتقال و الخوخ و قللي من الحليب و مشتقاته بطعامك
اذا ترضعين صناعي و صار امساك غيري النوعيه مال حليب
مساج البطن مهم و يسهل العمليه
حركه البايسكل تسهل الخروج
كثري الماء اذا انت ترضعين طبيعي و اذا طفلك بدا ياكل و صار عنده امساك كثري الطعام
حمام دافيء مهم
قطرات البروبايوتك تسهل حركه الامعاء و تقلل الحزق
قطرات كوليف صح هي للمغص بس تخفف البطن شويه
اخر سؤال هو طبيعي الطفل يعصر؟
اي طبعا طبيعي لان ما يعرف يوازن بين عضلات البطن و عضلات المقعد


د. سيف سمير البياتي اخصائي طب الاطفال باز کردن / نظر دهید

2023-01-03 22:50:41 قصه الشعر الأولى !
اول قصه شعر للطفل رغم هي تجربه عاطفيه جميله و بيها فرحه بالأخص اذا كان اللي ينقص شعره ولد و يصير شكله ولد صغير بس نتعلم كم شغله حلوه بيها حتى لا يكره الحلاق و الحلاقه فيما بعد و تكون مقدمه لتعامل سهل مع الآخرين
نبدي بأول نقطه؟
شوكت نقص الشعر لأول مره؟
ماكو عمر معين
قسم من الاطفال يولدون بلا شعر و قسم اخر بشعر كثيف
بس بصوره عامه اول قصه شعر تكون بعمر ٦ أشهر إلى سنتين
شوكت اكول انه هاهيه الطفل مستحق يقص شعره؟
اول شي اذا كان الشعر يؤذي عينه او يحجب نظره
او اكو صعوبه بتصفيف الشعر
او من يكون الشعر غير متساوي النمو فجهه طويله و أخرى قصيره
و اخيرا من يكون الشعر مجعد و كثيف و يكون من الصعوبه تمشيطه و تسريحه او ترتيبه
كيفيه التحضير ؟
اولا سوي تمثيليه بالبيت عن كيفيه قص الشعر و كيف راح يسوي الحلاق و اشتري مقص وهمي او بلاستيكي
ثانيا لا تأخذ طفلك للحلاق و هو جوعان او نعسان او متوتر
ثالثا روح للحلاق و عنده زبائن و ياريت لو عنده زبون طفل حتى يشوف بنفسه انه الحلاقه شي اعتيادي و لطيف
رابعا اخذ وياك كل الملهيات الضروريه مثل ملهيه او لعابه او كتاب قصصي
أثناء الحلاقه خليك مرتاح و غير متوتر و شجع طفلك عفيه بالبطل عفيه بالسبع
لا تكون كلش عاطفي و تتاثر
مجرد كلمات تشجيعيه بسيطه و بس
اذا بدا ينزعج الهيه بلعبه مثل وجه ضاحك او نكته صغيره
اخيرا
و بعد انتهاء الحلاقه خليها دائما روتين كل فتره بموعد محدد
و كول لطفلك وره ما يخلص شكد حلو صار و شكد تغير شكله للأفضل
و اذا ما عجبت قصه الشعر احد اخر لا يكول للطفل انه شعره ما حلو او تسريحته ما حلوه
اهم شي اول قصه شعر من تصير سهله راح تسهل باقي الزيارات للحلاق


د. سيف سمير البياتي اخصائي طب الاطفال باز کردن / نظر دهید

2022-12-30 22:11:05 ١٨ شغله لا تسويها و لا تنطيها لطفلك باول سنه
١. لا تضيفين سكر للاكل
٢. لا تضيفين ملح للاكل
٣. لا تنطين عسل للطفل
٤. لا تنطين حليب رقم ٣ او حليب كامل الدسم للطفل
٥. لا ترضعين طفلك و هو نايم بل ارفعيه ٣٠ الى ٤٥ درجه
٦. لا تنطين لطفلك عصير باي شكل سواء طبيعي او صناعي
٧. لا تنطين شاي او قهوه او بيبسي او اي شي بيه كافيين للطفل
٨. لا تنطين لطفلك اي شي ناعم ممكن يؤدي الى الاختناق و هذا يشمل الكاندي الشاميه المصقول الحامض حلو الكرزات الصوصج العلكه العنب غير مقسم و اي شي ممكن يسبب اختناق
٩. لا تحمين المميه بالمايكرويف ابدا
١٠. لا تطعمين طفلك بالسياره
١١. لا تعرضيه ابدا للجكاير و لا تقبلين المدخن يشيله
١٢. لا تستخدمين المعطرات القويه و العطور القويه و مواد التنظيف ذات الرائحه القويه فقط استخدمي اللطيف و الخالي من العطر
١٣. لا تكثفين الاغطيه فوق طفلك
١٤. ابدا لا تخليه يلعب باشياء صغيره ممكن تعرضه للاختناق
١٥. لا تستخدمين الماء الساخن من السخان لتحضير المميه
١٦. لا تنطين مميه بدون غلي ابدا و انما كل رضعه لازم المميه مغلية
١٧. لا تستخدمين النستاكورت و الدرمودين و البتنوسام و الهايدروكورتزون و الكوادريديرم و غيرها مع كل تغيير حفاظ لكثره مخاطرها و انما فقط استخدمي الزنك او المراهم اللي بيها زنك للوقايه فقط
١٨. لا تخلين بودره قريب مجرى التنفس للطفل او رقبته او اي مكان
البودره فقط للحفاظه
كم وحده انت ملتزمه بيها ؟


د. سيف سمير البياتي
اخصائي طب الأطفال باز کردن / نظر دهید

2022-12-29 15:52:45 انا طفل صغير عمري شهر
اريد اشتيكلكم من فد شي و احجي الكم شويه
و يا ريت تسمعوني
انا جيت بعد ٩ اشهر من الحمل و ما احجيلكم ع الراحه اللي كنت بيها
متمدد و كاعد و كلشي ما اسوي
حتى ما اكل و لا اشرب
الاكل يجيني عن طريق الحبل السري
و الفضلات هم تروح عن طريقة
لحد ما نزلت و جيت ع الدنيا و راسا كطعوا الحبل السري
شويه بجيت
وبديت اخذ نفس وحدي و اعتمد على نفسي شويه
حسيت باحساس غريب
بس اوكي ماشيه الامور
بديت اخذ رضاعة كل شويه و ماشيه الامور
الى ان رحت للبيت
لفوني بوصله فوكاها وصله فوكاها بطانية و دخلوني غرفة حارة عينن فرن صمون
و بديت ابجي من الحر
ابجي
ابجي
امي كامت تنطيني رضاعه اكثر
و اني اصلا معدتي صغيرة
و بطني تنفخ اكثر و ابجي
و امي ترضعني اكثر
و اني ابجي اكثر
كمت اسمعهم يكولون اهووو شو مزعج هذا
امي اني مو مزعج اني حران او ممتلي من الغازات و كثر الرضاعه بس ما اعرف احجي
انت دا تزيدين الامور
المهم اكملكم
ثاني يوم جتي حبوبتي فكست عيوني بالكحل
زين حجيه الكحل ليش ؟
الكحل بيه رصاص
الكحل كله وصخ و عيوني التهبت
و هم تاذيت و بجيت
و هم كالوا اهووو بس يبجي
تره صوجكم انتوا مو صوجي
اليوم الثالث يا عيوني صار بيه ابو صفار
ودوني طبيب فحصني
كال عادي بس رضاعه ما يحتاج شي
و هم رجعنا للبيت
الحبوبه ام الكحله هم جابت ٧ فصوص ثوم خلتها عليه
ما احجيلكم ع الريحه لعبت نفسي
و نفس امي و ابويه و عشيرتي
بس ما بيهم يحجون لان حبوبتي تزعل
و هم اني شسويت ظليت ابجي
ابويه الله يهديه جاب شمعه نيون حتى يروح ابو صفار
و خرب الساعه البايلوجيه مالتي
لا اعرف انام لا ليل و لا نهار
و ما اعرف ياهو الليل و ياهو النهار
وراها عادي نزل ابو صفار وحده
و لا الثوم و لا الشمعه نزلوا ابو صفار و لا الهم اي دخل بالسالفه يعني
هنا لازم اوصل رسالة لامي
تره سهل موضوع انه ما ابجي
مجرد انطيني الرضاعه لما اجوع
و اعرفي شوكت اجوع
مو كلما ابجي تنطيني رضعه
ما يجوز اني حران متضايق او مجرد اريدك بقربي
و كلش احب تمشين بيه و تعرضيني لجو لطيف معتدل
لليوم السابع و ما وكعت سرتي
شسسواا
عذبوني حرفيا
باريستول و اموكسيل خلوها على السرة و كل انواع الخرافات طبقوها
لحظه بس افهمكم
السره عادي ما توكع لغايه ٤٥ يوم
و ما تحتاج بس تنترك بدون ما يوصلها ماء و خارج الحفاظه و الافضل معرضه للهواء و هي توكع
خرافات الباريستول و الاموكسيل احتفظوا بيها لنفسكم
المهم بالاسبوعين وكعت السرة
برزت السره شويه
وصار فتق سرة عادي
يصير عند ٤٠% من الاطفال
شجابوا؟
اي جابوا حزام ضيق
دمرني
لا خلاني ارضع
و لا خلاني اتحرك
و هم بجيت
و هم كالوا ليش تبجي !!!
يا يابه ابجي من الفرح غير من ظيمكم
المهم
ودوني طبيب الطبيب كال يابه لا تلبسوه حزام هو وحده يروح عادي اتركوه
المهم دا اكبر و انمو على حليب امي و بجيت مره او ٢
راسا ام امي حتى تغث ابويه كالت ليش ما تنطوه حليب مساعد حتى من تطلعون او تطبون يتعلم يرضع
على اساس مكطعيها للطلعات
مو هن ٣ او ٤ مولات حتى حفظتهن و اني ببطن امي
و بما انه اني افضل الرضاعه الطبيعيه لان اسهل و تقربني من امي
حليب البقرة شجابه بالنص و ليش
المهم ابويه جاب حليب غالي و انزرف جيبه
بس عادي اني ما حبيت الحليب و ظليت اتقيا
و غيروا النوعيه و نفس الشي سويت
و ودوني لطبيب
كاللهم و عليش خليه على حليب امه و انتهى الموضوع
حليب البقرة شنو بيه
اكيد عرفتوه لهذا الطبيب
و بس
هذه معاناتي ببساطه
اتمنى توصلوها لكل الامهات
د. سيف سمير البياتي
اخصائي طب الاطفال باز کردن / نظر دهید

2022-12-28 17:11:24 و لا أروع و لا احلى من طلعتك من المستشفى بالسلامه و انت ماخذه طفلك بحضنك !
من حقك تكونين سعيده و مرتاحه و فخوره باللي صار
و بعد التسعه شهور !
بس كيف تمر اول ليله مع طفلك ؟
اذا سألتيني عن شنو اسوي ويه وصولي للبيت من المستشفى اني و طفلي فاكولك اضحكي و افرحي
اعرف كميه الالم و العمليه و ألم الطبيعي
بس المنجز
منجز ٩ شهور !
شنو اتوقع بأول ليله؟
ماكو نسق متوقع
قسم منهم يبجون هوايه
و قسم منهم هادئين
و هم بصراحه بأول ايام شعدهم غير : يرضعون ينامون ي لذلك خليني اشرحلك الاشياء الطبيعيه بأول ايام:
من الطبيعي ان ينام الطفل كثيرا اول ايام
و اذا طفلك مريح ممكن يبقى لاسابيع مريح
اي حديث الولاده ممكن ينام ٢٣ ساعه
يكعد شويه يرضع و ينام
ممكن تقلقين انه ينامون هوايه
بس اكولك لا تكعديه الا اذا مرت ٤ ساعات بلا رضاعه اول اسبوعين
بس احيانا الطفل الغير مكتمل النمو يحتاج يكعد و ترضعيه جبرا
بس بصوره عامه انصحك ب :
عززي مفهوم الرضاعه عند الحاجه
اختلاط الليل و النهار طبيعي جدا و جدا
و انت يا عيني يا قلبي يا روحي
فاتحه الشمعه بنص الليل و ترديه يعرف الليل و النهار شلون ؟
ها فاتحه الشمعه علمود ابو الصفار
الشمعه اللي ما بيها الطول الموجي اللي يكسر ابو صفار
يعني الشمعه مجرد ضوه لا تكسر و لا تسوي شي لابو صفار
طفلك أحيانا يرضع كل نصف ساعه و أحيانا ينام ٥ ساعات
هذا طبيعي جدا
اي راح يكولولك كعدي الطفل كل ساعتين
لا تسمعين كلامهم لان ما يكعدن لجهالهن
الا اذا الطبيب كالك كذلك
و اكولك : عززي مفهوم الرضاعه عند الحاجه
تردين يدر الحليب ؟
هوايه رضعي طبيعي
كل شوبه لما يستقر الانتاج
الرضاعه الطبيعيه مو سهله و تحتاج خبره و جهد فاقري عنها شكد ما تكدرين قبل الولاده
مو تنسين التربيت على الظهر بمنتصف الرضعه و بنهايتها و قبل وضعه بالسرير
اي حديث الولاده يسوي هوايه لذلك اي ويه كل رضعه يصير الخروج لذلك كل اللي عليك تغيريله هوايه
شكد ينام الطفل حديث الولاده بأول ليله ؟
كومه يكعد كل ٣ إلى ٤ ساعات و يرضع ع كيفه و ينام
هو عادي انه تشعر الام بالتوتر بأول ليله ؟
شكد ما اني ساعدتك كل هاي السنين و انطيتك كومه معلومات عن الطفل الا انه عادي انك تحسين متوتره
ضروري اكمط الطفل بأول يوم؟
اني كلش اشجع الكماط بالأخص اول ايام و بالأخص ايام البرد بس نذكر الكماط ماله علاقه بالواير اللي ينلف حول الطفل مجرد قطعه قماش تنلف حول الطفل مو اكثر و مالها داعي بعد الشهرين من العمر
وين ينام الطفل ؟
اول ٦ اشهر ينام بنفس غرفتك و الأفضل اول سنه وراها ممكن نقله لغرفه منفصله
يحتاج اراقبه و اسهر و ما انام ؟
اذا طبقتي شروط النوم الأمن لطفلك كلشي ما ينراد نامي و ارتاحي



د. سيف سمير البياتي اخصائي طب الاطفال باز کردن / نظر دهید

2022-12-27 01:17:31 من يجي الطفل يشكي من موقف معين لاتنطي اكل
ولا تكليه يلا هاك نستله

السبب؟

عده اسباب
1.تعليم الطفل على التعبير عن المشاعر ضروري جدا
اغلب البالغين يبجي ويتكاب ويعتزل العالم وهو مايعرف سبب الحزن مالته
مايعرف هو شنو الي مضوجه بالضبط ولا يعرف شديحس؟
هل هو حزين
وحيد
يشعر بالغضب ... الخ من المسميات

فالبدا بتدريب الطفل على فهم مشاعره مهم جدا حتى يكون شخص مستقر نفسيا يعرف شبي واكيد بمرور الايام حيغرف شلون يساعد نفسه وينطي لشعوره ألاحترام ويعيشه بتقبل دون نكران

2.مشاكل الاكل العاطفي تبدا من هاي النقطه (ضايج... خلي اكل )
(عصبي....خلي اكل)
(حزين... خلي اكل )
لازم نعرف الاكل ماله اي علاقه بالمشاعر
الاكل هو لسد حاجه الجوع
(جوعان....خلي اكل )

3.الانصات الى الطفل مهم بدل من اسكات الفم بالطعام
اعرف البكاء والنحيب صوت مزعج بالامكان اخبار الطفل (مدا افتهم شدتحجي نحاول نهدا... نفس ..نفس... علكيف) اي احجيلي شصار؟

4.تدريب الطفل على التعبير (التعبير مهاره لاتولد مع الطفل بشكل متطور)
الطفل يولد مع تعبير بالبكاء فقط
كلما نخلي يعبر افضل بالكلام كلما تتطور عنده قدره التعبير

واخيرا
نذكر ونكول

من الطفل يجي يشكي
لاتكله يلا هاك نستله
لو تريد جبس احسن؟؟
ا

د.اسماء باز کردن / نظر دهید

2022-12-25 23:44:56 الفطريات
و منو ما سامع بالفطريات
و منو ما صايره بطفله منها
الفطريات تشخيصها جدا سهل
هو انه تشوف غطا ابيض فوك اللسان
و بالجزء الداخلي من الخد
و حتى على اللثه
تكدر تميزها ببساطه عن الحليب انه الحليب بساع ينشال و يتوخر بس الفطريات تبقى
شنو الأسباب؟
١. تصير بالاطفال لان مناعتهم مو كلش قويه و شويه شويه تقوى
فتشوف انه تصير عدهم فطريات أكثر من الكبار
٢. تصير عند اللي ياخذون علاج مضاد التهابات ( دواء التهابات ) لان هذا المضاد راح يكتل البكتريا الضارة و النافعه و يخلي الفطريات تقوى أكثر و أكثر
٣. الأطفال الغير مكتملي النمو يصير عدهم فطريات أكثر من غيرهم لان مناعتهم اقل
٤. الأطفال المصابين بالسكر و اللي اكلهم مو منتظم و اللي اغلب اكلهم سكريات

شنو الأعراض؟
يعني عدا اللسان الأبيض شنو ممكن تكون الأعراض؟
اغلبهم بدون أعراض يعني مجرد لسان ابيض
و هذه ما تحتاج علاج
او ممكن تسوي أعراض مثل رفض الرضاعه او من الطفل يكره الرضاعه و يشوف صعوبه بالرضاعه فهذه هي الأعراض اللي ممكن تحتاج علاج
بس نادرا ما تسوي اسهال و هذه الفطريات اللي تشوفوها بالتحليل مال الخروج هي فطريات متعايشه ويانا
يعني مو هي سبب الاسهال
.
.
آخر فقره شنو العلاج؟
ببساطه النستاتين القطرات و اللي دائما تنطي بالجرعه الخطا
الجرعه الصحيحه هي
١٠٠ الف وحده ٤ مرات باليوم
و اللي تعادل سيسي كامل ٤ مرات باليوم
يعني القطاره كامله تنملي و تتوزع على الفم ٤ مرات باليوم
ممكن حتى أكثر بصراحه من قريتها بدساتير الادويه المختلفه
في حين مع الأسف اغلب الأمهات تنطي ٣ إلى ٤ قطرات بالزايد ٥ قطرات ٣ مرات باليوم
في حين هي تقريبا ٢٠ إلى ٣٠ قطره ٤ مرات باليوم
هذه الجرعه للي اقل من سنه
فوك السنه هي ضعف الجرعه الفوك او اضعاف الجرعه الفوك
إلى متى نبقى عليها؟
تستمرين عليها لمده يومين بعد زوال الأعراض ببساطه
يعني اذا رأسا طاب استمري بعد يومين
و اذا طاب بعد ٥ ايام
استمري بعد يومين فيصير ٧ ايام
اذا ما فاد دكتور ؟
مراجعه طبيب طبعا
.
.
الوقايه بسيطه جدا
النظافه النظافه النظافه
و الرضاعه الطبيعيه اللي تقلل نسبه الاصابه بفطريات الفم
و تعقيم المميات بالطريقه الصحيحه
و تجنب المضادات الحيوية
و الاكثار من تناول اللبن لان بيه بكتريا نافعه تساعد على مهاجمه الفطريات للاطفال فوك ٦ اشهر
ملخص الموضوع هو انه الفطريات مرض بسيط جدا و علاجه سهل او ما يحتاج علاج في اغلب الاحيان الا يسوي أعراض مثل قله الرضاعه
د. سيف سمير البياتي
اخصائي طب الأطفال باز کردن / نظر دهید